Read Aghem Fèlepìan 3 Bible Online

Fèlepìan 3 - Aghem bible

Fèlepìan 3

¹Aŋ ghəa à li ghən a waazə̂ ghaŋa gho, duʼn kɛʼɛ̄ kə e lo nduw ko nû, tɔŋlo enyəa ghɛ̀ lo ghî a Mughu ù te. À yò dzə̂ tsû ù li wo â mùghò aletɔɔ̄ kûeen kpeʼē wô ko ghɛ̀ â ghəa è mɔʼɔ̄ zo.

²Nì nlò ghôm zò ghɛ̀ à ghê ghì ghəla ghe ghəəŋ bo zo, ghî ghəla ghe ŋaŋè ghue zo tò tə bvʉ, ghe dzɛ̂ enyəa ghe ki aletèlè sugho tigh kə ghûw sěe ghùw ù te sô telè ki alezə kətuw.

³Tɔŋlo enyəa sɛ̀ fɛ lǒ tò ghî ghəla ghe lo mo ghe n twii u ghee wo u dzə̂əm sugho, ghî ghəla ghe kɔʼso Zə̀ kò mò à ghe â daʼa kə fughuu wò Zuʼ tə̀ Zɔlɔ to am bàm e Kə̀lestò Yɛso,

⁴Tò M̀ mô naām buʼù naŋā ko mòʼn zaŋa am fʉgha u mbī wo. Abugho ghùw ù lì mô so gaʼā ko fə̀ŋ am fʉgha u mbī ù è vʉ̀, M̀ mô so e gaʼā fə̀ŋ a te, Ǹ tsəghàa sə wə̄n.

⁵Ghe fə̀ tiigh kaŋā kə sugho mò Ǹ naam lǒ wɛ̂ɛtùghu aŋghəa ghe dzə tsughu mugho. Ǹ lo wɛ ù kə̀tsə an naʼ e Bɛndzàmɛ̂n, ghùw ù Hibùlù dzə. Tò aŋghəa lâŋ kə Tə̀dzûu kə̀ deē, Ǹ lo Falàsîi.

⁶Mùgho fə̀ lo tsəgha ghùw wəla ù fə̀ ki zǐi alezoʼn ghì ghò an làŋ kə enaʼ ko, aŋghəa mùgho fə̀ fughuu tsəgha ghî ghəla ghe boō fughu an zən e Kə̀lestò â tsù wò bòʼ mùgho fə̀ moʼn tsəgha enyəa ghe dəmà alesàʼà maʼà làŋ kə enaʼ ko. Mùgho ŋ ghəəŋ dzɔ̀ɔ, tò aŋghəa lâŋ kə̀ deē.

⁷Ghəa a te a fə̀ lo tsəgha kɔ tə aghəa â mùghò. Êzə̄ŋ, yìa Ŋ̀ kôʼ tsughu enyəa ghəa a te a lo kə̀nughùnùghù, bòʼ Ǹ ləghaa alekele Kə̀lestò.

⁸Ǹ nî àghəa a dzə̀m tò ghəa kə̀nughùnùghù ghò, yìa M̀ maʼà ndùw ghəa a te gho a dzə̀m enyəa mùghò e lo alekele Mughu ù te, Yɛso Kə̀lestò Yɛso, bòʼ à lǒ ghəa zəla e tsəghàsə ghəa gho a dzə̀m. Tɔŋlo enyəa mùghò ŋ ŋge fala, yìa Ŋ̀ gùŋù ghəa gho a dzə̀m. Yìa Ŋ̀ kôʼ tsughu enyəa, ghəa a te gho a dzə̀m lò udzʉ an sə kaŋā; enyəa e Kə̀lestò è lo namso kaŋa ko,

⁹mùghò è kuūm lo fəgha ko kə mɔ̀ʼ ghàʼ à wə̄n, də̀mà yò alelo tsəghatsəgha aŋ ŋgəŋ zaŋā, à yò dzə̂ alelo tsəghatsəgha enyəa Ǹ zûuw làŋ kə enaʼ ko. Mùghò êzə̄ŋ e lo tsəghatsəgha bòʼ boo zaŋā àsùghò fə̀ŋ zaŋa zəla Ŋ̀ gaʼ a zəŋò Kə̀lestò,

¹⁰enyəa aŋ ghəa ghən à dzə̀m, Ǹ dəmà alekele wə̄n, mùghò è ki sughò daʼa kə wə̄n kəla ù fə̀ kpuw kɔʼ sə alo evʉ̄ a te, àsùghò enyəa to M̀ mô fǎan sùghò tǒ aŋghəa ù fə̀ fala am fala e wə̄n, M̀ bughò doʼò sughò tǒ wə̄n aŋghəa ù fə̀ kpuw a te.

