Read Aghem 2 Kòlentìan 8 Bible Online

2 Kòlentìan 8 - Aghem bible

2 Kòlentìan 8

¹Waazə̂ ghò, ghàʼ ləghaa enyəa ghɛ̀ kele tsughu dzɔ̂ zəla Zə̀ kə̀ mò dê tsughu â dzeŋe kə ghì a Kəzə̀ ghò am mbùʼ è Màsɛdonìa.

²Ghe mafə kûm bìso ŋgè mɔ̀msò kòʼ an ndə̀mà tə utsù təla ghe fə̀ tsəgha a te, ghe kǔuwn tsô naam lò ko alo eduʼnlo, dùʼnlo e te zə ghəŋlo ghe m bughuu â ghù ko alefughu ghî ghò â fʉgha wò aŋghea ghe mò buʼù laa ko nû, ghəa ghə n tughuu sùghò a zəŋò ghee.

³Nu, ghəa Ǹ lô aledzɛ̀, chìa mò fughuu nû bùʼù fùghuu tsə̀ghàa ghəa ghî a mò kwo enyəa ù lò alefughu a te, ghe m fughuu sùghò am fə̂ŋ è ghee e dzə̀m, mo kâ ghee kɔ̂n dzə̀.

⁴Ghe ŋ kûu bùʼu wò kə̀ghu â ghàʼ enyəa ghàʼ zəghàa tsughu ghee ghe e yosō nduw sugho ghî à Kəzə̀ ghəla a ghe mò laā an Yɛ̀lusalɛ̀m.

⁵Ghe ŋ ghə̂əŋ ghəa ghən an dziī zəla ghǎʼ mò buʼù moʼn yo ghe zò, fùghù ndùw dzə̀ ghue e ghee â Mughu ù te, daŋso fùghù wò â ghàʼ, aŋ ghəa Zə̀ kə̀ ləghaa.

⁶Zən lò e ghee ghàʼ buʼ tsughu ghu ko â Taetùs enyəa aŋghəa ù mò kaʼ naŋā tsughu dzə̄ dzɔ̀dzɔ̀ kə kəfwàʼ kən ghɛ̀ à ghee, ù mìasò mɛʼɛ̀ kɔʼɔ̄ ko nù.

⁷Aŋghəa ghɛ̀ tsū sə ko alo aghəa a dzə̀m, aleboō fughu, aŋ ghəa à kəaa gho, an tɔ wɛʼɛ, aŋ ghɛ̀ zəla ghɛ ki, àsùghò an ləgha zəla ghɛ̀ ki a zəŋò ghàʼ, ghɛ̀ ghəəŋ tsughu enyəa ghɛ̀ tsu sugho sə ko alemwaʼā.

⁸Ŋ̀ ghəa ghə̀n â ghɛ̀ kə̂aa wò dzə̀ yò tò M̀ fughuu wò kə̀làŋ. Ǹ dêe wò aŋghəa dzweŋe u ghì a Kəzə̀ ù li ghən ki ghɛ̂ zo a te aleyoso ghî gho, alemɔ̀msò kôʼ enyəa ləgha zɛʼɛ e lo nû kùum kə eləgha ko a?

⁹Tɔŋlo enyəa ghɛ̀ kwo nû dzɔ̂ e Mughubè Yɛso Kə̀lestò zò, enyəa aŋghəa ù mò buʼù kuū ko fɛ, ù n naam tùe zə̀ghàa ndùw kô kum e wə̄n e t zo bùghò dòʼò tsughu ghùw ù lǎa ko ghəa zɛʼɛ, enyəa an lɛ e wə̄n zən, ghɛ̀ è lo alebùghò doʼò ghì a kuu gho.

¹⁰Tsʉ̂ zaŋa aŋ ghəa zən lò enyəa à dzɔ̀ tsəgha ko enyəa ghɛ̀ miaso kɔʼ fəgha kə̀là ghɛ̀ mò kaʼ naŋā tsughu aleghəŋlo alo kənûm. Ghɛ̌ fə̀ ka yo ko ghî a kəsə gho aleghəəŋ ghəa ghən gho, ghɛ̀ mò ki eghɛ̂ aleghəəŋ ghəa a te gho.

¹¹Mìaso kɔʼ nlò, to e doʼò tsughu enyəa ghɛ̂ zəla ghɛ̀ ki aleyòsò aghì a te kpeē dzəə̄ŋ ndûw ghèe ghəa yìa ghɛ̀ mîaso kɔʼ am fʉgha wəla ghɛ̀ ki êzə̄ŋ.

