Read Aghem 1 Kòlentìan 7 Bible Online

1 Kòlentìan 7 - Aghem bible

1 Kòlentìan 7

¹Ezə̄ŋ kùu ndùw ghəa ghəlà ghɛ̀ mò tɔm wo. À lò ghəa è dzûŋ zò â wìnûu aledòʼò mò ù mɔ̀ɔm yǒ wìzən[2]:

²Yia abugho ghəa à nuūŋ ghən sò kuūwn tsoōm kaāŋ ghî ghò aleghəŋlo èbo, wìnû bɔ̌ɔm ki ko alelo ghèe wi ù wə̄n, wìzən e bɔɔm lo sugho ghèe num ù wə̄n.

³Wìnûu kì alebɔɔm ghəəŋ nduw ghəa ghəla num ki aleghəŋlo â wi ù wə̄n, wi e bɔɔm ghəəŋ nduw sugho êzə̀ â num ù wə̄n.

⁴Zə êzə lo bòʼ wi ù wə̄n ki dzə yo daʼa kə̀ ə lì ko a zəŋo ghùe u wə̄n wo, à kǔuwn lǒ num ù ki daʼa kə tə ko; à lò sugho eghəla aŋghəa num ki sughò yô daʼa ko a zəŋò ghùe u wə̄n, à kǔuwm ki wī.

⁵E kwo ko chìa lò mʉā wàazə â ghue u wə̄n wo à gɔ̀ʼɔ̀ ko mo ghe ndôʼ sǎan tsughu aleghəə̄ŋ tsughu êzə aŋ gha kə̀ li ko, abugho ghe tsə̂m tsughu alenìi kɔʼ enəgha alegɔ̀ŋlò; Abugho ghe gɔ̂ɔŋ mɛʼɛ̀ tsughu, ghe ŋ kòom daŋso kàʼ ndùw ebàm, e kwo Satàn lò tsoō kɔʼɔ ghùw ù ghee abugho ghe yo alekwuū kelê ghue e ghee.

⁶Ŋ̀ ghəa ghən tsôo kəaa wò nù, Ǹ tsəghàsò wò yò lâŋ kò â ghɛ̀.

⁷M̀ moʼò enyəa abugho ghəa ghən à dzəm mò lo aŋ ghəa ghuūghùe waŋā u lo a te to e mô dzɔ̀ɔ. À sò fɛ kuuwn lò ko enyəa chìa kì nduw ko fughu kə wə̄n kəla Zə̀ kə̀ mò namsō wə̄n a te, chìa wən ŋ ki fughu kən, ù lì ù vʉ ŋ ki sugho kə̀ nughù kò.

⁸Â ghì ghəla ghe lo mo ghe kaān ghue zə n nî àsùghò â yiikpūw gho, Ǹ dzɛ̂ enyəa e dzɔ̂ɔ nù â ghee aledòʼòdoʼò ko nəŋ mo ghe kâ ghue e nî, tò aŋghəa Ǹ lo a te.

⁹Abugho ghe kuūwn ghâakêe alezūmsō èghue, ghe ŋ kəŋ tsughu wìzən ŋkāa wìnû, nì è tsughu; nu â ghùw alenəəŋ kaŋlo, dzɔ̀ lò enyəa ù nìi tsughu wi ŋkāa num.

¹⁰Â ghəla ghe lo mo ghe ŋ ghue e nî, M̀ fughuu wò kəlàŋ, à yò dzə̂ lâŋ kaŋa, à lò lâŋ kə Mughu ù te, enyəa e kwo ko wìzən lò səā num

¹¹Abugho wìzən ù te sə kɔʼ num, e kwo ko ù lò kôom niī num ù nùghùu ŋkāa ù n ndùw bǐaan tsughu èbàm ghèe num ù wə̄n. E kwo ko num lô so e dzûu sə̌a sùgho wi ù wə̄n.

¹²Â ghì à li ghən, à ghəa ghən dzâa wò ghuūghùe waŋa, a yò dzê Mughu ù te, enyəa abugho wàazə̀ wɛʼɛ ù li ki wī mò wìzən ù te kâ bǒo fùghù dzə̀ â Zə̀ kò, mò ù ŋ kuuwn boo alemùghùu ghèe wə̄n, e kwo ù lò dzuū səa wə̄n.

¹³Abugho wìzən ki num mò wìnû ù te kâ bǒo fùghù dzə̀ â Zə̀ kò, mo ù ŋ kuūwn boo alemùghùu ghèe wə̄n, e kwo ù lò dzûu səā wə̄n.

¹⁴M̀ fɛ dzàa bòʼ ghùw wəlà ù dòʼkè boō fughu â Zə̀ kò bùghò doʼn nǔ ghùw ù zɔ̀lɔ am bàm e wī, wìzən wìlà ù dòʼkè boo n dòʼò sùghò zən ù zɔ̀lɔ am bàm e num. Buw êzə̀, to wɛ ghɛʼɛ̄ a mô zɔ̀lɔ yo, aŋghəa e kuūwn lô dzə̂ êzə, ghe fɛ zɔlɔ nù.

