Read Aghem Efɛsùs 4 Bible Online

Efɛsùs 4 - Aghem bible

Efɛsùs 4

¹Bòʼ ghəa ghə̀n a dzə̀m Zə̀ kə̀ lo mo kə ghəŋlo â ghɛ̀, zən lò e ghee, mùghò wəla Ǹ lô fɛ an ndùghùtsāʼ bòʼ M̀ fwaʼà â Mughu ù te, M̀ buʼū wô ghu ko â ghɛ̀ enyəa ghɛ̀ è mughu mughù zəla ghî a Kəzə̀ ki alemùghù ghè zò, zəla Zə̀ kə fə̀ tɔŋɔ ghɛ a te.

² Aŋ ghəa ghən à dzə̀m ghɛ̀ ghəəŋ nduw â ghì ghò, e maʼn tsughuu nlò ghue zo, ghɛ̀ n zumso ghəəŋ ndùw ghəa a te gho alo eləghāa. E kɔɔn tsughuu nlò fə̂ŋ tò, pfʉso sùgho yǒ nʉghà wò abugho ghùw ghəə̄ŋ boon ghəa zo, bòʼ ləgha zəla ghɛ̀ ki â ghì ghò.

³Zuʼ tə Kəzə̀ tə̀ ghəəŋ nù ghɛ̀ yia lo alo kəfəgha kə mɔ̀ʼ aŋghəa ghɛ̀ mughu alo ebughunlo, mò à lò bughunlo e te zo e nîi wò ghɛ alo kəfəgha kə mɔ̀ʼ; e dəma təla tsughu nlò alemùghù êzə̀.

⁴Aŋghəa e lǒ enyəa sɛ̀ a dzə̀m dzeŋe ki Zuʼ tə̀ Zɔlɔ tə̀ mɔʼɔ̄ to, sɛ̀ yia dzeŋe ghəəŋ kɔʼ sùghò ghue u mɔ̀ʼ, tò aŋghəa a dzeŋe chîi sugho tùʼ aŋ ghəa è mɔʼɔ̄ zo, à lò aŋ ghəa è mɔʼɔ̄ e te zo Zə̀ kə fə̀ tɔŋɔ ghɛ a te.

⁵Mughu ù te lo ko u mɔ̀ʼ, à lò ko dzì e mɔ̀ʼ sɛ̀ dzeŋe boō fughu a te â Kə̀lestò àsùghò enyəa à lo ko an zən e ghûw u mɔ̀ʼ ghe fughuu mùghù ŋ Kə̀zə̀ mò a te â ghì ghò.

⁶Zə̀ kə̀ lo ko kə mɔ̀ʼ, mo kə lo Tsele â ghì gho a dzə̀m, mo kə tsəghà sə̀ ufʉgha u dzə̀m. Kə ghəəŋ nù sɛ̀ a dzə̀m m fwaʼà ghəa ghəla kə ləghaa, chia kə mughù sugho am fə̂ŋ tə sɛ̀ a dzə̀m.

⁷Zə̀ kə̀ m fughu kaaŋ wô sɛ̀ â fughu kə nə̀ŋònəŋ ko tò ghu a kəfwàʼ a sɛ̀, fughu kəla sɛ̀ mò ki alekele am bàm e mwàʼ è Kə̀lestò.

⁸ Zən lo eghēe shwaʼ u Kəzə̀ ù dzɛ enyəa, “Ghəa ù fə̀ kɔʼɔ̄ nduw alo kəwālā, ù n nì nùghu kɔʼ ndùw â ghì ghə̀là ù fə kwuun kɔʼ; ù m fùghu sùghò aghì â ndə̀mà tə ufughu to.”

⁹E mòʼnlò èdughō aŋghəa Mwàʼsò kə Kəzə̀ kə̀ dzɛ̂ enyəa, “Ù fə̀ nughu kɔʼ nduw edzuŋ a?” E moʼnlò enyəa, “Ù fə buʼ nughu tsughu wo dzə fɛ etsən ètsən aŋ ghùekətsə̄.”

