Read Aghem Efɛsùs 6 Bible Online

Efɛsùs 6 - Aghem bible

Efɛsùs 6

¹Wɛghêtùghù gho, e zuuw nduw nlò â ghê tsùghò bòʼ enyəa ghɛ̀ à ghê Mughu ù te lo kəfəgha kə mɔ̀ʼ, nu e lo tsəghatsəgha aleghəŋlo êzə̀.

²“E fughuu nduw nlo kɔʼso mò â ghê tsùghò ghèe ghê zùghù.” Kən lò lâŋ kə sʉesʉ kəla kə ki to ko ebàm:

³enyəa, “Sə̀ghà è kə̀tuw zɛʼɛ e zɔlɔ, ghɛ̀ lo ŋge mughuu sugho am mbī.”

⁴Yia a bughò ghɛ a ghê tselè wɛ̀, ka nlò è ghəəŋ ghəa a nʉ̀ghà ù pfʉa gho â wɛ ghɛʼɛ̀ gho. Ghɛ̀ kuuwn ki aleghəŋlo enyəa ghe noō sə kɔʼɔ̄ wò an tsəŋ e Mughu ù te, ghɛ̀ è fughuu sugho ghee â tsʉ̀ zəla Zə̀ kə̀ ləghaa.

⁵Â ghɛ a kɔ̂ wò, e zuuw nduw nlo â ghê mughùbè ghɛʼɛ ghəla ghɛ̀ ki fɛ aŋ ghueekətsə̄, ghɛ̀ e tsəŋo ghee, fughuu sughò ghee â kɔʼso mò, fwàʼà nduw â ghee am fə̂ŋ è zɔ̀lɔ̀ tò ghɛ̀ fwaʼa â Kə̀lestò.

⁶Ka nlò è ka fwaʼa ko an nə̀ghà zəla ghùw u lì ti lɛɛn wò ghɛ̀, enyəa to ù mò tɔ̀ʼɔ̀ kɛ̌ɛ wò ghɛ̀ enyəa ghɛ̀ nyɔ̂ʼɔ̀ fwàʼà nù. E kuuwn fwaʼa nduw nlo fəgha kəla Zə̀ kə̀ ləghaa â ghɛ̀ am fə̀ŋ tɛʼɛ tə dzə̀m, tǒ kɔ̀ɔ ŋ Kə̀lestò.

⁷E deē nduw nlò ghɛ̂ zò an fwàʼ kɛʼɛ, ka nlò e fwàʼa enyəa ghɛ̀ fwaʼa â ghuw, e fwaʼa nduw nlò enyəa ghɛ̀ fwaʼa â Mughu ù te.

⁸Nu ghɛ̀ kwo nù enyəa Mughu ù te lo namso nù ghî ghəla ghe fwaʼa fwaʼ kə̀ dzûŋ kò, ka ghe lô kɔ̂ wò ŋkāa ghe ndzə̂m mughu.

⁹Â ghɛ̀ a ghê mughu a ukɔ̀ wò, e ghəəŋ nduw sugho nlò ghəa è mɔʼɔ zo a zəŋò kɔ̀ wɛʼɛ wo, ka nlǒ ghee e tsəŋso sugho, ghɛ̀ è kwo sugho enyəa ghɛ̀ à ghê kɔ̀ wɛʼɛ u dzeŋe ki ko Mughùbè u mɔ̀ʼ alo kə̀walā, mò ù bàa yò kpìī wo.

¹⁰Gùŋsò kə eghəa kaŋā â ghɛ̀ lo enyəa, ghɛ̀ è tughuu an daʼa kə̀ ghaʼa kə̀ Mughu ù te ko, aŋghəa ghɛ̀ lô fəgha ko kə mɔ̀ʼ ghɛ̀ à ghee.

¹¹Nǐi kɔʼ nlò fʉgha u tsam wɛʼɛ wəla Zə̀kə̀ fughu ghɛ, ghɛ̀ kwu kele kɔʼ tò ghɛ̀ è lo aletughuū tsə̀ghà tsè n utɔ mə̀ avʉatsə̄a.

¹²Tɔŋlo enyəa sɛ̀ təma dzə̀ yǒ tsàm sɛ̀ à ghê ghì ghò, a tsàm kuuwn təma sɛ̀ à ghê zʉ̀ ù biigh wo, təma sùgho sɛ̀ à ghê zə̀a m biigh məla à tuu sə̀a wo dwə̀ŋ u te wo, təma sùghò sɛ̀ à ghê zʉ̀ wəla u ki dwaʼa wo aŋghəa a kələm ghəla a nîi bəla ke êzə̄ŋ, àsùghò zʉ̀ ù biigh ù li wəla u boōn kaāŋ ghəa gho an luʼu tə kəwalā

¹³Ghɛ fi ki alenìi kele təla kɔʼ fʉgha u tsam wɛʼɛ wəla Zə̀ kə fughu â ghɛ̀ aleghəŋlo enyəa mo tsuʼu zʉ boon ko nù, vʉ u tsəgha mîaa nduw, ghɛ̀ n naam ti ko alo tətsə̂n.

