Read Aghem Gàlashìan 5 Bible Online

Gàlashìan 5 - Aghem bible

Gàlashìan 5

¹Kə̀lestò mafə sɛ̀ zue sə enyəa sɛ̀ ka kôom fwàʼ sùghò kɔ̂ ko a tsəlā làŋ kò. A fi lo enyəa ghɛ̀ ki alefəghaan tɔʼɔ̀ tēe, e kwo ko ghùw wɛʼɛ lǒ so e bomlo alefwàʼà kpeʼe kə̀kɔ̀ a tsəlà làŋ kə̀ loʼ ko.

²Tɔ̀ʼɔ zhəən wò nlò shwaʼ wəla mùghò Pôl, Ǹ dzâa wo êzəŋ â ghɛ̀. Abugho ghùw wɛʼɛ kôom boo tsughu enyəa ghe sugho tigh kə wə̄n, to e doʼò tsəghatsəgha a vʉ̀a Zə̀ kò, a fi lo enyəa fəgha kə̀là Kə̀lestò mò fwàʼ kòom kì dzə yo namso kə̀ li ko am mùghù e ghûw ù te.

³Ǹ naam dzàa kpèʼe wò ko nù; ghùw wəla ù boo kɔʼ enyəa ghe sugho tigh kə wə̄n ki alebôo lwàŋ u Tə̀dzûu u dzə̀m.

⁴Ghùw wɛʼɛ wəla ù də̀ma aledòʼò tsəghatsəgha a vʉ̀a Zə̀ kò bòʼ ù naāŋ lâŋ kò, u ŋ ghue u wə̄n u bâʼ nùghù sə a vʉ̀a Kə̀lestò. Ù n naŋa sə̀ ndùw ghue u wə̄n wo an lùʼu kəla ù yò alekòʼ dzɔ̂ e Kəzə̀ a te.

⁵Zuʼ tə Kəzə̀ tə kûm dzə̀là nù fə̂ŋ tə sɛ̀ tò enyəa sɛ̀ e kwo tən enyəa Zə̀ kə̀ lo nìi sɛ enyəa sɛ̀ lo tsəghatsəgha bòʼ sɛ̀ boo fughu â Kə̀lestò.

⁶Abugho ghe sugho tigh kə ghûw kò ŋkāa ghe tâʼkè sugho, zə ki dzə yo ghəa è li zo aleghəŋlo am mùghù e sɛ̀ à ghê Kə̀lestò Yɛso. Ghəa èsəŋò zəla e lo ghè zò lò enyəa, sɛ̀ ŋgaʼ fə̀ŋ a zəŋò Kə̀lestò an ləgha zəla a ki ghè zò.

⁷Ghɛ̀ mò mgbaŋa bwiī dzɔɔ̄ nû, am fwàʼ kə Kə̀zə̀ kɛʼɛ. À màʼà ghɛ koōm bughu naŋa ndughoo enyəa ghɛ̀ ka tee tən tsughu ko an səŋò e te zo a?

⁸Ghùw wəla ù mò nom ghɛ, à mò yo dzə̄ Zə̀ kəla kə mò tɔŋɔ̄ ghɛ.

⁹ Abugho mbvùŋ toō ko ênzə̂n, è ghə̌əŋ nù kəa mə̀ n tùghù tsə̀ghà è tsughu.

¹⁰Ŋ̀ ŋgaʼ fə̀ŋ a zəŋò Mughu ù te enyəa ghɛ̀ lo kòom zuw yo tsʉ̂ e ghûw ù lì zo, tsə̀ghà sə̌a ko yo tsʉ̂ zəla Ǹ lo mò mùghò m fughu â ghɛ̀. Mò à kôom lò ko ndugho ù fwə̀là sə ghɛʼɛ gho, a lô wə̄n fɔeso ko Kə̀zə̀ abugho ghùw ù te tso lô ko kwò ko.

¹¹Waazə̂ ghaŋa gho, abugho e mô lô enyəa Ǹ naam zoʼn kaaŋ ko aghì enyəa ghe e sughoo tiigh ko, à sò lǒ kwo ghe tsôo naām ndzaŋsō kaāŋ ko mugho a? Abugho M̀ mô zoʼn kaāŋ yô ghì ghò aŋ ghəa ghən enyəa Kə̀lestò mò kpuw alo kədàŋlo, to ghùw ù lì mò so pfʉ̀so yo nʉghà.

¹²Dî zaŋa e lo enyəa, ghî ghəla ghe fəmso kaāŋ tsəgha ghɛ, to ghe mô kǔuwn kàa tsughu nù ghue e ghee zo.

¹³Yia a bughò ghɛ a waazə̂ ghaŋa gho, Zə̀ kə̀ mò ghɛ shìaa nughu sə wo enyəa ghɛ̀ e ndzəə̄m mughu. E kuuwn kwo ko ghùw wɛʼɛ lô so e nîi ndzə̀m kə emùghù kə te ko tò dzì è lì â wə̄n aleghə̂əŋ ghəa à biigh ghəla gwən e eghuè zɛʼɛ e ləghaa ghè ghò. E laam kuuwn mughu nlò alo eləgha, yosò sùghò ghue zɛʼɛ.

