Read Aghem 2 Kòlentìan 11 Bible Online

2 Kòlentìan 11 - Aghem bible

2 Kòlentìan 11

¹To ghɛ̀ mo nyɛʼɛ zəən tsughu ko nû aŋghəa Ǹ tsôo kə̂aa ndûw ko ghəa gho tò Ǹ laʼsò nù; nya zhəən tsughu ko nlò nû!

²Ŋ̀ ki ŋgòʼ è lə̀ghà è li zo a zəŋò ghɛ̀ mò a ghə̌əŋ Kə̀zə̀, tɔŋlo enyəa mùgho mò ghɛ kpoōm naŋa tsughu â Kə̀lestò, alenìi fughuu ndûw ghɛ̀ tò a lô fughuu nduw wìzən wəla ù naam lo mbumbùʼ â nùm ù wən u mɔ̀ʼ.

³Ǹ sô fɛ tsəŋo enyəa aŋghəa zughu fə̀ nɔm fughu tsughu Êf, mò zughu è te tɔɔ ko nʉghànʉghà tò ekom, ghe lo sèe mɛ̀ŋso nù tuw wɛʼɛ wo, ghɛ̀ lo ti zəghāa tsughu kùum kə kəfwàʼ kəla ghɛ̀ fwaʼā â Kə̀lestò am fə̂ŋ zɛʼɛ e dzə̀m, mò ghɛ̀ fwaʼà an dziī è zɔ̀lɔ.

⁴Ǹ ghəa ghən enyə kə̀aa bòʼ enyəa, abugho ghùw bùghò fughu wô ghɛ â tsʉ̀ zò kùu ndùw Yɛso ù nùghù mò à yò dzə̂ wəla ghǎʼ mò dzaā, ŋkāa ghe yia nî wò shʉghà ù li wo mò à yò dzə̂ wəla ghàʼ mò nî wo, ŋkāa abugho ghe yia boō ndûw làbəlà mò à yò dzə̂ zəla ghɛ̀ mò bûʼ boō dzə, ghɛ̀ m mbà kpènì ghee.

⁵Ghî ghəla ghe toō ko num enyəa à bìso lǒ ghee tum tə Kə̀lestò to, Ŋ̀ kwo dzə yo enyəa ghə̂an fə̀ li fə lo nû ghe tsə̀ghàsə mugho a te.

⁶Abugho M̀ bûʼ tɔ̂ʼ kwo ko yô ghəa à kə̀āa gho, Ŋ̀ kuuwn ki nû tɔ wo, ghàʼ ŋ kəŋ dziī tən tə̀ dzə̀m aledèe səā kɔʼ aghəa ndɛ â ghɛ̀ alo aghəa a dzə̀m.

⁷À lò enyəa mùgho mò bonlo eghəa aletsughuso naŋā tsughu ghùe waŋa a ghueetsə̄ a, enyəa ghɛ̀ kuuwn ghaʼ kɔʼ bòʼ mùgho mò kə̂aa wô shwaʼ u Kəzə̀ wò â ghɛ̀ mò ghɛ̀ kâ mùghò tsə ŋkāa?

⁸À mò mugho tsəa dzweŋe u ghì a Kəzə̀ ù li wə̄n aŋghəa mùghò mò fwaʼa â ghɛ̀; alekùum nîi tsughu, e fɛ lǒ enyea mughò mò fʉgha u mbaaŋ niī wo nû aŋ ghùu ghì a nughù ghò alebùghò yosò ghɛ̀ a te.

⁹Aŋghəa mùgho mò lo fì sɛ̀ mò Ŋ̀ ki yo fəgha ko, Ŋ̀ kamō ghùw fə̀mso dzə̀, nu à mò mugho yosō waazə̂ a sɛ̀ ghəla ghe mò nughù wo am Màsɛ̀donìa. M̀ fi doʼò wò nù, Ǹ doʼn wò nù mùghò è tsoo fəmso yo ghùw wɛʼɛ ù li an dziī è lì.

