Read Aghem Fèlepìan 2 Bible Online

Fèlepìan 2 - Aghem bible

Fèlepìan 2

¹Aŋghəa e lò dzə enyəa, Kə̀lestò dzə̀là nù fə̂ŋ tɛʼɛ to, Zuʼ tə̀ Zɔlɔ tia tə naāŋ ghɛ̀ alo kəfəgha kə mɔ̀ʼ, ləgha zəla Kə̀lestò ki a zəŋò ghɛ̀ zəa e tsəmso sughò ghɛ, ghɛ̀ yia ki ləgha zo àsùghò se è kwuso zo aŋ ghùe zɛʼɛ̄.

²Ŋ̀ gɔŋlò enyəa ghɛ̀ è lo alo kəfəgha kə mɔ̀ʼ, lò sugho alo edzughu e mɔ̀, àsùghò am fə̂ŋ è mɔ̀ʼ, ləghaa sùghò ghue zɛʼɛ, to duʼn kaŋā kə kpeēn mɛʼɛ̀ tsughu.

³Kà nlò è ghəəŋ dzə ghəa gho mò ghɛ̀ moʼn tə̀la kô ghue zɛʼɛ, ŋkāa aŋ ghùe è deē zo. E koʼō nduw nlò ghî à li gho tò ghî ghəla ghe tsəghà sə ghɛ.

⁴Kà nlò e kaa lɛɛn tsughuu ko ghəa ghɛʼɛ gho, e lɛɛn tsughuu sugho nlò ghəa ghəla a dzɔ̂ɔ â ghì à li gho.

⁵Kele tsughu nlò mwam u Kə̀lestò Yɛso wò am mùghù zɛʼɛ.

⁶Ghəa ù fə̀ bûʼ lô ko tò Kəzə̀; ki dwaʼa wən ù dzə̀m Zə̀ kə̀ ki, ù ka fə nî dzə̀ ghue u wə̄n wo enyəa e lo Kəzə̀.

⁷Ù ŋ kuuwn tsughuso tsughu ghue u wə̄n, ghe n dzə̀ wə̄n tǒ ghùw nsɔ̌ɔŋnchùw, ù m bùghò dòʼò tsùghu fəkɔ̂ɔ.

⁸A m bùghò ù lǒ ghùw nsɔ̌ɔŋnchùw êzə̀, ù n nì tsughu ghue u wə̄n enyəa e yo dzə̂ fəgha ko, ù m màʼà tsughu ghue u wə̄n, tsəŋo Kə̀zə̀, boo tsùghù sùghò alekpuw vʉ e tuw kə̀ dəla ko alo kədàŋlo.

⁹Bòʼ ghəa zə̀ è zə̀, Zə̀ kə̀ n tsuʼ naŋa kɔʼ wə̄n tsuʼ naŋa kɔʼ wə̄n am bəla kə̀ ne kəla kə tsəghàsə bəla zo e dzə̀m fughu tsughu wə̄n â zən zo, zən zəla e tsəghàsə zən gho a dzə̀m,

¹⁰Zə enyə lò enyəa abugho ghe tɔŋɔ tsughu zən e Yɛso zò, a ghî à dzə̀m alo kəwālā, aŋ ghueekətsə̄ àsùghò naʼ e ghueetsə̄ zo[1] n təm təŋguʼ a vʉ̀a wə̄n[2].

¹¹Àsùghò enyəa, aghî a dzə̀m e ke dzâa səa wo an dzughu e tughō zo enyəa, Yɛso Kə̀lestò lǒ Mughu ù te. Ghe kê èzə ghəŋlo, ghe sô fughuu kɔʼso mò[3] â Zə̀ kò, Tsele ù te.

¹²À fi lo enyəa fən ghaŋa à dzûŋ ghò, tò aŋghəa ghɛ̀ mò bwîi tsəgha an làŋ kə Zə̀ kəla mùgho mò zoʼn ghɛ a te aŋghəa sɛ̀ mò lò tsəgha a dzə̀m. À lǎam lo dzɔ̀ êzəŋ wəla M̀ buw sɛ̀, â ghɛ̀ alebwìi an làŋ kə te ko. E fwaʼā nduw ko nlò alo etsəŋ â ghɛ̀ alemìasò kɔʼ fwàʼ kɛʼɛ aŋghəa ghɛ̀ ki alezə kətuw a te.

¹³Nu Zə̀ kə̀ fwaʼà a zəŋò ghɛ̀ aleghəŋlo enyəa ghɛ̀ è ki zǐi alefwaʼā fwàʼ kə Wə̄n ko, bwìi sùghò an làŋ kə Wə̄n

¹⁴E fwaʼā nduw nlò ghəa gho a dzə̀m mò ghɛ̀ twəən yo, pfʉa sùghò yò dzughu gho a te,

¹⁵ tò ghɛ̀ lo e zɔlɔ, ki sugho yo dzʉ wo, lò wɛ a Kəzə̀ ghəla ghe nɔʼɔ̄ yo aŋ ghəa è li zo mo ghe mughu dzəŋlo am mbī ghèe ghê ghì a biigh gho àsùghò ghì a kəfwə̀s ghò. Ghɛ̀ è tughu tǒ tsə̀ â ghì ghò am mbī.

