Read Aghem Kòloshìan 1 Bible Online

Kòloshìan 1 - Aghem bible

Kòloshìan 1

¹À mwàʼsò kən kə tɔɔ wò mùghò Pôl tum è Kə̀lestò Yɛso zəla Zə̀ kə̀ mò shîaa kɔʼ. M̀ mwàʼsò kən kə tɔɔ wò mò Ǹ lo ghàʼ à wàazə̀ ù sɛ̀ Timotì.

²M̀ mwàʼsò kən kə tɔɔ wò â ghɛ̀ ghî a Kəzə̀ ghəla ghe boō fughu tsughu â Kə̀lestò an naʼ e Kòlosɛ̀. Ghàʼ gɔ̂ŋlò enyəa to Kə̀zə̀, Tsele ù sɛ̀ mò fughu ghɛ â bughuun zo, Kə dêe sughò ghɛ̀ â dzɔ̀ e wə̄n zo.

³Ghàʼ tsôo fùghuu tsə̀ghà ko kə̀zɔ̀ŋlò â Zə̀ kò, Tsele ù Mughubè ù sɛ̀, Yɛso Kə̀lestò, abugho ghàʼ gɔŋlo an tuw wɛʼɛ.

⁴Ghàʼ enyə ghəəŋ tsə̀ghà bòʼ aŋghəa ghàʼ mò zuw tsughu enyəa ghɛ̀ gaʼ fə̀ŋ a zəŋò Kə̀lestò Yɛso, àsùghò bòʼ ləgha zəla ghɛ̀ ki â ghì a Kəzə̀ ghò a dzə̀m.

⁵Ghəa a te ghə êzə lo kùu ndùw tùʼ zəla ghɛ̀ chiī am fəgha kəla Zə̀ kə̀ naŋā â ghɛ̀ alo kəwālā. Ghɛ̀ maā ghəa a te a ki zuw an shwaʼ wə èsəŋò wò, tɔɔŋ làbəlà è dzùŋ e te.

⁶Zən lǒ làbəlà zəla è fə̀ bùgho â ghɛ tò aŋghəa ghe bwîi naʼn ŋgəa kaāŋ nduw sugho a te am mbī e dzə̀m; làbəlà è te zə̀a è noōm dûuw nduw, dzəa ndùuŋ ndùw ùghue am bvʉa zɛʼɛ̄, alekaʼa nughù wô an tsuʼ fəla ghɛ̀ mò bugho zuwkɛlɛ̄ tsughu fəgha kəla Dzɔ̂ e Kəzə̀ e biso moʼo ghè kò.

⁷ À mò ghɛ â Dzɔ̀ e Kəzə̀ zən teso dzɛ wo Epafəlàs. Ù lǒ ghùw ù kə̀fwàʼ wəla ghàʼ à ghee dzeŋe fwaʼà a dzə̀m a ŋgeē ləghaa. Ù lǒ ghùw, ù fwàʼa â Kə̀lestò am fə̂ŋ è wə̄n e dzə̀m an tuw u sɛ̀.

⁸À lò sugho wə̄n ù mò dzɛ̂ wo â ghàʼ aŋghəa Zuʼ tə Kəzə̀ tə mò ghəŋlo enyəa ghɛ̀ è ki ləgha zo aŋ ghùe zɛʼɛ̄.

⁹Zə lo e ghee, alenìi nughù wô an tsuʼ fəla ghǎʼ mò zuw tsughu zwɔ̂ŋ wɛʼɛ wo a te, ghàʼ kaām bughu naŋa kòʼ alegɔ̀ŋlò an tuw wɛʼɛ enyəa Zə̀ kə̀ dêe wô ghɛ̀ â ghəa gho a dzə̀m kə ləghaa enyəa ghɛ̀ è ghəŋlo, kə fughuu sughò ghɛ̀ â tɔ wo, ghɛ è zuuwkɛlɛ sugho ghəa ghəla Zuʼ tə̀ Zɔlɔ tə fughu â ghɛ̀.

