Read Aghem 2 Kòlentìan 4 Bible Online

2 Kòlentìan 4 - Aghem bible

2 Kòlentìan 4

¹Ghəa Zə̀ kə̀ kwusō tsughu se zo a zəŋò ghàʼ, fùghù wò ghàʼ â fwàʼ kən, fəgha kə̀ li kə yo dzə̂ alebughusô fwee zaʼā a te.

²Ghàʼ n tùe màʼà ghəa à dəla a kətūw gho àsùghò ghəa a kələ̄m gho, ghàʼ tue nû alebəla kaŋlo an tɔ u aghì, ghàʼ fwəlà sùghò yò shwaʼ u Kəzə̀ wò. Ghəa ghàʼ laām kə̂aa səā wô êsəŋò enyə an ndɛ, ghàʼ ghəŋlo an sə kə Kəzə̀ enyəa ghî ghə̀n à dzə̀m kele tsughu enyəa ghàʼ ki nû kɛɛ wo.

³Abugho Làbəlà è Dzùŋ zəla ghàʼ zughōo mô lo nàn kə eghəa ko, to e mò nàn dòʼò ko â ghî ghəla ghe kwə̂ənsâaŋ nduw.

⁴Aŋ ghee ghən, ghəa ghe doʼŋkè boō fughu, zʉ̀ u mbī wə n tɔ u ghee u sâʼ màʼà, enyəa ghe lô koʼō dzɔ̀ɔdzɔ̀ tə aghəa təla tə lo an səghanyəgha mə̀là n lò an Làbəlà è Dzûŋ è Kə̀lestò wəla ù lǒ tò Kəzə̀.

⁵Ghàʼ fɛ kə̀aa dzə̀ yò ghəa a ghùe ghaʼā gho; ghàʼ kə̂aa wò ghəa a Yɛso Kə̀lestò, enyəa ù lò Mughù ù te, ghǎʼ yia kuūwn lo kɔ̀ɔ mɛʼɛ mò aŋ ghəa e Yɛso.

⁶À lǒ Zə̀ kəla kə fə̀ dzɛ̂ tsughu enyəa, “Tsə̀ tughūu səā wô alo kələ̄m”, Ù tughu sə wo am fə̂ŋ taʼa alefughūu tsughu tsə̀ enyəa a kôʼ səghanyəgha ŋ Kə̀zə̀ mə̀là n tughūu an sʉ u Kə̀lestò.

⁷Ghàʼ fɛ kuuwn ki kɔ tə ufʉgha ten an tɔ̀e tə etsāʼ aledèe tsughu enyəa fɛ̀ɛn fɛ̀ɛn kə kədaʼa kən lò daʼa kə Kəzə̀, mò à yò dzə kə̀ kaʼā ko.

⁸Tsû ù tsôo sə̌a kaaŋ ko a zəŋò ghàʼ an dziī ten tə̀ dzə̀m, sə̀ kǔuwn wīi tsə̀ghà yò ghaʼ. Nəghā è li zo tuw kə m kpuuw ghàʼ, a n tsoo tii zə̀ghàan yò.

⁹Ghî à tsoo bwìi kàŋlo an tàaŋ tə efwēe taʼà, Zə̀ chia kə tsoō baʼà zəghàan yô ghaʼ, ghe n zàʼ màʼà ndùw ghàʼ, ghe n yo alekuūwn wī.

¹⁰Ghî à tsôo lə̀ghaa ko alewī ghaʼ to ghe mò wi Yɛso, à fi lo enyəa ghàʼ kê lo alekpuūw sùghò ŋgòʼ e evʉ zəla Yɛso fə̀ kpuw ghè zo, enyəa ghî ghə̀ è koʼō wo mughùu e Yɛso zò a zəŋò ghàʼ.

¹¹Aŋ ghəa sɛ̀ lô â tuw ko, a lo ko fʉgha u evʉ̄ aŋ ghəa e Yɛso, enyəa to ghî à mô koʼò wô mùghùu e Yɛso aŋ gwə̀n e eghùe e sɛ̀ zəla e kpuūw.

¹²Ghàʼ boo tsughu aledòʼò fʉgha wə evʉ enyəa ghɛ̀ kuuwn mughuu.

¹³Ghəa ghàʼ lo mò ghàʼ ki boo è mɔ̀ʼɔ̀ zo ghàʼ à ghê ghùw wəla ù tɔm tsughu enyəa, “Mùgho fə̀ boo tsughu nû, mùghò ŋ kə̀aa wò alo aghəa.” Sɛ̀ yia boō fughu tsugho sugho, sɛ̀ yia a kə̂aa wo ghəa gho.

¹⁴Ghàʼ kwo enyəa Zə̀ kəla kə fə̀ nî nughù kɔʼ Mughùbè Yɛso alo evʉ̄ lo nìi nùghùun dzə̌əŋ kɔʼɔ ghàʼ à ghee, ù nìi wô sɛ̀ a dzə̀m an sə kə wə̄n.

¹⁵Ghəa ghə̀n à dzə̀m fɛ lo ko aleyòsò ghɛ̀; ghəa dzɔ̀ e Kəzə̀ kə̀ nyəŋō ndûuŋ nduw â ndə̀mà tə aghì tò, e lo nû aleghəŋlo ghe e ŋgee fughuu zɔ̀ɔŋ kò, mò à fi lo ŋkɔʼso ghe fughuu â Zə̀ kò.

¹⁶Zən lò e ghee fəgha kə̀ li kə yo dzə̂ alebughusô fwee zaʼā a te. Ghəa ghue waʼa wə̄n fɛ a beē laā nduw, Zə̀ kə̀ tsôo kǔuwn fughuu tsə̀ghà ko ghàʼ â mùghù e fughu zo tsuʼu mən n dzə̀m n dzə̀m.

¹⁷Nyàaŋ fə utsù fə̀là ghàʼ zuw kəŋo ndûw fɛ lo tsùuŋ yò, fə fɛ ndzùuŋ nǎaŋ ghàʼ an səghanyəgha n sə̀ŋò mə̀là n dòʼò tən, mò n tsə̀ghàtàʼà sə tsû wə̄n.

¹⁸À ènyə lǒ bòʼ ghàʼ lɛɛn yò ghəa ghəla a koʼò nduw, ghàʼ lɛɛn ndùw ghəla a koʼò yo; mbuu ghəa ghəla a koʼò nduw kə̀aa lò tsughu ko nû, ghəla a koʼò yo kuuwn doʼò tə̀n nû.