Read Aghem 1 Tɛ̀sàlonìan 2 Bible Online

1 Tɛ̀sàlonìan 2 - Aghem bible

1 Tɛ̀sàlonìan 2

¹Waazə̂ ghaŋa gho, ghɛ̀ kwo nû enyəa bwîin zaʼa zəla ghǎʼ mò bwîin wo fi a vʉ̀a ghɛ̀ ka mo tsəghà mìaa dzə̌ kə̀nughù nùghù.

² Ghɛ̀ kwo nû aŋghəa ghǎʼ mò fala a te am Felèpîi àsùghò aŋghəa ghe fə̀ sûuwn ghaʼ a te fughu alo enaʼ. Ghəa e mò bûʼ lô ko enyəa ghe mò ŋgee fughuu ghaʼ â tsù wo fughu alo enaʼ, Zə̀ kə sɛ̀ kə̀ n naam fughu tsughu ghàʼ â fə̀ŋ è te â ghàʼ alenāʼn wô làbəlà è dzuŋ zə̄n â ghɛ̀.

³Ghàʼ ka fə mə̂ŋ dzə̀ an fəgha kəla a fə̀ dzâa wo â ghɛ̀, ghàʼ ŋ ki sugho yo moʼnlò è biigh zo ŋkāa ghǎʼ fì kəŋo yo dzì è lì aletsè ghɛ̀.

⁴Ghàʼ ghəa ghən fɛ kə̀aa wò tò ghî ghə̀là Zə̀ kə̀ lo mo kə m fughu naŋa làbəlà è dzùŋ è te â ghee, ghàʼ kə̂aa dzə̀ yò fəgha kəla ghî à ləghaa, ghǎʼ kuuwn kə̀a wò fəgha kə̀là Zə̀ kə̀ ləghaa enyəa ghàʼ e kəaa, Zə kəla kə kwo fə̂ŋ tə aghì tò.

⁵Ghuūghùe zɛʼɛ̄ e kwo nû, Zə̀ chìa kə lô sûghò aleteso enyəa shwaʼ wəla u mò səa wo an dzughu zaʼā fə̀ yo dzə̂ shwaʼ ù kpəŋo wo aletsè ghɛ̀ ŋkāa alenɔɔm nî fəgha kə̀ li ko aŋ ghùu ghùw wɛʼɛ ù lì.

⁶Ghàʼ mò kəŋo dzə yo enyəa to ghî à mò kɛ̌ɛ wò ghàʼ. Tǒ tum tə Kə̀lestò, ghǎʼ mò ki nû alebvʉa wô ghɛ â fʉgha ù li wo.

⁷Ghǎʼ yia kuuwn zumsō tsughu ko ghue zo am bvʉa zɛʼɛ̄ tò zə̂awɛ̀ ù lɛnlō â wɛ a wə̄n gho.

⁸Ghǎʼ mò kuū ləghaa nû ghɛ, zə̀ lǒ e ghee ghǎʼ mò kaā kə̂a ko yo ghɛ â shwaʼ u Kəzə̀ wò, ghàʼ m fùghù mɛ̀ʼɛ̀ wò ghue zaʼa aleyòsò ghɛ̀, ghàʼ màʼà ŋge gaʼ fə̀ŋ a zəŋò ghɛ̀.

⁹Waazə̂ ghaʼa gho, ghɛ̀ mgbaŋ kwo nû aŋghəa ghǎʼ mò fwaʼà zeē nduw, bùghò fwàʼà bwǐi ndùw enyəa ghàʼ lô so e laʼà fəgha kə̀ li ko an nə̀ghà zəla ghǎʼ mò kə̂aa wô shwàʼ u Kəzə̀ wò â ghɛ̀. Ghǎʼ mǒ èzə fwaʼā aleghəŋlo enyəa e kwo ko ghàʼ lô doʼn fəm ko â ghùw wɛʼɛ u mɔ̀ʼ.

¹⁰Ghue e ùghùe zɛʼɛ e kwo nû ghəa ghən gho, Zə̀ chia kə kwo sugho; enyəa mwam zaʼa a zəŋò ghɛ̀ ghəla ghɛ̀ boō fughu â Zə̀ kò mò zɔlɔ nû, lò tsəghatsəgha, ki sugho yo nùʼ tò.

