Read Aghem Fèlepìan 4 Bible Online

Fèlepìan 4 - Aghem bible

Fèlepìan 4

¹E fi lo enyəa waazə̂ ghaŋa à dzûŋ ghəla Ŋ̀ ki am fə̂ŋ è dzùŋ, ndòʼò mbùuŋ kèe sùghò alekòʼ ghɛ, ghɛ̀ lo duʼn kaŋā, lò sugho namso kaŋa am M̀ mbûŋ nù alekòʼ ghɛ̀. Ka tsughu ko nlò zə̀ zo aŋ ghəa e Mughu ù te a fən ghaŋa à dzûŋ ghò.

²Ŋ̀ ŋgee buʼu kə̀ghu â ghɛ̀ a yùdìa à Sìndikì, tee tsughu ko nlò ghuw ko kəmòg aŋ ghəa e Mughùbè.

³Yia a bughò ghû fən waŋa wəla ghàʼ à ghù zumso fwâ kɔʼ wo, yoso yîzən ghən tɔŋlo enyəa ghe maā ŋge fwàʼ ghàʼ à ghee alezùghò làbəlà è Kə̀zə̀, ghèe ghê Kə̀lɛmɛ̀n àsùghò ghî à li ghəla ghàʼ à ghee mò dzeŋe fwaʼā a dzə̀m. Ghəla zŋ a ghee alo am mwàʼsò kə Kəzə̀.

⁴E duʼnlo nlò an ghəa e Mughùte nəgha tən tə̀ dzə̀m. Ǹ so naam dzàa kueen wô ko â ghɛ̀ enyəa elo alo eduʼnlo.

⁵Děe ndùw â ghì ghò a dzə̀m enyəa ghù ki zʉ̀ kə mwâm; tɔŋlo enyəa nəgha e mughùte è kwəla nyəa zə m kpe.

⁶Kà è ŋgee sə̂a â sə gho alo ufʉgha, e kuuwn bvʉa nduw ko fəgha kə̀là ghù ləghaa an ghua Zə̀kò alo egɔ̀ŋlò fughuu ndùw sùghò kəzɔ̀ŋlò.

⁷Abugho ghɛ̀ ghəəŋ dzə̂ èzə̀, bughuso e Kəzə̀ zəla e tsə̀ghàtàʼà tɔ u ghûw wə̀ nsɔ̌ɔŋnchùw wò, lo ghəŋlo fə̂ŋ tɛʼɛ à moʼn zɛʼɛ zə e lo alo kəfəgha kə mɔ̀ʼ a zəŋò Kə̀lestò Yɛso.

⁸Alemìasò tsughu shwaʼ waŋā waazə̂ ghaŋa gho, naŋa tsughu nlò moʼn zɛʼɛ zo an ghəa dzuŋ ghò àsùghò aŋ ghəa ghəla a ki kɔʼso mò, àsùghò ghəla alo tsəghatsəgha àsùghò ghəla alo èsəŋò, ghəa a zɔlɔ à sùghò ghəla ghî ləghaa alezuw àsùghò alekòʼ

⁹Ebɔɔm fwaʼa nduw ko nlò fəgha kə̀là ghɛ̀ mò zoʼn ni an dzughu zaŋā, kòʼ sùghò an fwàʼ kaŋa tò zə̀ kəla kə fughuu bughuso zo le lo ghɛ̀ à ghee.

¹⁰Ŋ̀ ŋgee duʼn nù, yìa M̀ fughuu zɔ̀ɔŋ kò â Zə̀kò enyəa ghɛ̀ n dè kpèʼe wô moʼn zɛʼɛ zo azəŋò mùghò. Ŋ̀ kwo nû enyəa ghɛ̀ mò ki ki nû moʼn zò azəŋò mughò, ghɛ̀ yia mò kuuwn ki yo dzə̀ aledè mòʼnlo e tezo.

¹¹Ŋ̀ ghəa ghən kə̂a dzə̀ yǒ tǒ ghùw lǎa èvʉ̀, tɔŋlo enyəa mùghò n zoʼnlo aletso lo, ka ŋ ki ŋkāa ŋ ki yo.

¹²Ŋ̀ kwo nû fəgha kəla e môʼnlô abugho ghùw də̀mà alekele kə̀fəgha, yìa Ŋ̀ kwo sugho bughu ghùw ŋge ki, Mùghò n zoʼn tɔ wo aletsô lo ko nû, tò Ǹ zə ŋkāa Ǹ tâʼkè zə. Tò Ŋ̀ ki nyàaŋ fò ŋkāa Ŋ̀ ki ndə̀m.

¹³Ŋ̀ ki nû sə̂ŋ e te zo alefwàʼ aghəa a dzə̀m an daʼa kəla Kə̀lestò fughu â mùghò.

¹⁴E mò naam ŋge dzɔ̂ɔ sugho nû â ghɛ̀ aleyòsò mùghò an tsù waŋa.

¹⁵Alekòom buʼù nîi tsughu, ghuūghùe zɛʼɛ̄, ghɛ̀ ghî a Fèlepìan a kwo nû enyəa nəgha zəla a mò ziī tsughu shwaʼ u Kəzə̀ wə̄n, mò Ǹ nughù wò an Masìdonìa, ghàʼ à ndùghù è Kə̀zə̀ è lìī fə̀ zə̂a faa dzə yo, tsə̀ghàsə̌a ko yo ghɛ a fɛ am Felèpîi.

¹⁶Tɔŋlo enyəa ghəa mugho fə̀ bûʼ lô ko an Tɛ̀sàlonikà ghɛ̀ n tum mugho â yòsò zò, kòom tum à kpeʼe.

¹⁷Ŋ̀ kəŋo dzə̀ yò fəgha kə̀là ghɛ̀ fughu wo ghè kò. Fəgha kə̀là ŋ kəŋo àlò namso kəla ghɛ̀ lo kele an dzɔ̀ɔ dzɔ̀ kə mwam kɛʼɛ̄.

¹⁸Mugho n namso kaŋa kə kele kpenlo, bùʼ tsə̀ghà èsə. Mùghò n zə kuw ko, am fʉgha wəla ghɛ mò tum wo â Èpàfə̀loditùs enyəa ù bùgho fughu à mùghò, ufʉgha mo ù lə̂əm dzɔ̀ɔ nù, mò Zə̀ kə̀ boom nù, ghue u wə̄n vʉa u ghɛ̂ɛn sugho alekòʼ.

¹⁹À lǒ Zə̀ kaŋa kə te ko kə lo fughu fʉgha wən ù dzə̀m ghɛ̀ ləghaa an kum zəla e lo an zən e Kə̀lestò Yɛso

²⁰Kɔʼso n lo tən à Tsele ù te tɔɔŋ Zə̀ kə̀ sɛ̀, to mbī kê bughò mîaa. Zə e lo ko êzə̀.

²¹Tɔɔŋ zuw kaaŋ ndùw ghî a Kəzə̀ yìa ghɛ̀a ghee lo fi a dzə̀m an zən e Kə̀lestò Yɛso. Waazə̂ a sɛ̀ ghə̀la ghàʼ à ghee lô fɛ a dzə̀m tɔɔŋ zùw wò ghɛ̀.

²²Ghî a Kəzə̀ a dzə̀m tɔ̌ɔŋ zùw wò ghɛ̀; a ka dɔ̂m taŋ a ghî ghò an ndughu alô Kaesà.

²³Ŋ̀ gɔ̂ŋlò enyəa to Mughu ù te Yɛso Kə̀lestò mò dê ghɛ̀ â dzɔ̀ e wə̄n zo.