Read Aghem 1 Kòlentìan 6 Bible Online

1 Kòlentìan 6 - Aghem bible

1 Kòlentìan 6

¹Abugho ghù ki tsû wǒ ghɛ̀ à wàazùghù, ghù sò â wə̄n an ti esāʼ a vʉ̀a ghì ghəla kɔʼso yo Zə̀ kò ndûw kwò, mò ghù kà ndùw â wə̄n a vʉ̀a ghì à Kəzə̀ à zɔlɔ gho a?

²Ghɛ̀ kwo yo enyəa à lô mbī zən saʼâ ghì Kəzə̀ à zɔlɔ gho a? Êzə̄ŋ abugho ghɛ̀ lo ki alesāʼ mbī, ghɛ̀ kuuwn ghà kè nù alesāʼ làŋà n təsaʼ mən a?

³Ghɛ̀ kwo yo enyəa sɛ̀ lo ki alesaʼ tsə̀təndə̄ghā tə Kəzə à? Abugho sɛ̀ kê lo alesaʼ tsə̀təndə̄ghā tə Kəzə̀, à fi lo enyəa sɛ̀ lo sughò nû alesaʼa ghəa ghî ghən fɛ am mbī!

⁴À sò lǒ kwò enyəa, abugho ghɛ̀ ki saʼ to kùu ndùw ghəa ghən fɛ̀ am mbī, ghɛ̀ n nîi nduw a vʉ̀a ghì ghəla dzeŋe kə ghì a Kəzə̀ kə̀ lɛɛ̄n kêe lo a, mo ghe nîi wò ghɛ̀ â tuw kə̀ dəla ko a?

⁵Ŋ̀ ghəa ghən kə̂a wò enyəa Ǹ də̂nsò wô tuw kɛʼɛ. To e fɛ lò enyəa ghùw yò am bvʉa zɛʼɛ̄ ù tɔɔ̄ tò ù è biaan ghəa gho am bvʉa e waazə̂ a wə̄n a, tɔ̂ɔŋ ghì a Kəzə̀ a?

⁶Chìa fɛ fwəlà nùghùun nyə̌a ndùw alo təsāʼ ghèe wàazə, nìi ndùw sùghò enyəa ghî ghəla ghe doʼkè boō fughu â Zə̀ kò e saʼā saʼ tə te to!

⁷Abugho ghɛ̀ ki kaāŋ saʼ to aŋ ghùe zɛʼɛ̄, e dêe enyəa ghɛ̀ mughu dzə yo tò ghî ghəla ghe lo mo ghe m boo fughu â Zə̀ kò. Ghɛ̀ yo alebisō boō ndûw ko enyəa ghùw ghəə̄ŋ boon ghɛ̀ â ghəa zo a, ghɛ̀ fala nduw a te a? Ghe yo alezə̀ghàa ndûw ko enyəa ghe biso tsê ghɛ̀ à?

⁸Ghue e eghùe zɛʼɛ̄ e ghəəŋ boon sùghò àghəa tsèe sùghò àghì, bùʼù ghə̌əŋ ghəa yi a zəŋò waazə̂ ghɛʼɛ gho.

⁹Ghɛ̀ kwo yo enyəa ghî ghəla ghe yô dzə̂ tsəghatsəgha lo zəa yo fɔ̂e u Kəzə̀ wò à? E kwo ko fəgha kə li kə lô nɔɔ̄m ghɛ; ghùw ù li aŋ ghì ghən, ŋkāa à lò nùuŋ kə ghûw, ŋkāa wəla ù kɔʼsō mùʼù mò, ŋkāa wəla ù lǒ bwìkòʼ kò, ŋkāa ghînû ghəla ghe nyə̂əŋ dzəə̄ŋ ghue zo ghèe ghê yìnû à li gho,

¹⁰ŋkāa à lǒ ghùw ù tsɔ̀ŋɔ, ŋkāa à lò wəla ù səā â sə gho am fʉgha u mbī wo, ŋkāa à lǒ ghùw ù kàla, ŋkāa à lò wəla ù màʼn nùʼ tò an zən a aghì, ŋkāa à lò wəla ù bvuʼū luʼū to, ghe ghən à dzə̀m lo zə yo fɔ̂e u Kəzə̀ wò.

