Read Aghem Gàlashìan 2 Bible Online

Gàlashìan 2 - Aghem bible

Gàlashìan 2

¹A m bùghò nûu tə̀ tsəghà tsughu eghə̄m à ghè tò tə chìakò, mùghò ŋ kòom kɔʼ kpeʼe ndùw an Yɛ̀lusalɛ̀m ghàʼ à Bànabàs. Mùghò n nì kɔ̀ʼ Taetùs, ndùw ghàʼ à ghee.

²Mùgho fə̌ fughu kɔʼ mò à dè tsùghù Kəzə̀. Mùghò n nì kɔ̌ʼ tum təla tə kwu kele dzeŋe kə ghì a Kəzə̀ kò an Yɛ̀lusalɛ̀m, kɔ̀ʼ zə̀m dòʼò tsùghu ghàʼ à ghee, nì tèso dzɛ̀ kɔ̀ʼ ndùw làbəlà è dzùŋ zəla Ǹ naʼnlo â Tòʼò zò â ghee; enyəa e kwo zə e doʼò enyəa Ǹ tuwnlo m̀mughū alo kəsàʼnlo ŋkāa mùghò m mùghù mò alo kəsàʼnlo tuuw.

³Taetùs wəla ù fə̀ bûʼ lô ko ghàʼ à wə̄n, aŋghəa ù bûʼ lô ko ghùw Gə̀lêk, e fə̀ telē yo dzə̂ enyəa ghe ki alesugho tigh kə wə̄n.

⁴Ghəa à sughoo a kətigh ghən fə̀ sə kɔʼ wo bòʼ ghî ghə agha à li gho ghe fə̀ ŋgaām nyə wo am bvʉa e ghì a Kəzə̀, ghe n nɔmlo agha enyəa ghe lo ghî a Kəzə̀. Mo e ghee e fə̀ lo ko alebùghò tsêen kôʼ ndzə̀m kə emùghùu kəla a mughu aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò Yɛso. Ghî ghə agha a te ghə n ləghaa enyəa ghàʼ doʼò tsughu ukɔ̂ a bàâ bughōo kə Tə̀dzûu kò.

⁵Ghàʼ ŋ kè kuuwn buʼù boon nəgha è li zo alezə̂ən ghəa a ghee a te ghəla ghe fə̀ dzâa wo, aleghəŋlo enyəa ghɛ̀ naam boo fughu tsughu ko êsəŋò zəla è lò an làbəlà è dzùŋ zəla ghǎʼ mò zoʼn ghɛ a te.

⁶Ghî ghəla ghe fə̀ dzɛ enyəa ghe lo tətsoʼ a fughu an dzeŋe ke te ko — kaa ghe fə̀ lo kwò kə ghee ko, e mò moʼo yo ghə̂a è li zo â mùghò; tɔŋlo enyəa Zə̀ kə̌ ghùw lɛ̌ɛn dzə̀ yò aŋ kòʼ e wə̄n. Ghî ghən fə̀ ki dzə yo ghəa è li zo tò kəsànlo ghe lo alefughuu wô â mùghò.

⁷Ghe ŋ kuūwn kòʼ tsùghù enyəa Zə̀ kə̀ m mùghò â daʼa kə fughu alezùghòo làbəlà è Dzùŋ â Tòʼò zò, aŋ ghəa kə mò fughu sughò Pità â daʼa ko alezùghòo làbəlà è mɔ̀ʼɔ è te â Dzûu tò.

⁸Zə̀ kəla kə fə̀ dzə̂n Pità â sə̀ŋ zò alefwaʼa â Dzûu tò tǒ tùm è Yɛso, à lò sugho kə ghee kə mò dzə̂n mugho â zə̀ŋ zò enyəa Ǹ doʼò tsughu tum è Yɛso â Tòʼò zò.

⁹A m bùghò Pità ghèe Dzɛ̂ms asùghò Dzɔ̌n, ghî ghəla ghiī a fə̀ kwo tǒ tsôʼ tə dzeŋe kə ghì a Kəzə̀ tə̀ səŋò tò kele tsughu enyəa à fwàʼ kən â mùghò fughu Kəzə̀, ghe n tɔɔŋ zùw wò ghàʼ à Bànabàs, fùghù ghàʼ â ghu ko aledèe tsughu enyəa ghe ŋ ghàʼ kpenì, enyəa ghaʼ à ghee êzəŋ e lo alo kəfəgha kə̀ mɔ̀ʼ. Ghàʼ à ghee n tsughu boo tsughu enyəa ghàʼ à Bànabàs è naʼn nduw tum è Kə̀zə̀ â Tòʼò zò, to ghe e kuuwn naʼn nduw â Dzûu tò.

¹⁰Fəgha kəla ghe mò ləghaa ko aŋ ghùu ghàʼ à mò lo enyəa e kwo ko a lô so e nîizə̀a ghî à laa gho, mò à mò bɔɔm lo sugho fəgha kəla mùgho mò muʼù mbuuw aleghəŋlo.

¹¹A m bùghò Pità bùghò an Antìok, mùghò n lughuun sàʼ ndùw wə̄n, bòʼ ù mò kum fwaʼ boon ghəa è li zo.