¹⁰Wə̄n wəla ù fə̀ tsughu wo, à lô sugho wə̄n ù mɔʼɔ wəla ù fə̀ kɔʼ ndùw sugho edzuŋ, bùʼ tsə̀ghàtàʼà edzuŋ èdzùŋ, enyəa to ù mò lô alo tə lùʼù tə dzə̀m.

¹¹À lǒ wə̄n ù fə̀ fughu dwaʼa u te wo â ghì ghò enyəa, ghî à li gho e lo tum to, à li gho e lo ghiīshʉ̀ghà a Kəzə̀ ghò, à li gho e lo ghê èfɔɔŋgele, à li ghə̀ e lo ghî ghəla ghə lɛnlo à ghî a Kəzə̀ ghò lò sugho ghê wàdè.

¹²Zən fə̀ lo alefughu udwaʼa â ghì a Kəzə̀ ghò alefwàʼ fwàʼ kə Kəzə̀ kò àsùghò aletughuso tsughu ghî à Kəzə̀ ghe sô lô gwən e ughùe e Kə̀lestò zò.

¹³Tò sɛ̀ a dzə̀m kè telè dzeŋe bughò dòʼò tsughu alo kəfəgha kə mɔ̀ʼ am boo e sɛ̀ zə̄lā a ki â Kə̀lestò, àsùghò enyəa a kê tɔʼɔ kele tsughu ghùw wəla Wɛ ù Kə̀zə̀ lǒ ghè wò. Sɛ̀ lo mə̄lā tsughu aŋ ghəa a Kəzə̀, a ke kuūm lo sugho tǒ Kə̀lestò.

¹⁴Sɛ̀ kê koom yo dzə̂ wɛghêtùghù gho, enyəa mo à bugho ko ndughò à tsʉ̀ zə agha e wən zo a n sə̀ tə̀ŋò ndùw a baa wən tò tùŋutùŋù kə dzughù kə̀ lô tûuŋ kaāŋ kwə̀n ko an dzughù.

¹⁵Sɛ̀ laam ki alekəaa ko ghəa zəla e lo èsəŋò an ləgha zəla a ki aŋ ghùe e sɛ̀, enyəa sɛ̀ lo noō doʼò alo kəfəgha kə mɔ̀ʼ sɛ̀ à ghê Kə̀lestò wəla ù lò tuw ko.

¹⁶ À gwən e ughùe zò e dzə̀m ki wə̀n, mò à lo ndə̀m è təsəŋ tə təm dzəə̀ŋ kɔʼ aleghəə̄ŋ kɔʼ ghùe u te wo. Abugho səŋ tə te to tə dzə̀m fwàʼà dzɔɔ̄, ghue u te wə n noom dzɔ̀ɔ, mò à lǒ alo eləgha ghùe u te u bəghā ghue wo.

¹⁷Tɔ̀ʼɔ naŋa wò nlò tuūŋ ko an tsʉ̀ zəla Ǹ tsʉ̂a wô ghɛ fɛ a te an daʼa kə Mughu u te, enyəa, ghɛ̀ ka kôom mùghù dzə̀ ŋgòʼ è mùghù zəla Toʼò e mughu ghè zo, nu ghe moʼn təla ko ghəa ghəla a kwuū yô ghəa zo.

¹⁸Ləm chia kə lo an sə a ghee, ghe yia a ki yo ghu ko am mùghù è fughu zəla Zə̀ kə̀ fughu â ghì ghò, bòʼ fə̂ŋso e ghee, ghe sô tughuso naŋā tsughu fə̂ŋ tə ghee to.

¹⁹Ghe tsoo də̀nsò yò tuw ko aŋghə̀a e li zo — ghe yia tsəghà təŋò tsughu ko aleghəəŋ ghəa à biigh gho, tsoo sə̀əm sùghò yo aleghəəŋ dzə̀adzə̀ tə aghəa tən tə̀ dzə̀m.

²⁰Ghən yò dzə̀ ghəa ghəla ghɛ̀ mò zoʼn kele kɔʼ kùu ndùw Kə̀lestò.

