Read Aghem 2 Kòlentìan 1 Bible Online

2 Kòlentìan 1 - Aghem bible

2 Kòlentìan 1

¹ À lò mugho Pôl M̀ tɔɔ̄ wo mwàʼsò kən ko, mùghò wəla Zə kə tsə̂m tsughu enyəa Ǹ doʼò tùm è Kə̀lestò Yɛso. M̀ mwàʼsò kən fɛ tɔɔ wò mò Ǹ lo ghàʼ à Timotì, wàazə̀ ù sɛ̀. Ǹ tɔɔ wò â ghɛ̀ dzeŋe kə ghì a Kəzə̀ ghəla ghɛ̀ lo fi aŋ naʼ e Kɔ̀lênt, àsùghò ghì à Kəzə ghən à dzə̀m ghe lo an naʼ e Akayà.

²Gɔ̂ɔŋ zaŋa e lo enyəa to Kə̀zə̀, Tsele ù sɛ̀, ghèe Mughùbè Yɛso Kə̀lestò mò dê ghɛ̀ â dzɔ̀ zò, ghe fughuu sughò ghɛ̀ â bughuun zo.

³Sɛ̀ è fughuu zɔ̀ɔŋ kò â Zə̀ kò tɔɔŋ Tselè ù Mughubè ù sɛ̀ Yɛso Kə̀lestò. Ù lǒ Tsele ù sɛ̀ wəla ù ki se è kwuso zo, lò sugho Zə̀ kəla kə tsəmsō ghî ghò a dzə̀m.

⁴Ù tsə̀mso sɛ̀ an tsù u sɛ̀ wə̀n ù dzə̀m, enyəa sɛ̀ lô kpaʼ lô sughò aletsəmso ghì ghəla ghe ki tsû ù li wo an dziī è mɔ̀ʼɔ zəla Zə̀ kə̀ lo mo kə n tsəmso sɛ̀ a te.

⁵Tɔŋlo enyəa ndə̀mà tə aghəa təla sɛ̀ ŋgeē faān fɛ a te an dzə̀ təla Kə̀lestò fə̀ fala a te, Zə̀ kə̀ lo ŋgēe tsəmso sùghò nǔ sɛ̀ am bàm e Kə̀lestò.

⁶Abugho ghàʼ faān fɛ êzə̄ŋ, à lò enyəa to ghɛ̀ mo kele tsə̀msò ko, ghɛ̀ zə sugho tuw ko. Abugho ghe tsəmsō ghāʼ, à lò enyəa to ghɛ̀ mo kele tsə̀msò ko, kəla ghùw kele abugho ù dzə̀n tsughu fə̀ŋ, zumso tsughu ughue, fala tsughu ŋgòʼ è fàlà zəla ghàʼ faan ghè zò.

⁷Fəgha kə̀ li kə yo dzə̂ aletə̀ghàsò mòʼn zəla ghàʼ ki a zəŋò ghɛ̀; tɔŋlo enyəa aŋghəa ghɛ̀ faān sughò fala zəla ghàʼ faan ghè zò, ghɛ̀ kele sùghò tsə̀msò kəla ghàʼ lo kele ghè kò.

⁸Waazə̂ ghò, ghàʼ mô lə̀ghàa dzə̀ yò enyəa ghɛ̀ doʼo alo kəŋgòmsò aŋ ŋgoʼ zəla ghǎʼ mò zuw am mbùʼ è Ɛshìa; nu ŋgoʼ zəla ghe mò naŋā ghaʼ a te mò tsəghasə̄ nû, a m bûʼ kòom kwò yo enyəa a kê dòʼn nù â tuw ko.

⁹À mò lo bòʼ ghǎʼ mò moʼo am fə̂ŋ taʼa enyəa ghe ki alewi ghaʼ. Ghəa ghən fə̀ sə aleghəə̄ŋ tsughu enyəa e kwo ko ghàʼ lô nîi ghəa gho aŋ ghu kaʼā, à fə̀ lo enyəa ghàʼ nyəŋè tsughu am fùuw tə Kəzə̀, Zə̀ kəla kə zôo nughùuŋ kɔʼɔ̄ ghîikpuuwn gho.

¹⁰Ù mò bəghasə̄ ghaʼ an tsù ù biigh ù biigh wəla u mò lô alenìi nughù tuw kaʼa. Ù lô sɛ̀ bəghasə̄a tsə̀ghà ko êzə̀. Ghàʼ fɛ chìi ko tùʼ enyəa ù lo bəghaasəa kpeʼe nù ghaʼ,

¹¹ghəa ghɛ̀ yôsò ghaʼ alegɔ̀ŋlò an tuw waʼā. Aŋ ghəa ghə̀ è yì, ndə̀mà tə aghì tə̀ e ke fughuu zɔ̀ɔŋ kò â Zə̀ kò, yòsò wò ghàʼ alo egɔ̀ŋlò enyəa ndə̀mà tə aghì tə̀ e lo alefughu zɔ̀ɔŋ kò am bughuso zəla a kele kɔʼ aŋghəa Zə̀ kə̀ zuw tsughu gɔ̂ɔŋ zəla də̀mà tə aghì tə̀ gɔ̂ŋlo an tuw waʼā.

