Read Aghem Kòloshìan 3 Bible Online

Kòloshìan 3 - Aghem bible

Kòloshìan 3

¹ Ghe mafə ghɛ à ghê Kə̀lestò dzeŋe zòm nùghùu kɔʼ alo evʉ̄, e kəŋo ko nlò ghəa e kəwālā zo, a fi a Kə̀lestò dǒʼ aŋ kwe u Kəzə̀ ù təma wo.

²Kà nlò moʼn zɛʼɛ e naŋa dzə̀ aŋ ghəa a mbī gho, laam naŋa ndùw nlò moʼn zɛʼɛ zo aŋ ghəa a kəwālā gho.

³Nu ghɛ̀ êzəŋ e lo tò ghî a kpuuwn gho, mughù zɛʼɛ zəa e nân doʼò a zəŋò Kə̀lestò, êzəŋ wəla ghɛ̀ à ghê Zə̀ kə̀ lo alo kəfəgha kə mɔ̀ʼ.

⁴Abugho Kə̀lestò wəla ù ki mughù e sɛ̀ zò lo kôom dê sə wo ghue u wə̄n wo ebàm, ghɛ̀ a ghee e ke dzeŋe lò ko a dzə̀m an səghanyəgha wə̄n.

⁵Ghɛ̌ fi ki aleŋgəmso kûm tuū maʼà ghəa a mbī ghəla gwən e ughùe è ləghaa, ghəa a te a lo tǒ; ghəa à nuūŋ kaaŋ ghə eghùe ghò, àsùghò aleghəəŋ dzə̀adzə̀ tə aghəa to, àsùghò alemōʼn təla ko aleghəŋlo èbo, àsùghò enyəa ghue u ka e nughuun ghû abugho ghù kòʼ nduw wìzən ŋkāa wìnû, àsùghò alesəa â sə gho am fʉgha u mbī wo, mò à fi lo sugho tǒ zʉ̀ ù li wo ghî a kɔʼso.

⁶À lǒ bòʼ ŋgòʼ è ghəa à biigh ghən gho Zə̀ kə̀ lo dêe nʉgha ù wə̄n u pfʉa wo a te a zəŋò ghì ghəla ghe zuūw yo â wə̄n.

⁷Ghuūghùe zɛʼɛ̄ e mò ghəəŋ tsəgha nû ghəa à biigh ghən gho, aŋghəa à mò mughù zɛʼɛ e naām ki tsəghà ghəa a te gho.

⁸Zə êzəŋ e lo enyəa, ghɛ̀ ki yo alekoōm ghəəŋ ghəa ghən gho; alepfʉso nʉghà wò ŋkāa ki sugho yo ku ko am fə̂ŋ, kàa aleghəəŋ bo zo, ŋkāa a alemaʼn kaaŋ nùʼ tò, ŋkāa aleki shwaʼ ù biigh wo alo edzughu.

⁹Kà nlò è kaʼn gha gho aŋ ghùe zɛʼɛ̄, tɔŋlo enyəa ghɛ̀ kôom yò dzə̂ fəgha kəla ghɛ̀ mò bûʼ lô tsəgha ghè kò, kòom ghə̌əŋ sùghò yò ghəa à biigh ghəla ghɛ̀ mò buʼù ghəə̄ŋ tsəgha.

¹⁰ Zə̀ kə̀ ŋ ghəŋlo enyəa ghɛ̀ doʼo ghî à fughu gho, dòʼn wò sùghò tǒ ghee, zoʼn kele mɛ̀ʼn wò sùghò ghùw wəla e lo ghè wò.

¹¹Am mùghù è fughu zən, nəŋōnəŋ è lì kôom yò a zəŋò Toʼò zò ghèe ghê Dzûu tò, ŋkāa ghî ghəla ghe sugho twigh u ghee wo ŋkāa ghe tâʼkè sugho, ŋkāa ghî ghəla ghe lô nyôm tò ŋkàʼ tò, ukɔ̂ ŋkāa ghî ghəla ghe ndzə̂m mughu. Ghəa è səŋò zò aŋ ghəa ghən kuuwn lò ko enyəa, à mìaa ko Kə̀lestò alo aghəa a dzə̀m, Kə̀lestò wəla ù lò a zəŋò ghì ghò a dzə̀m.

¹² Ghɛ̀ tò ghî à zɔlɔ ghəla Zə̀ kə̀ shîaa kɔʼ, kə n naŋa tsughu fə̀ŋ e wə̄n a te, kele tsughu nlò se è kwuso zo, ghɛ̀ è dee nduw dzɔ̂ zò, zumso tsughu èghue, zʉ̀a tsùghuu èghue, kaa tsughu ezə alo eghəa.

¹³Ghɛ̀ è bughuun ghəəŋ nduw ghəa gho aŋ ghùe zɛʼɛ̄ mò à yǒ ndə̀m kə̀ ndə̀m, mò ghùw ghə̌əŋ bonlo èghəa â wàazə̀, wàazə̀ ù te ŋ ghùw màʼà ghəa e te zo. Ghɛ̀ ki aleghuuw maʼn bôo tə aghì tò aŋghəa Mughu ù te fə̀ ghuw maʼà tɛʼɛ to təbôo.

