Read Aghem Gàlashìan 1 Bible Online

Gàlashìan 1 - Aghem bible

Gàlashìan 1

¹À mwàʼsò kən kə tɔɔ wò mùghò Pôl, tùm è Yɛso Kə̀lestò. À kà mùghò shîaa kɔ̀ʼ dzə̀ ghî ghò ŋkāa à mùghò tum wò ghùw ù lì. À mùghò tsɔʼ sə̀ wò Yɛso Kə̀lestò ghèe Zə̀ kò, tɔɔŋ tsele ù sɛ̀ wəla ù fə̀ zôm nughù kɔʼ Yɛso alo evʉ̄.

²Ghî à kəzə̀ à li ghəla ghe lô fɛ ghàʼ à ghee yia fughuu wô sughò ghɛ â tɔɔŋ zo. Ŋ̀ wàʼsò kən kə tɔɔ wò â ghɛ̀ ghî yìa ghɛ̀ lo an dzweŋe u ghì a Kəzə̀ a fì èzə̀ am mbùʼ è Gàlashìa.

³To Kə̀zə̀, Tsele ù sɛ̀, àsùghò Mughubè ù sɛ̀ Yɛso Kə̀lestò, mò dê ghɛ̀ â dzɔ̀ e ghee zo, ghe fughuu sughò ghɛ̀ â bughuun zo.

⁴Yɛso Kə̀lestò wən fə̀ zuw nduw â Tsele ù sɛ̀ tɔɔŋ Kə̀zə̀, ù m boo tsughu alekpuw an tuw u sɛ̀ bòʼ bòo tə sɛ̀, alebəghaasə sɛ̀ aŋ ghùu mwàm è biigh zən fɛ am mbī.

⁵To a ghî à dzə̀m mò fùghuu ŋ̀kɔ̀ʼso â Zə̀ kò to mbī kê bughò mîa. Zə e lo ko êzə̀.

⁶Dzughu e zuu mùghò aŋ ghəa ghəla ghɛ̀ ghəŋlo, enyəa ghɛ̀ ŋ ghaam kùʼn tì zə̀ghaa Zə̀ kəla kə mò tɔŋɔ̄ ghɛ enyəa ghɛ̀ e lo ghî a wə̄n gho an dzɔ̀ zəla Kə̀lestò fə̀ dê tsughu â ghɛ̀, ghɛ̀ yia fwə̂ən nughùu nduw alebwiī aŋghəa làbəlà è nùghu dêe —

⁷mò làbəlà è te tso bùʼ yò sugho làbəlà è dzùŋ. Ghî à li yia kuūwn sêe məŋso ghɛ, ghe dəmà ko alefɔɔ̄ maʼà làbəlà è dzùŋ è Kə̀lestò zən.

⁸Abugho à kôom bûʼ lô ko ghaʼ ŋkāa tsə̀ndə̄ghā è Kə̀zə̀ è li è bùgho alebùghò naʼà ghɛ̀ â làbəlà è lì mò à yò dzə̂ làbəlà è dzùŋ zəla ghǎʼ fə̀ zoʼn ghɛ a te, to Zə̀ kə̀ lo dzûw maʼà wə̄n!

⁹Tò aŋ ghəa ghəla ghǎʼ fə̀ bûʼ dzɛ̂ zîi dzə â ghɛ̀ sûesʉ, Ǹ so Ǹ naām dzâa kpeʼē wô ko êzə̄ŋ â ghɛ̀ enyəa, Abugho ghuw ù lì zoʼn wô ghɛ an làbəlà è lì mò à yò dzə làbəlà è dzùŋ zəla ghǎʼ fə̀ zoʼn ghɛ a te, to Zə̀ kə mô dzùuw maʼà tən wə̄n, to mbī kê bughò mîa.

¹⁰Ghəa ghə̀là Ŋ̀ kə̂aa enyə, Ŋ̀ kəŋo dzə̀ yò alekelê zən è dzûŋ zò a sə̀a ghì ghò, Ŋ̀ kuuwn kəŋo alekele a sə̀a Zə̀ kò. Abugho M̀ mô dəmà alekelê zən è dzûŋ zò a sə̀a ghì ghò, to M̀ mô yò dzə kɔ̂ɔ fə Kə̀lestò fò.

¹¹Ǹ ləghaa enyəa ghɛ̀ kele tsughu enyəa làbəlà è dzùŋ zəla mùgho mò naʼà wo â ghɛ̀ a waazə̂ ghaŋa gho, a ka fə ghùw ù lì moʼn sə̀ kɔ̀ʼ dzə̀.