¹²Ghàʼ ghue e ghaŋso bòʼ enyəa fə̂ŋ taʼa tə zɔlɔ nù am mùghù zəla ghàʼ mughù fɛ a te am mbī aŋghəa ghàʼ ghəə̄ŋ sughò â ghɛ̀ an dziī è zɔ̀lɔ zəla Zə̀ kə̀ ləghaa, à yò dzə̀ an tɔ u ghì a mbī gho, à lò an daʼa kə dzɔ̀ e Kəzə̀.

¹³Tɔŋlo enyəa ghàʼ ghəa è li zo â ghɛ̀ tɔɔ wò yò mò ghɛ̀ yo aletɔɔ̄ŋ zuūwkɛ̄lɛ̄. M̀ moʼò enyəa ghɛ̀ sô zǔuwkɛ̄lɛ̄ nù ghəa a te gho a dzə̀m.

¹⁴Ghəa ghɛ̀ lo mò ghɛ̀ ŋ ghàʼ nya zuwkɛlɛ̄ tsughu enyəa ghɛ̀ lo nû aletsɔ̀ fə̀ŋ a zəŋò ghàʼ aŋghəa ghàʼ kê tsɔ̂ɔ sugho fə̀ŋ a te a zəŋò ghɛ̀ an tsuʼ u Mughùbè Yɛso ù saʼa u mbī wo.

¹⁵Ghəa mùgho mò tɔ̂ʼ kwo ghəa ghən, mùghò n ləghaa alebùghòo dzə̂ alô ghɛ̀ esə̄, enyəa ghɛ̀ lô kpaʼā kele maāŋ kɔʼɔ̄ namso ko.

¹⁶ Mùgho mò dzɛ enyəa M̀ bughò bwîin koʼò daŋà tsəghà ghɛ̀ abugho Ǹ nduūw am Masɛ̀donìa, Ŋ̀ kôom bughò è bàm a vʉ̀a ghɛ̀ abugho Ǹ nughù wo fughu, tò ghɛ̀ ke dəm tsughu enyəa Ǹ ndûw tɛ̂ an Dzùdîa.

¹⁷À lǒ mò mùgho mò məŋō nû aŋghəa mùgho mò se ghə̂əŋ ghəa ghən a? À lǒ mò Ŋ̀ ghəa ghaŋa a bian naŋlo tǒ ghùw ù mbì a; wəla ù lò alelō alo eghəa kòom bùw a te a?

¹⁸Aŋghəa Zə̀ kə̀ kûu naāŋ dzughu e wə̄n zo, ghǎʼ mò boom yo ghəa zo kòom tǔu màʼnlo.

¹⁹ Yɛso Kə̀lestò, Wɛ̀ ù Kə̀zə̀, wəla ghàʼ à ghê Sìlvanùs, àsùghò Timotì mò kə̂aa ghəa a wə̄n gho â ghɛ̀, ù mò teen tsəgha dzə yo alo eghəa ù ŋ kôom bùw a te; aŋ wən, ù ňaaŋ tsə̀ghà kô dzughu e wən.

²⁰Zə̀ kə̀ naaŋ mɛ̀ʼn to kəla kə lǒ mò kə n to kə dzə̀m am bam e Kə̀lestò. Zən lò e ghee a dzâa ko enyəa, “Zə e lo ko êzə̀” am bàm e wə̄n alefughu ŋkɔʼso â Zə̀ kò.

²¹À kǔuwn lò Kəzə̀ kə kê ghəŋlo a tɔʼɔ̄ teme tsughu alo kəfəgha kə mɔ̀ʼ sɛ̀ à ghê Kə̀lestò, tsuʼ naŋā kɔʼ sùghò sɛ̀ enyəa sɛ̀ e lo ghî a wə̄n gho.

²²Kə n sɛ̀ tsə̂sò nàŋa an lɔ̀m kə wə̄n, dzə̀n nàŋa wò Shʉ̀ghà u wə̄n am fə̀ŋ tə sɛ̀ aledèe wô enyəa kə lo fughuu mɛ̀ʼn nǔ sɛ̀ â fʉgha wəla kə fə̀ to naŋā alefughu â sɛ̀.

²³Ǹ dzɛ̂ enyəa Zə̀ kə̀ mʉā fughu gùw zaŋa — enyəa mùghò mò koōm moʼn ke nû alebùghò tɛ̂ a vʉ̀a ghɛ̀ aŋ Kolèent enyəa Ŋ̀ ka ghɛ kôom bùghò fə̀mso kpeʼe sùghò.

²⁴À yò dzə̂ enyəa ghàʼ ki daʼa kə̀ li ko am boo zɛʼɛ̄, ghàʼ yôsò enyəa ghɛ̀ è duʼnlo, nu ghɛ̀ tɔ̂ʼ tì nû aŋ ghəa zəla ghɛ̀ boō fughu tsughuu a te.