Read Aghem Gàlashìan 6 Bible Online

Gàlashìan 6 - Aghem bible

Gàlashìan 6

¹Waazə̂ ghaŋa gho, abugho ghùw wɛʼɛ ù lòʼ ghəə̄ŋ boon tsughu ghəa è li zo, ghɛ̀ ghəla Zuʼ tə̀ dêe ghɛ â dzì, ghɛ̀ ŋ ki alenyoʼn kôom bɔɔ̄ tiso wô ghùw u te e bàm an dziī. À m bùghò ghɛ̀ ghəŋlo êzə̀, ghɛ̀ n nîi tsùghu èghòmlo enyəa e kwo ko ghùw wɛʼɛ lô kôom bvʉ̂a kômlo.

²E yoso nlò ghue zɛʼɛ zo alebòʼò mbùŋ kə waazə̂ ghɛʼɛ. Abugho ghɛ̀ ghəŋlo êzə̀, ghɛ̌ fi luesô làŋ kə Kə̀lestò.

³Tɔŋlo enyəa abugho ghùw mòʼò enyəa e lo fəgha kə̀ li ko mò ù bùʼ yò dzə̂ kə ghee, ù fi tsêe ghue ū wə̄n.

⁴To ghùw mò tɔ̀ʼɔ̀ lɛ̌ɛn tsughû ghəa a wə̄n à ghəəŋ gho alekòʼ enyəa a dzɔ̂ɔ ko nù a. Abugho ghəa a wə̄n a dzɔɔ̄, ù fi lo nû aletsɔ̀ fə̀ŋ aŋ ghəa ghəla ù lo mò ù ŋ ghəŋlo, mò ù bàan ndùw yǒ ghəa a wə̄n gho ghèe a ghûw ù lì ghò.

⁵Tɔŋlo enyəa ghùw kì ko mbùŋ kə wə̄n alebòʼò.

⁶Ghî a ki alefughū nduw sugho yôsò zò â ghì ghəla ghe zoʼn nduw ghee an shwaʼ u Kəzə̀ mo ghe fughuu nduw ghee â fʉgha ù dzûŋ wəla ghe ki.

⁷Kà nlò ghue zɛʼɛ zə e tseē dzə. Ghùw yò dzə̂ aletsè Kə̀zə̀. Abugho ghùw tam fəgha ko, ù lo tèlè kèle ko kə̀ ghee.

⁸Ghùw wəla ù ghəə̄ŋ ghəa ghəla gwən e ughùe e wə̄n e ləghaa, ù lo tèlè kèle kô ŋgòʼ è namso kəla ghəa a gwə̀n ghə eghùe a fughuu, mò namso kə te kə lo evʉ. Wəla ù ghəə̄ŋ ghəa ghəla Zuʼ tə̀ Zɔlɔ tə ləghaa, ù lo kelê mùghù zəla e doʼò tən.

⁹E kwo ko sɛ̀ lô so e bughuu kòom nù aleghə̂əŋ ghəa à dzûŋ ghò, tɔŋlo enyəa abugho nəgha e te e lo kpē tsughuu, sɛ̀ lo kele nù namso ko abugho sɛ̀ doʼŋkè kôom ghɔ̂ɔn wò ebàm.

¹⁰Aŋghəa e lo êzə̀, e fi lo enyəa sɛ̀ ki aleghəŋlo èdzɔ̀ â ghì ghò a dzə̀m, a ka dɔ̂ɔm tāŋ abugho à tso lo ghî ghəla ghe boō fughu â Zə̀ kò tǒ sɛ̀.

¹¹Kòʼ nlǒ ŋgɔ̀ʼɔ̀ tə səa a kəmwàʼsò ghə̀là Ǹ nyâʼ nyə tsughu mughò â nəŋ ko aŋghəa Ǹ tɔɔ̄ wô ghɛ â mwàʼsò kən ko a.

¹²Ghî ghəla ghe dzâa wô enyəa ghɛ̀ e sughoo twigh wɛʼɛ wo, lo ghî ghəla ghe ləghaa ko aletɔʼɔ̄ deē səa wo ghue e ghee enyəa ghe lo ghî à dzûŋ ghò. Ghe ləghaa yo alezoʼn wo ghî ghò enyəa ghe lo nû alezə̄ kətuw bòʼ aŋghəa Kə̀lestò fə̀ kpuw alo kədàŋlo. Ghe enyə ghəŋlo ghe sô tsəŋō enyəa ghî à lô dzaŋsō kaāŋ ghee.

¹³Ghe ghəla ghe kəa ko ghəa gho kùu ndùw ghəa à sughoo a kə tigh ghən, ghuūghùe e ghee e bùʼù nǎaŋ sùghò yò lâŋ kə Musî kò. E ghee e lo ko aleghəəŋ kaŋlo enyəa to ghî a mô sùghô twigh u ghee tò ghe e ki kɔʼso mo a te.

¹⁴Yia a bùghò, Ŋ̀ ki ko aletsɔɔ̄ fə̀ŋ an dǎaŋ kə Mughùbè ù sɛ̀, Yɛso Kə̀lestò. Ghəa a mbī a dzə̀m à lo kənughùnu â mùghò, yìa à lǒ tò mùghò m kpuw â ghəa a mbī gho.

¹⁵Ghəa è li e ndôʼ yò, ka ghe sugho tigh kə ghûw kò ŋkāa ghe taʼkè sugho; ghəa è səŋò è lo ko enyəa sɛ̀ n ghì à fughu a doʼò.

¹⁶Ghùw wəla ù naāŋ dzə̂ laŋ kən, to Zə̀ kə̀ mô fughu wə̄n â bughuun zo, kə dêe sùghò wə̄n a se è kwuso zo, àsùghò â ghì a Kəzə̀ ghò a dzə̀m.

¹⁷E kwo ghùw lò so e kôom fə̀mso mùghò, tɔŋlo enyəa na kə fəsə̀ghà kə̀là ŋ ki a zəŋò mùghò dèe enyəa, Ǹ lo ghûw ù kə̀fwàʼ ù Yɛso.

¹⁸Waazə̂ ghaŋa gho, gɔ̂ɔŋ zaŋa e lo enyəa, to Mughùbè ù sɛ̀ Yɛso Kə̀lestò mò dê ghɛ̀ a dzə̀m â dzɔ̀ e wə̄n zo. Zə e lo ko êzə̀.