Read Aghem 1 Tɛ̀sàlonìan 1 Bible Online

1 Tɛ̀sàlonìan 1 - Aghem bible

1 Tɛ̀sàlonìan 1

¹ À mwàʼsò kən kə tɔɔ wò mùghò Pôl, ghàʼ à ghê Timotì àsùghò Saelàs[1] â ghɛ̀. Ghǎʼ mwàʼsò kən kə tɔɔ wò â ghɛ̀ dzeŋe kə ghì a Kəzə̀ ghò an naʼ e Tɛ̀sàlonikà; ghɛ̀ lo ghî a Kəzə̀ tɔɔŋ, Tsele ù te ghèe Mughùbè Yɛso Kə̀lestò. Gɔ̂ɔŋ zaʼa e lo enyəa, to Zə̀ kə̀ mô dê ghɛ̀ â dzɔ̀ e wə̄n zo, kə fughuu sughò ghɛ̀ â bughuun zo.

²Ghàʼ fughuu zee kə̀zɔ̀ŋlò â Zə̀ kò bòʼ ghɛ̀ a dzə̀m, yia a zə̂əŋ zee sughô zən ghɛ̀ʼɛ̀ ghò aŋ gɔ̀ɔŋ zaʼa.

³Ghə̄a ghàʼ zə̂əŋ zeē ko ghɛ aŋ gɔ̀ɔŋ zaʼa â Zə̀ kò, Tsele ù sɛ̀, ghàʼ nîi zə̀a yò fwàʼ kəla ghɛ̀ fwaʼā bòʼ ghɛ̀ boo fughu â Kə̀lestò, àsùghò ghəa à dzûŋ ghə̀là ghɛ̀ ghəŋlo â ghî ghò bòʼ ləgha zəla ghɛ̀ ki ghè zò, àsùghò tùʼ zəla ghɛ̀ ndzəmà chiī a zəŋò Mughùbè ù sɛ̀ Yɛso Kə̀lestò.

⁴Waazə̂ ghaʼa ghò; ghàʼ kwo nû enyəa Zə̀ kə mò ləgha tsughu ghɛ, kə n shìaa kɔ̀ʼ ghɛ enyəa ghɛ̀ e lo ghî a wə̄n gho.

⁵Tɔŋlo enyəa ghàʼ fə̂ làbəlà è dzùŋ zaʼa zən â ghɛ̀ kaa naʼn wo ko yo an shwaʼ ù zūm wo, làbəlà è fə̀ bugho dzəə̄ŋ ko ghèe shʉ̀ghà wò an daʼa kə Zuʼ tə̀ Zɔlɔ to. Ghɛ̀ mô è zuw, zuwkɛlɛ̂ ghəa a te gho. Ghɛ̀ kwo nû mughù zəla ghǎʼ mò mughu ghè zò aŋ ghəa ghǎʼ mò lo fì sɛ̀, à mò lo aleyòsò ghɛ̀.

⁶ Ghɛ̀ ŋ kàʼ tsughu alekòʼò nî mùghù zaʼa àsùghò e Mughu ù te zo. Aŋghəa e fə̀ bûʼ lo ko êzə̀, ghɛ̌ fə̀ buʼ kele ko fə̀msō ko aŋ ghùu ghì ghò enyəa so ghɛ̀ zuuw wò shwaʼ waʼa, Zuʼ tə̀ Zɔlɔ tə ŋ ŋgəəŋ ghəəŋ ko nù ghɛ̀ n tsoʼnlo.

⁷Zən lò e gheē ghɛ̌ fə̀ ndûw bughò ghî ghəla ghe moʼò dêe ghəa a Kəzə̀ ghò â ghì ghò an Màsìdonìa àsùghò an Achaìa.

⁸Ghɛ̀ ŋ ghəŋlo ghî yia a zuw shwaʼ u Kəzə̀ ŋgəa kaāŋ an naʼ e Achaìa, àsùghò an Màsèdonìa. Mbi e dzə̀m zə̀a è kele sugho boo zɛʼɛ̀ zo mò à kà ghàʼ bûʼ dzɛ̀.

⁹Ghì a te gho a dzə̀m ndòʼò tèso kaaŋ nǔ dzì zəla ghɛ̀ mò kpenî ghaʼ a te, aŋghəa ghǎʼ mò bugho alô ghɛ̀, àsùghò aŋghəa ghɛ̀ zəghà maʼà tsughu mùʼù ŋ kɔʼso mò, kàʼ ndùw alefwàʼ â Zə kə̀ səŋò kəla kə lô â tuw ko.

¹⁰Ghe buʼù kə̀aa sùghò nù ghəa ghɛ̀ lo mo ghɛ̀ ləəm Wɛ ù Kə̀zə wəla ù lo nughùn wo alò kəwālā alebùghò èbàm am mbī; wəla Zə̀ kə mò nî nughù kɔʼ alo evʉ̄, tɔɔŋ Yɛso wəla ù bəghaasəa sɛ̀ an tsu wəla u ki alebùghò.