Read Aghem Efɛsùs 3 Bible Online

Efɛsùs 3 - Aghem bible

Efɛsùs 3

¹À lǒ bòʼ ghəa ghəla Zə̀ kə̀ lo mò kə ŋ ghəŋlo aletəmaa dzəə̄ŋ wô Tə̀dzûu ghèe ghê Tòʼò zo alo kəfəgha kə mɔ̀ʼ, mùghò Pôl, Ǹ lo ghùw ù ndùghùtsāʼ aŋ ghəa e Kə̀lestò Yɛso enyəa Ǹ zughò wo làbəlà è dzùŋ â ghɛ̀ à Toʼò zò.

²Ŋ̀ kwo nû enyəa ghɛ̀ maā zuw enyəa, Kə̀zə̀ am dzɔ̀ e wə̄n m mùgho â fwàʼ kə̀ fughu alenàʼà wô làbəlà e dzùŋ â ghɛ̀,

³àsùghò dzì zəla Zə̀ kə̀ lo mo kə n nì dè fùghù wò nàn kə eghəa M mafə bûʼ tsuʼ naŋa wò dzə̀ â ghɛ̀ a m mwàʼsò kaŋa.

⁴Abugho ghɛ̀ tɔɔ̄ŋ kɔʼ mwàʼsò kən ko, ghɛ̀ ke alezoʼn kele kɔʼ enyəa Ŋ̀ kûm kwò nû nàn kə eghəa kə te ko kùu ndùw Kə̀lestò.

⁵Kən fə̀ lo nàn kə eghəa kəla Zə̀ kə fə̀ lo mo kə kaām dê fughù kòʼ tsə̀ghà â ghùw an tì kə̀ li ko, tò aŋghəa Zə̀ kə ghəəŋ tsughu êzə̄ŋ Zuʼ tə̀ Zɔlɔ tia tə nî dè fughu wò nàn kə eghəa tə te to â tum tə wə̄n tə̀ zɔlɔ to àsùghò â ghǐishʉ̀ghà a Kəzə̀ ghò.

⁶Nàn kə eghəa e Kəzə̀ zən lo enyəa, Toʼò zə̀ m bughò kele sughô daʼa kə te ko aletəmadzəə̄ŋ ndûw Tə̀dzûu alezə̄ fʉgha u Kəzə̀, ghe lo tò wɛ a ghûw u mɔ̀ʼ, ghe yia ki sugho ghu ko am fəgha kəla Zə̀ kə fə̀ to naŋā â ghì ghəla ghe boo fughu â Kə̀lestò Yɛso. Ghəa à dzûŋ ghən enyə bùghò sə bòʼ làbəlà è dzùŋ zəla ghe fə̀ zuw, è boo.

⁷Ghe n naŋa tsughu mugho tǒ ghûw wəla ù naʼn làbəlà è te, mò à fwàʼ kə te ko â mùghò fughu Kəzə̀ an dzɔ̀ e wə̄n zəla ù mò dê tsughu â mùghò an daʼa kə wə̄n.

⁸Ghəa e bûʼ lô ko enyəa Ŋ̀ kâ tso kɔ̀ʼ kpe to ghe e tɔŋɔ mùghò enyəa Ǹ lo ghùw ù Kə̀zə̀, ghe fə̌ fwàʼ kən kə fughu wo â mùghò alezùghò naʼa kum e ne zəla e lo am bàm e Kə̀lestò â Tòʼò zò,

⁹àsùghò aleghəŋlo enyəa mbī e dzə̀m kòʼ nàn kə eghəa kəla Zə̀ kə fə̀ nân naŋā an ndə̀mà tə tənùu, tɔ̂ɔŋ Zə̀ kəla kə fə̀ gbə̂n wô fʉgha wo u dzə̀m.

¹⁰E fə̀ lo enyəa to dzeŋe kə ghì a Kəzə̀ ghə̀ e lo aledèe ndûw tɔ u Kəzə̀ ù ne wo â zʉ̀ wəla u saʼā ghî ghəla ghe lo a tsəlà ghee an lùʼù tə kəwalā.