¹⁰Tò aŋghəa Kə̀lestò kə̀aa səŋò zo, à lò sugho êzə̀ Ŋ̀ kə̂aa sugho səŋò zo, ghùw ù lì vʉ̀a ù yò am mbùʼ e Akayà e dzə̀m ù lò alebughū naŋa mùghò am fə̀ŋ zəla n tsoō ghè zò.

¹¹Mùghò enyə kə̀aa bòʼ kwò à? À lǒ bòʼ Ǹ ləghaa yô ghɛ ŋkāa? Zə̀ kə̀ kwo nû enyəa Ǹ ləghaa nù ghɛ.

¹²Ǹ ndûuw ko â sə ko â fəgha kəla M̀ fwaʼā ghè kò, alebuū bughusô fwee e ghì ghəla ghe tsɔɔ̄ fə̀ŋ enyəa ghe fwaʼà sùghò eghəla to ghàʼ fwaʼā aŋ ghəa ghəla ghe tsôo kaāŋ fə̀ŋ a te.

¹³Ŋgoʼ è ghì ghən lo tum tə agha, ghî a kə̀fwàʼ à fwəlà a sə aghì ghò, ghe nyə gbəla doʼò kɔʼ tò tum tə Kə̀lestò.

¹⁴M̀ məgha nû, Satàn bùʼù nyəā gbəən doʼn kɔʼɔ̄ aŋ tsə̂ndəgha è zɔ̀lɔ.

¹⁵À fi yo dzə̂ ghəa è fughu zo abugho kɔ̀ɔ ŋ wən n nyə bwəlā kɔʼ sugho tǒ kɔ̀ɔ n tsəghatsəgha mò. Alegùŋsò tsughu, ghe kê bɔ̌ɔm kele gùŋsò tsùghuu sùghò fəgha kəla kə kpeēn tsughu am fwàʼ kəla ghe mò fwaʼ ghè kò.

¹⁶Ǹ dzâa kpeʼē tsughu, e kwo ghùw lò moʼò enyəa Ǹ laʼsò nù; ŋkāa mò ghɛ̀ se nîi ndûw ko êzə̀, boo tsughu nlò mugho tǒ ghùw ù làʼso wə̀ èvʉ̀, tò mùghò è bɔŋɔ nyɛʼɛ tsɔɔ̄ sugho fə̀ŋ.

¹⁷Ghəa ghə̀là Ŋ̀ kə̂aa fɛ, Ŋ̀ kə̂aa dzə̀ yò an daʼa kə Mughu ù te, Ŋ̀ kə̂aa tò ghûw ù làʼso, aletɔʼɔ̄ too num enyəa;

¹⁸aŋghəa ndə̀m è àghì tsɔ̌ɔ fə̀ŋ am fʉgha u mbī wo, M̀ bɔŋɔ tsɔ̀ɔ sùghò nù.

¹⁹Tɔŋlo enyəa ghɛ̀ duʼn ndùw enyə alebwiī ghuw ko kə mɔ̀ʼ ghɛ̀ ghê ghì à laʼso gho, mo ghue e eghùe zɛʼɛ̄ e tɔɔ nù!

²⁰Ghɛ̀ boom naaŋ nù abugho ghùw nì naŋā ghɛ tò ukɔ̂, ŋkāa zəāa an zuʼso fɛʼɛ̄, ŋkāa tsèe ghɛ̀ nìi nùghùun fʉgha wɛʼɛ, ŋkāa kɔʼso èghue, ŋkāa abugho ù ghəə̄ŋ ko ghəa à nyuɛʼɛ̄ a fə̂ŋ ghò ênzə̂n a zəŋò ghɛ̀.

²¹Ǹ dzâa wò ko nù an tùw kə̀ dəla ko enyəa ghàʼ ghən mò lɛɛ ghaʼ nû aleghə̂əŋ ghəa yì. Abugho ghùw kǔuwn ləghaa ko aletsɔ̀ fə̀ŋ aŋ ghəa è li zo — Ŋ̀ ghəa ghən fɛ kə̀aa tǒ ghùw ù làʼso — M̀ bɔŋɔ tsɔ̀ɔ sùghò nǔ fə̀ŋ a te.

