Read Aghem Kòloshìan 4 Bible Online

Kòloshìan 4 - Aghem bible

Kòloshìan 4

¹ Yia a bugho ghɛ ghê mughùbè ghəla ghɛ̀ ki kɔ̂ wò, ghɛ̀ ki aleghəəŋ nduw ghəa ghəla a lô tsəghatsəgha â ghee, kwuu kele sùghò ghee aŋ ghù kə̀dzûŋ kò, bòʼ ghɛ̀ kwo nû enyəa ghɛ̀ ki sugho Mughùbè wɛʼɛ wəla ù lò alo kəwālā.

²E kwo ko ghɛ̀ lô so e bughuu dòʼnlò alegɔɔ̄ŋ zee. Ghɛ̀ è tɔʼɔ̄ tiso kɔʼɔ tuw wɛʼɛ wo abugho ghɛ̀ gɔ̂ŋlo, fughuu ndùw sùghò kə̀zɔ̀ŋlò â Zə̀ kò.

³Ghɛ̀ è gɔɔ̄ŋ tsughu sugho an tuw waʼā, enyəa Zə̀ kə̀ tsʉā dêe wô ghàʼ â dzì è te alenàʼà shwaʼ u wə̄n â ghì ghò, enyəa ghàʼ e lo aledzàa nduw ghee â fəgha kəla kə fə̀ nân doʼō aŋ ghəa a te gho kùu ndùw Kə̀lestò, bòʼ enyəa kən lò soo kə eghəa kə te ko ghe kwu fê naŋā ghàʼ fɛ̄ a te an ndughu è tsāʼ.

⁴Ghɛ̀ e gɔɔŋ tsughu an tuw kaŋa enyəa to M̀ mô lò aletɔʼɔ kəaa ghəa a te gho ghə e zɔlɔ aŋghəa Ŋ̀ ki alekə̀a a te.

⁵ E kwo nlò aŋghəa ghɛ̀ mughu a te ghɛ̀ à ghê ghì ghəla ghe tâʼkè boō fughu â Kə̀lestò, e ghəəŋ tsughu nlò ghəa è səŋò zò an nə̀gha zəla ghɛ̀ kele tsughu ghɛ̀ à ghee.

⁶Ghɛ̀ ki aleki dzə̀ è dzùŋ aŋghəa ghî a ki aleduʼnlo abugho ghɛ̀ kə̂aa ghəa gho ghɛ̀ à ghee, to enyəa ghɛ̀ ŋ kwo dzì zəla ghɛ lo alebɛ̀lɛ̀ ghùw a te.

⁷ Tàekikùs, tɔɔŋ wàazə̀ waʼa wəla a ŋgeē ləghaa, wəla ghàʼ a ghee dzeŋe fwaʼa â Mughu ù te fɛ, vʉ̀a ù gaʼ sugho fə̀ŋ am fwàʼ kə wə̄n, lo teso dzàa mɛ̀ʼn wò nù ghɛ̀ â ghəa gho a dzə̀m kùu ndùw mughù zaŋa fɛ.

⁸Soo kə eghəa kəla Ǹ tuū wo wə̄n a te a vʉ̀a ghɛ̀ lo enyəa, ù bùghò toōn wô ghɛ̀ am fwàʼ kɛʼɛ, aŋghəa ù lo bughò teso dzɛ̂ wo â ghɛ̀ aŋghəa ghàʼ lo a te.

⁹ Ù bùghò ghèe Ònesimùs, wàazə̀ waʼa wəla ghàʼ ləghaa, vʉ̀a ù gaʼ sugho fə̀ŋ am fwàʼ kən, ù lò sugho ghùw ù enaʼ wɛʼɛ. Ghe lo dzaà mɛ̀ʼn wò nù â ghɛ̀ ghəa ghəla a dzə̀m a səā fɛ.

