Read Aghem 2 Tɛ̀sàlonìan 1 Bible Online

2 Tɛ̀sàlonìan 1 - Aghem bible

2 Tɛ̀sàlonìan 1

¹ À mwàʼsò kən kə tɔɔ wò mùghò Pôl, ghàʼ à ghê Timotì àsùghò Saelàs[1] â ghɛ̀ yia ghɛ̀ lo mò ghɛ̀ m boo fughu â Zə̀ ko, Tsele ù te ghèe Yɛso Kə̀lestò fi an Tɛ̀sàlonikà. Ghàʼ fughuu wô ghɛ̀ â tɔɔŋ zo.

²Gɔ̂ɔŋ zaʼa e lo enyəa to Kə̀zə̀, Tsele ù sɛ̀ ghèe Mughu ù te Yɛso Kə̀lestò mò dê ghɛ̀ â dzɔ̀ zò, ghe fughuu sughò ghɛ̀ â bughuun zo.

³Waazə̂ ghaʼa gho, ghàʼ ki alefughuu zɔ̀ɔŋ kò â Zə̀ kò nəgha tən tə̀ dzə̀m, mo e ŋgəmso dzɔ̀ɔ nù aleghəŋlo èzə̀ tɔŋlo enyəa boo zɛʼɛ̄ àsùghò ləgha zəla ghɛ̀ ki aŋ ghùe zɛʼɛ̄ ŋgee noom nù.

⁴Zən lò e ghee ghàʼ tsɔɔ fə̀ŋ bòʼ ghɛ̀ an ndughu tə Kəzə̀ tən tə̀ dzə̀m. Ghàʼ tsɔ̂ɔ fə̀ŋ enyəa ghɛ̀ naām ti ko am boo zɛʼɛ̄, aŋghəa ghe buʼù ndzaŋso kaāŋ ko ghɛ, ghɛ̀ yia a fanlō.

⁵Zə zəla ghɛ̀ ka tsughu lo tsə̌a aledèe tsughu enyəa Zə̀ kə̌ sàʼ è wən saʼa an ndziī è tsəghatsəgha, à fi lo enyəa kə lo ghəəŋ nù ghɛ̀ doʼo tsughu ghî ghəla ghe lo mo ghe ŋ kɔʼkpe am fɔ̀e u wə̄n wəla ghɛ̀ fanlo bòʼ ghè wò.

⁶Zə̀ kə̀ fwàʼà kô ghəa ghəla a lô tsəghatsəgha, à fi lo enyəa kə lo fɔeso nù ghî ghəla ghe fughuu ghɛ â tsù wò.

⁷Kə lo fughuu ghɛ̀ ghəla ghɛ̀ fanlō â yòsò zò, àsùghò â ghàʼ. Ghəa ghən kê bəla kə nîi abugho Mughu ù te, Yɛso kè sə tsughuu wo alo kəwālā ghèe ghê tsə̀də̀ndə̄ghā tə Kəzə̀ tə wə̄n tə̀ ghaʼa to.

⁸Abugho ù kè səā tsughu wo ghèe ghè tsə̀təndə̄ghā tə Kəzə̀ tə wə̄n to èzə̀ à wə̀n ù bəghaan wo, ù kê dî tə̀ŋgàmà a zəŋò ghì ghəla ghe kwo yo Zə̀ kò àsùghò a zəŋò ghì ghəla ghe bwîi yo aŋghəa Làbəlà è Mughùbè ù sɛ̀ Yɛso děe.

⁹Ghe kê fɔeso ghee, ghe ke e mgbɛɛ zuuw tsəgha ko ŋgōʼ, mbùuŋ kèe alekòʼ Mughu ù te àsùghò səghanyəgha n daʼa kə wə̄n, ghe sò lo mo ghe ŋ ghee bâʼ zə̀ghà sə̀ wò.

¹⁰Abugho ù kè bugho am tsuʼ fə tēfō, dzughu ghə e ke zuu ghî ghə̀n à dzə̀m ghe lo mo ghe m boo fughu à Zə̀ kò, ghe e fughuu wə̄n â kɔʼso mò. Ghuūghùe zɛʼɛ e ke lo aŋ bvʉa e ghee, ghɛ̀ sô lo mò ghɛ̀ maā boo fughu shwaʼ wəla ghǎʼ mò bughò dzɛ wo â ghɛ̀ kùu ndùw wə̄n.

¹¹Zən lò e ghee ghàʼ gɔ̂ɔŋ Zə̀ kò an tuw wɛʼɛ nəgha tən tə̀ dzə̀m enyəa Zə̀ kə ghəŋlo tò ghɛ̀ kele daʼa ko alemùghù mùghù zəla kə mò tɔŋɔ̄ ghɛ enyəa ghɛ̀ mughu ghe zò. To Zə̀ kə̀ mô ghəŋlo enyəa moʼnlò è dzûŋ zəla ghɛ̀ ki ghè zò àsùghò fwàʼ kə̀là ghɛ̀ fwaʼā bòʼ boo zəla ghɛ̀ ki ghe zò mò bɔɔ̄m bughò səā ko êzə̀.

¹²Abugho e lô enyə, e lo ghəŋlo enyəa ghî ghə è fughuu kɔʼso mò â Kə̀lestò bòʼ ghɛ̀, àsùghò enyəa, ghue e eghùe zɛʼɛ zə e ki sugho kɔʼso mò bòʼ wə̄n. Ghəa ghən a dzə̀m ènyə lǒ bòʼ Zə̀ kə sɛ̀ ghèe Mughu ù te, Yɛso Kə̀lestò ň dzɔ̀ e ghee dê â sɛ̀.