¹⁰Ghàʼ yia gɔ̂ɔŋ sugho enyea ghɛ̀ è mughu mùghù zəla e kɔʼso Mughu ù te, mughù zəla e ghəŋlo Mughu ù te n tsoʼnlo, ghɛ̀ e ghəəŋ ghəa à dzûŋ ghə̀n a dzə̀m, ghɛ̀ ke biso bugho kele tsughu Zə̀ kò, ghɛ̀ tsəgha taʼa.

¹¹Ghàʼ yia gɔ̂ɔŋ sugho enyəa Zə̀ kə̀ tughuso tsughu ghɛ an daʼa kə wə̄n kəla kə tughu tsə̀ghà dwaʼa wo u dzə̀m, tò ghɛ̀ e lo alekɔlɔ tə̀fə̀ŋ àsùghò aleka ezə alo aghəa a dzə̀m alo eduʼnlo.

¹²Ghàʼ yìa fughuu sugho zɔ̀ɔŋ kò â Tsele ù te wəla ù ghəŋlo enyəa sɛ̀ kele sughò tuʼ e sɛ̀ am fʉgha wəla ù fə̀ to naŋā enyəa e ki alefughu â ghì à wə̄n gho, ghəla ghe mughu an tsə̂.

¹³Vʉ̀a ù bəghāsə̄ sɛ̀ aŋ ghùu daʼa kə kələ̄m ko, nì nàŋa tsə̀ghà wò sɛ̀ am fɔ̀e u Wɛ ù wə̄n, ù gaʼ fə̀ŋ a te.

¹⁴Wɛ ù wə̄n wəla ù ghuūw màʼà bôo tə sɛ̀ tò, zè zə̀ghàa sùghò sɛ̀ enyəa sɛ̀ e ndzəə̄m mughu.

¹⁵Kə̀lestò lǒ fwěen kə Kəzə̀, Zə̀ kəla a koʼò yo, â Zə̀ kò alegbə̀n ùfʉgha u dzə̀m, à fə̀ lo mo ù lo tsəgha nû, vʉ̀a ù tsə̀ghàsə fʉgha u te wo u dzə̀m ghe fə̀ gbə̂n wo.

¹⁶Tɔŋlo enyəa à fə̀ lo am bàm e wə̄n Zə̀ kə fə̀ gbə̂n wô fʉgha wo u dzə̀m alo kəwālā àsùghò am ghueekətsə̄ fʉgha wəla a koʼō àsùghò wəla a koʼò yo, ŋkāa à lò ulwâŋ, ŋkāa dwaʼa wə enaʼ wo, ŋkāa kwu è ùdwə̀ŋ ŋkāa udwə̀ŋ u dzə̀m, ufʉgha u dzə̀m Zə̀ kə fə̀ gbə̂n wô, a fə̀ lo am bàm e wən àsùghò â wə̄.

¹⁷Â Zə̀ kò alegbə̀n fʉgha wən u dzə̀m, à fə̀ lo mò ù kì lò tsəgha nû, à fʉgha wən u dzə̀m dzeŋe kwu kele wə̄n alo kəfəgha kə mɔ̀ʼ.

¹⁸ Ù lò kətuw â ghì a Kəzə̀ ghò a dzə̀m, tɔɔŋ dzeŋe kə ghì a Kə̀zə̀. À fə̌ Ndughu è Kə̀zə̀ se tsughu wə̄n, Ghùw ù sûesʉ wəla Zə̀ kə fə̀ zôm nughù kɔʼ alo evʉ̄, enyəa ù e lo sə ko a lo aghəa a dzə̀m.

¹⁹Tɔŋlo enyəa à fə̀ tsəm kɔʼ Kəzə̀ aleghəŋlo enyəa Wɛ ù wə̄n e bɔɔm lo sugho to wə̄n alo aghəa a dzə̀m.