¹⁵Abugho ghùw wəlà ù dòʼkè boō fughu â Zə̀ kò kuūwn tsə̂m tsughu alezəghàa maʼà wən wəla ù boō fughu â Zə̀ kò, ghe n zə̀ghà wə̄n ù mò è nughu; aŋ ŋgòʼ è bùʼ kən, a kâ wìzən ŋkāa wìnû kɔ̀n nàŋa dzə̀: nu Zə̀ kə fə̀ sɛ̀ tɔŋɔ tsughu enyəa sɛ̀ e mughu alo ebughunlo.

¹⁶Â ghù a wìzən, ghù kwò naŋa ênzə̂n enyəa à lô num wʉ̂a bə̀ghasəa ghǔ a? Â ghu sugho a nùm ù wìzən, ghù kwò naŋa ênzə̂n enyəa à lô wi wʉ̂a bə̀ghasəa ghǔ a?

¹⁷E lo ko enyəa chìa kì alemùghùu tsughuu kô mùghùu zəla Mughu ù te fughu â wə̄n, àsùghò aŋ ghəa zəla Zə̀ kə̀ tɔŋɔ wə̄n a te. Kən lo lâŋ kaŋa kəla M̀ fughu wo an dzweŋe u ghì a Kəzə̀ wən u dzə̀m.

¹⁸Abugho ghùw lǒ mo ghe maā tigh kə wə̄n kə sugho an nəghà zəla Zə kə̀ mò tɔŋɔ̄ wə̄n a te, e kwo ko ù lò dəmà dzə̂ enyəa e so e nân na kə te ko. Abugho ghùw lǒ mo ghe ka mo tigh kə wə̄n kə sugho an nəghà zəla Zə kə̀ mò tɔŋɔ wə̄n a te, e kwo ko ù lò dəmà dzə̂ enyəa ghe sughōo tsughu tigh kə wēn êzə̄ŋ.

¹⁹Tɔŋlo enyəa ŋkāa ghe sugho tigh kə ghûw kò ŋkāa ghe doʼkè sugho, à yò dzə̂ ghəa è li zo, ghəa e te e lo enyəa ghù è naaŋ tsughuu lwâŋ u Kəzə̀ wò.

²⁰Chìa bɔɔ̄m doʼò tsughuu ko aŋ kòʼ zəla Zə̀ kə̀ mò tɔŋɔ̄ tsughu wə̄n mò ù lò a te.

²¹Abugho ghe mò ghû tɔŋɔ̄ tsughu mò ghù lò kəkɔ̂, kà tso tā — abugho ghù lò alekele dzì alendzəə̄m lo, ghù ŋ ghəəŋ ndùw êzə̀.

²²Tɔŋlo enyəa ghùw wəla Mughu ù te fə̀ tɔŋɔ̄ wə̄n mò ù lò kəkɔ̂, ù êzə̄ŋ e ndzə̂əm lò nû aŋghəa ù lò fəgha ko kə mɔ̀ʼ ghèe Mughu ù te. À lò sugho eghəla â ghùw wəla Mughu ù te mò tɔŋɔ̄ wə̄n mò ù ndzə̀əm lò nû fə̀n doʼò ndûw kɔ̂ kə Kə̀lestò.

²³Ghe mò tuw kɛʼɛ kə zue sə wo alo kəfəgha; kǎ nlò doʼò dzə kɔ̂ wò â ghì ghò.

²⁴Waazə̂ ghaŋa gho, abugho ghe mò ghû tɔŋɔ̄ ko mò ghù lò ko kə kwò, bɔɔm dòʼo ko aŋghəa Zə̀ kə mò tɔŋɔ ghû a te.

²⁵Êzə̄ŋ kùu ndùw ghì ghəla ghe lo mo ghe kaām ghue zə ŋ kaam nì, Ŋ̀ ki dzə yo lâŋ kə Mughu ù te kə li ko a te, Ŋ̀ kuuwn dzàa wò kô mòʼn zaŋa tǒ ghùw Mughu ù te mò kwusō tsughu se zo enyəa ù dòʼò tsughu ghùw wəla a lô alegaʼ fə̀ŋ a te.

²⁶M̀ moʼò enyəa aŋghəa ghəa a tughūu êzəŋ enyə, e dzɔ̂ɔ nù enyəa to ghùw mò doʼòdoʼò ko aŋ ghəa ù lò a te.

²⁷Ghù wəlà ghù lǒ mò ghù ŋ wi nî, e kwo ko ghù lò so ghəŋlo enyəa ghɛ̀ à wə̄n sɛɛ̄. Ghù wəlà ghù lǒ mò ghù kaan wī n nî, e kwo ghù lò dəmà enyəa ghù so e nî.