¹⁴Zən lo dzì zəla ghɛ̀ ki aletee a te, ghɛ̀ kì alenìi kɔʼ esəŋò tò fəkwûu alekɔlɔ̄ tughuso nyəaā ndûw ndzʉ tɛʼɛ a te alo esā, ghɛ̀ è lo sugho tsəghatsəgha aŋghəa ghɛʼɛ à ghəəŋ gho tò kəkə̀ŋ aŋ chichi kɛʼɛ.

¹⁵Ghəa ghɛ ki zîi e te alezùghò làbəlà e dzùŋ zəla è bùghò â bughun zo, à lo sugho eghəla tò sughugòʼ lò dzə̂n kɔʼɔ guw to alendùw an tsam.

¹⁶Alebaʼso tsughu aŋ ghəa ghən a dzə̀m, è li e lo enyəa ghɛ̀ naŋa tsughu boo e Kəzə̀ zɛʼɛ̄ zo tò kəkə̂ŋ alebuu baʼa kàʼtəmwɛ̀ təla vʉatsə̄a a tuu səā wo.

¹⁷Ghɛ̀ ni kɔʼ zə e kətuw zə̀lā Zə̀ kə̀ lo mo kə̀ m fughu â ghɛ̀ tǒ taaŋ kə tsam. Nii kɔʼ nlò shwaʼ u Kəzə̀ wò tǒ kɔ zəla Zuʼ tə zɔlɔ tə fughuu â ghɛ̀.

¹⁸Ghɛ̀ è gɔŋlo an nəgha tən tə̀ dzə̀m aŋghəa Zuʼ tə Kəzə̀ tə̀ fughuu ghɛ â daʼa ko a te, bvʉa ndùw fəgha kəla ghɛ̀ ləgha a wə̄n. Aŋghəa yì ezə̀, tiso kɔʼ nlò tuw ko alo egɔ̀ŋlò, ghɛ̀ è tɔʼɔ tuw u ghî a Kəzə̀ a zɔlɔ gho a dzə̀m aŋ gɔ̀ɔŋ zɛʼɛ,

¹⁹Ghɛ̀ e gɔɔŋ tsughu sugho an tuw kaŋa enyəa to Zə̀ kə̀ mô fughu mugho â daʼa ko to mùghò è ki fə̀ŋ alenàʼà nàn kə eghəa kəla kə lo aŋ làbəlà è Kəzə̀.

²⁰Ghe mò mùgho tum wo â alebùghò naʼà làbəlà èdzùŋ zə̄n, zən lò e ghee Ǹ lô fɛ an ndùghùtsā. E gɔŋlo nlò an tuw kaŋā enyəa to M̀ mò lò aledoō naʼn làbəlà zən an ghəa ghəla ŋ ki alenàʼà a te.

²¹ Taekikùs, wàazə̀ ù sɛ̀ wəla u ghàʼ ŋgeē ləghaa, vʉ̀a ù lò sughò kɔɔ fəla fə zumso fwaʼa â Mughu ù te bughò nǔ fì a vʉ̀a ghɛ̀, ù lo bùghò tɔʼɔ̀ teso dzâa wô ghəa ghəla Ǹ lô fɛ a te â ghɛ̀.

²²Zən mìa kô ghəa zəla Ǹ tum sə wo wən a te, enyəa ghɛ̀ kele tsughu ghəa ghə̀là ghàʼ lô fɛ a te, àsùghò enyəa u è lo alefəghaan dzəlà wô fə̀ŋ tɛʼɛ.

²³Gɔ̂ɔŋ zaŋa e lo enyəa to Kə̀zə̀, Tsele u te ghèe Mughùbè Yɛso Kə̀lestò mò fughu ghɛ â bughun zo, ghe ghəəŋ tsughu enyəa ghɛ e ləgha nduw ghue zɛʼɛ zo, boom fughu nduw sugho â Kə̀lestò.

²⁴Yìa Ŋ̀ gɔ̂ɔŋ sugho enyəa to Zə̀ kə̀ mo dê dzɔ̀ e wən â ghì ghəla ghe ki ləgha zəla e kê mîaan koʼò yo â Mughùbè Yɛso Kə̀lestò.