¹⁰ Alistachùs, wəla ù lò fɛ an ndùghùtsāʼ ghàʼ à wə̄n fughu wò ghɛ̀ â tɔɔŋ zo. Mâk, tɔɔŋ wàazə̀ ù ghê Bànabâs vʉ̀a ù dzɛ̀ wô sugho enyəa ghàʼ tɔɔŋ zuūw wô ghɛ̀; ghɛ̀ mafə dzɛ̂ zìi wò ghəa ghò â ghɛ̀ kùu ndùw Mâk, abugho ù bughò fì avʉ̀a ghɛ̀, ghɛ̀ kpeni wə̄n aŋ ghu kə̀ dzûŋ kò.

¹¹Dzushùa[1] wəla ghe ŋgɔɔ̄ sugho enyəa à lò Dzustùs fùghu wò sugho ghɛ̀ â tɔɔŋ zo. Ghən nəəŋ lò ko ghî a Tə̀dzûu ghə̀n a təgha ghe boō fughu a Kə̀lestò, ghe fwaʼa dzəə̄ŋ ghàʼ à ghee fɛ kùu nduw ghəa e Fɔ̀e u Kəzə̀, ghe yia ŋgeē fughuu sugho mugho â yòsò zò.

¹² Epafəlàs wəla ù lò sugho ghùw ù enaʼ wɛʼɛ, kɔ̂ɔ fə̀ Kə̀lestò Yɛso tɔɔŋ zùw wò ghɛ̀. Ù kùu gɔ̀ɔŋ zěe nù an tuw wɛʼɛ, enyəa to Zə̀ kə̀ mô ghəŋlo ghɛ̀ mən tsughu am boo zɛʼɛ̄ â Kə̀lestò, ghɛ̀ e tɔʼ kwo tən enyəa ghɛ̀ fɛ fwàʼà fəgha kəla Zə̀ kə̀ ləghaa ghè kò.

¹³Ǹ lo nû aletɔ̀ʼɔ̀ teso dzɛ̂ aŋghəa ù ŋgəmso kûu ŋgəmso ŋgeē fwaʼā a te â ghɛ̀, àsùghò â ghì à yia ghe lo an naʼ e Làodisea àsùghò an naʼ e Hielapolìs.

¹⁴ Lûk, tɔɔŋ ghùwŋgàŋ waʼa wəla ghàʼ ləghaa ghèe Demàs fughu wò sùghò ghɛ̀ â tɔɔŋ zo.

¹⁵Fughu ndùw nlò tɔɔŋ zaʼa zo â waazə̂ a sɛ yia ghe lo naʼ e Làodisea àsùghò â wàazə̀ ù sɛ̀ ù zən vʉ̀, Nymfà ghèe ghê ghì a Kəzə̀ ghəla ghe bughò dzeŋe tsəgha an ndughu alô wə̄n.

¹⁶Abugho ghe tɔɔ̄ŋ dzɛ̂ kɔʼ mwàʼsò kən ko â ghɛ̀, ghɛ ghəəŋ tsughu sugho enyəa ghe ndûw tɔɔ̄ŋ dzâa kɔʼɔ sughò â ghì a Kəzə̀ a yia ghe lo an naʼ e Làodisea. Ghɛ ghəəŋ tsughu enyəa ghɛ ni wo mwàʼsò chìa mùgho mò tɔm nduw â ghì a Kəzə̀ ghò a Làodisea, ghe tɔɔ̄ŋ dzâa kɔʼɔ sughò â ghɛ̀.

¹⁷Ghɛ̀ dzɛ nduw â Achippùs enyəa, ù ghəəŋ tsughu, ù kùum fwaʼ mɛʼɛ̄ fwàʼ chia Mughu ù te mò fughu â wə̄n enyəa ù e fwaʼā.

¹⁸Tɔɔŋ zəla M̀ fughuu wô fɛ â ghɛ̀ êzə̄ŋ, à tso tɔm nyə tsughu ghu kaŋa mùgho â mughu ko. E kwo ko ghɛ̀ lô nîizəa enyəa Ǹ lo fɛ an ndùghu e tsāʼ. Ŋ̀ gɔ̂ŋlò enyəa to Zə̀ kə̀ mô dè ghɛ̀ â dzɔ̀ e wə̄n zo.