²⁸Abugho ghù kuūwn nî ko wī, ghù kà ghəa è li e boon dzə, abugho wɛ̂ɛzə̄n nî tsughu sugho num, ù kà ghəa è li e boon dzə. Ghî ghəla ghe nîi ghue zo lo koʼò tsù u mbī wo, yìa Ǹ ləghaa yo enyəa to ghɛ̀ mo nyə aŋ ŋgòʼ è tsù wən.

²⁹Waazə̂ ghaŋa gho, fəgha kəla Ǹ dzâa wo lò enyəa nəgha zə ŋ kəmto â sɛ̀ fɛ am mbī; alenìi nughù tsughu êzə̄ŋ, ghî ghəla ghe nîi ghue zo mughùu tsughu tò ghî ghəla ghe nîi yo.

³⁰Ghî ghəla ghe dînlo, mughùu tsughu tò ghəla ghe dîin yo, ghəla ghe duʼnlo mughùu tsughu tò ghî ghəla ghe duʼn yo, ghəla ghe zueēn fʉgha wo, ghe mughùu tsughu tò ghəla ghe kî yô fəgha ko.

³¹Ghî ghəla ghe ki fwàʼ kò am fʉgha u mbī wo ghe doʼò tsughu tò ghəla ghe ki yo fwàʼ kò a te. Nu mbī zəla a koʼō êzə̄ŋ fɛ tsəghàa mìaa ndùw nù

³²Ǹ ləghaa enyəa to ghɛ̀ mo doʼo tsughu ko tò ghəa è li e fəmso yo ghɛ. Ghùw wəlà ù ki yo wī ŋgeē gaʼā tsughu tuw kə wə̄n aŋ ghəa e Mughu ù te, enyəa to e mô ghəŋlo fə̀ŋ è Mughu ù te zə̀ e zɔlɔ.

³³Ghùw wəlà ù ki wī kuuwn dəmà ko aŋ ghəa mbī gho, enyəa to e mô ghəŋlo fə̀ŋ è wi e zɔlɔ.

³⁴Fə̀ŋ è wən dzughùu dòʼò nù. Wìzən ŋkāa wɛ̂ɛzə̄n wəla ù ki yo num ŋge gaʼ kətuw aŋ ghəa e Mughu ù te, enyəa to ù mo zɔ̀lɔ a zəŋo e ughùe àsùghò am fə̂ŋ e wə̄n; wəla ù ki num kuūwn gaʼ kətuw aŋ ghəa a mbī gho, enyəa to e mô ghəŋlo fə̀ŋ è num n zɔlɔ.

³⁵Ghəa ghəlà Ŋ̀ kə̂aa wô fɛ à lǒ dzɔ̀ â ghɛ̀, à yò dzə̂ enyəa Ǹ so Ŋ̀ kɔlɔ̀ naŋā wô ghɛ̀ an dziī è lì, à lǎam lò enyəa ghɛ̀ e ghəəŋ nduw ghəa ghəla a lo ghè ghò mo a lo sugho tsəghatsəgha, àsùghò enyəa to ghɛ̀ mô kòom mòʼn dzə yò ghəa è li zo, tò ghɛ̀ mô mòʼn təla ko alefwàʼ â Mughu ù te.

³⁶Abugho ghùw mòʼò enyəa e tɔʼɔ̀ fwàʼà dzɔ̀ɔ yò a zəŋò wìzən wəlà ù kpòom naŋā, abugho ù nǔu aŋ ghəa a te gho, mo e ki alelo èzə, ù ŋ ghəəŋ ndùw ghəa zəla ù tsəm tsughu, ghe n nì ndùw èghue — à yò dzə̂ ghəa è biigh zo.

³⁷Ghùw wəlà ù kuūwn tɔ̂ʼ ti am fə̂ŋ è wə̄n enyəa e ləghaa dzə yò alenì wə̄n, tɔ̀ʼ kì sugho am fə̂ŋ è wən aletsəmā tsughuu ko ghəa e wə̄n zo, kpàʼ tsəm tsùghù êzə am fə̂ŋ è wə̄n enyəa e nî yǒ wi, ù lò kədzûŋ.

³⁸E fi lo enyəa ghùw wəlà ù nì tsughu wìzən wəlà ù mò kpôom naŋā ŋ ghəəŋ dzɔ̀. Ghùw wəla ù tue alenì wi, vʉ̀a ù kuūwn fwâʼ dzɔ̂ tsəghàsə.

³⁹Wì ù ghùw lò ko fəgha kə ghûw ù te abugho ghùw ù te lô dzə â tuw ko. Abugho nùm ù te kpuw tsughu, wìzən ù te lo nû alenì ghùw ù nùghù ù ləgha tsughu, mò ghùw ù te m boo fughu â Mughu ù te.

⁴⁰Am mòʼn zaŋa, ù kǔuwn lò kədzûŋ abugho ù dòʼòdoʼō êzə. Yìa Ŋ̀ kwo enyəa Ŋ̀ ki Zuʼ tə Kəzə̀, (tə gheŋlo enyəa mùghò è kəaa ghəa gho enyə.)