Read Aghem 2 Kòlentìan 10 Bible Online

2 Kòlentìan 10 - Aghem bible

2 Kòlentìan 10

¹À lò ghuūghùe waŋā Pôl, Ǹ zumso buʼū wô ghu ko â ghɛ̀ an zən e Kə̀lestò wəla ù bughunlō, zʉ̀ lò sugho; mùghò wəla ghî a li a kə̂aa kaŋlo enyəa, abugho Ǹ ti an sə kɛʼɛ̄ mùghò n tsəŋlo, mùghò ŋ kuuwn ki fə̀ŋ abugho Ǹ nughù nduw!

²M̀ buʼu kə̀ghu â ghɛ̀ enyəa e kwo ghɛ̀ lô tsəə̄n mugho enyəa mò bughò fì, mùghò ŋ kə̂aa ghɛ̀ â ghəa gho an tɔɔn kə dzə̂, nu Ŋ̀ kwo nû enyəa Ǹ lo nû alekə̀a tɔɔŋ kə dzə̂ â ghì ghəla ghe moʼò enyəa to M̀ mô ghə̌əŋ wò àghəa aŋghəa mbī ləghaa.

³Sɛ̀ kpuwso mùghù ko nû fɛ am mbī, sɛ̀ kuuwn təma yo tsàm è sɛ̀ aŋghəa ghî a mbī a təma è ghee a te.

⁴Fʉgha u tsam u sɛ̀ ù yo dzə tò u ghì a mbī wo, u kuuwn ki daʼa kə Kəzə̀ aletəma sâʼ luʼū təla ghîikətuw a sɛ̀ à bəgha doʼò kaŋlo a te.

⁵Sɛ̀ buu nyəmâ làŋà tə dzughu à pfʉa gho àsùghò làŋà tə aghəa təla tə ghəŋlo enyəa ghəa a Kəzə̀ à ka ndûw â sə ko am fʉgha u tsam u sɛ̀ wən. Sɛ̀ kwuu kɔ̀lɔ̀ tsùghûu mòʼnlò ghì ghəla ghe ləghaa yo alezuw shwaʼ u Kəzə̀ a ŋ ghəə̄ŋ tsughu ghî a te gho enyəa ghe e zuuw wo â Kə̀lestò.

⁶Ghàʼ yəa ti ko an sɔ̀ŋ è bii zo alebɛ̄ mbɛ̄ an tuw kə ghì ghəla ghe zuūw yo â Kə̀lestò, abugho ghɛ̀ lo doʼò mɛʼɛ̀ tsughu ghî ghəla ghɛ̀ tɔʼɔ̀ zuūw â Kə̀lestò.

⁷Ghɛ̀ lɛɛn tsughu kô aghəa a beē, mò ghɛ̀ kâ tɔ̀ʼ lɛ̌ɛn nyə tsughu dzə̀. Abugho ghùw tɔ̀ʼ kwo enyəa e lo ghùw ù Kə̀lestò, ù zə̀əŋ tsughu ghue u wə̄n enyəa aŋghəa ù lǒ ghùw ù Kə̀lestò, ghàʼ lo sugho êzə̀.

⁸Abugho Ǹ nyɛʼɛ̄ bûʼ to tsəghàsò ko num an dwaʼa wəla ghàʼ ki, Mughu ù te fughu wo enyəa ghàʼ bɔɔ̄ tiso wô ghɛ̀ a te, mo a wiin màʼn n yò boo zɛʼɛ zo, Ǹ sô yò dzə̂ alekele tùw kə̀ dəla ko.

⁹E kwo e lô doʼnlo enyəa M̀ beme wò ghɛ̀ am mwàʼsò wəla Ǹ tɔɔ̄ wo â ghɛ̀.

¹⁰Ghî à li a dzɛ̀ enyəa, “Shwaʼ wəla ù tɔɔ̄ am mwàʼsò u wə̄n u dəlà nù, tɔɔn sùghò, abugho ù kuūwn ti aŋ ghùe u wə̄n an sə kə sɛ̀ ù n tsəŋlo, shwaʼ u wə̄n wə ŋ kwuu yo ghəa zo.”

¹¹Ŋgòʼ è ghì yi ki alezuūwkɛlɛ tsughu enyəa fəgha kə̀là ghàʼ tɔɔ̄ wo ghè kò abugho ghàʼ buw, à lò ghəa à mɔʼɔ ghəla ghàʼ ghəə̄ŋ ghè ghò abugho sɛ̀ lo a dzə̀m.

¹²À yò dzə̂ enyəa ghàʼ ləghaa alefòʼn ndûw èghue ŋkāa ghàʼ bâan ndûw ghàʼ à ghê ghì ghəla ghe dzɛ̂ enyəa ghe lo ghî à ne gho, abugho ghe bânlo êzə alo eghue, ghe fi lâʼsò màʼn ghue e ghee.

¹³Ghàʼ kuuwn yò dzə̂ aletō num a tâa daŋso kə̀bəŋ am fwàʼ kən, ghàʼ kuʼù nǎaŋ tsughuu ko an də̀ŋò kəla Zə̀ kə fə̀ dzɛ̂ enyəa ghàʼ kuʼù naŋa a te, alekùʼù naŋa wò a zəŋò ghɛ̀.

¹⁴Ghàʼ kâ ndùw tsə̀ghàtàʼà dzə̀ bəŋ ko am fwàʼ kaʼa tò è so a lo ghî ghəla ghe mò doʼŋkè bughò tɛ̂ fia alô ghɛ̀, ghǎʼ mò lo ghî a sʉesʉ gho alebùghò a vʉ̀a ghɛ̀ â Làbəlà è Kə̀lestò è Dzùŋ.

¹⁵Ghàʼ too dzə̀ yǒ num tɛ̀ɛn dàŋso kə̀bəŋ, nyəa daŋso ndùw am fwàʼ u ghì à li gho, ghàʼ laam chìi ko tùʼ enyəa aŋghəa fə̀ŋ zɛʼɛ ndoʼò nɛɛ nduw, fwàʼ kaʼa kə lo tsoo dùuw sə̌a ndùw nù am bvʉa zɛʼɛ̄.

¹⁶Ghàʼ è ke lo alekə̀aa shwaʼ ù dzùŋ wə̄n an nàʼà təla tə doʼò sə nduw a fia alô ghɛ̀, ghàʼ è ke too sugho yo num alo kəfwàʼ mò ghî nughù ghə̀ fwàʼ nàŋa an də̀ŋò kə̀ li ko

¹⁷Mwàʼsò kə Kəzə̀ kə̀ dzɛ̂ enyəa, “Ghùw wəla ù ləghaa aletsɔ̀ fə̀ŋ alo eghəa, ù kì aletsɔɔ̄ fə̀ŋ am fəgha kəla Mughu ù te lo mò ù m fwàʼ.”

¹⁸Tɔŋlo enyəa Mughu ù te nîi yo ghùw wəla ù kɛɛ̄ tsughuu ghuè u wə̄n wo wə̄n à nəŋ ko tò kəfəgha, à lǎam lǒ ghùw wəla Mughu ù kôʼ tsughu enyəa ù kpè nû.