Read Aghem 2 Kòlentìan 2 Bible Online

2 Kòlentìan 2 - Aghem bible

2 Kòlentìan 2

¹Mùgho mò tsəm tsughu am fə̂ŋ zaŋa enyəa Ŋ̀ ka ghɛ â fə̀ŋ kôom bùghò tèso sùghò enyəa M̀ bughò bwìin kòʼò ghɛ̀.

²Abugho Ŋ̀ ghəə̄ŋ tsughu enyəa ghɛ̀ zuw fɔɔn zo, à sə̀ mùghò kuuwn ghəəŋ ndùghò enyəa mùghò è duʼnlo à, mò à mgbàŋ yò ko ghɛ ghəla Ŋ̀ ghəə̄ŋ tsughu enyəa ghɛ̀ è zuuw fɔɔn zo a?

³Zən lò e ghee mùgho mò tɔm wô ghɛ â mwàʼsò kə̀ chî, enyəa abugho M̀ mô bughòo kpeʼē, e kwo Ǹ lô bughò fanlō aŋ ghùu ghì ghəla ghe mô ki aleghəŋlo enyəa mùghò è tsoʼnlo. Zən lǒ bòʼ Ǹ tɔ̂ʼ kwò nû ghɛ ghə̀n à dzə̀m, enyəa abugho Ǹ duʼnlō, à fi lo enyəa ghɛ̀ duʼn sùghò nù.

⁴Mùgho mò ghɛ tɔɔ wo mò ŋgee muŋe nù, mùgho n lo am bàŋ kə fə̂ŋ, à sə̀ mò alo kətuw. Mùgho mò tɔɔ dzə yo aleghəŋlo enyəa ghɛ̀ zuw fɔɔn zo, mùgho mò ləghaa aledèe wô ghəa Ŋ̀ ŋgeē ləghaa ghɛ a te.

⁵Zə e lô enyəa abugho ghùw wɛʼɛ ù lì kpɛʼɛ̄ ghəə̄ŋ wàazə̀ enyəa ù zuw efɔnlo, ù kà ka ghəəŋ dzə̀ â mùghò, ù ghəŋlo â zəŋò ghɛ̀ a dzə̀m an dzii è lì — aleghəə̄ŋ tsughu enyəa ghəa a te a ka ŋge fɛ̀nlò â wə̄n wəla ù ghəə̄ŋ bonlo;

⁶tɔŋlo enyəa tsû wəla ndə̀m è àghì am bvʉa zɛʼɛ̄ lo mo ghe m fughu â ghùw tò wən, u kpe nû.

⁷E fɛ èzəŋ e lo ko enyəa ghɛ̀ ŋ ki aleghuūw maʼà bo e wə̄n, ghɛ̀ ŋ kòom dzə̀n nduw fə̀ŋ è wə̄n enyəa e kwo ko ù lò so doʼnlò alo emuŋe. Mò ghɛ̀ ka èzə ghəŋlo, muŋe e te lo aleghəəŋ wə̄n, fwee e wən e bughūu kômlò.

⁸M̀ fɛ êzəŋ e buʼu wò kəghu â ghɛ̀ enyəa, ghɛ̀ de nduw â wə̄n enyəa ghɛ̀ naam ləghaa ko nû wə̄n.

⁹Mùgho mo mwàʼsò kən â ghɛ̀ tɔɔ wo alemɔ̀ɔkôʼ enyəa ghɛ̀ nyɔʼɔ̀ bwìi to nù aŋghəa mùgho mò dzɛ̂ naŋā â ghɛ̀ à.

¹⁰Abugho ghɛ̀ ghuūw maʼà bo e ghûw zò, mùghò ŋ ghuuw màʼà sùghò bo e ghûw ù te. Ghùw wəla Ŋ̀ ghuūw maʼà bo e wə̄n zo, abugho Ŋ̀ ghuūw maʼà bo e wə̄n, Ǹ êzə ghəəŋ tsughu an sə kə Kə̀lestò, bòʼ ghɛ̀,

¹¹aleghəŋlo enyəa e kwo ko ghɔŋ e Satàn è lô bughò baŋà kɔʼɔ am bvʉa e sɛ̀, tɔŋlo enyəa a kwo nû dziī tə wə̄n tə̀ biigh tə̀ ghəəŋ tə aghəa to.

¹² Ghəa Ǹ nyə nduw an naʼ e Tə̀lɔ̂as alendùw naʼà Tùm è Dzùŋ è Kə̀lestò zən fughu, mùgho n ndùw kòʼ tsùghù enyəa Mughu ù te maā dzì è fwàʼ kə te ko â mùgho a fughu alo enaʼ tsʉ naŋa.

¹³Zə ŋ kuuwn fə̄msō mùghò enyəa Ŋ̀ kâ wàazə̀ ù sɛ̀ Taetùs fughu kôʼ dzə̀. M̀ fi dzɛ̂ nù â ghee fughu enyəa ghe doʼò kədzûŋ, mùghò n nùghù dàŋso ndùw e zaŋā zo am mbùʼ e Màsɛ̀donìa.

¹⁴Ŋ̀ kuuwn fughu zɔ̀ɔŋ kə Kəzə̀; tɔŋlo enyəa aŋghəa ghàʼ doʼò ndûw fəgha ko kə mɔ̀ʼ ghàʼ à ghê Kə̀lestò, Zə̀ kə̀ mgbɛɛ sèe bwii tsə̀ghà ko ghàʼ tò ghî ghəla ghɔŋ e ghee e lo mo zə m bàŋ an zən e Kə̀lestò. Zə̀ chia kə tsəghà tsughu a zəŋò ghàʼ ghəəŋ tsughu enyəa ghàʼ zughòo ndûw tɔ wəla u lo aŋ ghəa Kə̀lestò, to u nyəŋō ŋgəaa tsughu luʼū tə̀n tə̀ dzə̀m tò zuʼù fə vʉa fə̀ ləə̄m fo.

¹⁵Ghàʼ lo tò zuʼù fə̀ ləə̄m fo Kə̀lestò fughu nduw â Zə̀ kò — ghàʼ lo zuʼù fə̀ ləə̄m fo aŋ ghì ghə̀n à dzə̀m ghe zəā ndûw tuw ko àsùghò ghəla ghe kwə̂ən sâaŋ nduw.

¹⁶Â ghì ghəla ghe kwə̂ən sâaŋ nduw, zuʼù fə te fə bughòo â vʉ zo, â ghì ghəla ghe zəā tuw ko, zuʼù fə te fə bughòo â mùghù zo. À lò ndugho ù kɔʼkpe alo eghəa tò zən à?

¹⁷Ghàʼ yo dzə̄ tò ndə̀m è ghì a mbòʼkùm ghəla ghe nî shwaʼ u Kəzə̀ wò zəa a te, ghəa Zə̀ kə̀ kuūwn tum sə wô ghaʼ, ghàʼ kə̂aa wò shwaʼ waʼa ù səŋo wò an sə kə wə̄n tǒ kɔ̀ɔ ŋ Kə̀lestò n sə̀ŋò mò.