¹²Tɔŋlo enyəa Pità fə̀ zəa dzəəŋ tsəgha ghèe ghê Tòʼò zò, a m bùghò ù kòʼ kɔʼ ghî yia Dzɛ̂ms tum wo, ù ŋ kaʼ aletiī zəghàa Etòʼò; ù màʼa fə̀ tsəŋō ghî ghəla ghe fə̀ ləghaa enyəa mò ghùw ù nughùnùghù so e boo fughu â Zə̀ kò, ghe n tèlè sugho tsughu tigh kə wə̄n.

¹³Dzûu tə̀ li tə ŋ kàʼ ndùw sùghò alefòʼn ghəa a kə̀bàŋàdzə̀m a Pità a te gho a ka dɔ̂m taŋ Bànabàs wəla ghe fə̀ sê məŋsō nduw aŋ ghəa a kə̀bàŋàdzə̀m a te gho.

¹⁴A m bùghò mùghò Pôl kuuwn kôʼ tsùghù enyəa ghî ghən nyɔʼɔ̀ bwìi dzə̂ yò alo êsəŋò zəla e lo an làbəlà è Kə̀lestò, mùghò n dzɛ̀ ndùw â Pità an sə kə ghì yì à dzə̀m enyəa, “Abugho ghù Pità, ghùw ù Dzudà, lò alemùghùu tò Etoʼò, mùghù yo tò Dzûu, ghù lǒ êzə̂n aletsəən Toʼò zò enyəa e bughò kaʼ alemùghùu tǒ tə̀ Dzûu a?”

¹⁵Ghuūghùe zaʼā, à ghàʼ dzə Tə̀dzûu, mo à yò dzə̂ “Toʼò zəla e mughu alo ebo” aŋ ghə ghe tɔɔ̄ŋ ghee a te,

¹⁶a kwo sugho nû enyəa ghùw dòʼn dzə̀ yǒ ghûw ù zɔ̀lɔ a vʉ̀a Zə̀ kò enyəa so ù nàŋa tsughu kəlâŋ, à lǎam lò abugho ù gaʼ tsughu fə̀ŋ e wə̄n a zəŋò Yɛso Kə̀lestò. Zən lò e ghee ghàʼ boō fughu ndûw sugho â Kə̀lestò, enyəa ghàʼ doʼò tsughu ghî à zɔlɔ gho am fə̀ŋ zəla a gaʼ tsughu a zəŋò Kə̀lestò Yɛso, à yò dzə̂ làŋ kə̀ naaŋ ko; tɔŋlo enyəa abugho à lò ko an làŋ kə̀ naaŋ ko, ghùw yò aledòʼò ghùw ù zɔ̀lɔ.

¹⁷Abugho sɛ̀ dəmà enyəa a doʼò ghì à tsəghatsəgha gho a vʉ̀a Zə̀ kò aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò, zə e kôom sə wô enyəa sɛ̀ lo ghî à biigh gho — à so yia lo enyəa à lǒ Kə̀lestò ù kòom ghəŋlo enyəa sɛ̀ e ghəəŋ bo zo ŋkāa? Ɛ̂ŋgaŋ dzə̂, à dɔ̀m yò dzə̂ èzə̀!

¹⁸Abugho Ŋ̀ kôom bəgha tiso kɔʼ lâŋ kəla Ǹ lo mò M̀ maā sâʼ màʼà, M̀ fi ghə̂əŋ ghue waŋa tǒ ghùw wəla ù zaʼā lâŋ kò.

¹⁹Abugho à lò ko â làŋ kò, Ǹ lo ko tǒ ghùw ù kpǔuw, à fi lo enyəa lâŋ kə̀ kôom ki yo daʼa ko a zəŋò mùghò, enyəa to M̀ mô mùghu aŋghəa Zə̀ kə̀ ləghaa.

²⁰E fi lo ko to ghe mǒ ghàʼ à ghê Kə̀lestò təghāa dzəəŋ kɔʼ a dzə̀m alo kədàŋlo; à kòom yò dzə̂ mugho M̀ mughu, à lǒ Kə̀lestò ù mùghù a zəŋò mùghò. Mughùu zəla M̀ mughu êzə̄ŋ aŋ gwə̀n e ughùe, M̀ mughu ghè zò am fə̂ŋ zəla Ŋ̀ gaʼ tsughu a zəŋò Wɛ̀ ù Kə̀zə̀, wəla ù mò ləgha tsughu mugho, ù m fùghù ndùw tuw kə wə̄n aŋ ghəa zaŋā.

²¹Ǹ yo dzə̂ aletuū maʼà ghəa zən enyəa Zə̀ kə̀ maā sɛ̀ bəghasə am fə̀ŋ è wən è dzùŋ zəla kə ki a zəŋò sɛ̀. Abugho ghùw mò doʼn ghûw tsəghatsəgha an sə kə Kəzə̀ bòʼ enyəa ù naāŋ kò, to e mò fi lo enyəa Kə̀lestò mò kpuw maʼa kə̀nughùnùghù.