Read Aghem Kòloshìan 2 Bible Online

Kòloshìan 2 - Aghem bible

Kòloshìan 2

¹Na tò Ǹ dzɛ â wô â ghɛ̀ aŋghəa Ǹ dəma a te aŋ ghəa ghɛʼɛ àsùghò aŋ ghəa a ghì a yia ghe lo an Laòdisia; bùʼù də̀mà sùghò aŋ ghəa a ghì ghəla ghe lo mo ghe kǎam kwâʼ u usʉ waŋā wə ŋ kô kòʼ tsəghà.

²Ŋ̀ ghəa ghən ghəŋlo enyəa to fə̂ŋ tə ghee tə mô nyəā tsughu, ghe nîi kɔʼ eləgha tò fəgha kəla kə kwuu kɔɔn ghee alo fətùʼù, ghe e kwo tən enyəa e lo êzə̀ aŋghəa ghe bughò zuwkɛlɛ̄ tsughu səŋò e te zo. A n dziī zən, ghe lo zuūwkɛlɛ enyəa nàn kə eghəa kəla kə lo aŋ ghəa a Kəzə̀ lǒ Kə̀lestò.

³Ghəa ghə̀n a dzə̀m a lô alekele kùu ndùw Kə̀zə̀ nàn doʼò a zəŋò Kə̀lestò.

⁴Ŋ̀ ghəa ghən fɛ â ghɛ̀ dzâa wò enyəa ghɛ̀ tiso kɔʼ tuw ko edzuŋ an dzì zəla ghùw ù lì ki yo alenìi wô àgha ù bugho tsê ghɛ̀ a te, abugho shwaʼ u wə̄n u te u buʼù kpəŋò ko tǒ kə kwò.

⁵Ghəa M̀ bûʼ lɔʼso lô ko fɛ, fə̀ŋ zaŋa lo fi ezə̀ sɛ̀, yìa Ŋ̀ ki sughò duʼnzo alekòʼ aŋghəa ghɛ̀ mughù dzɔ a te àsùghò aŋghəa ghə̀la boo zɛʼɛ̀ e tɔ̂ʼ ti a te a zəŋò Kə̀lestò.

⁶Ghəa e nyɔ̂ʼ lô enyəa ghɛ̀ m boo fughuu â Kə̀lestò Yɛso, Mughu ù te, e ti ko nlò ghuw ko kə mɔ̀ʼ ghɛ̀ à ghee.

⁷Ghəəŋ tsughu nlò enyəa ghaŋ ghɛʼɛ a nyəā tughuu tsughu a zəŋò wə̄n, ghɛ̀ bəgha nlò mughù zɛʼɛ zo a zəŋò wə̄n, ghɛ̀ tee tən tsughu ko am boo zɛʼɛ̄ a ndziī zəla ghe mò zoʼn ghɛ a te. Ghɛ è fughuu wə̄n â zɔ̀ɔŋ kò nəgha tən tə̀ dzə̀m aŋ ghəa ghəla ù ghəŋlo â ghɛ̀.

⁸E kwo ko ghùw ù lì lô so è ndûw bùghòo â tɔ u ghì am mbī wo, ù bùghò ghəə̄ŋ tsughu enyəa ghɛ̀ doʼo tsughu kɔ̂ wò â wə̄n, aghəa mò à lò nzə̀azə̀a ŋ kwu mò ghî a mbī a mò moʼn sə kɔʼ, zoʼn ndùuŋ tsùghuu wò àghì a te, àsùghò ghəla a nughùun wo aŋ ghùu shʉ̀ghà u mbī wo, mo a te a kâ sə̀ dzə̀ aŋ ghùu Kə̀lestò.

⁹Tɔŋlo enyəa Kə̀lestò bɔ̌ɔm ki ko mwam u Kəzə̀ u dzə̀m a zəŋo ghùe u wə̄n,

¹⁰Zə̀ chia kə̀ fughu ghɛ â ndzə̀m kə emùghù kò aŋghəa ghɛ̀ lô fəgha ko kə mɔ̀ʼ ghɛ̀ à ghê Kə̀lestò wəla ù tughu tsə̀ghàsə zʉ̀ wò u dzə̀m àsùghò dwaʼa u mbī wən u dzə̀m.

¹¹Ghɛ̀ ka mo wɛ a Kəzə̀ à bughò dòʼò dzə̀ mò ghe sugho tsughu twigh wɛʼɛ tò aŋghəa ghî a sughōo tigh kə ghûw kò a te, à mò lo bòʼ ghɛ̀ mò bughò doʼò fəgha ko kə mɔ̀ʼ ghɛ̀ à ghê Kə̀lestò aŋghəa Kə̀lestò mò tsɔ̀ʼ maʼà ndûw ghue zɛʼɛ zəla e ləghaa bo zo.

¹²Ghe mafə ghɛ tsəla dzəŋlo ghɛ̀ ghê Yɛso Kə̀lestò am mùghù ŋ Kə̀zə̀ mə̀là ghe mò fughu â ghɛ̀. Zə̀ kə̀ m fùghù sùghò ghɛ̀ â mùghù è fughu zo bòʼ ghɛ̀ gaʼ fə̀ŋ aŋ kɔ kə kəfwàʼ kə Wə̄n, tɔ̂ɔŋ Zə̀ kəla kə fə̀ zôm nughù kɔʼ Yɛso alo evʉ̄.