¹¹Tò enyəa mùghò e ki sugho moʼn zò enyəa Ǹ lo kpuuw kɔʼɔ səa sùghò nù alo evʉ.

¹²Ǹ dzâa dzə̀ yò enyəa, mùghò m bəla e te e kele, ŋkāa mùghò n daŋso dòʼò tsəghatsəgha, Ŋ̀ kuuwn naām də̀mà nù aleghəŋlo enyəa bəla e te e doʼò è zaŋa zo, tɔŋlo enyəa Kə̀lestò Yɛso maā ghəŋlo enyəa Ǹ doʼò fəgha kə wə̄n.

¹³Waazə̂ ghaŋa gho, Ǹ nîi dzə̀ yò enyəa mùghò mô èzəŋ kɔʼ tè am bəla e te zo. Ghəa e lo ko e mɔ̀ʼ Ǹ dəma a te, mo e lo enyəa Ǹ nîi zə̀a ndùw ghəa ghəla a lo mo ghə tsə̀ghà nùghù ndùw e bàm, naam də̀mà ndùw ko am fəgha kəla kə lô â sə ko.

¹⁴Yìa Ǹ naām dəmà ndûw ko â sə ko am fəgha kəla Ŋ̀ kəŋo ghè kò, enyəa to M̀ mô kele namso kəla Zə̀ kə fughu sə tsughu wo alo kəwālā am bàm e Kə̀lestò Yɛso.

¹⁵Sɛ̀ ghəla sɛ̀ lo mo sɛ̀ n noo kpe aŋ ghəa a Kəzə̀, sɛ̀ ki alelɛɛn ghəa gho an dzì è mɔ̀ʼɔ è te. À m bùghò ghəa zəla tuw kə kpuūw ghɛ a te, Zə̀ kə ŋ ghəəŋ ghɛ̀, ghɛ̀ mò è kele.

¹⁶Sɛ̀ ki alekuuwn bwiī nduw ko an sə̀ŋò zəla sɛ̀ kwo zîi dzə.

¹⁷ Waazə̂ ghaŋa gho, e mughu nlò aŋghəa mùgho mò mughu a te, ghɛ̀ è koʼo niī wo sugho mwam e ghì ghəla ghe mughu an tə̀ŋ kəla a mò zoʼ ghɛ a te.

¹⁸Tɔŋlo enyəa ndə̀m lò nû aŋghəa mùgho mò dzâa tsəgha â ghɛ̀, tò aŋghəa Ǹ naām dzâa kpeʼē wo êzə̄ŋ à sə̀ mò alo kətuw, mughù e ghee e boom dzəəŋ yo ghèe sə̀ŋò zəla e lo am vʉ zəla Kə̀lestò fə̀ kpuw ghè zò alo kədàŋlo.

¹⁹Mbī è ghee kê mìanlò an tsù, tɔŋlo enyəa Zə̀ kə ghee kə lo nə̀ghà ŋ ghee, ghe sô nî kɔʼ moʼnlò e ghee zo e dzə̀m a, naŋa tsughu am fʉgha u mbī wo a, kɔʼso tə̀mbòʼ aŋ ghəa ghəla ghe mô ki aledənso tuw wo a te a.

²⁰Yia a bughò sɛ̀, naʼ e sɛ̀ e lo alo kəwāla, à lǒ fughu Bəghambī wəla sɛ̀ ləmlo, tɔɔŋ Mughùbè Yɛso Kə̀lestò, lo nughùun wo a te.

²¹Ù lo bùghò kǔuwn nùghùun kɔ̀ʼɔ̂ gwən e ghùe zəla sɛ̀ ki êzə̄ŋ, ù kê fughu tsughu sɛ̀ â gwən e ughùe zəla e zɔn buʼ, tò e wə̄n zo. Tɔŋlo enyəa ù ki kədaʼa aledzɛ̀ enyəa, ufʉgha u dzə̀m u doʼò wô a tsəlà wə̄n.