¹²Tɔŋlo enyəa abugho ghɛ̂ e te e lo, Zə̀ kə̀ fəgha kə̀là ghùw fughu nìi ndùw sùghò am fəgha kəla ghùw ù te ki, à yò dzə̂ am fəgha kə̀là ù ki yo.

¹³Ŋ̀ kâ ghəa ghən dzɛ̂ tsùghù dzə̀ enyəa to ghəa a mô zaŋsò kɔʼ a zəŋò ghì à li gho ghə e kuuwn dəla a zəŋò ghɛ̀ à li gho, à kǔuwn lò enyəa to ghəa a mô doʼò tsughu eghəla â ghì ghò a dzə̀m.

¹⁴Ǹ dzɛ̂ enyəa, aleghəə̄ŋ tsughu enyəa ghəa ghə e alo eghəla, ghɛ̀ ki alefughuu nduw ghî ghò â fəgha kəla ghɛ̀ ki êzə̄ŋ mo ghe ki yo, to ghe e fughuu wo sugho ghɛ â kəla ghe ki, mò ghɛ̀ ki yo, to ghəa ghə e bwiī nduw alo eghəla.

¹⁵ Aŋghəa ghe tɔm naŋā enyəa, “Ghùw wəla ù fə̀ ŋge zûuŋ naŋā fʉgha wo, ka fə ŋge kele sùghò ndə̀m, ghùw wəla ù fə̀ zûuŋ ko mbəs ka fə ŋge kele sùghò mbəs.”

¹⁶Ŋ̀ kuuwn fughûu zɔ̀ɔŋ kə Kəzə̀, Zə̀ kəla kə mò dzə̂n ndûw ghəa à dzûŋ à mɔʼɔ̄ ghəla Ŋ̀ ki a zəŋò ghɛ̀ am fə̂ŋ è Taetùs.

¹⁷Ù ka mo ka boo dzə̀ bòʼ ghu kaʼa kə̀ buʼu kən â wə̄n, ù mò tso ki ghɛ̂ e te zo aleyòsò ghɛ̀, ù n tsə̀m tsùghù alebùghò kôʼ ghɛ̀.

¹⁸Ghàʼ tum wò wàazə̀ ù sɛ̀ ù lì ghèe wə̄n mo ghe kwo wə̄n an dzweŋe u ghì a Kəzə̀ wən ù dzə̀m aŋghəa ù nàʼn tùm è dzùŋ a te.

¹⁹À bùʼ kà yò ko êzə̀, dzweŋe u ghì a Kəzə̀ ù tsɔʼ kɔʼ wə̄n enyəa ù è bwiī kaaŋ ghàʼ à ghee aŋghəa fwaʼà nduw fwàʼ kə̀ dzûŋ kən kəla kə fughuu kɔʼso mò â Mughu ù te, àsùghò aledèe tsughu enyəa ghàʼ ləghaa nù alefughu yôsò zò â ghì ghò.

²⁰Ghàʼ kəŋo enyəa to ghùw kà mò ghàʼ saʼ dzə̀ an dzì zəla ghàʼ kwu kele fughu kəla ghî a ndzə̀əm fughuu wo,

²¹nu ghàʼ kaa ləghaa ko yo aleghə̂əŋ ghəa ghəla a lô tsəghatsəgha an kə Mughu ù te, ghàʼ ləghaa sùghò nù aleghəəŋ ghəa a te gho an sə kə aghì.

²²Ghàʼ tuu wò wàazə̀ ù sɛ̀, wəla ghǎʼ mò mɔ̂msò kôʼ tsughu, bùghò kòʼ tsùghù enyəa ù kì nû ghɛ̂ zò an ndə̀mà tə̀ aghəa, mò ù kǔuwn ki eghɛ̂ êzəŋ tsə̀ghàtàʼà aŋghəa ù mò bûʼ ki bòʼ ù nàŋa fə̀ŋ a zəŋo ghɛ̀.

²³Yia a bugho Taetùs, à lǒ ghùw wəla ù dzeŋe fwaʼā ghàʼ à wə̄n alefwaʼā â ghɛ̀; yia abugho waazə̂ a sɛ̀ ghò, ghe lo tum tə dzweŋe u ghì a Kəzə̀ gho, ghe ghəŋlo enyəa Kə̀lestò kele ŋkɔʼso.

²⁴Děe tsughu nlò an sə kə dzweŋe u ghì a Kəzə̀ enyəa ghɛ̀ ləghaa nù ghî ghən, àsùghò enyəa fə̀ŋ zəla ghàʼ tsɔ̂ nduw â ghee kùu ndùw ghɛ̀ à lò êsəŋò.