Read Aghem Efɛsùs 1 Bible Online

Efɛsùs 1 - Aghem bible

Efɛsùs 1

¹À mwàʼsò kən kə tɔɔ wò mùghò Pôl, mùghò tum è Kə̀lestò Yɛso zəla Zə̀ kə̀ mò tsɔʼ kɔʼ. M̀ mwàʼsò kən kə tɔɔ wò â ghɛ̀ ghî a Kəzə̀ ghəla ghe gaʼ tsughu fə̂ŋ tɛʼɛ to â Zə̀ kò am mùghù zɛʼɛ àsùghò aŋghəa ghɛ̀ lo alo kəfəgha kə mɔ̀ʼ ghɛ̀ à ghê Kə̀lestò Yɛso an naʼ zə Efɛsùs.

²Ghàʼ gɔ̂ŋlò enyəa to Tsele ù sɛ̀ Kə̀zə̀ àsùghò Mughùbè ù sɛ̀ mò fughu ghɛ â bughuun zo, ghe dêe sughò ghɛ̀ â dzɔ̀ e ghee zo.

³Kɔʼso n lo à Zə̀ kò, Tsele ù Mughùbè ù sɛ̀ Yɛso Kə̀lestò, wəla ù fughu sɛ̀ a bughuso e shʉ̀ghà zò mo e nùghù wò alo kəwālā aŋghəa sɛ̀ à ghê Kə̀lestò lò fəgha ko kə mɔ̀ʼ.

⁴Zə̀ kə mǒ sɛ̀ ki shiāa nû to kə e bughò gbə̂n mbī, enyəa sɛ̀ è lo ghî a wə̄n gho aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò, mò sɛ̀ ki yo nùʼ tò, lò sugho ghî à zɔlɔ gho an sə kə wə̄n. Zə̀ kə̀ ləghaa sɛ̀,

⁵zən lò e ghee Zə̀ kə fə̀ ki foʼ naŋā enyəa sɛ̀ e ke lo wɛ a wə̄n gho am bàm è Yɛso Kə̀lestò, bòʼ enyəa à fə̀ lo fəgha kəla Zə̀ kə fə̀ tsə̂m tsughu alefwàʼ ghè kò am fə̂ŋ e wə̄n e dzùŋ.

⁶Sɛ̀ ki alefughuu Zə̀ kò â kɔʼso mò an dzɔ̀ e wə̄n e ne zəla ù ndzə̀əm dê wo â sɛ̀ am fwàʼ kəla Wɛ ù wə̄n ù tsuʼu fə̀ fwaʼ ghè kò.

⁷ Tɔŋlo enyəa à fə̀ lo aŋ kàŋ tə Yɛso təla tə fə̀ tsughu tsughu alo kədàŋlo Zə̀ kə fə̀ zue sə wo sɛ̀ a te; mo e fi lo enyəa Zə̀ kə̀ mafə bôo tə sɛ̀ tə ghuuw màʼà bòʼ dzɔ̀ e wə̄n e ne zən,

⁸dzɔ̂ zəla kə fə̀ tso mwâʼ dê wo â sɛ̀ an tɔ e wən e dzə̀m àsùghò aŋghəa kə kwo ghəa gho a te.

⁹Zə̀ kə̀ ŋ ghəəŋ tsughu ghea ghəla kə fə̀ fôʼ naŋā, nì dè wò sɛ̀ â nàn kə eghəa kəla kə fə̀ tsə̂m kɔʼ am bàm e Kə̀lestò.

¹⁰Ghəa ghən a dzə̀m kè səa an nə̀ghà zəla Zə̀ kə̀ fə̀ môʼ naŋā, alenìi təmadzə̄əŋ wô ufʉgha u dzə̀m alo kəfəgha kə mɔ̀ʼ, alo kəwālā àsùghò aŋ ghueetsə̄, mò Kə̀lestò lo kətuw aŋ ghəa a te gho a dzə̀m.

¹¹Aghəa a dzə̀m bɔ̌ɔm bwìi ko aŋghəa Zə̀ kə̀ fôʼ naŋā a te, kə n shîaa kɔʼ ghaʼ enyəa a e lo fəgha ko kə mɔ̀ʼ ghàʼ à ghê Kə̀lestò, aŋghəa Ù fə̀ fôʼ naŋā enyəa zə lo êzə̀.

¹²To sɛ̀ ghəla a fə̀ lô ghî a kəsə gho alechiī tùʼ a zəŋò Kə̀lestò Yɛso è fughuu Zə̀ kò â kɔʼso mò bòʼ an səghanyəgha ŋ wə̄n.