¹³Yia a bughò ghɛ ghəla ghɛ̌ fə̀ lo tò ghî à kpuuwn gho bòʼ ghəa ghɛʼɛ à biigh gho, aŋghəa ghɛ̀ mò naam lo mò ghɛ̀ kaām boo fughu dzə̀ â Zə̀ kò, Zə̀ kə̀ ŋ ghəŋlo enyəa ghɛ̀ koōm doʼo wo â tuw ko am bàm è Kə̀lestò aŋghəa ù fə̀ ghuūw maʼà ghəa a sɛ̀ à biigh gho a dzə̀m.

¹⁴Zə̀ kə̀ n zè màʼa ndàŋ kə sɛ̀ kə̀là Ù mò tɔm naŋā. Ndàŋ kəla sɛ̀ mò ki aletsə̄ aŋghəa lâŋ kə̀ deē abugho ghùw bvʉ̂ tsughu lâŋ kò, kə n nì bàan màʼa mwàʼsò u te wo am vʉ zəla Yɛso mò kpuw ghè zò, nì bɛ naŋa kɔʼ ghəa a te gho alo kədàŋlo.

¹⁵A fughu èzə̀ alo kədàŋlo, Kə̀lestò n tùghù tsə̀ghà tsughu zʉ̀ u mbī wo àsùghò dwaʼa wəla u saʼā mbī. Ù ŋ ghəəŋ tsùghù sùghò enyəa aghî à dzə̀m kòʼò wô aŋghəa ù sèe bwîi nduw a ghee a te tò ukɔ̂, enyəa e n təm zə.

¹⁶ À fi lo enyəa ghùw ù lì ki yo alesāʼ ghɛ am fəgha kəla ghɛ̀ zəā ŋkāa ghɛ̀ mʉā ghè kò. Ghe ki sugho yo alesaʼ ghɛ abugho ghɛ̀ zeē tsəgha yo Tsuʼutəntsə̄ tə Tə̀dzûu tò ŋkāa abugho ghɛ̀ zeē tsəghà yo tsuʼu məla Dzûu tə̀ zəā zə ko a te ŋkāa abugho ghɛ̀ zəā tsəghà yo zə kə Ndzɔ̄ŋ è fughu ko.

¹⁷Ghəa ghən tsô lò ko tò kəzəŋso kə dêe wô ghəa ghəla a ki alebùghò, ghəa è səŋò zəla e biso lô fɛ aŋ ghəa a te lo Kə̀lestò.

¹⁸E kwo ko ghɛ̀ lô bomlo enyəa ghùw nìi nughù fəgha kəla kə kûm lô kə̀ kɛʼɛ̄ ko, ghe e tughuso dzaā wo enyəa ghɛ̀ ki alemàʼà naŋā tsughu ghue zɛʼɛ, àsùghò enyəa ghɛ̀ e kɔʼso nduw tsə̀təndə̄ghā tə Kəzə̀ tò, ghe e dzaā wo enyəa ghe ghəa ghən kôʼ wò an ushʉ̀ghà. Ghe moʼnlò enyəa ghe ŋge kwo aghəa, ghəa a te yia a ghəŋlo ghe yia a ghaŋso kaāŋ ghue zo.

¹⁹ 19 Ŋgòʼ è ghì ghən enyə kòom bùʼù zǔuw yo â Kə̀lestò wəla ù lò tuw ko â ghì a Kəzə̀ ghò a dzə̀m; Kə̀lestò wəla ù nì təmdzəə̄ŋ wô ghî a Kəzə̀ ghò a dzə̀m alo kəfəgha kə mɔ̀ʼ enyəa ghe e nomlo aŋghəa Zə̀ kə̀ ləghaa.

²⁰Aŋghəa ghɛ̀ mò kpuw dzəəŋ nduw ghɛ̀ à ghê Kə̀lestò, ù mafə zê zə̀ghàa ghɛ am fàŋa kə daʼa kə shʉ̀ghà u mbī wo. À lò kə kwò ghɛ̀ sô lo tò ghɛ̀ naam mùghù ko an lwàŋ u mbī wo a?

²¹À sò lo kwò ghɛ̀ sô naām zuūw ko lwâŋ wən wo enyəa, “Kà kwu kele fəgha chì ko ŋkāa kən! Kà mɔ̂m zuw kə chi ko ŋkāa kən! Kà bûʼ mɔ̀m kən ko ŋkāa kə chî!”

²²Lwâŋ wən bɔɔm lò ko am fʉghà wəla u kôom ki yo fwàʼ kò abugho a fwâʼ tsəgha dzə a te, à sò ghəa a te bùghòo kɔʼ ghuw, zoʼn ndùw àghì a te. Wən tsò lò ko lwâŋ wəla ghî à tɔm naŋā tsughu, zoʼn wò àghì a te.

²³Ŋgòʼ è lwàŋ wən u bughōo wə n lo ko to tɔ è li e lo nû a te, u sô dêe enyəa ghî ghə̀ e ŋgee kɔʼso tsəghaso tsughuu Zə̀ kò, enyəa ghî ghə̀ màʼn naaŋ tsughu ghue e ghee zo, àsùghò enyəa ghî ghə̀ e mughu aŋ ŋgōʼ. Lò êzə̀ mo lwâŋ wən biso ki yo daʼa kə̀ li ko aleyòsò ghùw alebughuu naŋâ ghəa à kwu ghəla ù ləghaa aleghəŋlo.