Read Aghem 2 Kòlentìan 12 Bible Online

2 Kòlentìan 12 - Aghem bible

2 Kòlentìan 12

¹Ŋ̀ ki aletsoō to num; aŋghəa Ǹ tsoō zəā ko yo fəgha ko a te, Ŋ̀ kuuwn ndùuw ko â sə ko aledzaā dzôo mò àsùghò ghəa ghəla Mughu ù te dèe â mùghò.

²Ŋ̀ kwo nu ghùw ù Kə̀lestò ù lì, à ezəŋ tsəghà tsughu tə̀nùu eghə̄m à ghè tò tə chìakò aŋghəa ghe fə̀ nî kɔʼ nduw wə̄n alo kəwalā edzuŋ èdzùŋ. Ù mǒ yia lo to aŋ ghùe u wə̄n, ŋkāa à mò lo mò ù n soʼ sə, Ŋ̀ kwo yo; à kwò ko Kəzə̀.

³Ŋ̀ kwo ko enyəa ghùw wən mò kɔʼ nduw an tsə̀ fə̀ ləŋo fo, ŋkāa ù mò lo aŋ ghùe u wə̄n ŋkāa mò ù n soʼ sə; Ŋ̀ kuuwn kwo yo; à kwò ko Kəzə̀.

⁴Fughu an tsə̀ fə̀ ləŋo fo, ù n zuw aghəa mò fəgha kə nsɔ̌ɔŋnchùw kə̀ li kə ki yo alekə̀aa.

⁵To Ǹ tsɔ̂ fə̀ŋ am bàm e ghûw wə̄n, Ŋ̀ kuuwn yò dzə̂ tsɔ̀ fə̀ŋ aŋ ghùe waŋā, à gɔ̀ʼɔ̀ ko mò lò an lɛɛ zaŋā.

⁶Abugho M̀ mô ləghaa aletsɔ̀ fə̀ŋ, M̀ mô so e yo dzə̄ ghùw ù làʼso, tɔŋlo enyəa M̀ mô so e kə̂a êsəŋò. Yìa kuūwn Ǹ tue maʼà tsughu aletsɔ̀ fə̀ŋ enyəa ghùw lò nîi mugho enyəa Ǹ tsəghàsə̀ fəgha kə̀là ghe kòʼò wo ghè kò, ŋkāa ghəa ghə̀là ghe zuw an dzughu zaŋā.

⁷Alekuūwn ghəə̄ŋ tsughu enyəa e kwo Ǹ lô kɔʼso ghue wo bòʼ ndə̀mà tə kɔ tə aghəa təla Zə̀ kə̀ dê fughu wo â mùghò, ghe n tùm zə̀ghàa wò fʉgha ù fɔɔn wo a zəŋò mùghò enyəa u e fwaʼā a zəŋò mùghò tǒ tum è Satàn, aletə̀ghàsò mùghò enyəa e kwo Ǹ lô muūwn kɔʼsō tsəghàsò ghue wo.

⁸Mùghò m buʼ kəghū â Mughu ù te tə nəgha tə təgha enyəa ù nìi nughù fʉ̀ghà ù fɔɔn wən a zəŋò mùghò.

⁹Ù kuūwn dzɛ̀ â mùghò enyəa, “Dzɔ̂ zaŋa zə m kpe â ghù, tɔŋlo enyəa daʼa kaŋā kə ghue u tɔʼɔ̀ dèe sə̌a kɔʼɔ abugho ghùw lɛɛ̄ tsughu.” À fi lo enyəa Ŋ̀ ki aletsɔɔ̄ fə̀ŋ an lɛɛ zaŋā, to daʼa kə Kə̀lestò kə̀ è lo alemughu a zəŋò mùghò.

¹⁰Zən lò e ghee mùghò boo tsughu lɛɛ zo, esuwnlò, elɛ, ghəa à tughu gho, kə̀fə̀mso àsùghò zəŋ to, mùghò ghəa ghen boo tsughu an zən e Kə̀lestò; nu abugho Ǹ lɛɛ̄ tsughu, M̀ fi tughuu nù.

¹¹Mùghò m fə̀n fəgha kə̀ laʼso ko mò à ghə̌əŋ ghɛ̀, mò à lǎam lò ghɛ alekɛɛ mugho, tɔŋlo enyəa ghəa M̀ bûʼ buw ko fəgha ko, ghî ghəla ghe toō num enyəa ghe lo kɔ tə tətūm, Ŋ̀ kwo dzə yo enyəa nyàaŋ fə eghəa fə̀ lo nû ghe tsə̀ghàsə mugho a te.

¹²Ghəa mùgho mò lo fì sɛ̀, mùghò n zumso tsughu ughue, dè wò tə̀tsə̌a, nsə̀ghàa, fwàʼ sùghò kɔ tə aghəa aledèe tsughu enyəa Ǹ lo tùm è Kə̀lestò è sə̀ŋò.