¹³Kə̀lestò n dê wò sùghò ghɛ̀ â səŋò zò, mò à lo làbəlà ê dzuŋ zəla è zoʼn ghɛ an dzì zəla ghɛ lô alezə kətuw a te. Ghɛ m boo fughu ndùw â Kə̀lestò, Zə̀ kə̀ fughu wò ghɛ̀ â zuʼ tə zɔlɔ təla Zə̀ kə fə̀ to naŋa, aledè tsughu enyəa ghɛ̀ e zəŋ lo ghî a wə̄n.

¹⁴Zuʼ tə̀ Zɔlɔ tən tə lo tsə̌a aledèe tsughu enyəa sɛ̀ lo kele mɛʼn nu fʉgha wəla Zə̀ kə fə̀ to naŋā â ghì a wə̄n gho a dzə̀m alebùghò tâa wô an tsuʼ fəla kə kê bəghaasəa ghî a wə̄n gho a te. Zə̀ kə fə enyə ghəəŋ tsughu enyəa sɛ̀ è fughuu kɔʼso mò â wə̄n bòʼ ghaʼ e wə̄n.

¹⁵À lǒ bòʼ ghəa ghən à dzə̀m Zə̀ kə lo mo kə m fwàʼ àsùghò alekaʼā nughù wô aŋghəa mùgho mò zuw tsughu fə̀ŋ zəla ghɛ̀ gaʼ tsughu a zəŋò Mughu ù te Yɛso àsùghò ləghaa zəla ghɛ̀ ki â ghì a Kəzə̀ gho a dzə̀m,

¹⁶Ǹ lo mò Ŋ̀ kaām bughu naŋa kòʼ tsəgha alefughu kəzɔŋlò â Zə̀ kò an tuw wɛʼɛ. Yìa Ŋ̀ gɔ̂ɔŋ sugho an tuw wɛʼɛ nəgha tən tə dzə̀m abugho Ŋ̀ gɔ̂ŋlo,

¹⁷enyəa Zə̀ kə Mughùbè ù sɛ̀ Yɛso Kə̀lestò tɔɔŋ Tsele ù sɛ̀ ù ghàʼa mô fughu ghɛ â Zuʼ tə̀ Zɔlɔ təla tə ghəŋlo enyəa ghɛ̀ e ki tɔ wo, tə ni dêe fughu wô fəgha kəla Zə̀ kə̀ lo ghè ko tò ghɛ̀ tɔʼ kele tsughu wə̄n.

¹⁸Yìa Ŋ̀ gɔ̂ɔŋ sugho enyəa to Zə̀ kə mô tsʉ tuw wɛʼɛ, ghɛ̀ zuuwkɛlɛ tùʼ zəla ghɛ̀ chiī ghè zò aŋ ghəa zəla Zə̀ kə mò tɔ̀ŋɔ ghɛ̀ a tè, àsùghò enyəa ghɛ̀ e kwo sugho namso kə wə̄n kə̀ ne kəla ù fə̀ to naŋā â ghì a wə̄n à dzûŋ ghò,

¹⁹Ǹ ləghaa enyəa ghɛ̀ kele tsughu sugho enyəa daʼa kə wə̄n kə̀ ne kəla kə ghaʼ tsəgha dwaʼa wo u dzə̀m alo kəwālā kə fwaʼā a zəŋò sɛ̀ ghəla à boō fughu a wə̄n. Kən lò daʼa kə wə̄n kə̀ ne ko,

²⁰ kəla ù fə̀ dê tsughu aŋghəa ù fə̀ zôm nughù kɔʼ Kə̀lestò alo evʉ̄, nì dòʼsò nàŋa tsughu wə̄n an kwe u wə̄n ù təma wo alo kəwālā.

²¹A fughu alo kəwālā, Kə̀lestò tsə̀ghàtàʼà sə dwə̀ŋ wə̄n ù dzə̀m, dwaʼa u wə̄n vʉa u tsə̀ghàtàʼà sə dwaʼa wo ù dzə̀m, kwù è wə̄n zəa è tsə̀ghà taʼà sə kwu tə udwə̀ŋ wən u dzə̀m, zən e Kə̀lestò zəa e ghaʼ tsəghàtaʼā zən ghən a dzə̀m am mbī zə̄n àsùghò an mbī zəla è ki alebùghò.

²² Zə̀ chia kə nî naŋā tsughu fʉgha wo u dzə̀m a tsəlà wə̄n, chia kə naŋā tsughu sughò wə̄n tò kətuw alo ufʉgha u dzə̀m an dzɔ̀ e ghì a Kəzə̀

²³Ghî a dzeŋe kə ghì a Kəzə̀ a lo tò gwə̄n e ughùe e Kə̀lestò, à bɔ̌ɔm lue kpeen tsughu ko wə̄n a te, wən wəla ù lue kpeen kaāŋ wo alo ufʉgha u dzə̀m.