Read Aghem 1 Tɛ̀sàlonìan 5 Bible Online

1 Tɛ̀sàlonìan 5 - Aghem bible

1 Tɛ̀sàlonìan 5

¹Waazə̂ ghaʼa gho, ghùw ù lì ndôʼ ki dzə yo aletɔɔ̄ dzâa wô â ghɛ̀ nəgha zo ŋkāa tî kəla Mughu ù te lo bughoo a te ebàm.

² Tɔŋlo enyəa ghue e ughùe zɛʼɛ e tɔ̂ʼ kwò nû enyəa, ghùw kwo naŋa dzə yo tsuʼ fəla Mughu ù te kê bugho a te. Tɔŋlo enyəa tsuʼ u wən ù bugho u kê bùghò ko tò ghûw tsɔŋɔ lô bughoo â tsuʼ wo, mò ghùw ù mɔʼɔ̄ kwo naŋa dzə yo.

³Ghî a lo e dzaā enyəa, “Ghəa a zʉ̂ lô nû, ghǎʼ yia tsəŋo sughò yo ghəa è li zo.” A kê kôom koʼò ko mo tsû wə̌ sam tɛɛ, to wɛ lô vûuŋ chuūw tsughuu zən ù nʉghà u wɛ, dzì è lì è ke tso koōm buw â ghùw ù lì alenùghù tiī sə.

⁴Waazə̂ ghaʼa gho, ghɛ̀ yo dzə̂ alo kələ̄m tò ghî ghəla ghe kwo yô ghəa ghən gho, e kwo ko tsùʼ u te lô bughoo mò ghɛ̀ kaām ghue zɛʼɛ zə n ndzûuŋ nàŋa.

⁵Ghɛ̀ lo ghî ghəla ghɛ̀ ghəə̄ŋ ghəa ghɛʼɛ gho an ndɛ, tò aŋghəa ghî à mgbaŋā ghəəŋ ghəa gho â tsə̀ tò. Sɛ̀ yo dzə̂ tò ghî ghəla ghe ghəə̄ŋ ghəa gho alo kələ̄m, tò aŋghəa ghî à tsɔŋɔ̄ ghəə̄ŋ ghəa gho â tsuʼ wo.

⁶À fi lo enyəa sɛ̀ ki dzə yo alebwii tò ghî à li gho. A kuuwn ki aletisō kɔʼ kətuw edzuŋ, a e naŋso tsughu sugho ghuw kə ebwìi kə sɛ̀ kò.

⁷Tɔŋlo enyəa ghî ghəla ghe bwiī, bwii tsə̀ghà â tsuʼ wo. Ghəla ghe mʉā kalā lʉ̀ mò, mʉ̀a kala tsə̀gha sùghò â tsuʼ wo.

⁸ Yia a kuuwn bugho sɛ̀ ghəla a lô wɛ a tsə̂ ghò, a ki alenaŋsō ghuw kə e bwìi kə sɛ̀ kò, a gaʼā ndûw fə̀ŋ a zəŋò Kə̀lestò, àsùghò enyəa, a e ləghaa ghue e sɛ̀ zò; sɛ̀ e ghəŋlo enyə tò kəkə̀ŋ sɛ̀ dzəlà kele alo kəchīchī alekə̀əŋ. Sɛ̀ e ndzəmā chiī sugho tùʼ enyəa a lo zəa nù tuw ko, tò a e soō alo kətàŋlò a dzəlà kele kɔʼ alo kətūw.

⁹Tɔŋlo enyəa Zə̀ kə̀ ka fə sɛ̀ shîaa sə̀ wò dzə̀ aledè nʉghà u wən ù pfʉa wo a zəŋò sɛ̀. Ù fə̌ sɛ̀ shiāa enyəa a lâam zə kətuw am bàm e Mughù ù sɛ̀ tɔɔŋ Yɛso Kə̀lestò.

¹⁰Yɛso Kə̀lestò fə̀ kpuw an tuw u sɛ̀ aleghəŋlo enyəa sɛ̀ kê naām lo â tuw ko, ŋkāa mo a m kpūwnlō, a kê mùghù sɛ̀ à ghee abugho ù ke bughuo ebàm.

¹¹À fi lo enyəa ghɛ̀ kì aledzəlā fə̂ŋ tɛʼɛ to, bɔɔm sùghò ghue zɛʼɛ̄, tò aŋghəa Ŋ̀ kwo enyəa ghɛ̀ ghəəŋ nù êzə̀.

