Read Aghem 2 Kòlentìan 5 Bible Online

2 Kòlentìan 5 - Aghem bible

2 Kòlentìan 5

¹A kwo nû enyəa abugho ghe sâʼ maʼà tsughu pfʉ̌a kəla sɛ̀ mughu a te fɛ aŋ ghueekətsə̄, tɔ̂ɔŋ gwən e ughùe e sɛ̀, sɛ̀ ki nû ndughu Zə̀ kə̀ naŋā â sɛ̀, ndughu mò à kà bɔ̀m dzə̌ ghùw nsɔ̌ɔŋnchùw, ndughu mò è dòʼò tə̀n nû alo kəwālā.

²Sɛ̌ yia sɔɔ̄ ghue zo êzə̄ŋ, mbùŋlò enyəa to a mô kì ghue zəla sɛ̀ kê kele alo kəwalā,

³enyəa abugho sɛ̀ lo aŋ ghùe è fughu zən e kwo ko ghe lô koʼò enyəa sɛ̀ lo â ghue è zum zo.

⁴Tɔŋlo enyəa aŋghəa a naam lo aŋ gwə̀n e ughùe e wii zən, sɛ̀ sɔɔ èghue alo mbūuw an ndə̀mà tə utsù təla tə dəla â zəŋò ghàʼ; à yò dzə̂ enyəa a ləghaa alekpuūw naŋa taʼà tsughu gwən e ughùe zən, à lò enyəa Zə̀ kə̀ è lo alebaʼsō wô mùghùu è fughu zo a zəŋò sɛ̀, to gwən e ughùe zəla e doʼò tən kwuū ŋgwûu tsughu fəgha kə evʉ̄ kən.

⁵À lò ghuūghùe u Kəzə̀ u biān naŋā tsughu sɛ̀ aŋ ghəa ghən, dzə̀n nàŋa wò Shʉ̀ghà u wə̄n am fə̀ŋ tə sɛ̀ aledèe wô enyəa kə lo fughuu mɛ̀ʼn nǔ sɛ̀ â fʉgha wəla kə fə̀ to naŋā â sɛ̀.

⁶Zən lò e ghee ghàʼ tsô ki tsəghà ko fə̀ŋ è te. Ghàʼ kwo nû enyəa abugho ghàʼ lo aŋ gwə̀n e ughùe zaʼā, ghǎʼ fi yo dzə ghàʼ à ghê Mughu ù te;

⁷nu ghàʼ fɛ mùghu ko am fəgha kəla a boō fughu tsughu a te, mò à yò dzə am fəgha kəla a koʼò nduw.

⁸Ghàʼ tɔ̂ʼ ki fə̀ŋ è te, ghǎʼ yia a laām ləghaa enyəa to a mô yò dzə̂ aŋ gwə̀n e eghùe zaʼā, to ghàʼ mô lǎam lò aŋ ghùe è fughu zo ghàʼ à ghê Mughù ù te.

⁹À fi lo enyəa abugho a lô ko aŋ gwə̀n e ughùe ŋkāa a buw, ghàʼ kwɛ̂ nàŋa tsughu enyəa ghàʼ è ghəŋlo enyəa fə̀ŋ è wə̄n e zɔlɔ.

¹⁰ Tɔŋlo enyəa sɛ̀ ghən à dzə̀m lo ndùw nyə̌a tēen nù an tia e sāʼ e Kə̀lestò. Ghùw ù sɛ̀ e ke lo alekelê namso kəla kə kpe â wə̄n — kə̀ dzûŋ ko ŋkāa kə̀ biigh ko, kùu ndùw fəgha kə̀là ù lǒ mò ù m fwàʼ aŋghəa ù mò lò aŋ gwə̀n e ughùe e ghûw wə̀ nsɔ̌ɔŋnchùw.

¹¹Ghàʼ kwo nû ghəa zəla e niī aletsəŋ Mughu ù te, zə lo eghee ghàʼ buʼu wô ghî ghò â ghu ko ghe e tsəŋo nduw sugho Wə̄n. Zə̀ kə̀ tɔ̂ʼ kwò nû fəgha kəla ghàʼ lo ghè kò, yìa M̀ moʼò sugho enyəa ghɛ̀ kwo sugho nû fəgha kəla Ǹ lo ghè kò am fə̀ŋ tɛʼɛ.

