Read Aghem 1 Tɛ̀sàlonìan 3 Bible Online

1 Tɛ̀sàlonìan 3 - Aghem bible

1 Tɛ̀sàlonìan 3

¹ Ghə̄a ghàʼ màʼa fə̀ kɔlɔ̄ kê fə̂ŋ aledòʼò mo a koʼò yò ghɛ, ghàʼ ŋ kòʼ tsùghù enyəa à bìso dzɔ̌ ko enyəa ghàʼ doʼò kôom ko an naʼ e Atɛ̀n ghàʼ â nəŋ ko,

²ghàʼ n tùm wò Timotì, Wàazə̀ ù sɛ̀, wəla ù lò sûghò kɔ̂ɔ fə Kəzə̀ fò, ù fwàʼà dzəə̄ŋ ghàʼ à ghee alenàʼà làbəlà è dzùŋ è Kə̀lestò, a vʉ̀a ghɛ̀ enyəa u bùghò dzə̂n fə̀ŋ tɛʼɛ, ù fəghaan tughuso wô sughò boo zɛʼɛ,

³aleghəŋlo tsughu enyəa e kow ko ghùw wɛʼɛ ù lì ù e bvʉ̂a kômlo am boo e wə̄n, bòʼ tsù ù li wo, nu ghue e ughùe zɛʼɛ̄ e kwo ziī nû enyəa tsû ù ki alebùghò am fwaʼ kə Kəzə̀.

⁴Ghɛ̀ kwo nû enyəa aŋghəa sɛ̌ fə̀ lo a dzə̀m, ghàʼ mafə̀ dzɛ̂ nàŋa â ghɛ̀ enyəa fala e lo bùghòo nù, tò aŋ ghəa ghəla ghɛ̀ koʼō a səā êzə̄ŋ.

⁵Zə lo e ghee aŋghəa ghəa a mò tsəghà səa mugho, mùghò Ǹ tùm wò Timotì a vʉ̀a ghɛ̀ enyəa, ù bùghò kôʼ aŋghəa ghɛ̀ boō fughu a te â Kə̀lestò. À fə̀ lo bòʼ mùghò fə̀ ki tsə̄ŋ zo enyəa Satàn làʼà lo mò ù n ghɛ̀ tsom enyəa ghɛ̀ ti zəghā fwàʼ kə Kəzə̀ kò, à e bən lo tò ghàʼ mò fwaʼ mùghù mə̀ èləghāa.

⁶ Yìa a kuūwn bugho êzəŋ wəla Timotì lǒ mò ù n nùghù tsughu fì a vʉ̀a ghɛ̀ bùghò kòʼ wò ghàʼ ebàm, ù m bùghò kà màm tsaʼ kə̀ saa ko am fə̀ŋ taʼa kùu boo zɛʼɛ̄ àsùghò ləgha zəla ghɛ̀ ki aŋ ghùe zɛʼɛ̄, ndòʼ dzɛ̀ wò sùghò enyəa ghɛ̀ moʼn zěe nù ghaʼ an fə̂ŋ è dzûŋ mbùuŋ sùghò alekòʼ ghàʼ, tò aŋ ghəa ghàʼ mbûŋlo alekòʼ ghɛ̀.

⁷Waazə̂ ghaʼa gho, shwaʼ ù dzûŋ wəla ghǎʼ mò zuw tsughuu bòʼ boo zɛʼɛ̄ ŋ ghàʼ fughu â tsoʼn zo, aŋghəa ghàʼ bûʼ zuūw ko ŋgoʼ fɛ àsùghò tsù wəla ghàʼ lô fɛ a te.

⁸Ghàʼ lo nû alendzəə̄m mughu êzə̄ŋ abugho boo zɛʼɛ̄ e nyɔ̂ʼ ti dzə̄ èzə̀ aŋ ghəa e Mughu ù te.

⁹Ezə̄ŋ ghàʼ lo nû alefughū kəzɔŋlò â Zə̀ kò bòʼ ghɛ̀. Yia a fughuu kɛɛ wo à wə̄n an tsoʼn zəla e lo am fə̀ŋ taʼa bòʼ ghɛ̀.

¹⁰Ghǎʼ yìa a gɔ̂ɔŋ zēe Zə̀ kò, gɔ̀ɔŋ bwîi am fə̂ŋ zaʼa e dzə̀m enyəa to kə mô ghəŋlo enyəa to ghàʼ mô kôom koʼò wô ghɛ̀, ghɛ̀ koʼ wo sugho ghàʼ, asùghò enyəa ghàʼ kele sughò dzì zəla a lô alefəghaan nîi tisô boo zɛʼɛ a te.

¹¹To Kə̀zə̀, Tsele ù sɛ̀ ghèe Mughùbè ù sɛ̀ Yɛso mò dê dzì zəla ghàʼ lô alebùghò tɛ̂ a vʉ̀a ghɛ̀.

¹²To Mughu u te mô ghəŋlò enyəa ləgha zə̀lā ghɛ̀ ki a zəŋò ghì à li gho àsùghò aŋ ghùe zɛʼɛ̄ mô dùuw tò aŋghəa zaʼā e lo a te a zəŋò ghɛ̀.

¹³Ghǎʼ yìa gɔ̂ɔŋ sugho enyəa to Mughu ù te mô ghəəŋ tsughu ghɛ̀ nɛɛ tsughu, ghɛ̀ ke e lo tsəghātsəghā, zɔlɔ am sə kə Kəzə, Tsele ù sɛ̀ àsùghò a vʉ̀a Mughùbè Yɛso abugho ù lo bugho ebàm ghèe ghê ghì a wə̄n gho.