¹¹Ghəa ghən fə̀ bɔɔm boo dzəəŋ nduw ko aŋghəa Zə̀ kə fə̀ ki fôʼ naŋā, ghəa a te ghə n nyoʼn bùghò sə wo sùghò êzə̀ aŋghəa kə fə̀ fôʼ naŋā am bàm e Kə̀lestò Yɛso Mughùbè ù sɛ̀.

¹²À lǒ Kə̀lestò ù ghəŋlo enyəa sɛ̀ e ndzəə̄m lo alebùghò a vʉ̀a Zə̀ kò mo a ki yo tsəŋ è li zo aŋghəa sɛ̀ gaʼ fə̀ŋ a zəŋò wə̄n.

¹³Zən lò e ghee Ǹ dzâa wo â ghɛ̀ enyəa, e kwo ko fə̀ŋ lo so e baŋà ghùw wɛʼɛ ù lì aŋ ŋgoʼ zəla Ǹ zuūw fɛ â ghɛ̀, tɔŋlo enyəa ŋgoʼ zəla Ǹ zuūw fɛ, à lǒ dzɔ̀ â ghɛ̀.

¹⁴Ǹ təma təŋguʼ a vʉ̀a Tsele ù sɛ̀ Kə̀zə̀ alo egɔ̀ŋlo bòʼ ghəa ghən a dzə̀m ù lo mo ù m fwàʼ â sɛ̀.

¹⁵À lǒ wə̄n ù bɔm ghî ghò a dzə̀m alo kəwāla àsùghò aŋ ghueekətsə̄.

¹⁶Ŋ̀ gɔ̂ŋlò enyəa to Zə̀ kə̀ mô nîi kɔʼ kum e wən è ne zəla e kê mîaan koʼò yo kə dzəlà tsughu fə̂ŋ tɛʼɛ a te an daʼa kəla Zuʼ tə̀ Zɔlɔ tə fughuu â ghɛ̀, tò ghɛ̀ e tughuu,

¹⁷àsùghò enyəa Kə̀lestò e mughu am fə̂ŋ tɛʼɛ bòʼ boo zəla ghɛ̀ ki â wə̄n. Ŋ̀ gɔ̂ŋlò enyəa to ghaŋ ghɛʼɛ a mô nyəā məla tsughu an ləgha zəla ghɛ̀ ki â Zə̀ kò àsùghò aŋ ghuè zɛʼɛ̄.

¹⁸Yìa Ŋ̀ gɔ̂ɔŋ sughò enyəa ghɛ̀ à ghê ghì a Kəzə̀ à li ghən e ke dzeŋe lo alekelê kə̀daʼa alezuūwkɛlɛ enyəa ləgha zəla Kə̀lestò ki â ghɛ̀ dùw tsə̀ghà sə fəgha kəla ghùw yò aleteso.

¹⁹Ŋ̀ gɔ̂ŋlò enyəa to ghɛ̀ mo mɔm zuw ləgha e Kə̀lestò zəla ghùw yò aleteso mɛʼɛ̀, tò mwam u Kəzə wəla a zəŋò ghɛ̀.

²⁰Zə̀ kə lo nû alefwàʼ, kə bùʼù fwaʼà tsəghàsə ghəa ghən a dzə̀m sɛ̀ bvʉā nduw, ŋkāa ghəa zəla a bûʼ moʼn tsughuu ko nû an daʼa kə wə̄n kəla kə fwaʼā a zəŋò sɛ̀.

²¹Ŋ̀ gɔ̂ŋlo enyəa to sɛ̀, dzeŋe kə ghì a Kəzə̀ mò ghə̌əŋ ndùw ghəa ghəla a fughuu kɔʼsò mò â Zə̀ kò aŋghəa sɛ̀ lô fəgha ko kə mɔ̀ʼ sɛ̀ à ghê Kə̀lestò Yɛso an nə̀ghā tən tə dzə̀m to mbī kê bughò mîaa. Zə e lo ko êzə̀.