Read Aghem Fèlepìan 1 Bible Online

Fèlepìan 1 - Aghem bible

Fèlepìan 1

¹ À mwàʼsò kən kə tɔm wò mùghò ghàʼ à Timotì, ghàʼ lo ghî a kəfwàʼ a Kə̀lestò Yɛso. Ghàʼ mwàʼsò kən kə tɔɔ wò â ghɛ̀ ghî a Kəzə̀ yi ghɛ̀ lo fi an naʼ e Felèpîi, â ghɛ̀ ghəla ghɛ̀ lô fəgha ko kə mɔ̀ʼ ghɛ̀ à ghê Kə̀lestò Yɛso, àsùghò â tsoʼ tə dzeŋe kə ghì a Kəzə̀ to ghèe ghê ghì ghəla ghe fughuu ghɛ â yòsò zò..

²Ŋ gɔ̂ŋlò enyəa to Kə̀zə̀, tɔɔŋ Tsele ù sɛ̀, ghèe Mughu ù te, Kə̀lestò Yɛso mò fughu ghɛ bughuun zo, ghe dêe sughò ghɛ̀ â dzɔ̀ e ghee zo.

³M̀ fughuu kə̀zɔ̀ŋlò â Zə̀ kaŋa ko nəgha tən tə̀ dzə̀m abugho M̀ moʼn tsughu ghɛ,

⁴àsùghò nəgha tən tə̀ dzə̀m abugho Ŋ̀ gɔ̂ŋlo â ghɛ̀, M̀ bughoo mùgho ŋ gɔŋlò alo eduʼnlo,

⁵bòʼ yosò zɛʼɛ zəla ghɛ̀ mò fughu â mùghò alenàʼà làbəlà è Yɛso zən, alenìi nughù wô an tsuʼ fə sûesʉ fəla ghɛ̀ fə̀ boō fughu a te tsughu, bùghò tɛ̀ wò êzəŋ.

⁶Ǹ tɔ̂ʼ kwo nû enyəa Zə̀ kəla Kə fə̀ kaʼ tsughu fwàʼ kə̀ dzûŋ kən a zəŋò ghɛ̀ lo fwàʼà suɛ̀lɛ̀ sə̌a ndùw nù alendùw tâa ndûw an tsuʼ fəla Yɛso Kə̀lestò kè bughoo a te ebàm.

⁷À lo nu dzɔ̀ â mùghò alekele ŋgòʼ è mòʼn zən a zəŋò ghɛ̀, nu Ŋ̀ ki ghɛ am fə̂ŋ è dzùŋ. Bòʼ enyəa sɛ̀ a dzə̀m dzeŋe dzùghuun dzə̌əŋ dzɔ̂ e Kəzə̀ məla Zə̀ kə̀ fughu â mùghò. Tò êzəŋ wəla Ǹ lo mo ghe kùm nàŋa mugho alo tətsaʼ aŋ kwə̀n ŋkāa tò an ti kə̀là mùgho mò ki daʼa ko kə̀ŋlò làbəlà è dzùŋ è Yɛso àsùghò aleteso dzaā wo enyəa zə̀ è ki zən ko.

⁸Nu Zə̀ kə̀ kwo nû enyəa ləgha zəla Ŋ̀ ki a zəŋò ghɛ̀ lò zəla Yɛso Kə̀lestò ki sugho a zəŋò ghɛ̀.

⁹Ŋ̀ gɔ̂ŋlò enyəa to ləgha zə eghùe zɛ̀ʼɛ e mô nǒom ndùuŋ ndùw àsùghò tɔ wɛʼɛ ù zuuwkɛlɛ wə aghəa ghəla a lô è səŋò àsùghò enyəa ghɛ̀ e lo alekwo ghəa è səŋò zo a zəŋò è biigh zo,

¹⁰tò ghɛ̀ e ke lo alekwo ghəa zəla e dzɔ̂ tsəgha. Ghɛ̀ e ke lo ghî à zɔlɔ gho, mò ghe e yo alesaʼ ghɛ aŋ ghəa è li zo

¹¹Yɛso Kə̀lestò kè ghə̌əŋ sùghò nù mughù zɛʼɛ zə e ke lo è dzûŋ zò, zəla e ki kɔʼso mò à kəma mò â Zə̀ kò.

¹²Waazə̂ ghaŋa gho, Ǹ ləghaa enyəa ghɛ̀ kele tsughu enyəa, fəgha kəla kə sə a zəŋò mùghò ŋ kùum ŋgè yòsò aleghəŋlo enyəa to làbəlà è dzùŋ mò noō ndûuŋ ndûw â sə ko.

¹³ Tɔŋlo enyəa, gbè tə tɔʼ tə dzə̀m an Lumà, àsùghò ghì ghò a dzə̀m fɛ kwo nû enyəa M̀ fɛ aŋ kwə̀n lǒ zuŋufia Ǹ lô kɔ̂ɔ fə Kə̀lestò fò,

¹⁴Doʼò zaŋa aŋ kwə̀n zəa e dzə̂n tsughu sughò fə̂ŋ tə ghì ghə̀là ghe boō fughu â Mughu ù te enyəa ghe e ki fə̂ŋ to aleŋgee naʼn nduw shwaʼ u Kəzə̀ wò mo ghe ki yo tsəŋ zo.

¹⁵À lò nû èsəŋò enyəa ghî à li a naʼn wò tùm è Kə̀lestò à mʉ̌ʉn ko alo tə fə̀ŋ, bwìi wò sùghò an tàaŋ tə efwe tə waazə̂, ghî à li yia kuūwn naʼn wo làbəlà è te am fə̂ŋ è tə̀ dzùŋ tò.