¹⁴Ghəa è səŋò zò aŋ ghəa ghən à dzə̀m lò enyəa ghɛ̀ a dzə̀m è ləghaa nduw ghue zɛʼɛ zo, tɔŋlo enyəa abugho ghɛ̀ ləghaa ghue zo ghɛ̌ fi lo kəfəgha ko kə mɔ̀ʼ.

¹⁵Bughun zəla Kə̀lestò fughuu â ghɛ̀ lò aledeē nduw ghɛ â fəgha kə̀là ghɛ̀ ki aleghəŋlo, bòʼ Zə̀ kə̀ mò ghɛ̀ fɛ tɔŋɔ enyəa ghɛ̀ bugho doʼo tǒ ghùw u mɔ̀ʼ enyəa ghɛ̀ kele bughuun zən zo, tò ghɛ̀ è fughuu zɔ̀ɔŋ kò â Zə̀ kò.

¹⁶ To mughù zɛʼɛ e dzə̀m e mò lò tən ko ghəa ghəla tùm è dzùŋ zən kùu ndùw Kə̀lestò děe ghè ghò, ghəa ghɛ̀ kûm zoʼn ghue zɛʼɛ zo, tsʉ̀a ndùw sùghò an tɔ zəla ghɛ̀ ki. Ghɛ̀ è zɔ̀ŋɔ̀ nduw zɔ̀ŋ kò, zoo ndùw tə̀ zòo àsùghò zòo tə̀ baa to am fə̀ŋ tɛʼɛ tə̀ dzûŋ tò, alefūghuu zɔ̀ɔŋ kò â Zə̀ kò.

¹⁷Mò ghɛ̀ ghaa ko kə̀ kwò, ŋkāa ghɛ̀ so e kə̂aa ko ghəa è kwò, ghɛ̀ ki aleghəəŋ nduw ghəa a te gho an zən e Mughu ù te, tɔɔŋ Yɛso, abugho ghɛ̀ fughuu zɔ̀ɔŋ kò â Tsele ù sɛ̀ Kə̀zə̀, mò ghɛ̀ tsəghà am bàm e Kə̀lestò.

¹⁸ Yi ghə a anūm gho, e zūu nduw nlò â num ghɛʼɛ gho, tɔŋlo enyəa ghən lò ghəa ghəla ghî ghəla ghe boō fughu â Mughu ù te ki aleghəŋlo.

¹⁹Yia a bughò â ghɛ a num gho, ghɛ̀ è deē nduw ləgha zo â yi ghɛʼɛ̄ gho, ghɛ̀ è ka e tɔɔn dzə a zəŋò ghee.

²⁰Wɛ gho, e zuuw nduw nlò â ghê tsùghò ghèe ghê zùghù alo aghəa a dzə̀m, tɔŋlo enyəa zən lò ghəa zəla Zə̀ kə̀ ləghaa ghè zò.

²¹Ghɛ̀ a ghê tselè wɛ̀, kà nlò è ghəŋlo enyəa nə̀ghà mò pfʉa wɛ ghɛʼɛ̄ gho, ghe lô səa ndûw fʉgha ù nughù wò.

²²Â ghɛ̀ a kɔ̂ wò, e zuuw nduw nlò â ghê mughùbè ghɛʼɛ alo aghəa a dzə̀m. E dəmā təla tsughuu ko nlò aleghəŋlo enyəa fə̂ŋ tə ghee tə e duʼnlo, kà è kaa fwaʼā ko nlò â ghee mò ghùw chìin ghɛ̀. E tsəŋo nlò Mughu ù te, ghɛ̀ è fwaʼā â ghì ghəla ghe lo ghê mughùbè ghɛʼɛ am fə̀ŋ tə̀ dzûŋ tò.

²³Abugho ghɛ̀ ghaā ko kwò kò, e ghəəŋ nduw nlò am fə̂ŋ e mɔ̀ʼ, tò enyəa ghɛ̀ fwaʼà â Mughu ù te, mò à yò â ghê mughùbè ghɛʼɛ ghən fɛ am mbī,

²⁴Abugho ghɛ̀ fwaʼā êzə̀, ghɛ̀ kwo tən enyəa Mughu ù te lo fughu nù ghɛ̀ namso kəla ù fə̀ to naŋā â ghì a wə̄n gho; tɔŋlo ghɛ̀ fwaʼā â Kə̀lestò wəla ù biso lô Mughùbè wɛʼɛ.

²⁵Abugho ghùw wɛʼɛ ghəə̄ŋ dzə̂ bo zo, Zə̀ kə̀ lo fɔeso nǔ wə̄n, tɔŋlo enyəa Zə̀ kə̀ kuuwn bàa yò kpiī wo an sàʼ e wə̄n.