¹¹Ghɛ̀ kwo nû enyəa ghǎʼ mò ghɛ̀ kwu kele ko to tselè ù lô kwuū kele wɛ a wə̄n gho,

¹²enyəa ghɛ̀ è mughu tsughu mughù zəla Zə̀ kə̀ ləghaa ghè zò. Ù lǒ Zə̀ kəla kə mò tɔŋɔ̄ nyə wô ghɛ am fɔ̀e u wə̄n, àsùghò an səghanyəgha ŋ wə̄n.

¹³Ghàʼ yìa fughuu zeē sugho zɔ̀ɔŋ kò â Zə̀ kò bòʼ enyəa shwaʼ u Kə̀ zə̀ wəla ghǎʼ mò naʼà wo â ghɛ̀, ghɛ̀ mafə zuw, è boo, mo ghɛ̀ ka fə nî dzə̀ shwaʼ u te wo tò shwaʼ u ghûw ù lì, ghɛ̀ mò kuūm ni tsughu shwaʼ u te wo enyəa à lò shwaʼ u Kəzə̀, dèe êzə̀ mò à kùum lò u ghee, wəla u fwaʼā êzə̄ŋ a zəŋò ghɛ̀ ghəla ghɛ̀ boō fughu â wə̄n.

¹⁴ Waazə̂ ghaŋa gho, ghɛ̌ fə̀ bɔɔm ni ko mwam e ghì a Kəzə̀ ghəla ghe fə̀ boo fughu â Kə̀lestò Yɛso, ghəla ghe fə̀ lo an ndughu tə Kəzə̀ təla tə fə̀ lo am Dzùdîa. Nu ghɛ̌ fə̀ bɔɔm fala sugho aŋ ghù ghì ghɛʼɛ gho tò aŋ ghəa ghe fə̀ fala an ghù Dzûu tò.

¹⁵ Ghɛ̀ kwo nû enyəa à fə̀ lo Tə̀dzûu tə fə̀ wi maʼa Mughu ù te, Yɛso, wiin màʼà sùghò ghì a ushʉghà a Kə̀ zə̀ à li gho, fəmso kaaŋ sùghò ghàʼ. Ghe fə̀ ghəəŋ ghəa ghə̀là Zə̀ kə̀ ləghaa dzə̂ yo, ŋaŋà ndùw àghì a dzə̀m.

¹⁶Ghe fə̀ êzə ghəŋlo aletə̀ghàsò sɛ̀ enyəa a ka shwaʼ u Kə̀zə̀ wò â Tòʼò zò naʼà, enyəa ghe zuw to ghe zə̀ kətuw. Ghe ŋ ghəŋlo èzə̀ mò ghe naam dùwsò ndùw kô boo e ghee. Yìa à sò kuūwn lô ko enyəa Zə̀ kə̀ mô èzəŋ biso kòom bùghò pfʉ̀so nʉghà wò a zəŋò ghee.

¹⁷Waazə̂ ghaʼa gho, ghə̀a ghe mò bû bâʼ nughù tsughu ko ghaʼ a zəŋò ghɛ̀ am kə̀mà fə̀ kə ghā, à fə̀ yo dzə̂ fə̂ŋ taʼa ghe fə̀ bâ nughu, ghàʼ n də̀m enyəa to a mô kôom bughò èbàm, a sô mbûŋlo enyəa to sɛ̀ mò koʼò dzəə̄ŋ ndûw kàʼ mə̀ esʉ̄.

¹⁸Ghǎʼ mò kuuwn ŋgee ləghaa nû alebùghò kôʼ ghɛ̀. Ghuūghùe waŋa Pôl, M̀ maā də̂m an ndə̀m è tə̀nə̀gha, Satàn ŋ kuuwn tə̀ghàsò ghàʼ.

¹⁹À lò ghɛ̀, ghɛ̀ ghəŋlo enyəa ghà è ndzəmā chiī tùʼ, ghàʼ è duʼnlo, yìa à lò sughò ghɛ fəgha kəla kə ghəŋlo enyəa ghàʼ è ke e lo aŋ ghùe ù ghaa wo a vʉ̀a Mughùbè ù sɛ̀ abugho ù lo bùghò e bàm.

²⁰Kùmkùm à lò ghɛ, ghɛ̀ lo ghəŋlo ghàʼ e tsɔɔ̄ fə̂ŋ tò, lò sugho alo eduŋlo.