²⁰À fə̀ lo sugho am bàm e Wɛ ù wə̄n Zə̀ kə fə̀ nî naŋā wo fʉgha wo u dzə̀m e bàm a tsəla wə̄n, wəla u lô alô kəwālā àsùghò aŋ ghueekətsə̄. Zə̀ kə fə̀ êzə̀ ghəəŋ tsughu alenìi wô ebughunlo aŋ kàŋ tə Yɛso təla tə fə̀ tsughu tsughu alo kədàŋlo.

²¹Ghɛ̀ mò buʼ lo tsəgha ghî ghəla ghe mò nyuʼu naŋa dzəm to a zəŋò Zə̀ kò, ghɛ̀ ŋ ki moʼnlò e biigh zo, lò ghîikətuw a Kəzə̀.

²²Zə̀ kə ŋ ghɛ̀ e nî nàŋa wò e bàm a tsəla e bàm an vʉ zəla Kə̀lestò fə̀ bughò kpuw ghè zò tǒ ghùw nsɔ̌ɔŋnchùw; enyəa ghɛ̀ è zɔlɔ, ghùw e yo alesaʼ ghɛ, ghɛ̀ e ki sugho yo nùʼ tò an sə kə wə̄n,

²³Â ghɛ̀ alelo enyə, ghɛ̀ ki aleboō fughu tsughu an səŋò zən, ghɛ̀ tee tən tsughu ko a te, e kwo ko ghɛ̀ lô bomlo enyəa fəgha kə sêe nughù ghɛ am fəgha kəla ghɛ̀ mò zuw ghè kò an làbəlà è dzùŋ zən. Zən lǒ làbəlà è dzùŋ zəla ghɛ̌ fə̀ zuw, zəla ghe fə̀ naʼà nduw â ghì gho a dzə̀m a tsəla kəwālā, tɔɔŋ làbəlà zəla ghuūghùe waŋā Pôl, u tsoō zughò sugho.

²⁴Ǹ duʼn nù êzə̄ŋ am fala zaŋā bòʼ ghɛ̀, yia a bughô fala zəla M̀ fanlō êzə̄ŋ, Ǹ yôsò alemìasò kɔʼ am fəgha kəla kə fə̀ doʼòdoʼo am fala e Kə̀lestò bòʼ ghue u wə̄n, tɔɔŋ dzeŋe kə ghì a Kə̀zə̀.

²⁵À lò bòʼ dzeŋe kə ghì a Kəzə̀ kən, Zə̀ kə̀ naŋā mùghò enyəa N̂ doʼò ghùw ù kə̀fwàʼ wɛʼɛ a te, enyəa mùghò è kuū naʼ wo shwaʼ u Kəzə̀ wò.

²⁶Mò à fə̀ lo nàn kə eghəa ghe fə̀ nân naŋā â wǐiwì àsùghò aŋ ghùu ndə̀mà tə aghì tò, vʉ̀a ù kuūwn nî dê fughu wo ghəa a te gho êzə̄ŋ â ghì a kəfwàʼ a wə̄n gho.

²⁷Zə̀ kə mò ləghaa enyəa ghe kele tsughu enyəa fɛ̀ɛn kə nàn kə eghəa kə wə̄n kən lò sugho â ghɛ̀ a Toʼò zò. Nàn kə eghəa kə te chia kə lo enyəa: Kə̀lestò lo ghɛ̀ à ghee. Ghəa ghən fɛ dèe enyəa ghɛ̀ lo kele sùghò nu kɔʼso mò tǒ Kə̀lestò.

²⁸Ghàʼ mò zugho naʼn nduw tum è Kə̀lestò â ghì ghò a dzə̀m, kwɛ̀ɛn ndùw ghee, zoʼn ndùw ghee an tɔ wən u dzə̀m Zə̀ kə̀ fughu â ghàʼ, enyəa a e lo alenìi ndûw ghee a vʉ̀a Zə̀ kò mo ghe lo alo kəfəgha kə mɔ̀ʼ ghèe ghê Kə̀lestò.

²⁹Zə lo e ghee Ŋ̀ kûu dzəlà tsughuu sə̂ŋ zò alefwàʼ an daʼa kəla Zə̀ kə mò fughu à mùgho, kəla kə fwaʼa a zəŋò mùghò.