¹⁴ Tɔŋlo enyəa lwâŋ u Musî wə̀n u dzə̀m ghe n nì kwu kɔlɔ kɔʼ alo kəlàŋ kə mɔ̀ʼ mo kə dzɛ̂ enyəa “Ləgha wàazùghù tò aŋghəa ghù ləghaa ghue wʉ̀a wò a te.”

¹⁵Abugho ghɛ̀ chuūwn kaāŋ ghue zɛʼɛ zo alo tədzə̀, pfʉa sùghò àsɔŋ aŋ ghùe zɛʼɛ̄, nǐ nlò ghôom zò, ŋkāa ghɛ̀ lo dzuw maʼa mɛʼɛ̄ ghue zɛʼɛ zo.

¹⁶Ǹ so ŋ kuūwn dzâa wô â ghɛ̀ enyəa, mùghù tsughu nlò aŋghəa zəla Zuʼ tə Zɔlɔ tə deē enyəa ghɛ̀ è mughu a te, tɔŋlo enyəa abugho ghɛ̀ mughu êzə̀, ghɛ̀ e ke ghəəŋ yo ghəa ghəla gwən e ughùe zɛʼɛ e ləghaa.

¹⁷ Ghəa à laan ghəla gwən e ughùe è ləghaa enyəa to ghùw mò ghəŋlo boom dzəəŋ yo ghèe ghəla Zuʼ tə Zɔlɔ tə ləghaa. Ghəlā Zuʼ tə̀ Zɔlɔ tə ləghaa enyəa to ghùw mò ghəŋlo boom dzəəŋ sùghò yò ghèe ghəla gwən e ughùe e ghûw è ləghaa. Ghəa a te gho a bə̀ghà bwìi dzə̀ yò fwən wo. Êzə̀, ghəa a te a ghəəŋ nù ghɛ̀ yo aleghə̂əŋ ghəa à dzûŋ ghə̀là ghɛ̀ mô moʼò aleghəŋlo.

¹⁸À fi lo enyəa lâŋ kə̀ ki dzə yo daʼa ko a zəŋò ghù abugho à ghuw kə e bwìi kə̀a kə̀ naŋsô Zuʼ tə̀ Zɔlɔ to.

¹⁹Ghəa ghəla ghue u ghûw ù ghɛ̂nlo aleghəŋlo lo an ndɛ: ghəa a te a lo; alesəā ndzāŋ, ghəa à nyəə̄ŋ kaaŋ ghə eghùe gho, dzə̀adzə̀ tə aghəa, aleŋaŋa koʼo ghue zo,

²⁰mùʼù ŋ kɔ̀ʼsò mòʼ, nyàʼ n zùuw mò, bɛ̂ zə èghùe, kə̀zùghù, kə̀mʉ̀nlo, nə̀ghà m pfʉ̌a mò, ekʉmè, ndzùghùn kə emùghù àsùghò ghəa à ghəəŋ gho ghù tə̀ghū,

²¹sə à səa gho am fʉgha u aghì, lʉ̀ m mʉ̀aa kala mò, dzweŋe ù biigh wo. Àsùghò ghəa à biigh à li gho. M̀ maa ghɛ bùʼ kwɛ̀ɛn dzə̀ tò aŋghəa Ǹ naām kwɛ̂ɛn wô ko sughò ghɛ êzə̄ŋ, enyəa ghùw wəla ù mùghu ŋgòʼ è mùghù zən zo yǒ tò ù e zə fɔ̂e u Kəzə̀.

²²Twam wəla Zuʼ tə̀ Zɔlɔ tə mʉā wo lò, eləgha, ebughunlo, ghue ù zumso wo, mwam ù dzûŋ wò, edzɔ̂ àsùghò səŋò zò,

²³zʉ̀ kə emùghù àsùghò ghuw kə ebwìi kə̀ naŋso ko; abugho ghəa ghən enyə lǒ a zəŋò ghùw, làŋ kə̀ li yo dzə̂ alekɔlɔ̄ wə̄n.

²⁴Ghî ghəla ghe lô ghî a Kə̀lestò Yɛso ghò, ghe lo ko to ghe n təghàa nàŋa gwən e ughùe e ghee zo alo kədàŋlo àsùghò laan tə aghəa təla gwən e ughùe e ghee e ləghaa.

²⁵Êzəŋ wəla sɛ̀ mughu an daʼa kə Zuʼ tə̀ Zɔlɔ to, sɛ̀ ki aleghəəŋ sugho ghəa gho aŋghəa Zuʼ tə̀ Zɔlɔ tə dêe wo à sɛ̀.

²⁶E kwo ko sɛ̀ lô so e kɔʼso èghue ŋkāa a ka e soʼsō kaaŋ ghî ghò. A ka e mʉʉn sugho fəgha kə ghûw kò.