Read Aghem Efɛsùs 5 Bible Online

Efɛsùs 5 - Aghem bible

Efɛsùs 5

¹E fi lo enyəa ghɛ̀ koʼ ni ghəa a Kəzə̀ ghò bòʼ enyəa ghɛ̀ lo wɛ a wə̄n a fə̂ŋ ghò.

²E ləghaa nduw nlò ghî ghò tò aŋghəa Kə̀lestò mò ləgha wo sɛ̀ a te, ù m fùghù sùghò ghue u wə̄n to kəfughu kə̀ ləə̄m dzɔɔ̄ ko enyəa ghe sâa ndûw â Zə̀ kò an tuw u sɛ̀.

³Ezəŋ wəlà ghɛ̀ lô ghì a Kəzə̀ ghò, e nûŋlò, ghəa à dzəa ghən à dzə̀m à dzə̀m àsùghò kʉmè zò lǒ ŋgòʼ è ghə̀a ghəla a kôom ki dzə̂ yo aleniī bəla ko am bvʉa zɛʼɛ̀.

⁴E kwo ko ghùw wɛʼɛ lò so e ki dzughu e biigh zo ŋkāa alekəaa shwaʼ ù dzəa wo, ŋkāa shwaʼ ù laʼso wo, tɔŋlo enyəa shwaʼ u te u fween yo ghɛ. Ghɛ̀ lāam ki alefughuu zɔɔŋ kò â Zə̀ kò am fəgha kəla kə lo mò kə fwàʼ â ghɛ̀.

⁵Kele tsughu nlò enyəa, ghùw wəla ù ghəə̄ŋ dzə̀adzə̀ tə aghəa to ŋkāa ghəa à nuūŋ kaaŋ gho, ŋkāa ghùw wəla ù kume (nu kumè è lo tǒ zə̀ kə̀ li ko ghî a kɔʼsò) lo kele dzə̀ yǒ ndâŋ è lì an fɔ̀e u Kə̀lestò ghèe Zə̀ kò.

⁶E kwo ko ghùw ù lì lô so e bughô nìi wò zuum tə ushwāʼ tə̀ li to, ù buū fwəlà tsughu tɔ wɛʼɛ̀ a te, tɔŋlo enyəa à lǒ bòʼ ghəa ghən gho Zə̀ kə̀ dêe nʉgha u wə̄n u pfʉa wo a te a zəŋò ghì ghəla ghe zuūw yo â wə̄n.

⁷E fi lo enyəa ghɛ̀ dɔ̂m kì dzə yo alezəafaa ghɛ̀ à ghê ŋgòʼ è aghì ghəla ghe ghəə̄ŋ ghəa ghən gho,

⁸tɔŋlo enyəa ghuūghùe zɛʼɛ̄ e fə̀ buʼū lo tsəgha alo kələ̄m, ghɛ̀ yia lo mò ghɛ̀ n sə teme wò an tsə̂ êzəŋ aŋghəa ghɛ̀ à ghê Mughu ù te lô fəgha ko kə mɔ̀ʼ. E ghəəŋ nduw nlò ghəa ghɛʼɛ gho tò ghî ghəla ghe lo mo ghe n sə tēe wò an tsə̂.

⁹Abugho ghuw ti an tsə̂, ghəa ghən a dzə̀m ù ghəŋlo ghə n dzɔ̂ɔ, lò tsəghatsəgha, lò sugho èsəŋò.

¹⁰E dəma tsughu nlò aleghəəŋ ghəa ghəla a ghəŋlo enyəa fə̀ŋ è Mughu ù te e tsoʼnlo a te.

¹¹Kà nlò ghu kò e nyəso aŋ ghəa e kə lə̄m è li zo, tɔŋlo enyəa ghəa a tè a ki dzə yo namso kə̀ li ko. E kuuwn niī deē fughuu səa wo ghəa a te gho an ndɛ to ghî ghə̀ e koʼō.

¹²Tɔŋlo enyəa à bùʼ lò ghəa e tùw kə̀ dəla ko alekəā ghəa ghəla ghî à nalà ghəŋlo.

¹³Abugho ghe nî tiso sə wô ghəa zo an tsə̂, e fi lo an ndɛ, tɔŋlo enyəa abugho ghəa e lo an ndɛ, e fi lò tsə̀.

¹⁴Zə̀ lò e ghee ghe dzâa tsughuu enyəa, “Hɛɛ mugho fə̀ŋo tə̀mgbii, zôo nùghu kɔʼ alo evʉ̄, ghù tee kɔʼ alò fwē, tò Kə̀lestò lo ghəŋlo tsə̀ e wən e tughuu a zɔŋɔ ghù.”

¹⁵E fi lo enyəa ghùw kǐ aletɔʼɔ̄ naŋso tsughuu ghuw kə egbìi kə wə̄n ko, kà è tsôo bwiī ko nlò tò ndzəŋso tə aghì, e kuuwn bwiī nlo tò ghî à tɔɔ gho.

¹⁶ E ghəəŋ tsughu nlò ghəa è səŋò zò an nə̀ghàa zəla ghɛ̀ ki, bòʼ enyəa ghəa a biigh a ŋgee kə̀mà êzəŋ an tsùʼu mən.