²¹Ghɛ maā zuw ghəa a wə̄n gho, ghe n zoʼn sughô ghɛ an səŋò zəla e lo kùu ndùw Yɛso.

²²Zə̀gha màʼa nlò mughù è wii zəla ghɛ̀ mò bûʼ mughù tsəgha ghè zò, mughù e te e mò seē məŋso ghɛ, ghɛ̀ ŋ ghə̂əŋ ghəa ghəla a wiīn ghɛ alo fətsə̀tèʼè.

²³Zêe zə̀gha tsughu nlò fə̂ŋ tɛʼɛ to, tò Zə̀ kə̀ kuuwn kɔʼ moʼn zɛʼɛ e doʼò tsughu è fughu zo.

²⁴Ghɛ ki alemughu to ghî à fughu gho, tò ghî ghəla Zə̀ kə̂ mò bɔm tsughu enyəa ghe e lo tǒ wə̄n, ghɛ̀ e kum lo tsəghatsəgha, zɔlɔ sùghò aŋ ghəa ghɛʼɛ̄ à ghəəŋ gho.

²⁵ Ghəa e lo èzəŋ enyəa ghɛ lo ghî à fughu gho, ghɛ̀ ki alezə̀ghàa maʼa gha à kaʼn gho, ghɛ̀ è kəaa səŋo zò an ghùe zɛʼɛ̄ tɔŋlo enyəa sɛ̀ êzəŋ lo alo kə fəgha kə mɔ̀ʼ an zən e Kə̀lèsto.

²⁶Abugho nʉghà u pfʉ koʼ ghùw, e kwo ko nʉghà u pfʉa u te lô so e ghəŋlo enyəa ghùw u te ghəŋlo èbo, ù ka boo sùghò enyəa zuw e saŋà mò nʉgha u te u naam pfʉa kò wən:

²⁷E kwo ghɛ̀ lô fughuu dzì â vʉatsə̄a gho aletsoom ghɛ̀.

²⁸Mò ghùw mò tsɔŋɔ nû, ù m màʼà tsɔŋ e te zo, u n nì kɔ̀ʼ ghu a wə̄n alefwaʼā fwàʼ kə̀ səŋò kò, tò ù e lo aleyòsò ghì ghəla kə ghee kə buw.

²⁹Kà nlò è bomlo enyəa shwaʼ ù biigh wə e səa wo an dzughu ghɛʼɛ̄, e kuuwn bɔɔm kəaa təla ko nlò shwaʼ wəla u lo aleyòsò aghì am fəgha kəla kə kpe â ghee, enyəa ghî ghəla ghe zəə̄n shwaʼ u te wo, u e lo aleyòsò ghee.

³⁰Kà nlò è ghəŋlo enyəa Zuʼ tə Kəzə̀ tə̀ Zɔlɔ tə e lo alo esē, tɔŋlo enyəa à lò tə ghee ghe fə̀ tsə̂sò naŋa ghɛ a te, aledèe tsughu enyəa Zə̀ kə̀ kê bə̀ghasəa nù ghɛ abugho tsuʼ u te u kê kpe.

³¹Ghɛ̀ maʼa nlò nə̀ghà m pfʉa mò, etɔnlo àsùghò nə̀ghà fə̀ tɔɔ fò. Ghɛ̀ bughu naŋa sugho alenyuʼn dəma zee ŋkāa alemaʼn kaaŋ nùʼ tò aŋ ghùe zɛʼɛ̄ àsùghò ŋgòʼ tə aghəa tə biigh to tə dzə̀m.

³²Ghɛ̀ kuuwn ki aleki fə̂ŋ tə̀ dzûŋ tò, dèe ndùw sùghò èdzɔ̀ aŋ ghùe zɛʼɛ̄. Mò ghùw ghəəŋ bonlo èghəa â wàazə̀, wàazə̀ ù te ŋ ghuuw màʼà bo e ghûw ù te to aŋghəa Zə̀ kə̀ mò bɔɔ̄m ghuūw maʼà sugho bôo tə sɛ̀ tò aŋghəa sɛ̀ lǒ fəgha ko kə mɔ̀ʼ sɛ̀ à ghê Kə̀lestò.