¹¹Ghɛ̀ â li a fə̀ buʼu ghəəŋ tsəgha sugho ŋgòʼ è ghə̀a ghən. Ghe ŋ kuuwn sùw màʼà tsùghù ghɛ, ghe ŋ ghəəŋ tsùghù è sugho ghɛ̀ n zɔ̀n dòʼò è tsughu, ghe ŋ ghəəŋ tsughu sùghò enyəa ghɛ̀ doʼo tsughu ghî à tsəghatsəgha gho an zən e Mughu ù te Yɛso Kə̀lestò àsùghò an Zuʼ tə̀ Zɔlɔ to.

¹² Ghɛ̀ â li a dzâa tsùghu nù enyəa, “Ǹ ki nû daʼa ko aleghəŋlo àghəa à dzə̀m.” Òo, e lo nû êsəŋò, à sò kǔuwn lò ko enyəa à yò dzə̂ aghəa a dzəm a dzɔɔ̄ â ghù. M̀ mô lò sugho nû aledzàa tsughu enyəa Ǹ lo nû aleghəŋlo àghəa a dzəm; à kǔuwn lò enyəa Ǹ yo alebōo aledòʼò kəkɔ̀ â fəgha kə li ko.

¹³Ghùw ù lì lò sugho nû aledzàa tsughu enyəa, “Fʉghàzəa u lo fəgha kə nʉ̀ghà kò, nʉghà vʉa u lô fəgha kə ufʉ̀ghàzəa ko.” Òo; à kǔuwn lò ko enyəa Zə kə lo dzùuw màʼn fʉgha u te wo u dzəm. Zə kə ka fə gwən e ughùe e ghûw è bɔm wò dzə aŋ ghəa a nuūŋ kaaŋ ghe eghùe gho, à fə̀ lo enyəa zə e lo alefwaʼā â Mughu ù te, enyəa Mughu ù te e lɛɛn sugho â gwən e ughùe e te zo.

¹⁴Zə̀ kə̀ mafə Mughu ù te alo evʉ̄ zôm nùghù wò an daʼa kə wə̄n, ù lo zòo nùghùun wò sùghò nǔ sɛ̀.

¹⁵À lǒ mò ghɛ̀ kwo yo enyəa ghɛ̀ lo nyùŋ u ughùe u Kə̀lestò. À lǒ mò Ŋ̀ ki nû alenìi kɔʼ nyùŋ kə ughùe kə Kə̀lestò Ǹ ndûw təmadzəə̄ŋ kɔʼ ghèe ghê kpàlà kò à? Ɛ̂ŋgaŋ dzə̂, Ǹ tso yò.

¹⁶ Ŋkāa ghɛ̀ kwo yo enyəa ghùw wəlà ù ndùw təmdzəə̄ŋ ndûw kpàlà kò ghèe wən bùghò dòʼò kɔʼ tò gwən e ughùe e mɔ̀ʼ à? Nu ghe tɔm naŋa am Mwàʼsò kə Kəzə̀ enyəa, “Ghe a te gho a bə̀ghà kè bùghò dòʼn kɔ̀ʼɔ egwən e mɔ̀ʼ.”

¹⁷Ghùw wəla ù laām təmdzəə̄ŋ kɔʼ ghue u wə̄n wo ghèe Mughubè ù te, zuʼ tə wə̄n ghèe tə Mughu ù te tə m bùghò dòʼò kə̀fəgha kə̀ mɔ̀ʼ.

¹⁸Zəgha màʼa nlò ghəa à nuūŋ kaaŋ gho. Bo è li e yo dzə̂ ghùw ghəŋlo e mɔ̂ɔ gwən e ughùe e wə̄n zo; ghùw wəla ù nùuŋ kaŋlo kuuwn ghəŋlo èbo a zəŋò gwən e ughùe e wə̄n zo.

¹⁹ À lǒ mo ghɛ̀ məghaa nù enyəa gwən e ughùe zɛʼɛ̄ e lo tsughu e Zuʼ tə̀ Zɔlɔ təla tə mùghù a zəŋò ghɛ̀, mò à fə fughu Kəzə â ghɛ̌ a? À ghue zɛʼɛ e ki dzə yo ghɛ, à ghɛ̀ ki Kəzə.

²⁰Zə̀ kə fə̀ tuw wɛʼɛ u zue sə wo aŋ wən è tughu zo. Ghɛ̀ ki alenaŋā tsughu gwən e ughùe zɛʼɛ̄ alekɔʼso Zə kò a te.