²²À lǒ mo ghe lo tə̀ Hebə̀lù à? Ǹ lo sugho nû êzə̀. À lò mò ghe lo ghî ghə̀ Ezə̀lɛ̂ à? Ǹ lo sugho nû êzə̀. Ghe səa n tigh kə Abə̀làhâm à? Ǹ sə sugho fughu.

²³À lǒ mo ghe lo kɔ̀ɔ ŋ Kə̀lestò à? Ǹ tsəghàsə̌ ghee — Ŋ̀ ghəa ghən fɛ kə̀aa tǒ ghûw ù zə̀ghaa. Mùgho m fwàʼ ndə̀mà tə aghəa tə̀ səŋò tò, yìa Ŋ̀ kɔʼ ndughutsaʼ an ndə̀mà te tə̀nə̀gha, ghe m mùghò bu sə an ndə̀mà tə tə̀nə̀gha, yìa Ǹ nɔ̂sə̄ aŋ ghùu vʉ zo an ndə̀mà tə tə̀nə̀gha.

²⁴Dzûu tə̀ n sa ghaŋa a tsɔʼ sə aŋ ghə̀m n tə̀kwùu n təgha à ghè mǒ tɛndzūghū alo tənəghā tə tɛ̀.

²⁵Ghe yia bu sə mugho tə nəgha tə təgha alo ekwùu; ghe yia təə̄m sə mugho alo atīa e nəgha e mɔ̀ʼ, kwə̀n chia kə kwə̂n sə ghî ghò nəgha to tə təgha à mùghò a te. Yìa Ǹ təgha bwiī nduw an dzughù bùghò təgha zee è nduw.

²⁶Am bwìi zaŋa zəla Ǹ tsoʼn səā bwîin zeē, dzùghù mò kuŋso ke mugho, ghîitsɔŋɔ ghe wì kè mùghò, Dzûu tə̀ ŋ wì kè mùgho, àsùghò Tòʼò zò. Ghe ŋ wì kè sughò mughò enaʼ, mùghò m kpùw kè sùghò aŋ ŋgwə̄n àsùghò and dzùghùntsòʼ, mùghò n lo sugho an utsù ghàʼ à ghêe fən ghə agha gho.

²⁷Mùghò n də̀m, yìa biso zuw tsughu fala zo, mùghò ŋ koʼò bwǐi ndùw, mùghò n lo dzə̀ŋ, fə̀ŋ è m̀mùghu n zuʼso mùghò, mùghò n zəa tsə̀ghà yò, lò tsəgha ko bêe tə̀ bèe, mùghò n lo am ufwō mò Ŋ̀ ki yo ndə̀mà təndzʉ aledzə̀là.

²⁸Alebùʼù nîi tsughu ghəa à li ghən, Ŋ̀ ŋgee kɔɔ zêe ghue waŋā aŋ ghɛ̀ zəla Ŋ̀ ki a zəŋò ndzweŋe u ghì a Kəzə̀ ghò.

²⁹À lɛ̌ɛ tsughu ndugho a, zəa e doʼŋkè mɔ̂m mùghò a? Ghe bvʉ̂sò màʼà ndùghò, zəa e doʼŋkè mɔ̂m mùghò a?

³⁰Abugho Ŋ̀ ki aletèlè to num, Ŋ̀ ki aletō aŋ ghəa ghəla a dêe tsughuu lɛɛ zaŋā zo.

³¹Kə̀zə̀, Tselè Mughubè Yɛso Kə̀lestò, wəla ù ki kɛɛ wəla u doʼò tən kwo nû enyəa Ŋ̀ kaʼa yo ghā gho.

³²A m bùghò Ǹ lo an Dàmaskùs, gɔvə̀nò wəla ù mò fwaʼà a tsəlà Də̀ŋ kə ghee ko, tɔɔŋ Aletàs, m fughu tsughu kəlâŋ enyəa ghe fêe tsughu naʼ e Dàmaskùs e dzə̀m to ghe kwu mugho,

³³ghe ŋ kuuwn nì zə̀ghàa sə̀ tsùghù wò mùghò alo kəkə̂aa mo ghe mugho tùm sə̀ wò aŋ tɔ̀ŋ è ndughu am bəgha kə ughɔŋ u enaʼ wo, M̀ fi ti sə nû aŋ ghu kə wə̄n.