Read Aghem 1 Kòlentìan 9 Bible Online

1 Kòlentìan 9 - Aghem bible

1 Kòlentìan 9

¹À lǒ mò Ǹ ndzə̂əm mùghù yo aŋ ŋgəŋ zaŋa a? À lǒ mò Ǹ yo tum è Kə̀lestò a? À lǒ mò Ŋ̀ kâ Mughubè ù sɛ̀ Yɛso kôʼ à? À lǒ mò à ka fɛ mugho ghəŋlo enyəa ghɛ̀ boo fughu â Mughu ù te à?

²Abugho kwo yo mugho enyəa Ǹ lo tum è Kə̀lestò, ghɛ̀ yia a ŋgəə̄ŋ kwo ko mugho. Mughùu zəla ghɛ̀ mughù enyə alo kə fəgha kə mɔ̀ʼ ghɛ̀ à ghê Kə̀lestò, e dêe nù enyəa Ǹ tum è Kə̀lestò

³Ŋ̀ ghue waŋa u baaŋ səa tsə̀ghà enyə abugho ghî à tɔʼɔ̀ tûe kaŋa ko enyəa Ǹ yo dzə̀ tum è Kə̀lestò.

⁴À lǒ mò e lo nû enyəa Ŋ̀ ki yo daʼa ko alekelê fəghà kə zəa ko àsùghò kə̀ mʉa ko am fwàʼ kəla M̀ fwaʼā ghè kò à?

⁵À lǒ mò Ŋ̀ ki yo daʼa ko alenìi kɔʼ wìzən mò ù bǒo fughu â Zə̀ ko aŋ wi a, ghàʼ à ghee e ŋgea nduw a dzə̀m à, tò aŋghəa tum tə Kə̀lestò tə̀ li tən àsùghò waazə̂ a Mughu ù te gho ghèe ghê Sɛfàs fə̀ ghəŋlo à?

⁶Ŋkāa à lǒ mò e lo enyəa à kà lò ko mugho ghàʼ à Bànabàs ghàʼ ki aletèlè fwàʼ à, sěe ghàʼ sô lo alezə a?

⁷À lǒ sùghugòʼ è ghɛ̌ zò è fwàʼà tsəā ghue u wə̄n wo, wən à nəŋ ko a? À tǎa tsughu ndùghò kàʼ n ùtwam mò, ù ŋ kè kʉ̂ɛɛ nəgha kətam a tè à? À nyə̀so ndùghò mbɔ̀ŋ tò a, ù n yo alekaā mʉ mele kə te ko a?

⁸À lǒ mò ŋ ghəa ghən kêaa wò to aŋghəa ghùw nsɔ̌ɔŋnchùw kə̀aa ghəa gho a te a? Lâŋ kə mgbaŋa kəaa sùghò yò ghəa è mɔʼɔ̄ zo a?

⁹ Nu ghe tɔm naŋa an làŋ kə Musî enyəa, “Kǎ tsāʼ an dzughu e mbɔ̀ŋ è gwənlo dzəlà nàŋa abugho è dzùghòo kue gho.” À lǒ mò Zə̀ kə̀ sə e wə̄n e ka naŋa ko a zəŋò mbɔ̀ŋ tə̀ gwəə̄n to a?

¹⁰À lǒ mò ù ghəa ghən fɛ kə̀aa yò kùu wò sɛ̀ à? Ghe fə̀ ghəa a te a tɔm naŋa â sɛ̀, bòʼ enyəa ghùw wəla ù gwə̀ən sum wo ki alegwəə̄n nduw, chiī nduw tùʼ enyəa e lo kele nù fəgha ko an sum u te wo. Ghùw wəla ù dzùghòo kue gho e chiī sugho tùʼ êzə̀.

¹¹ Abugho e lo enyəa ghàʼ fəgha kəla Zuʼ tə̀ Zɔlɔ tə fughu â ghàʼ am bvʉa zɛʼɛ, à so kǔuwn tughu kə kwò a te â ghɛ̀ alefughu ghaʼ â fʉgha u mbī ù li wən a?

¹²Abugho ghî li a ki daʼa kə te ko alekele fʉgha wən aŋ ghùu ghɛ̀, ghàʼ sô kǔuwn bòʼò kì yo daʼa kə te ko ênzə̂n tsə̀ghàsə ghee a? Ghàʼ kâ dwaʼa u te u kuuwn dè dzə. Ghàʼ fwə̂n ka tsughu ezə alo aghəa a dzəm enyəa mò à lò ko kə kwò e kwo ghàʼ lô fêe naāŋ dzî enyəa ghî à lô zuū làbəlà è Kə̀lestò.

¹³ À lǒ mò ghɛ̀ məghaa nù enyəa dzə zəa ko an dəŋò kəla ghe təŋò naŋā wə̄n a te a? Ghɛ̀ məghaa sughò nù enyəa ghî ghəla ghe fwaʼā an tsaʼ kəla ghî kɔʼɔ sâa fughu fʉgha wo a te zəa am fʉgha u te wo a?

¹⁴ À lò sugho eghəla Mughu te dzɛ̂ tsughu enyəa ghî ghəla ghe naʼn làbəlà è dzùŋ e wə̄n e zəa sugho aŋ ghəa a làbəlà è dzùŋ a te gho.