¹²Ghàʼ kôom kɛ̌ɛ kpeʼe wò dzə̀ yò ghue zaʼa zo â ghɛ̀, ghàʼ dêe wò ghɛ̀ â dzì zəla ghɛ̀ lô aletsɔɔ̄ fə̀ŋ a te a zəŋò ghàʼ, tò ghɛ̀ è lo alebèlè ghì ghəla ghe kɔʼsō ghue zo am fəgha kəla ghùw lǒ ghè kò, mò à yò dzə am fə̂ŋ zəla ghùw ù te ki ghè zò.

¹³Abugho à kpaʼ lô enyəa ghàʼ yo dzə̂ an tɔ waʼā, à lò ghəa e Kəzə̀, abugho ghàʼ kuūwn tɔ̂ʼ ti an tɔ waʼā; à lò aŋ ghəa zɛʼɛ̄.

¹⁴À sɛ̀ fɛ̀ êzə̄ŋ ki ləgha zəla Kə̀lestò ki â sɛ̀, aŋghəa sɛ̀ zuwkɛlɛ̄ tsughu dzə̂ enyəa ghùw ù lì maā kpuw an tuw u aghî a dzə̀m, à fi lo enyəa sɛ̀ a dzə̀m maā kpuw sùghò.

¹⁵Kə̀lestò fə̀ kpuw an tuw u ghì ghə̀n à dzə̀m, enyəa ghî ghəla ghe mughu ghe ka mùghùu dzə̀ aŋ ŋgə̀ŋ è ghee; ghe e mùghù an zən e wə̄n wəla ù fə̀ kpuw kɔʼsə alo evʉ aŋ tuw u ghee.

¹⁶À fì lò enyəa alenìi nughù tsughu êzə̄ŋ ndùw â sə ko, sɛ̀ ki dzə yo aletsòo nìi ko ghùw aŋghəa ghî à koʼò ndûw kôʼ e wə̄n zo a te mbuu sɛ̀ fə̀ bûʼ nî dzə Kə̀lestò aŋ kôʼ e wə̄n, sɛ̀ yia kôom yo alenì wə̄n êzə̀ êzə̄ŋ.

¹⁷Ghùw wəla ù lò fəgha ko kə mɔ̀ʼ ghèe Yɛso Kə̀lestò, ù fi lo ghûw ù fughu; ghəa à wii ghə n tsə̀ghà mìaa, à fughu yia a bugho.

¹⁸Ghəa ghə̀n à dzə̀m à ghə̌əŋ Kə̀zə̀, Zə̀ kəla ù mò biān tsughu sɛ̀ à ghee am bàm e Kə̀lestò, fùghù tsùghù sùghò sɛ̀ â fwàʼ kò enyəa sɛ̀ è biaan ghî ghò ghèe ghê Zə̀ kò.

¹⁹À fi lo enyəa à fə̀ lo am bàm e Kə̀lestò Zə̀ kə fə̀ ndoʼò biāan ghèe ghê ghì gho a te am mbī, kè ndoʼò taŋ yo bôo tə ghee to, kə m fughu naŋa nyə̀ tsùghù sùghò shwaʼ ù bian u aghì wò aŋ ghu kaʼā.

²⁰Ghàʼ fɛ êzəŋ e lo tuw kə Kə̀lestò, tò è so ghuūghùe u Kə̀zə̀ u mò ghu kə wə̄n kə̀buʼu kə buʼ am bàm zaʼā. Ghàʼ buʼu kə̀ghu an zən e Kə̀lestò enyəa ghɛ̀ biaan tsughu ghɛ̀ à ghê Zə̀ kò, ghɛ̀ ka kôom dòʼò sùghò ghî à kətūw a wə̄n gho, ghɛ̀ doʼo nduw fən a wə̄n gho!

²¹Kə̀lestò mò ki yo bo è li zo, Zə̀ kə̀ ŋ ghəŋlo è tsughu ù n dòʼò tsùghu tò ghûw ù bǐigh bòʼ ghəa e sɛ̀, enyəa aŋghəa sɛ̀ à ghee təmdzəə̄ŋ kɔʼ, a ke e dzeŋe lo sugho tsəghatsəgha a vʉ̀a Zə̀ kò.