¹⁷Ghɛ̌ ki dzə yo alelo ghî à laʼso gho. E kuuwn zuuwkɛlɛ tsughuu ko nlò fwàʼ kəla Mughu ù te ləghaa enyəa ghɛ̀ è fwaʼa ghè kò.

¹⁸Ka nlò è mʉa kala sugho lʉ̀ mò, tɔŋlo enyəa lʉ̀ ŋ ghəəŋ nù ghùw ŋ ghə̂əŋ ghəa à kwu gho. E zəghaan tsughu nlò Zuʼ tə̀ Zɔlɔ to tə n dêe ndùw ghɛ̀ â dzì.

¹⁹ Mò ghɛ̀ bugho təmdzəə̄ŋ kɔʼ nû, ghɛ̀ n dzeŋe zôo àghəa àsùghò ndzàŋ təlà Dɛvìd fə̀ bughòo naŋā, buʼu ùfʉgha, zɔŋɔ̀ sùghò kə̀zɔ̀ŋ aŋghəa ghɛ̀ fughuu kɔʼso mò â Mughu ù te am fə̀ŋ tɛʼɛ tə dzə̀m.

²⁰Ghɛ̀ è fughuu nduw sugho zɔɔŋ kò â Zə̀ kò, Tsele ù sɛ̀ alo aghəa a dzə̀m àsùghò an nə̀gha tən tə̀ dzə̀m an zən e Mughùbè Yɛso Kə̀lestò.

²¹Mò ghùw wɛʼɛ dzɛ̂ ghəa è li zo â wàazə̀, wàazə̀ ù te mò è zuw bòʼ kɔʼso məla ghɛ̀ ki â Kə̀lestò.

²² Ghɛ̀ a yi ghə a num gho, e zuuw nduw nlò â num ghɛʼɛ gho, tò aŋghəa ghɛ̀ zuuw â Mughu ù te,

²³tɔŋlo enyəa num lo kətuw â wī tò aŋghəa Kə̀lestò lò tuw ko a zəŋò dzeŋe kə ghì a Kə̀zə̀ ghò. Kə̀lestò wə̄n lo wəla ù mò bəghasə̄ ghî a Kə̀zə̀ ghəla ghe lô ghue u wə̄n wo.

²⁴Yi ghə anum a ki alezuuw nduw â num a ghee gho, tò aŋghəa dzeŋe kə ghì a Kəzə̀ kə̀ zuūw a te â Kə̀lestò.

²⁵Num ghə ayi gho, e ləghaa nlò yi ghɛʼɛ gho, tǒ aŋghəa Kə̀lestò mò ləgha ghî a Kəzə̀ gho a te boo tsughu alekpūw an tuw u ghee.

²⁶Ù fə̀ enyə ghəəŋ tsughu enyəa dzeŋe kə ghì a Kəzə̀ kò dòʼò fəgha kə̀ ba ko an daʼa kə shwaʼ u wə̄n aŋghəa ù fə̀ nî kɔʼ ghee sùw sə kɔʼ alo mmùghu.

²⁷Ù fə ezə ghəŋlo alenì tiso wô dzeŋe kə ghì a Kəzə̀ an sə kə wə̄n mò ghe lo alo nsəghanyəgha, mo ghe ki yo nwa wo ŋkāa mo ghe kâ tàŋndzùʼnlo, ŋkāa ghəa e biigh è li zo; enyəa ghe e zɔlɔ, mò ghùw yò alesaʼ ghee aŋ ghəa è li zo.

²⁸À fi lo enyəa wìnû kì sugho aleləghaa wī ù wə̄n tò aŋghəa ù ləghaa ghue u wə̄n wo a te. Ghùw wəla ù ləghaa wi ù wə̄n, ù fi ləghaa sùghò nù ghue u wə̄n wo.

²⁹Tɔŋlo enyəa ghùw ù lì yo dzə̂ ù bàa ghue u wə̄n wo, ù lǎam lɛnlo â ghè wò, tsʉa sùghò tò aŋghəa Kə̀lestò ghəŋlo â dzeŋe kə ghì a Kəzə̀ ghò,

³⁰bòʼ enyəa sɛ̀ lo tǒ nyùŋ u ughùe u wə̄n.

³¹ Tò aŋghəa ghe tɔm naŋā am mwàʼsò kə Kəzə̀ enyəa, “Zən lò e ghee wìnû zə̀ghàan taʼn tsughuu tsele ghèe zə̀, ù n nduẁ təm dzəəŋ kɔʼ ghèe wi ù wə̄n, ghee a te gho a bə̀ghà m bùghò dòʼò kɔʼ kəfəgha kə̀ mɔ̀.”

³²Səŋò e ne e lo nu e nân doʼo an shwaʼ wən, Ŋ̀ ghəa ghən fɛ kə̀aa kùu ndùw Kə̀lestò ghèe ghê dzeŋe kə ghì a Kəzə̀ ghò.

³³Shwaʼ wən enyə lǒ â ghɛ̀ a dzə̀m, enyəa ghùw kì aleləghaa wi ù wə̄n tò aŋghəa ù ləghaa ghue u wə̄n wo a te, wìzən e tele zuuw nduw sugho â num ù wə̄n.