¹⁵Ŋ̀ kâ kǔuwn dè dzə daʼa kə li ko an dwaʼa wən, Ŋ̀ ghəa ghən êzəŋ buʼù tɔ̌ɔ dzə yò enyəa to M̀ mô nîi kele kɔʼ dwaʼa u te wo aŋ ghùe waŋā. Â mùghò alezəghàa tsughu enyəa ghùw ù lì bùghò ghəə̄ŋ tsughu enyəa Ŋ̀ ka e tsɔɔ̄ fə̀ŋ am fəgha kəla Ǹ ti a te, to M̀ biso kpuw a te.

¹⁶Ŋ̀ ki dzə yo daʼa kə li ko aletsɔɔ̄ fə̀ŋ enyəa sō Ŋ̀ naʼn wò dzə̀ làbəlà è dzùŋ zən. À fwàʼ kən â mùgho fughu Kəzə̀. Utsû a zəŋò mùgho abugho Ǹ doʼkè naʼà làbəlà è dzùŋ e te!

¹⁷Abugho M̀ mô fwàʼ kən kə fwaʼà enyəa à tsò tsəm kɔʼ ko mùghò, to ghe mô tsə̌a mùghò a te. Abugho à kuūwn lô enyəa à kà mùghò tsə̂m kɔ̀ʼ dzə̀, à fi lo enyəa M̀ fɛ fwàʼà fəgha kəla Mughu ù te fughu â mùghò enyəa mùgho è fwaʼā.

¹⁸Namso kaŋā kə lo kwo a te a? Namso kaŋa ko a te lo enyəa mùghò e naʼn wo làbəlà è dzùŋ e te mo ghe tsəa yo mugho, àsùghò enyəa mùghò bvʉa zee yo ghɛ â fʉgha wəla M̀ mô ki alebvʉ̄ aŋghəa Ǹ naʼn wo Làbəlà è dzùŋ e te.

¹⁹Aŋghəa Ǹ tsô ndzə̂əm lô ko fɛ, Ŋ̀ ghəəŋ naŋa tsughu ghue waŋa tò kəkɔ̂ â ghì ghən à dzəm, nyəa to M̀ mô tsòo fəghaan ghəəŋ ndùw ko enyəa ghî ghə̀ e boom fughuu nduw â Kə̀lestò.

²⁰Abugho Ǹ lo ghàʼ à ghê Dzûu tò, mùghò n lo tǒ ghùw u ghee, enyəa Ŋ̀ ghəŋlo ghe boō fughu â Kə̀lestò. Abugho Ǹ lo ghàʼ à ghê ghì ghəla ghe lo a tsəlà làŋ kò, mùghò n dòʼò ndùw tǒ ghùw ù ghee, aŋghəa M̀ bûʼ yo ko a tsəla làŋ kò, aleghəŋlo enyəa ghe boō fughu â Kə̀lestò.

²¹Abugho Ǹ lo ghàʼ à ghê ghì ghəla ghe yo dzə a tsəlà làŋ kò, mùgho n dòʼò tǒ ghùw ù ghee, (aŋghəa Ǹ lo mò ŋ kaām bûʼ nɔ̂sə aŋ ghùu làŋ kə Kəzə̀ ko, mò Ŋ̀ kuuwn naam lo ko a tsəlà làŋ kə Kə̀lestò kò), enyəa to M̀ mô lò aleghəŋlo enyəa ghî ghəla ghe kwo yo lâŋ kò è lo aleboō fughu â Kə̀lestò.

²²Abugho Ǹ lo ghàʼ à ghê ghî lɛɛ ghəla ghe ki you fə̂ŋ tò, mùghò n dòʼò ndùw sùghò tǒ ù ghee, enyəa to M̀ ghəŋlo ghe boō fughu â Kə̀lestò. Mùghò m bùghò dòʼò fʉgha wən ù dzəm â ghì ghən à dzəm, enyəa Ŋ̀ kəŋo tsughu tədziī tə dzə̀m alebəghaasə ghee à li gho a te.

²³Ŋ̀ ghəa a te gho a dzəm ghə̌əŋ ko alezùghòo làbəlà è dzùŋ è te, enyəa to M̀ mô kele sughò bughuso zəla e lo aŋ ghəa a te gho.

²⁴À lǒ mò ghɛ̀ məghaa nù enyəa à dzèŋe nyəŋo tsə̀ghà ndə̀mà tə aghì abugho ghe bânlo alenyəŋ a, à ŋ kuuwn nyəŋ zə ko ghùw ù mɔ̀ʼ namso kə te ko a? Ghɛ̌ fi ki aledə̀mà təla tsughu alenyəŋo zə namso kə te ko.

²⁵Ghî à nyəŋo ghən à dzəm kì aletɔʼɔ̄ naaŋ tsughu lwâŋ wəla ghe zoʼn tsughu ghee a te. Ghe enyə ghəŋlo enyəa to ghe mô lò alekele kə̀lɔ̀ʼɔ mo kə lo boo mìaan nù, sɛ̀ kuuwn kəŋo alekelê lɔʼɔ kəla kə kê boō mîaan koʼò tsəghà yo.

²⁶Zən lò e ghee Ǹ nyəŋō dzə̂ yo tǒ ghùw wəlà ù nyəŋō maʼn kənughùnùghù, buu sùghò yǒ ŋgè kò tǒ ghùw wəlà ù shùaan kêe kaāŋ kʉ̌ɛɛ ko alo kəmbùʼ.

²⁷Ǹ nîi nǎaŋ tsūghûu ghue waŋa tò kəkɔ̂ a tsəlà mùghò enyəa e kwo Ǹ lô so e kuūwn gùuŋ namso kə te ko mò à làbəlà è dzùŋ è te zughòo mùghò â ghì ghò.