¹⁶Ghî a fə̀ŋ tə̀ dzûŋ ghən a fwaʼà wò alo eləgha, bòʼ ghe kwo nû enyəa Mughu ù te nì wò alekə̀əŋ làbəlà è dzùŋ è te.

¹⁷Ghî à loʼ a yi naʼn làbəlà è dzùŋ è Kə̀lestò am mòʼnlò e ghee è biigh zo, ghe sô moʼò enyəa ghe lo aleghəŋlo mùghò è ŋgee zuuw fɔɔn zo aŋghəa Ǹ lo aŋ kwə̀n.

¹⁸Zə ndoʼò mòʼn dzə̀ yò ghəa è li zo, ŋkāa ghe naʼn tùm è Kə̀lestò mo ghe ki moʼnlò è biigh zo ŋkāa moʼnlò è dzûŋ zò, ghəa è səŋò è lo ko a te enyəa ghe n tùm è Kə̀lestò naʼà. Zə̀ lò e ghee Ǹ duʼnlō, mò Ǹ lo tsò nǎam ki ko aleduʼnlo,

¹⁹E lo nû èsəŋò enyəa Ǹ lo naam ki nû aleduʼnlo, Ǹ sô kwo enyəa gɔ̂ɔŋ zɛʼɛ àsùghò daʼa kə Yɛso Kə̀lestò kò lo bəghaasəa nù mugho.

²⁰Ləgha zaŋa, àsùghò mòʼn zaŋa zo, lo enyəa, e kwo ko Ŋ̀ kê bvʉ̂a kôʼ am fwàʼ kaŋa, à è tsoo səasəa êzə̄ŋ a, àsùghò an nə̀gha tən tə̀ dzə̀m à, to Ǹ lo e ki fə̀ŋ, ghue waŋa u dzə̀m wə̀ è fughuu sugho kɔʼso mò â Kə̀lestò, ŋkāa Ǹ lo â səa à tughu gho ŋkāa M̀ kpuw ko nû.

²¹Tɔŋlo enyəa, â mùghò alemùghù, à lǒ bòʼ Kə̀lestò, vʉ zəa e bûʼ lô namso ko.

²²Abugho à bùʼ lò ko alemùghù aŋ gwə̀n e ughùe, à nǎam lò ko fwàʼ kəla kə tsəā â mùghò, alefwaʼā â Kə̀lestò. Yìa à sò lô ko enyəa, Ŋ̀ kwo dzə yo kəla kə tsəghà sə kə̀ li ko.

²³M̀ fɛ êzəŋ ti an tsə̀tèʼè fə ghəa a te gho a bə̀ghà. Ŋ̀ ŋgee ləghaa nù alenùghù ndûw doʼò ndûw ghàʼ à Kə̀lestò, bòʼ e dzɔ̂ tsə̀ghà àghəa à dzə̀m — alendùw doʼò a vʉ̀a Yɛso.

²⁴E dzɔ̂ɔ nù enyəa to M̀ mô kuūwn doʼò â tuw ko am bàm zɛʼɛ̄.

²⁵Ŋ̀ kûum kwò nû enyəa Ǹ lo dòʼn dòʼn nù, aleghəŋlo enyəa ghɛ̀ noo nduw am boo zəla ghɛ̀ ki àsùghò an duʼn kəla ghɛ̀ ki aŋ ghùe zɛʼɛ̄.

²⁶To abugho Ŋ̀ kê lo sɛ̀, bughò zaŋa ebàm a fìa vʉ̀a ghɛ̀ è ke lo soo kə eghəa kəla ghɛ̀ fughu kɔʼso mò a te â Kə̀lestò Yɛso.

²⁷Ghəa è səŋò zə èzəŋ e lo ko enyəa, ŋgòʼ è dzì zəla ghɛ̀ mughu a te ki alelo fəgha kəla làbəlà è dzùŋ è Kə̀lestò dzâa ghè kò, enyəa abugho M̀ bùghò kôʼ ko ghɛ ŋkāa M̀ bûʼ buw ko alebùghò kòʼ ghɛ̀, mùghò è ke lo alezuūw wo enyəa ghɛ̀ kûum tì nû alo kəfəgha kə mɔ̀ʼ, àsùghò enyəa am fə̂ŋ e mɔ̀ʼ, ghɛ̀ è dəma alekwuū kelè boo zəla ghɛ̀ zoʼn kɔʼ an làbəlà è dzùŋ è te.

²⁸E kwo ko ghîikətuw ghɛʼɛ̄ a lô so e beme tsughu ghɛ̀, ghɛ̀ nughu tsəŋ doʼo nduw. Zən kè lǒ tsə̌a aledèe tsughu â ghîikətuw ghɛʼɛ gho enyəa ghe lo bvʉ̀a kòom nù, Zə̀ kə̀ lo ghəŋlo ghɛ̀ zə tuw ko.

²⁹Tɔŋlo enyəa, Zə̀ kə̀ kâ ka dè ko ghɛ â dzɔ̀ e wə̄n zo enyəa ghɛ̀ boo ko â Kə̀lestò, à lò sughò enyəa ghɛ̀ ki alefaan sugho bòʼ wə̄n.

³⁰ Ghɛ mô èzə̄ŋ nyə sùghò an tsù wəla ghɛ̀ fə̀ bugho ghà n zuuw wò aŋghəa Ǹ dəmà a te alekə̀əŋ làbəlà è Kə̀zə̀, àsùghò aŋghəa ghɛ̀ koʼô wo Ǹ naām dəmà ko êzə̄ŋ a te.