Read Aghem Gàlashìan 3 Bible Online

Gàlashìan 3 - Aghem bible

Gàlashìan 3

¹Huʼ, ndzə̀ŋ tə efùw tə Gàlashìa tə̀n, à ghɛ̀ yia boon naŋa ndùghò à? À fə̀ mgbaŋ yo an sə kɛʼɛ̄ ghe fə̀ teso dzaā dzì zəla Yɛso Kə̀lestò fə̀ kpuw a te, mo ghe wə̄n təghàa kɔ̀ʼ alo kədàŋlo a?

²Ghəa e lo ko e mɔ̀ʼ Ǹ so n bvʉ̀ā wô â ghɛ̀. Ghɛ̀ mò kaʼ tsughu ênzə̂n to ghe fughu â Zuʼ tə Kəzə̀ tò a? À mò lo bòʼ ghɛ̀ zuuw kə̀làŋ ŋkāa à mò lo aŋghəa ghɛ̀ mò zuw tsughu shwaʼ u Kəzə̀ wò a ghɛ̀ m boo fughu ndùw â Kə̀lestò enyəa ù kpe nû alebəghaasə ghɛ à?

³À lǒ kwò ghɛ̀ sô boʼò laʼsò enyə a? Ghɛ̀ mò mgbaŋ kaʼ tsughu alemùghù an daʼa kə Zuʼ tə kə Kəzə̀, à lò enyəa ghɛ̀ êzəŋ so e mîasò kɔʼ aŋ ŋgəŋ zɛʼɛ̄ a?

⁴À lǒ enyəa fala zəla ghɛ fə̀ fala mò tsəgha miāa kə̀nughùnughù a? Ɛ̂ŋgaŋ dzə̂, Ǹ tɔʼɔ mòʼn dzə̀ yò enyəa fala e te e mò lo kə̀nughùnùghù.

⁵Ghəa Zə̀ kə fə̀ fughu tsughu ghɛ â Zuʼ tə̀ Zɔlɔ to, dè sùghò nsə̀ghàa am bvʉa zɛʼɛ̄, ghɛ̀ moʼnlò enyəa à mò lo bòʼ ghɛ̀ mò zuūw lâŋ kò ŋkāa, à lǒ bòʼ ghɛ̀ mò zuw tsughu làbəlà è dzùŋ è Yɛso, ghɛ̀ m boo fughu ndùw â wə̄n à?

⁶ Nǐi tsughu ko Abə̀làhâm, tsele ù ghê tselè sɛ̀, aŋghəa Mwàʼsò kə Kəzə̀ kə̀ dzɛ̂ enyəa, “Ù fə̀ boo fughu tsughu â Zə̀ kò, bòʼ fə̀ŋ zəla ù fə̀ gaʼ tsughu a zəŋò Zə̀ kò, Zə̀ kə̀ n nì ndùw wən enyəa ù lò tsəghatsəgha.”

⁷Ghɛ̀ koʼ tsughu êzəŋ enyəa ghî ghəla ghe boō fughu tsughu â Zə̀ kò lò wɛ ghə Abə̀làhâm.

⁸ Ghe fə̀ tɔm naŋa am Mwàʼsò kə Kəzə̀ enyəa Zə̀ kə̀ lô Tòʼò è naaŋ tsəghatsəgha am fə̂ŋ è ghee zəla ghe gaʼ tsughu a zəŋò wə̄n, Kə̀zə̀. Zən lò e ghee Zə̀ kə fə̀ dzɛ̂ naŋā zîi wo Làbəlà è Dzùŋ â Abə̀làhâm enyəa, “Naʼà tə̀n tə̀ dzə̀m fɛ a mbī kê bughuso e kele am bàm zəghà.”

⁹Abə̀làhâm fə̀ gaʼ tsughu fə̀ŋ a zəŋò Zə̀ kò, Zə̀ kə̀ m bughuso tsughu wə̄n, a fi lo enyəa ghî ghə̀n à dzə̀m ghe gaʼ tsughu fə̀ŋ a zəŋò Zə̀ kò, ghe lo kele sùghò bughuso tò aŋghəa Abə̀làhâm fə̀ kele.

¹⁰ Ghî ghəla ghe moʼò enyəa ghe kê lò tsəghatsəgha a vʉ̀a Zə̀ kò bòʼ ghe naāŋ dzə̂ lâŋ kò, à lo ghî ghəla Zə̀ kə lo dzûuw maʼn ghee; nu ghe tɔm naŋa am Mwàʼsò kə Kəzə̀ enyəa, “Ghùw wəla ù tɔ̀ʼɔ̀ bwîi mɛʼn yo aŋ ghəa ghən à dzə̀m ghe tɔm naŋa am Mwàʼsò kə Kəlàŋ, vʉ fi lo ghùw wəla ghe lo dzûuw maʼnlo.”

