Read Aghem 2 Kòlentìan 13 Bible Online

2 Kòlentìan 13 - Aghem bible

2 Kòlentìan 13

¹Zən lo ghəəŋ tsughuu nəgha e kə̀ təgha zo abugho M̀ bughò bwîin kôʼ ghɛ. Tò aŋghəa mwàʼsò kə Kəzə̀ kə̀ dzɛ̂ tsughu enyəa, “Abugho ghɛ̀ sɔ̂ʼ ghu ko a zəŋò ghùw ghəa e te e lo ko aletɔ̀ʼɔ̀ tughu abugho ghî à lo a bə̀ghà ŋkāa a təgha ghe lô aletɔ̀ʼɔ̀ teso.”

²M̀ maā bûʼ kʉ̀ɛɛn ghî ghəla ghe mò bûʼ ghəəŋ bo zo sûesʉ àsùghò ghì à li ghə̀n à dzə̀m, M̀ fɛ kʉ̀ɛɛn wo ghee êzə̄ŋ mò Ŋ̀ kaān bughò fì, aŋghəa mùgho mò ghəŋlo mò Ǹ lo nû aŋghəa mùgho bughò bwîin kôʼ ghɛ an nə̀gha e kə̀bə̀ghà zaŋa zo — enyəa abugho Ŋ̀ kôom bugho, Ǹ lo zə̀ghàan yǒ ghee.

³Aŋghəa ghɛ̀ ləghaa tsə̌a, Ǹ dêe wò nù â ghɛ̀ enyəa Kə̀lestò kə̀aa sə̌a wò àghəa a zəŋò mùghò. Aŋ ghəa zɛʼɛ̄, ù dɔ̀ɔ kpàʼa yo kpe wo, Ù lǎam dèe daʼa kə wə̄n am bvʉa zɛʼɛ̄.

⁴Aŋghəa ghe mò bûʼ təghàa ko Kə̀lestò mò ù kì yo daʼa ko, vʉ̀a ù kuuwn lô â tuw ko an daʼa kə Kəzə̀. Ghàʼ ki sugho yo daʼa ko aŋghəa ghàʼ lo alo kəfəgha kə mɔ̀ʼ ghàʼ à ghee, yia a bugho aŋ ghəa zɛʼɛ̄, ghàʼ lo doʼn wò â tuw ko ghàʼ à ghee an daʼa kə Kəzə̀.

⁵Lɛɛn tsughu nlò ghue zɛʼɛ zo ghɛ̀ koʼ enyəa ghɛ̀ naam gaʼ ko nǔ fə̀ŋ a zəŋò Kə̀lestò a. Mɔ̌ɔ kòʼo tsughu nlò ghue zɛʼɛ zo. Ghɛ̀ koʼòkɛ̀lɛ yo enyəa Yɛso Kə̀lestò lò a zəŋò ghɛ̀ à? À gɔ̀ʼɔ̀ mò ghɛ̀ mɔ̂m kè nù, kòʼ tsùghù enyəa ghɛ̀ m bvʉ̀ kòmlò!

⁶Ŋ̀ kwo enyəa ghɛ̀ sô kə̀ŋò kòʼò sə̀a kɔʼɔ enyəa ghàʼ kâ bvʉ̀ kòom dzə̀.

⁷Ghàʼ kuuwn gɔ̀ɔŋ ko enyəa ghɛ̀ lô ghəə̄ŋ boōn ghəa zo. À yò enyəa ghàʼ fɛ dzɛ̀ enyəa ghàʼ n tsə̀ghà, à lò aleghəə̄ŋ tsughu enyəa to ghɛ̀ mô ghə̌əŋ ndùw ghəa a tsəghatsəgha gho, ghəa e buʼù fween ko tò ghàʼ m bvʉ̀ kòmlò.

⁸A yo dzə̂ aleghə̂əŋ bôon ghəa è li zo aŋ ghəa zəla e lo êsəŋò, sɛ̀ laam ti ko an êsəŋò è te.

⁹Tɔŋlo enyəa ghàʼ duʼn nù abugho ghàʼ lɛɛ̄ ghɛ̀ yia kuūwn tughūu. Fəgha kə̀là ghàʼ gɔ̂ŋlo a te lo enyəa to ghɛ̀ mən tsughu aŋ ghəa e Kə̀lestò.

¹⁰Ŋ̀ ghəa ghən fɛ tɔɔ mò Ǹ yo fì sɛ̀ enyəa abugho Ǹ lo bugho, mùghò è ke kôom tɔɔn yo aledè dwaʼa wəla Mughu ù te fughu â mùghò, mo e lo alebə̄ghāa tīsō kɔʼ, mò à yò dzə̂ alebuu saʼā.

¹¹Aletsəlā tsughuu ghəa ghən a waazə̂ ghò, dòʼo nlò kədzûŋ. E dəma tsughuu ko aleghəəŋ ghəa à dzûŋ ghəla a lô tsəghatsəgha, zuw nlò dî zaŋa zo. Dòʼo nlò alo kəfəgha kə mɔ̀ʼ, ghɛ̀ è mughu alo ebūghūnlō. To Zə̀ kəla kə dêe ləgha zo, fughuu sùghò èbughunlo mô lǒ ghɛ̀ à ghee.

¹²Tɔ̀ʼɔ tɔɔŋ zuw tsughu nlò ghue zɛʼɛ zo aŋ ghəa à dzûŋ ghò tò ghî Kə̀lestò.

¹³Ghî à Kəzə̀ ghə̀n à dzə̀m dzɛ̀ enyəa M̀ fughuu wô ghɛ̀ â tɔɔŋ zo.

¹⁴To dzɔ̂ è Mughu ù te Yɛso Kə̀lestò, ləgha e Kəzə̀ àsùghò Zuʼ tə Kəzə̀ təla tə təmdzəə̄ŋ sɛ̀ alo kəfəgha kə mɔ̀ʼ, mô lǒ ghɛ̀ à ghee a dzə̀m.