Read Aghem 1 Kòlentìan 5 Bible Online

1 Kòlentìan 5 - Aghem bible

1 Kòlentìan 5

¹ Ghe kûu dzɛ̀ enyəa ghî à nûuŋ kàŋlo èghue am bvʉa zɛʼɛ̄, an dziī zəla ghî ghəla ghe doʼkè boō fughu â Zə̀ kò bùʼù yo aleghəŋlo. A zuw enyəa ghùw u lì lò am bvʉa zɛʼɛ̄ ù bùʼù nyəə̄ŋ ghɛ̀ wì ù tsele.

²Ghɛ̀ sô yia ghaŋso sùghò èghue a? Ghɛ̀ mô ki alelaam diī nû, lò sugho alo ese. Ghɛ̀ ki aledzùu sə ghùw wəlà ù fòʼ ghəa zən zo am bvʉa zɛʼɛ̄.

³Nu aŋghəa ghuūghùe waŋā u bûʼ buw ko a fì a vʉ̀a ghɛ̀, fəŋ zaŋa lo sɛ̀. Ghəa e bûʼ lo ko tò Ǹ lo fì êzə̀ sɛ̀, mùghò m mbɛ an tuw kə ghûw wəla ù fôʼ ŋgòʼ e eghəa tò zən bɛ an zən e Mughùbè ù sɛ̀ Yɛso

⁴Abugho ghɛ̀ bughò dzeŋe tsughu, fə̀ŋ zaŋa n lo sɛ̀, an daʼa kə Mughùbè ù sɛ̀ Yɛso

⁵Ghɛ̀ ki alezèe fughuu ndûw ghùw wən â Satàn tò ù wiī maʼà tsughu gwən e ughùe e wə̄n, to fə̀ŋ è wə̄n e ke lo alezə kətuw an tsuʼ wəla Mughùbè Yɛso lo bughoo ebàm a te.

⁶ Fəŋ zəla ghɛ̀ tsɔ̂ɔ kaŋlō, ghəa a te a dzɔ̂ɔ dzə yò. Ghɛ̀ kwo ko nû enyəa sə fə mbvùŋ fə bughōo fə n nyəŋ kǎan ndùw tuʼ kə kəbɛ̄ kə dzəm enyəa kə kɔʼɔ kɔʼ a?

⁷Sǔuw màʼa sə kɔʼ nlǒ mbvùŋ è wìi zən tò ghɛ̀ doʼo tsughu tò tuʼ kə kəbɛ kə̀ fughu ko mò mbvùŋ yò a te, aŋ ghəa ghɛ̀ tɔ̂ʼ lo. Nu ghe maā Kə̀lestò sɛ̂ an tuw kə sɛ̀ tǒ ndzì è Zə kə̀ Zəŋso naaŋ ko.

⁸ Bùghò nlò tò sɛ̀ zə zə kən ko, mo a kâ zə̀ dzə̀ am bɛ kəla kə ki mbvùŋ è wǐi zən — mbvùŋ è wǐi zen lo ebo àsùghò fə̀ŋ è biigh; mo a zə kən kə laam zə am bɛ kə̀ fughu kəla kə ki yo mbvùŋ — mo a zə kən kə zəa am fə̀ŋ tə̀ zɔlɔ to àsùghò alo êsəŋò.

⁹Mùgho mò tɔm naʼā wo â ghɛ̀ am mwàʼsò kaŋa enyəa e kwo ghɛ̀ lô təmādzəə̄ŋ ghî ghəla ghe ghəə̄ŋ kaāŋ dzə̀adzə̀ tə aghəa tə̀ nuūŋ tə eghùe zo;

¹⁰à dɔ̀m yò dzə ghee ghəla ghe ki mwam è biigh zo fɛ am mbī, ŋkāa ghî ghəla ghe səā â sə gho am fʉgha u mbī wo ŋkāa ghî à tsɔŋɔ gho, ŋkāa ghəla ghe kɔʼsō mùʼù mò. Abugho ghɛ̀ lo ghəə̄ŋ dzə̂ êzə̀, ghɛ̀ lo ki alesəā nughù kɔʼ fɛ am mbī.

¹¹Mùgho mò dzɛ̂ enyəa ghɛ̀ ka e təmadzəəŋ ghî ghəla ghe dzɛ̂ enyəa ghe lo waazə̂ ghɛʼɛ abugho ghe lo mo ghe nûuŋ kǎaŋ nù, ghe yia səa â sə gho am fʉgha u mbī wo, kɔʼso mmùʼù, sùwnlò àghì, mʉa kala, ŋkāa tsɔŋɔ, kà tsobùʼ zə dzəəŋ sùgho ghɛ̀ à ghê ŋgòʼ è aghì to ghən.

¹² E zaŋa e lo kwo a te â mùghò alesaʼa ghî ghò mo ghe yo an dzeŋe kə ghì a Kəzə̀ à? À lò ghɛ, ghɛ̀ ki alesaʼ ghî ghəla ghe lo an dzeŋe kə ghì Kəzə̀ kɛʼɛ.

¹³À lô ghì ghəla ghe yo an dzeŋe kə ghì a Kəzə̀ saʼa ko Kə̀zə̀. Ghe tɔm naŋa am Mwàʼsò kə Kəzə̀ enyəa, “Dzǔu sə nlǒ ghùw wəla ù ki fə̀ŋ è biigh am bvʉa zɛʼɛ̄.”