Read Aghem Efɛsùs 2 Bible Online

Efɛsùs 2 - Aghem bible

Efɛsùs 2

¹Ghɛ̀ mò buʼ lo tsəgha tò ghî a kpuuwn gho bòʼ aŋghəa ghɛ̀ mò tsughòsò maʼn lâŋ kə Kəzə̀ kò, àsùghò bòʼ ghəa ghɛʼɛ à biigh gho,

²aŋghəa ghɛ̀ mò boʼ mughù tsəgha a te to ghî a mbī gho, ghɛ̀ m bwîi an lwàŋ u də̀ŋ kə zʉ̀ u biigh wəla u lo kaŋlo edzūŋ alo kəkwɛ̌ɛ, də̀ŋ kən lo zʉ̀ ù biigh wəla u fwaʼā ezəŋ a zəŋò ghì ghəla ghe tsughòsò maʼn Zə̀ kò.

³Sɛ̀ a dzə̀m mafə mughù sùghò tǒ ghee, aŋghəa gwən e ughùe e ghûw è ləghaa aŋ ki sugho moʼnlò è biigh zo tǒ ghee. È li lo enyəa ghe mǒ sɛ̀ dzə tò ghî ghəla Zə̀ kə̀ ki aledè nʉ̀ghà u wə̄n u pfʉa wo a zəŋò ghee, tò aŋghəa kə ghəŋlo â ghì ghən a dzə̀m.

⁴À sò kuuwn lò ko enyəa Zə̀ kə̀ ŋge ki se è kwuso zo, bòʼ ləgha e wə̄n zəla kə ki â sɛ̀.

⁵Aŋghəa sɛ̌ fə̀ bûʼ lô ko tò sɛ̀ kpuw dòʼò nù bòʼ ghəa a sɛ̀ à biigh gho, Zə̀ kə̀ ŋ ghəəŋ tsughu enyəa sɛ̀ e dzeŋe mughu sɛ̀ à ghê Kə̀lestò. À lo dzɔ̂ zəla Zə̀ kə mò dê tsughu â ghɛ e mò ghəŋlo enyəa ghɛ zə tuw ko.

⁶Zə̀ kə̀ n zôm nughù dzəə̄ŋ kɔʼ sughò sɛ̀ à ghê Kə̀lestò Yɛso, dòʼsò nàŋa dzəəŋ ndùw sùghò sɛ̀ à ghee an lùʼù tə kəwālā, aŋghəa Zə kə fə̀ ghəə̄ŋ tsughu enyəa sɛ̀ e lo fəgha ko kə mɔ̀ʼ sɛ̀ à ghê Kə̀lestò.

⁷Zə̀ kə fə̀ ènyə ghəəŋ tsughu enyəa an tì kəla kə ki alebùghò, kə ke e lo aledè dzɔ̀ e wə̄n e ne zo an ləgha zəla kə lo mo kə n dè â sɛ̀ aŋghəa ù fə̀ ghəə̄ŋ tsughu enyəa sɛ̀ doʼò kə̀fəgha kə mɔ̀ʼ sɛ̀ à ghê Kə̀lestò Yɛso.

⁸Tɔŋlo enyəa à ghəə̄ŋ dzɔ̀ e Kəzə̀ enyəa ghɛ̀ zə tuw ko bòʼ boo zəla ghɛ̀ ki â Kə̀lestò. À kà ghə̀əŋ tsùghù dzə̀ ghɛ enyəa ghɛ̀ zə tuw ko, à lǒ fughu kə Kəzə̀.

⁹À yò dzə̂ am fwàʼ kə̀ li ko ghuw fwàʼà tsughuu aŋ ŋgəŋ e wə̄n kə ghəŋlo enyəa ù zə kətuw, tò ù e lo aletsɔ̀ fə̀ŋ a te.

¹⁰Sɛ̀ lo ghu a kəfwàʼ a Kə̀zə̀ ù mò bɔm tsughuu aŋghəa sɛ̀ doʼò tsughu kəfəgha kə mɔ̀ʼ sɛ̀ à ghê Kə̀lestò Yɛso, alefwaʼā fwàʼ kə̀dzûŋ kò ù fə̀ biaan naŋā, enyəa sɛ̀ è bwiī a te.

¹¹Ghe mò ghɛ dzə wo tò Etoʼò; Tə̀dzûu, ghî ghəla ghe mò sugho tigh kə wɛ ko n tɔɔŋ ghɛ̀ enyəa, “Ghî ghəla ghe sugho yô tigh kə wɛ ko.” Mo ghəa a te a tsô lò ko ghəa ghəla ghùw ghəə̄ŋ tsughuu aŋ gwə̀n e ughùe.

