Read Aghem 2 Kòlentìan 7 Bible Online

2 Kòlentìan 7 - Aghem bible

2 Kòlentìan 7

¹Waʼāwaʼ, ghəa sɛ̀ ki dzə̂ to kəla Zə̀ kə̀ to naŋā â sɛ̀, bùghò nlò tò sɛ̀ nîi nughù ghu kə sɛ̀ aŋ ghəa ghə̀là à dzə̀m a lô aledzəsô ghue e sɛ̀ àsùghò fə̀ŋ tə sɛ̀ tò, a ghəə̄ŋ tsughu enyəa sɛ̀ mughùu tsughu mughùu è zɔlɔ zəla e kɔʼkpē mo a tsəŋo ndùw Kə̀zə̀.

²Zèe zə̀ghaa tsughu nlò fə̂ŋ tɛʼɛ to sɛ̀; ghàʼ kâ ghəa e bonlo â ghùw, ghàʼ kâ ghùw tsê, ghàʼ kâ tsə̀ghà tsùghù an tɔ wəlà ghàʼ ki enyəa ghàʼ baāŋ nî fʉgha u aghì.

³Ŋ̀ ghəa ghən kə̂aa wò dzə̀ yò enyəa Ǹ ləghaa alesaʼā wô ghɛ̀; nu M̀ maā bûʼ dzɛ̀ enyəa ghàʼ ŋge gaʼ fə̀ŋ a zəŋò ghɛ̀, àsùghò enyəa to sɛ̀ mô dzèŋe lò ko a dzə̀m, ŋkāa a kpuwnlo ŋkāa a lô â tuw ko.

⁴Ghɛ̀ lo ghî ghə̀là Ǹ lô alenaŋā aŋ ŋgòʼ; Ŋ̀ ŋgee tsɔ̀ɔ fə̀ŋ a zəŋò ghɛ; fə̀ŋ zaŋa fɛ tsòo zʉ̀ʉn ko enyə. Aŋghəa sɛ̀ tsoō kele ko ndə̀mà tə utsù tò fɛ, yìa Ǹ naām ŋgeē duʼn ko nû.

⁵Ghəa ghǎʼ fə bûʼ nyə wô ko am Màsɛ̀donìa, a ka fə dɔ̀m zʉ̀ʉn ghue zo, tsû wə̀ n tsô lò kaaŋ ko a zəŋò ghàʼ bâa tə̀ dzə̀m — ghàʼ n nuum ndùw èghue an ushwāʼ a fɛ a beē, ki etsəŋ alo təfə̀ŋ.

⁶Kə̀zə̀, kəla kə tsəmsō ghî ghəla fə̂ŋ tə̀ baŋā ghee, ŋ kuuwn dzə̀n wò fə̀ŋ taʼa aŋghəa kə fə̀ ghəəŋ tsughu enyəa Taetùs bùghò.

⁷Fə̂ŋ taʼa tə ka fə ka nyə ko aŋghəa Taetùs mò bugho tɛ̂ a vʉ̀a ghàʼ, à fə̀ lo sugho aŋghəa ghɛ̌ fə̀ dzə̂n sugho fə̀ŋ è wən a te, aŋghəa ù mò dzɛ̂ wô ghaʼ ghəa ghɛ̀ ləmlo alekòʼ mùgho, dìi èghue am fəgha kəla ghɛ̀ mò ghəŋlo, mùʼù â mbuuw mò alefwàʼ fəgha kəla mùgho mò dzɛ̂ naŋā, mùghò ŋ kòom fə̀ghaan duʼn səso tsughu enyə.

⁸Abugho mwàʼsò kaŋa kə mò bûʼ ghəə̄ŋ ko ghɛ enyəa ghɛ̀ è muŋe, Ǹ dîi yò ghue wo enyəa mùghò mò tɔm wo êzə̀, aŋghəa mùgho mò bûʼ dî ko ghue wo, nu Ŋ̀ kôʼ enyəa mwàʼsò kə te kə mò ghəəŋ nû ghɛ̀ m muŋe, à n lo enyəa à lò ko aŋ kə̀mà fə enə̀gha.

