Read Aghem 2 Kòlentìan 9 Bible Online

2 Kòlentìan 9 - Aghem bible

2 Kòlentìan 9

¹Yia a bugho yosò zəla ghî à fughu â ghì à Kəzə̀ ghò an Yɛ̀lusalɛ̀m Ŋ̀ kôom lɛ̌ɛn yò aletɔɔ̄ dzâa wô â ghɛ̀:

²nu Ŋ̀ kwo nû enyəa ghɛ̀ tsôo mùʼù ko â mbuuw mò enyə aleyòsò; mùghò n tsɔ̀ ndùw sùghò fə̀ŋ aŋ ghɛ â ghì a Màsɛ̀donìa ghò, â ghee enyəa à èzəŋ lo kənûm ghəa ghî a Àkaeyà mò ki doʼò to an sɔ̀ŋ è bii zo alefughu eyôsò; ghɛ̂ zəla ghɛ̀ ki aleyosō n nùmsò kɔ̌ʼ ndə̀m è ghee.

³M̀ fɛ tuū wò waazə̂ a sɛ̀ ghən enyəa fəŋ zəla ghàʼ tsɔɔ̄ a zəŋò ghɛ̀ lò kôom səā kɔʼɔ̄ kə̀nughùnùghù aŋ ghəa zən, enyəa ghɛ̀ ŋ ghue zɛʼɛ e biaan naŋa tsughu, aŋghəa mùgho mò dzɛ̂ naŋa enyəa ghɛ̀ lo lǒ a te.

⁴Abugho kpaʼ ndûw bugho ghàʼ à ghê ghî a Màsɛ̀donìa à li gho, a bughò koʼò wô mò ghɛ̀ kaām ghue zə m biaan naŋa — to sɛ̀ kele kɔʼ tuw kə̀ dəla ko, a e ki yo ghəa zo alekə̀aa kùu ndùw ghɛ̀ aŋ ghəa ghǎʼ mò tɔʼɔ̀ tsɔɔ̄ fə̀ŋ a te.

⁵Zən lǒ e ghee mùgho mò dzɛ̂ enyəa e dzɔ̂ɔ aletsəə̄n tsughu waazə̂ a sɛ̀ ghən enyəa, tò mùghò è bughò, ghe buʼù bughò koʼò dzə̂ ghɛ̀ esə̄, ghe biāan naŋā zîi tsughu fəgha kə̀là ghɛ̀ boō naŋā alefughu, zə e lo tən enyəa à yò dzə̂ fəgha kəla ghe tsəə̄n tsughuu nû ghɛ enyəa ghɛ̀ fughu, à è kǔuwn lò fəgha kə̀là ghɛ̀ tsə̂m kɔʼ alefughu.

⁶Ghəa e te lo enyəa, ghùw wəla ù tam ko sə fə ufʉgha fo, ù ŋ kwùu sùghò fə̀ sə enyə, ghùw wəlà ù muʼ tam tsughu, ù m mùʼ kwùu e sùghò.

⁷Chìa kì ko alefughu aŋghəa ù tsə̀m kɔʼ a te am fə̂ŋ è wə̄n, à e yò dzə tò ù sə̀əm nù, ŋkāa to a wən tsəən ndùw nù, tɔŋlo enyəa Zə̀ kə̀ ləghaa ghùw wəla ù fughuu mò ù fùghuu am fə̂ŋ è dzùŋ.

⁸Zə̀ kə̀ lo nû alefughu ghɛ â bughuun zo naʼèdzə̀m, enyəa ghɛ̀ lo è ki tsəgha fʉgha wə̀n ù dzə̀m ghɛ̀ ləghaa bùʼ tsə̀ghàtàʼà wəla ghɛ̀ ki alekele, tò ghɛ̀ e ke lo aledeē nduw dzɔ̂ zò â ghì a li gho am fʉgha u te wo.

⁹Ghe tɔm naŋa am Mwàʼsò kə Kəzə̀ enyəa, “Ù mwàʼà nu, fughuu ndùw â ghì ghəla ghe laʼā; ghəa a wə̄n a tsəghatsəgha a doʼò tən nû.”

¹⁰Zə̀ kəla kə fughuu ŋgòʼ tò â ghùwsūm àsùghò fʉ̀ghàzəa wo â ghì ghò alezə, kə lo fughuu mɛ̀ʼn ghɛ̀ â ŋgòʼ tɛʼɛ to tə dzə̀m, kə ghəəŋ sughò ghɛ̀ kele fʉgha wo u dzə̀m aŋghəa ghɛ̀ bughuu â ghu ko a te.

¹¹Kə kê ghə̌əŋ tsughu nù ghɛ̀ è kuu am mwàʼ zəla ghɛ̀ mwaʼā ghè zò, ghì ghə̀ è ke fughuu zɔ̀ɔŋ kò â Zə̀ kò bòʼ fʉgha wɛʼɛ wəla ghàʼ fughu nduw â ghee.

¹²Tɔŋlo enyəa fwàʼ kə̀là ghɛ̀ fwâʼ tsughu kaa kpēen tsughuu ko yo am fəgha kəla ghî à Kəzə̀ à ləghaa, kə ghəəŋ sùghò nù, ndə̀m è aghì yia fughuu kɛɛ wo â Zə̀ kò.

¹³Ndə̀mà tə aghì tə̀ e ke fughuu kɔʼso mò â Zə̀ kò mò à lo bòʼ fəgha kəla ghɛ̀ fwâʼ tsughu, aŋghəa ghe zuūw tsughuu Làbəlà è Kə̀lestò è dzùŋ zən, àsùghò am mwàʼ zɛʼɛ alechuuw fughuu nduw ghee â fʉgha wo, chuuw fughuu sùghò ghì à li gho.

¹⁴Ghe lo e diī ghɛ, gɔ̀ŋlò an tuw wɛʼɛ bòʼ dzɔ̂ è nêene zəla Zə̀ kə̀ dê tsughu â ghɛ̀.

¹⁵Zɔ̀ɔŋ kə Kəzə̀ am fughu kə wə̄n kə̀ ne kəla ghùw buw aletesō dzɛ̂.