¹²Ghɛ̀ e taā moʼn tsughuu enyəa tî kə te kə fə̀ lo mò ghɛ à ghê Kə̀lestò ka n zə dzəəŋ dzə̀, ghɛ̀ à ghê Ezə̀lɛ̂ n ndzùghùn lò sugho, ghɛ̀ ŋ ki yo ghu ko aŋ kàa məla Zə̀ kə̀ fə̀ zə ghèe ghê ghì a wə̄n gho an to u wə̄n wəla ù fə to naŋā. Ghɛ̀ n chîi yǒ tùʼ aŋ ghəa è li zo, Zə̀ kə̀ n yo sughô am mbī zɛʼɛ.

¹³Ghɛ̀ à ghê Kə̀lestò Yɛso kǔuwn lò nû alo kəfəgha kə mɔ̀ʼ êzə̄ŋ. Ghəa e fə̀ bûʼ lô ko enyəa ghɛ̀ fə̀ lɔʼso lo tsəgha nù, Zə̀ kə̀ ŋ ghəŋlo aŋ kàŋ tə Kə̀lestò ghɛ̌ yìa kuʼso doʼò wo ghɛ̀ a ghê Zə̀ kò.

¹⁴À lǒ Kə̀lestò ù fughuu sɛ̀ â bughuun zo, tɔŋlo enyəa à ghə̌ŋ wə̄n enyəa Tòʼò è dòʼò kə̀fəgha kə̀ mɔ̀ʼ ghèe ghê dzûu tò. Vʉ̀a ù sàʼ maʼa sugho bəgha kə ndughū kəla kə mò ghəŋlo enyəa ghɛ̀ ka e koʼō kàʼ mə̀ esʉ mò.

¹⁵Kə̀lestò mafə zê màʼà lwâŋ u Tə̀dzûu àsùghò ghəa ghela lwâŋ u gəə̄n ghî gho a te an vʉ e wə̄n, ù fə̀ ezə ghəŋlo enyəa to Etoʼò àsùghò Dzûu to mò bùghò doʼò ghì a fughu gho a zəŋò wə̄n to bughunlo e doʼò,

¹⁶àsùghò enyəa ù e lo alebian ghee a te gho a bə̀ghà, ù naŋa sɛ̀ à ghê Zə̀ kò alo kəfəgha kə mɔ̀ʼ an vʉ̄ e wə̄n alo kədàŋlo. À fì lo mo ù ŋ ghəŋlo enyəa ghe e koʼo dzəəŋ kàʼ mə̀ esʉ mò.

¹⁷ Zən lò e ghee Kə̀lestò mò bùghò kə̂a wô shwaʼ u dzûŋ wo alenìi wo è bughunlo â ghì ghə̀n à dzə̀m — â ghɛ̀ a Toʼò zò, ghɛ̀ ghəla ghɛ̀ mò tso kaām kwo yo Zə̀ kò, àsùghò Dzûu tò, ghe ghəla ghe tsoo kwo wə̄n.

¹⁸À lò am bàm e Kə̀lestò, sɛ̀ a dzə̀m, Tə̀dzûu à Tòʼò zò, sɛ̀ lô alendùw a vʉ̀a Tsele ù te an daʼa kə Zuʼ tə̀ Zɔlɔ to.

¹⁹E fi lo nû enyəa, ghɛ a Toʼo zò àsùghò Dzùu to, ghɛ êzəŋ kôom yo dzə ghî ghəla ghɛ bwîin nyə wo nû, ghɛ ezəŋ lo kəfəgha kə mɔ̀ʼ ghɛ̀ à ghê ghì a Kəzə̀ ghò, lò sugho alo kəfəgha kə mɔ̀ʼ ghɛ̀ à ghê kèndughu kə Kəzə̀ kò.

²⁰Ghɛ̀ ti sugho am bə̀ghàan kəla tum tə Kə kəze tə mò bəgha naŋa kɔ̀ʼ ghèe ghê ghiīshʉ̀ghà gho, mò à lo Kə̀lestò Yɛso ghuūghùe u wə̄n tia zə ebūw zo.

²¹À ndùghù è te e dzə̀m kwu kele wə̄n, vʉ̀a ù ghəə̄ŋ sugho enyəa è noō doʼò tsughu è baa zo â Mughu u te.

²²Yìa à lo wən ù nì təm dzəə̄ŋ wô ghɛ̀ à alo kəfəgha kə mɔ̀ʼ, ghɛ̌ yìa a doʼò tsughu ndughu zəla Zə̀ kə̀ mughu a tə an Zuʼ tə̀ Zɔlɔ to.