¹¹ E zɔlɔ nù êzəŋ enyəa ghùw yò dzə̂ aledòʼò tsəghatsəgha a vʉ̀a Zə̀ kò bòʼ enyəa e ŋge kwo alenaŋa kə̀làŋ. Nu ghe tɔm naŋa am mwàʼsò kə Kəzə̀ enyəa, “Ghùw wəla ù lò tsəghatsəgha lo mùghùun nù bòʼ ù bǒo fughu tsughu â Kə̀lestò.”

¹² À fɛ kuuwn lò ko enyəa lâŋ kə̀ ki yo ghəa è li zo aleghəŋlo ghèe ghəa ghəla ghùw boō fughu a te, mwàʼsò kə Kəzə̀ kə̀ laam dzɛ̀ tsùghù enyəa, “Chìa wəla ù ghəə̄ŋ ghəa ghə̀n à dzə̀m lâŋ kə̀ ləghaa, ù lo kele mùghù è səŋò zò.”

¹³ Kə̀lestò mafə tuw kə sɛ̀ kə̀ zue sə̀ wò aŋ ghùu tsù u kəlàŋ wò aŋghəa ù mò doʼò ndûw ghî fə kəlòʼ an tuw kə sɛ̀; nu ghe tɔm naŋa am mwàʼsò kə Kəzə̀ enyəa, “Ghùw wəla ghe təghàa naŋa kɔʼ alo fəkà, à lǒ ghî fə kəlòʼ.”

¹⁴Kə̀lestò fə̀ enyə ghəəŋ tsughu enyəa, Toʼò zə è lo alekelê bughuso zəla Zə̀ kə fə̀ to naŋa â Abə̀làhâm, àsùghò enyəa sɛ̀ è lo alekelê Zuʼ tə̀ Zɔlɔ təla Zə̀ kə fə̀ to naŋā â sɛ̀ enyəa a kê kèle ko abugho sɛ̀ boō fughu tsughu â Kə̀lestò Yɛso.

¹⁵Waazə̂ ghaŋa gho, alebùʼù nîi tsughuu ko an dziī zəla ghî à ghəə̄ŋ ghəa a ghee gho a te, abugho aghî à bə̀ghà à zə kɔʼ kàa mò alo eghəa, zə n tughuu â ghùw u mɔ̀ʼ alekuūwn nyəā tsughu ghəa è li zo aŋ kàa n te mò ŋkāa alebaʼso ghəa è li zo a te.

¹⁶Zə̀ kə fə̀ to kə to â Abə̀làhâm, àsùghò â wɛ ù wə̄n. Mwàʼsò kə Kəzə̀ kə̀ kâ dzɛ̀ dzə̀ enyəa, “Àsùghò â wɛ a awɛ a wə̄n gho.” E fi moʼò dzə̀ yǒ ndə̀m è àghì; e moʼò ko ghùw u mɔ̀ʼ, “Àsùghò â wɛ wʉ̂a.” Mò à lǒ Kə̀lestò.

¹⁷ Fəgha kəla M̀ môʼnlo aledzɛ̀ fɛ̀ lo enyəa, Lâŋ kə̀ yo alendùw, ke bughò tuū maʼà tsughu kàa məla Zə̀ kə fə̀ zə naŋa ŋkâa ghèe Abə̀làhâm, boo naŋa tsughu enyəa kə lo naaŋ nù dzughu e wə̄n aŋ kàa n te mò. Lâŋ kəla ghe fə̀ fughu wô ko êzə̄ŋ mo nû tə̀ mafə tsəghà təbɔm tə chìakò à ghə̀m n tə̀nùu mò n təgha, kə yo dzə̂ alebùghò tuū maʼà tsughu kàa n te mò à, kə kuūwn kɔʼɔ sughò to kə te ko.

¹⁸ Abugho à mò lô enyəa Zə̀ kə ghùw bughuso bòʼ ghùw ù te tɔʼɔ̀ zuūw lâŋ kò, bughuso e Kəzə̀ e te e fi nyəŋ dzə yo am fùuw tə kətō kə te ko. À fə̀ lo bòʼ to kən Zə̀ kə fə̀ fughu kɔ kə kənāmsō kən ko â Abə̀làhâm.

