Read Aghem 2 Kòlentìan 6 Bible Online

2 Kòlentìan 6 - Aghem bible

2 Kòlentìan 6

¹Aŋghəa sɛ̀ à ghê Zə̀ kə̀ dzeŋe fwaʼà êzə̀, ghàʼ buʼu wò kə̀ghu â ghɛ̀ enyəa e kwo ghɛ̀ lô bomlo enyəa dzɔ̂ zəla Zə̀ kə mò de â ghɛ̀ e tsəghàa mîaa kə̀nughùnùghù.

²Ghɛ̀ zuw fəgha kəla Zə̀ kə dzɛ ghè kò a, “Ghəa nəgha e kpe tsughu â mùghò aleləghā ghɛ̀, mùgho n dì zɛʼɛ e zuw, a m bùghò tsuʼ ù bəghasəa u aghì ù kpe tsughu, mùghò n yòsò kɔʼ ghɛ̀.” Kòʼô, nəgha e te zə m kpe, zəla Zə̀ kə ki aledè dzɔ̀ e wə̄n a te, àsùghò nəgha zəla Zə̀ kə̀ bəghaasəa ghî ghò a te zə m bùghò sə.

³Ghàʼ naaŋ yo fàŋa ko an dzì è ghùw ù lì, ghe lô koʼò enyəa fwàʼ kaʼa kə dzəa nù.

⁴Ghàʼ kuuwn kɛɛ kô ghue zaʼa tǒ kɔ̀ɔ ŋ Kə̀zə̀ aŋ ghəa ghaʼā à ghəəŋ gho a dzə̀m; am fə̂ŋ zəla ghàʼ kɔlɔ tsughu ghè zò an tsù wəla ghàʼ koʼ, kòʼ ghəa à tughu gho, kòʼ à bìigh gho,

⁵ mʉ ŋkwə̂n, kɔʼ ndughutətsāʼ, ghî yia kə̂m ghaʼ, tsù ghàʼ, ghàʼ yia koʼò zeē nduw dzə̀ŋ, bùghò kòʼò bwǐi ndùw sùghò.

⁶Ghǎʼ yia dê tsughu enyəa ghàʼ zɔlɔ nù, dè sùghò enyəa ghàʼ tɔɔ nù, dè sùghò ghue zəla ghàʼ maʼà tsughu, dè sùghò dzɔ̂ zaʼa, Shʉghà ù Kəzə̀ vʉa u lo a zəŋò, ghǎʼ yia ləghaa ghî ghò am fə̂ŋ zaʼa e dzə̀m,

⁷Ghàʼ yia dzaā èsəŋò, fwàʼà ndùw àghəa an daʼa kəla Zə̀ kə̀ fughu â ghàʼ. Ghəa a tsəghatsəgha ghəla ghàʼ ghəə̄ŋ nduw ghè ghò, à lò fʉgha u tsam waʼa wəla ghàʼ ki aŋ kwè ù təma wo àsùghò alô ù kwû wò.

⁸Ghî à li yia kɔʼsō ghāʼ, à li yəa tsughòsò ghaʼ, à li yia lɛɛ̄n ghaʼ an sə̀ biigh zo, à li gho an sə̀ è dzûŋ zò. Ghî à lɛɛn ghàʼ tò mbaaŋ tə aghì, ghǎʼ yia naām ti ko alo èsəŋò.

⁹Ghî à li yia a lɛɛ̄m ghaʼ tò ghî ghəla ghe kwo yo ghee, mo ghe gbaŋ kwo nû ghaʼ. Ghî à li a lɛɛn ghàʼ tò ghàʼ lo ghî à kpuuwn gho, aŋghəa ghɛ̀ koʼò wò, ghǎʼ yia naām lô â tuw ko; ghe yia buū zeē ghaʼ am fʉgha wə ŋkwə̀n, ghe yia yo alewi ghaʼ.

¹⁰Ghî à li yia lɛɛn ghaʼ tò ghàʼ lo ghî ghəla ghe lô alo esē, mo a tsôo dùʼn tsə̀ghà ko nù. Ghî à li yia lɛɛn ghaʼ tò ghî ghəla ghe ki yo fəgha ko, mo a ki fʉgha wə̀n ù dzə̀m, à li lɛɛ̄n ghàʼ tò ghî à laa gho, mò ghàʼ ghəəŋ nù ndə̀m è àghì zə̀a è kuū.

¹¹Wo ghî a Kɔ̀lênt ghò, ghàʼ kâ dzughu e nân dzə̀ â ghɛ̀, ghàʼ sə wò tughō, mbuw naŋa kɔʼ fə̀ŋ zaʼa tughoo â ghɛ̀.

¹²Ghàʼ ləghaa ghɛ̀ a dzə̀m am fə̂ŋ zaʼa e dzə̀m, à kǔuwn lò ghɛ, ghɛ̀ dêe yò ləgha zɛʼɛ zo zəŋò ghàʼ.

¹³Ŋ̀ ghəa ghən kə̂a wô to Ǹ lô kə̂āa â wɛghêtùghùu gho enyəa ghɛ̀ bɔŋ tsʉ naŋa kɔʼ sugho nlò fə̂ŋ tɛʼɛ to tughō â ghàʼ.

¹⁴Kà è zəa faa nlo ghɛ̀ à ghê ghì ghəla ghe doʼŋkè boo fughu â Zə̀ kò. Nu ghəa e tsəghatsəgha e ki yo ghəa è li zo ghèe ghê ghəa à kwu gho. Ŋkāa tsə̀ lò nû aledòʼò dzəəŋ ghèe ləm ko ŋkāa?

¹⁵Kə̀lestò kǐ kwò ghèe Bɛlial[1] lo a? Ŋkāa ghùw ù Kə̀zə̀ kǐ kwò ghèe ghùw wəlà ù doʼŋkè boo Kəzə̀ a?

¹⁶Zʉ̀kɔ̂ŋ u ndûw nyə kə̀ŋ kə kwò an Ndùghù è Kə̀zə̀ è ne a? Nu sɛ̀ lo ndughu è Zə̀ kə̀la kə lô â tuw ko; aŋghəa ghuūghùe u Kəzə̀ kə fə̀ dzɛ̂ tsughu enyəa, “Mùghù kaŋa kə kê lò tsəgha ghàʼ à ghê ghì ghaŋa gho, mùghò e ke mughu am bvʉa e ghee, bwìi dzə̌əŋ ghàʼ à ghee. Mùghò e ke lo Zə̀ kə ghee ko, ghe e ke lo ghî ghaŋa gho.”

¹⁷Mughu ù te dzɛ̂ tsùghù enyəa, “À fi lo enyəa ghɛ̀ zəghaa tsughu ghee, ghɛ̀ doʼo sə wo nəŋ, ghɛ̀ ka e mɔɔ̄m fʉgha wəla u zɔlɔ̄ yo, Ǹ lo daŋso kpeēnîi kɔʼ ghɛ.”

¹⁸Mughu ù te dzɛ̂ tsùghù enyəa, “Ŋ̀ kê doʼò tsughu tsele wɛʼɛ, ghɛ̀ doʼo tsughu wɛ ghaŋa à nûu ghò àsùghò à zən gho.”