⁹Zə êzəŋ lo ko enyəa Ǹ duʼn nù, à yò dzə̂ enyəa ghɛ̀ mò lo alo ese, à kǔuwn lò enyəa ghɛ̀ mò alo ese lo alefə̀là fughuu ndûw ghue zɛʼɛ â Zə̀ kò; tɔŋlo enyəa muŋe zɛʼɛ̄ e mò lo aŋghəa Zə̀ kə fə̀ fôʼ naŋa enyəa zə e lo êzə, mò aŋ ghəa ghə̀ è yì, a ka fə ghəa è li e ghəəŋ bonlo â ghɛ̀.

¹⁰Tɔŋlo enyəa ŋgòʼ è muŋe zəla ghùw muŋē mò à lò zəla Zə̀ kə̀ ləghaa ghəŋlo enyəa ghî a tiī kuūwn kɔʼ fə̂ŋ te ghee, to ghe e lo alezə kətuw, mò ghùw yò dzə̂ aledì ughue a te. Muŋe zəla à tsò lô ko e ghûw wə̀ nsɔ̌ɔŋnchùw zò bughòo â vʉ zo.

¹¹Kòʼ ghəa ghə̀là ŋgòʼ è mùŋe zəla Zə̀ kə̀ ləghaa ghəə̄ŋ tsughu ghɛ a, ghɛ̀ yia muʼū â mbuuw mò, ghɛ̀ yia a ki ghɛ̂ zò aledèe tsughu enyəa ghu ghɛʼɛ zɔlɔ nù aŋ ghəa ghəla ghe kwuū ghɛ a te. Ghɛ̀ mò pfʉso n nəghà ghɛ̀ à ghê ghì ghəla ghe mò ghəəŋ boōn ghɛ â ghəa gho, ghɛ̀ n tsəŋo enyəa Zə̀ kə lo fɔeso nù ghɛ, ghɛ̀ n ləghaa enyəa tò M̀ mô bughò tɛ̂ a vʉ̀a ghɛ̀, ghɛ̀ n dəmà sùghò aleghə̂əŋ ghəa zəla e lô tsəghatsəgha, ghɛ̀ m fɔesò ghì ghəla ghe ghəə̄n boōn tsughu ghəa zo. Aŋ ghəa ghən a dzə̀m, ghɛ̀ n dè enyəa ghɛ̀ kaām nɔʼ dzə̀ aŋ ghəa è li zo.

¹²Ghəa mùgho mò bûʼ tɔm wô ko ghɛ â mwàʼsò kò, à mò yo dzə̂ aŋ ghəa e ghûw wəla ù mò fôʼ bonlō, ŋkāa aŋ ghəa e ghûw wəla ù mò fala aŋ ghə̀a è biigh e te zo, à mò kuuwn lo aledèe fughuu kɔʼ ghɛ̂ zəla ghɛ̀ ki a zəŋò ghàʼ an sə kə Kəzə̀.

¹³À fi lo enyəa ghɛ̀ m fə̀ŋ taʼa tə dzə̂n. Ghàʼ mò tsoʼn nû, Taetùs m fəghaan bùghò ghə̌əŋ kpeʼe wò enyəa ghàʼ ŋgee tsoʼnlo an tsoʼn kə wə̄n; an tsaʼ kə̀ saa kəla ghɛ̀ a dzə̀m mò kâ mam nduw am fə̂ŋ è wə̄n.

¹⁴Tɔŋlo enyəa abugho M̀ mô tsɔ̂ɔ nduw fə̀ŋ â wə̄n a zəŋò ghɛ̀, to ghɛ̀ kâ mò mùghò bvʉsò màʼà dzə̀. Ghəa ghǎʼ mò dzâa êsəŋò â ghɛ̀ aŋ ghəa ghən à dzə̀m ghǎʼ mò kəaa, à bɔ̌ɔm lò êzə̀ num zəla ghàʼ mò toō bòʼ ghɛ̀ â Taetùs m bùghò sə wô sugho êsəŋò.

¹⁵Ləgha zəla ù ki a zəŋò ghɛ̀ e noom ndùw nù aŋghəa ù mòʼn dzə̂ ghəa ghə̀là ghɛ̀ mò bɔɔ̄m ləə̄m ko alezūw â wə̄n àsùghò aŋghəa ghɛ̀ mò kpenī wə̄n a te aŋ ghùe è tsəəŋ zo.

¹⁶Ǹ duʼn nù enyəa ghɛ̀ lo nû ghî ghəla Ǹ lo alenaŋa fə̀ŋ a te, alo aghəa a dzə̀m.