¹²Ŋ̀ ka fə nî ndùuŋ wò dzə̀ aŋ ghùu ghùw wə nsɔ̌ɔŋnchùw ù lì, ŋkāa ghe ka fə mugho a te zoʼn tsùghù dzə̀ nû, à mò làbəlà è dzùŋ è te â mùghò kuuwn de wo ghuūghùe u Yɛso Kə̀lestò.

¹³ Tɔŋlo enyəa ghɛ̀ maā zuw aŋghəa mughù zaŋa e mò bûʼ lô tsəgha a te, aŋghəa mùgho mò bûʼ mughù tsəgha tǒ kùm kə ghûw ù Dzudà, àsùghò aŋghəa ghəla mùghò mò dzaŋsō tsughu ghî ghəla ghe gaʼ fə̀ŋ aŋ ghəa e Kə̀lestò an nʉ̀ghà ù pfʉa wo, də̀mà sùghò aledzùuw maʼà ghee;

¹⁴ Mùghò ŋ ŋgee nomlo aŋ ghəa a Zə̀ kə Tə̀dzûu tsə̀ghàtàʼà ghàŋ faŋa fə̀ li fən. Mùghò ŋgee mùʼù sùghò â mbuuw mò alebwiī aŋ ghəa ghəla bughōo kə ghê tsele ghaŋā a wii kə deē.

¹⁵ À sò kǔuwn lò ko enyəa Zə̀ kə̀ mò mugho shiāa mo ghe kaām mugho dzə, kə tɔŋɔ mùghò am fə̀ŋ è wən è dzùŋ.

¹⁶Kə n lə̀ghà tsùghù sùghò aledèe wô Wɛ ù Wə̄n â mùghò aŋ ghəa ghəla Ǹ lo alendùw zughòo zən e wə̄n â Tòʼò zò. Ghəa Ù fə̀ tɔŋɔ̄ tsughu dzə̂ mugho êzə̀, mùghò ŋ kè kôom ndûw bvʉā zuūw dzə̂ aŋ ghulô fəgha kə nsɔ̌ɔŋnchùw kə̀ li ko.

¹⁷Ŋ̀ ka fə kôom nùghù ndùw dzə̀ ebàm an Yɛ̀lusalɛ̀m enyəa Ǹ ndûw kə̂aa dzəə̄ŋ ndûw dzə̂ àghəa ghàʼ à ghê ghì ghəla ghe fə̀ doʼò tum tə Yɛso tò kəsə a zəŋò mùghò. Mùgho fə̀ ghue u shuā nduw dzə an naʼ e zə Àlabìa, mùghò n daŋso kòom zə̀ghàa tsùghù sùghò naʼ e te zo nùghùu wò èbàm an naʼ e Dàmaskùs.

¹⁸ A m bùghò nûu tə̀ tsəghà tsughu tə təgha, mùghò n nùghùu kɔ̀ʼ ndùw an Yɛ̀lusalɛ̀m alendùw bwîin kôʼ Sɛfàs tɔɔŋ Pità, mùghò n dòʼò kə̀ŋo ndùw ghàʼ à wə̄n alo ntsuʼu eghə̄m à ghè mò n tɛ̀.

¹⁹Ŋ̀ ka fə kôom sə kpeen dzə̀ ghàʼ à tùm è Yɛso è lòʼ à gɔ̀ʼɔ̀ ko Dzɛ̂ms, wàazə̀ Mughùbè ù sɛ̀.

²⁰Kòʼô! Ghəa ghəla Ǹ tɔɔ̄ wô fɛ â ghɛ̀, Zə̀ kə̀ kwo nû enyəa Ŋ̀ kaʼn yo gha gho.

²¹Mùghò n daŋso nùghù ndùw am mbùʼ è Silìa àsùghò è Sìsilìa.

²²À n lo mo ghî ghəla ghe boō fughu â Kə̀lestò am mbùʼ è Dzùdîa ka m mugho alo esə n tsuʼ kòʼ.

²³Ghe ŋ kuuwn zuuw ko ghəa à kəaa gho enyəa, “Ghùw wəla ù fə̀ ndzaŋsō tsəghà ghaʼ, à èzəŋ e lo wə̄n ù bwìi naʼn kaāŋ wo làbəlà è dzùŋ zəla ù fə̀ bûʼ də̂m kê dzə alewiī maʼà.”

²⁴Ghe n təm ŋkəma â Zə̀ kò am fwàʼ kə̀là ù mò fwâʼ tsughu a zəŋò mùghò.