¹⁹Lâŋ kə̀ è kən màʼà bugho bòʼ kwò à? Ghe fə̀ lâŋ kən kə səso wo aledèe fughu ghəa à biigh ghəla ghî à ghəə̄ŋ ghè ghò; lâŋ kə te kə fə̀ lo ko alefwàʼà bughô tâa wô an zəla wɛ̀ ù Abə̀làhâm fə̀ ki alebùghò a te, tɔɔŋ ghùw wəla to kə te kə fə̀ kə̂a ghəa a wə̄n gho. Tsə̀təndə̄ghā tə Kəzə̀ tə̌ fə̀ lâŋ kə te kə fughu tsughu â Musî, wəla ù fə̀ lo ghùw ù fə̀tsə̀tèʼè ù Kə̀zə̀, ù m fùghù ndùuŋ wò â ghì ghə Ezə̀lɛ̂ ghò.

²⁰Ghùw ù fə̀tsə̀tèʼè kǔuwn ki dzə yo fwàʼ kò abugho à lò ko ghùw u mɔ̀ʼ lò alo eghəa. Zə̀ kə̀ lo ko kə mɔ̀ʼ, kə m tò sùghò to kə te ko â Abə̀làhâm wə̄n à mughu ko.

²¹À lò enyəa lâŋ kə te kə boom dzəəŋ yo ghèe to u Kəzə̀ wò à? À dɔ̀m yò dzə̂ êzə̀! Abugho ghe mô fughuu wô lâŋ kə̀ li ko mo kə ghəŋlo enyəa ghùw dòʼò â tuw ko, to ghùw mò dòʼn nù tsəghatsəgha abugho ù naŋā tsughu lâŋ kò.

²²Mwàʼsò kə Kəzə̀ kə̀ fwə̂n dzɛ̀ tsùghù enyəa aghî à dzə̀m am mbī lo ukɔ̀ â bo zo. E dêe enyəa, Zə̀ kə̀ lo fughuu kô namso kə̀là kə to naŋā â ghì ghəla ghe boō fughu â Yɛso Kə̀lestò.

²³Â fə̀ŋ è gàʼa zən a zəŋò Kə̀lestò alebùghò, à fə̀ lo mò ghe n sɛ̀ kɔ̂n nàŋa a tsəlà làŋ kò, tò Zə̀ kə̀ e telè bughò dêe səā wô ghəa a te gho.

²⁴À fə̀ lo enyəa, lâŋ kə fə̀ kwukele sɛ̀ tò wɛ fə̀ bughu fo alebùghò tâa wô an tì kə̀là Kə̀lestò fə̀ bùghò a te, enyəa to sɛ̀ mô doʼò tsughu tsəghatsəgha a vʉ̀a Zə̀ kò bòʼ mo a gaʼ tsughu fə̀ŋ a zəŋò Kə̀lestò.

²⁵Yia kuūwn bughò êzəŋ wəla ghəa è gaʼā a fə̂ŋ zən bugho, à kà kòom kwukele dzə̀ lâŋ kǒ sɛ̀.

²⁶Tɔŋlo enyəa ghɛ̀ a dzə̀m lò wɛ a Kəzə̀ bòʼ ghɛ̀ gaʼ fə̀ŋ a zəŋò Kə̀lestò Yɛso.

²⁷Ghɛ̀ ghən à dzə̀m ghe mò ni mùghù ŋ Kə̀zə̀ mò, aledèe tsughu enyəa ghɛ̀ boo fughu â Kə̀lestò, ghɛ̀ mǒ fi ni kɔʼ mwam u Kə̀lestò dzə̀là tsughu a zəŋo ughùe tò təndzʉ̄.

²⁸Ghɛ̀ a dzə̀m èzəŋ e lò wɛ a Kəzə̀ bòʼ ghɛ̀ gaʼ fə̀ŋ a zəŋò Kə̀lestò Yɛso: nəŋò nəŋ è lì kôom yò dzə̂ a zəŋò ghùw ù Dzûu ghèe Tòʼò zò, ŋkāa, kəkɔ̂ ghèe ghùw wəla ù ndzə̀m mughu, ŋkāa a zəŋò wìnû ghèe wìzən.

²⁹Abugho ghɛ̀ lô dzə̂ ghɛ̀ à ghêe Kə̀lestò, ghɛ̌ fi lo wɛ ghə Abə̀làhâm, ghî ghəla ghe ki to kəla Zə̀ kə fə̀ to naŋā â Abə̀làhâm.