¹³À lǒ mò ghəa è li lo nû e mɔ̀ʼ mùgho mò ghəə̄ŋ kaāŋ wo an ndzweŋe u ghì a Kəzə̀ u li wən a, mò Ŋ̀ kamō ghəəŋ fìa a lô ghɛ̀ à? À lò enyəa Ŋ̀ kamō fughu dzə̀ ghɛ â fəm ko. M̀ buʼ kəghu enyəa ghɛ̀ nizə mugho an nɔ̀ʼ è te.

¹⁴M̀ moʼn nù alebùghò kôʼ ghɛ̀ aleghəəŋ tsughu nəgha e kə̀ təgha zo M̀ bughò bwîin koʼò ghɛ; Ǹ lo bvʉa yo ghɛ â fəgha kə̀ li ko. À yò dzə̂ fʉgha wɛʼɛ Ǹ ləghaa, Ǹ tsâʼ ghɛ̀. Ndzì yò dzə̂ alenyɔŋɔ ghe e wɛ̄ zo, à lǒ wɛ ù nyɔŋɔ̄ ghe e zə̂ zò.

¹⁵To M̀ fughu fʉgha wə̀n ù dzə̀m Ŋ̀ ki â ghɛ, M̀ buʼù fughuu daŋsô tuw kaŋa aŋ ghùe ù ghɛɛ̄ŋ wo aleghəŋlo enyəa ghɛ̀ noo aŋ ghəa e Kəzə̀. Ghəa Ǹ tsoō ŋgeē ləghaa ghɛ enyə, à lǒ kwò ghɛ̀ kuūwn tɔʼɔ̀ ləghaa yô mugho à?

¹⁶Ghɛ̀ lo nû alebōo enyəa Ŋ̀ kamo ghɛ â fəm kə fughu dzə̀. Ghî à li a kuuwn dzɛ̀ enyəa mùgho mò tɔɔ ko an unʉ̀ghà tò ekom, tsèe ghɛ̀, nìi kèlê fʉgha wɛʼɛ.

¹⁷Ênzə̂n! À lò enyəa ghî ghə̀là mùgho mò tuū wo a vʉ̀a ghɛ̀ à mò lo dzì â mùghò alenɔɔ̄m zə ghɛ a?

¹⁸Mùghò mò ghu kə buʼ tsughu nû â Taetùs enyəa ù bùghò tɛ̂ a vʉ̀a ghɛ̀, mùghò n tum tsughu wàazə̀ ù sɛ̀ ù lòʼ enyəa ù bùghò ghèe wə̄n. Taetùs mò bugho nɔɔm ni nû fəgha kə̀ li ko aŋ ghùu ghɛ̀ à? Ghàʼ à ghee mò mgbaŋa bwiī ko yo ghuw ko kə mɔ̀ʼ à, ki sugho umwam ù mɔ̀ʼ à?

¹⁹Ghɛ̀ è dzaā ko enyəa ghəa ghə̀n à dzə̀m fɛ lo enyəa ghàʼ dəmà alebâaŋ ghue zaʼā an sə kɛʼɛ̄ an nə̀gha zən e dzə̀m. Ɛ̂ŋgaŋ dzə̂! Ghàʼ ghəa ghən kə̂aa an sə kə Kəzə an dziī zəla Kə̀lestò mò lô aleləghā enyəa ghàʼ kə̂a à tè. Ghəa ghə̀n à dzə̀m ghàʼ ghəŋlo a waazə̂ ghaŋa gho, ghàʼ ghəŋlo enyəa ghɛ̀ noo aŋ ghəa e Kəzə̀.

²⁰M̀ fɛ tsəŋo enyəa abugho Ǹ lo bugho fì, Ǹ lô bughò koʼò ghɛ mò ghɛ̀ yo dzə̂ fəgha kə̀là M̀ moʼò enyəa ghɛ̀ lo ghè kò, ghɛ̀ koʼ kɔʼ sugho mugho mò Ǹ yo dzə̂ fəgha kə̀là ghɛ̀ mô ləghaa enyəa mùghò è lo ghè kò. Ǹ tsəŋo enyəa Ǹ lô bughò koʼò wo mò ghɛ̌ yia zughūu, mʉnlo èghue, pfʉso nnə̀ghà alo eghùe, kùmè alo eghùe, màʼn kǎaŋ tə̀nùʼ alo èghue, màʼn kǎaŋ tə̀fom alo eghùe, kɔʼso èghue, sòʼò kǎaŋ sùghò ùtsù.

²¹M̀ fɛ tsəŋo enyəa abugho Ŋ̀ kôom bugho Zə̀ kə̀ lô yia də̂nsò nù tuw kaŋa ko a an sə kɛʼɛ̄, mùghò è ke diī enyəa ghî ghəla ghe mò ghəə̄ŋ bo zo kaām n ti màʼà dzə̀adzə̀ tə aghəa tə̀ nuūŋ tə te to — sə à səa gho, àsùghò ghəa à ndzaŋa kaaŋ ghən.