¹⁶Shwaʼ wəla u fughuu mughù zò lò fəgha kəla ghɛ̀ ki aleteē tsughu a te, to a kê bughoo an tsuʼ fəla Kə̀lestò kè bugho a te, Ŋ̀ ke e tsɔ̂ɔ fə̀ŋ enyəa Ŋ̀ ka mo fwâʼ màʼà dzə̌ kə̀nughùnùghù.

¹⁷Abugho ghe bûʼ nî kwə̂ən tsughu ko kâŋ taŋa to enyəa à lǒ ŋgoʼ zəla ghɛ̀ zuūw bòʼ boo zəla ghɛ̀ ki â Zə̀ kò, Ǹ tsoʼn nù a te, yìa Ŋ̀ ŋgeē duʼn sugho sɛ̀.

¹⁸À lò sugho eghəla êzə̀ ghɛ̀ ki aletsoʼnlo, duʼn dzəəŋ sùghò sɛ̀.

¹⁹À lò an daʼ kə Kəzə̀ M̀ moʼnlò enyəa e mô dzɔ̀ɔ nù â mùghò alekùʼn tuū wô Timotì a vʉ̀a ghɛ̀ enyəa ù bùghò tsəmso ghɛ̀ abugho ù nàʼà wo tum zaŋā â ghɛ̀, Ǹ lo e duʼn sugho abugho Ǹ zuūw wô zɔʼn wɛʼɛ wo.

²⁰Ghùw ù lì kôom yò dzə̂ fɛ ù ki moʼnlò è dzùŋ zò a zəŋò ghɛ̀ tò Timotì, à mìaa ko wə̄n ù zuūwkɛlɛ fəgha kə tsəghàa fɛ a zəŋò mùghò.

²¹Ghî a li ghən moʼn tə̀la kô ghue e ghee. Ghe dɔ̂ɔ mòʼn dzə̀ yò ghəa e Yɛso Kə̀lestò è li zo.

²²Ghɛ̀ kwo nû enyəa Timotì n dě fwàʼ kə wə̄n ko tǒ wɛ ù tsəlà tsele wəla ù lò alefwaʼā ghàʼ à wə̄n alenàʼà làbəlà è dzùŋ zən.

²³Zə lo e ghee Ǹ lô daŋso nîi ndzə̂əm tuū wo wə̄n abugho Ŋ̀ lo kəŋ kele sə kɔʼ ghəa zəla e sò e sə a zəŋò mùghò.

²⁴Yìa Ǹ ndzə̂əm kwo enyəa aletsùuŋ tsughu, Mughu ù te lo ghəəŋ nù M̀ bughò koʼò sughò ghɛ̀.

²⁵Mùghò ŋ kòʼ enyəa e dzɔ̂ɔ nù â mùghò alenìi tuū wô wàazə̀ ù sɛ̀ wən Èpàfə̀loditùs ebàm a vʉ̀a ghɛ̀. Ù lǒ fən waŋā, lò sugho ghùw wəla fwàʼ dzənlō ghàʼ à wə̄n tǒ sùghugòʼ, ghùw wəla ghɛ̀ mò tum wo enyəa ù bùghò fughu mugho â yòsò zò.

²⁶Mùghò n tsughu tsən enyəa Ŋ̀ ki alenìi tuū wô wə̄n ebàm a vʉ̀a ghɛ̀, nu ù dìi kèe alebùghò kôʼ ghɛ̀.

²⁷Alekùu nîi tsughu, ù mò dzaŋā nû; ù m bən lǒ tò ù è dâŋ â wɛ a bvʉ gho an lʉ̀ghà. Zə̀ kə̀ n naam kwuso ko èse a zəŋo wə̄n àsùghò a zəŋò mùghò, aleghəŋlo enyəa Ǹ lô ŋgeē doʼnlo alo ese tò aŋghəa mùgho mò bûʼ lò dzə.

²⁸M̀ fɛ ŋgee ləghaa alenìi tuū wô Èpàfə̀loditùs ebàm aŋ ghulô ghɛ̀ enyəa ghɛ̀ è lo alo eduʼnlo abugho ghɛ̀ kôom kôʼ tsughu wə̄n, tò Ŋ̀ ka kôom ŋgè bàŋsò sùgho fə̀ŋ a zəŋò ghɛ̀.

²⁹Kpenǐ nlò wə̄n a m fə̀ŋ è dzùŋ è Mughu ù te, àsùghò alo eduʼnlo; ghɛ̀ è fughuu kɔʼso mò â ŋgòʼ è àghì tò ghən

³⁰Tɔŋlo enyəa, ù fə̀ shʉan ke tsughu ko evʉ enyə am fwàʼ kə Kə̀lestò, aŋghəa ù fə̀ fughuu mugho â yòsò zəla ghɛ̀ fə̀ yo alefughu.