¹²Ghàʼ buʼu kə̀ghuw â ghɛ̀ a waazə̂ ghaʼa gho enyəa, ghɛ̀ è fughuu nduw kɔʼso mò â ghì ghəla ghe dêe ghɛ â dzì am boo zɛʼɛ̄. Ghe lo tuw wɛʼɛ ghe yia a fwaʼà tə̀la tsughu alo kədaʼa alenaŋsô ghuw kə ebwìi kɛʼɛ

¹³Ghe ki alefughuu ghee â kɔʼso mò, kùu dèe ndùw ghee â ləgha zəla e lo am fə̀ŋ bòʼ fwàʼ kə ghee. E mughu nlò alo ebughunlō aŋ ghùe zɛʼɛ̄.

¹⁴Ghàʼ buʼu wò kə̀ghu â ghɛ̀ a waazə̂ ghaʼa gho enyəa ghɛ̀ è kʉɛɛ̄n nduw ghî à lɛɛ gho, kùu dzə̀là ndùw fə̀ŋ tə ghì ghəla ghe ki yo fə̀ŋ tò. E fughuu nduw nlò yôso zò â ghì ghə̀là ghe ki yo nûŋ wò aleghə̂əŋ ghəa è li zo. E maʼn tsughuu nlò ghue zo ghɛ̀ a ghê ghì ghò a dzə̀m.

¹⁵Kà nlò è bomlo enyəa ghùw tsə ebo alo ebō. E kuuwn kəŋo ko dzì aleghəŋlo èdzɔ̀ aŋ ghùe zɛʼɛ̄ àsùghò â ghì ghò a dzə̀m.

¹⁶E duʼnlo nlò nəgha tən tə̀ dzə̀m.

¹⁷E gɔ̄ŋlō nlò nə̀ghā tən tə̀ dzə̀m.

¹⁸E fughuu nlǒ zɔ̀ɔŋ â Zə̀ kò alo tənə̀gha tə dzə̀m, nu à lò ghəa zəla Zə̀ kə̀ ləghaa enyəa sɛ̀ è ghəəŋ ghè zò, êzəŋ wəlà ghɛ̀ à ghê Kə̀lestò Yɛso lò kəfəgha kə mɔ̀ʼ.

¹⁹Kà nlò kê bù nyəm kòʼ dzə̀ wən u Zuʼ tə̀ Zɔlɔ təla tə bəghanlo a zəŋo ghɛ̀.

²⁰Kà nlò è ghuuw maʼn shwaʼ u ghìishʉghà a Kəzə̀ ghò.

²¹E mɔmso koʼō nduw nlò ghəa ghəla ghe dzɛ̀ a dzə̀m, ghɛ̀ ŋ kuuwn nìi naāŋ wò ko ghəla a lo à dzûŋ ghò.

²²Ghɛ̀ è tii nughunlo aŋ ghəa à biigh gho a dzə̀m.

²³To Zə̀ kəla kə fughu bughun zo mô tɔʼɔ̀ ghəə̄ŋ tsughu enyəa ghɛ̀ è zɔlɔ, wən à mughu ko: to ghue zɛʼɛ, zuʼ tɛʼɛ àsùghò gwən e ughùe zɛʼɛ zo mô kì yo dzʉ ù li wo alebùghò tâa wô an tsuʼ fəla Mughu ù te Yɛso Kə̀lestò kè bugho a te ebàm.

²⁴Zə̀ kəla kə mò tɔŋɔ̄ ghɛ kaʼn tsə̀ghà dzə̀ yò gha gho, kə lo fwàʼà nù fəgha kə̀là kə fə̀ to naŋā.

²⁵Waazə̂ ghaʼa gho, e gɔŋlo nlò am tuw waʼā.

²⁶Tɔɔŋ zuw tsughu nlò ghue zɛʼɛ zo am fə̂ŋ è zɔ̀lɔ.

²⁷Ǹ fughu wo kə̀làŋ â ghɛ̀ an zən e Mughu ù te enyəa ghɛ̀ ni kɔʼ mwàʼsò kən, ghɛ̀ tɔɔŋ dzɛ kɔʼ â waazughù ghò a dzə̀m an ndùghù e Kə̀zə̀.

²⁸To Mughùbè ù sɛ̀, Yɛso Kə̀lestò mò dê ghɛ̀ â dzɔ̀ e wə̄n zo.