Read Aghem 2 Tɛ̀sàlonìan 2 Bible Online

2 Tɛ̀sàlonìan 2 - Aghem bible

2 Tɛ̀sàlonìan 2

¹ Ǒo waazə̂ ghaʼa gho, kùu ndùw aŋghəa Yɛso Kə̀lestò lo bugho a te ebàm àsùghò dzì zəla sɛ̀ lo zûuŋ wo a te alendùw kpee nî wə̄n a te, ghàʼ buʼu kə̀ghu â ghɛ̀

²enyəa fə̂ŋ tɛʼɛ tə ka e mbaa tsəŋ dzə ŋkāa tuw kɛʼɛ kə e ndzəghanlo abugho ghî a li a bughò dzɛ̂ wo â ghɛ̀ enyəa tsuʼ wəla Mughu ù te ki alebùghò a te wə m kpē. Ghɛ̀ ka e boom fughuu dzə â ghee abugho ghe bûʼ dzɛ̂ ko enyəa ghe ghəa a te gho à mò naʼa wo ghaʼ â ghee ghà mò zuw wo aŋ ghùu Zə̀ kò, ŋkāa à lò an tsʉ̀ zaʼa ghàʼ fughu wo â ghì ghò, ŋkāa enyəa à lò kəmwàʼsò ghàʼ tɔm.

³E kwo ko ghùw ù lì lô so e tsêe ghɛ̀, tɔŋlo enyəa tsuʼ fə te lo yo dzə̂ alebùghò mò ndə̀m è aghì kaam bûʼ sə̀ wò dzə̀ enyə, enyəa ghe tuu màʼn Kə̀zə̀ — à ke lo sugho mò ghùw ù biigh ù biigh ŋ ghue u wə̄n u dê fughu sə wò; ghùw wəla ghe lo dzûuw maʼnlo an uwə̀n.

⁴ Ghùw ù te e ke kɔʼso ghue u wə̄n wo, tsùghòsò màʼn fʉgha wəla ghe tso tɔŋlo enyəa à lò uzʉ̀. Ù lo nyəā nyaʼā kɔʼ an ndùghène è Kə̀zə̀, ù e dzaā wo enyəa e lo Kəzə̀.

⁵Ghɛ̀ kwo nû enyəa M̀ maā ghəa ghən gho â ghɛ̀ dzɛ̀ aŋghəa mùgho mò lo a fì èzə̀.

⁶Ghɛ̌ kwo sugho nû fəgha kəla kə kɔlɔ̀ naāŋ wə̄n enyəa ù ka kaam bùghò, à lò enyəa ghe lo telè dêe fughu kɔʼ wə̄n abugho nəgha e te e lo kpē tsughuu.

⁷Êzəŋ am mbī, ghî à tsɔŋɔ də̀mà kaaŋ nù ghî ghə̀ e ka e zuuw lâŋ kə Kəzə̀ kò. À sò kuuwn lò ko enyəa ghəa ghəla a ke ki alesə̄ lo tèlè sə̌a ko mo ghe ŋ ghùw ù biigh ù biigh ù te kwu nùghù.

⁸ Ghe lo daŋso dêe fughu səā wô ghùw wəla ù zuūw yo lâŋ kò, Yɛso lo daŋso wiī maʼa wə̄n mò ù fò ndùw təzuʼ a zəŋò wə̄n. Yɛso lo daŋso dzûuw màʼà sugho wə̄n daʼa kə səghanyəgha ŋ wə̄n ù bùghò â ghe kò.

⁹ Ghùw ù bǐigh ù te lo bùghòo mò ù kì daʼa kə Satàn. Ù lo e deē wò sə̀ghà mò, fwàʼà wò sùghò tùghù tùghù tə aghəa mo ghəa è səŋò è li e yo aŋ ghəa a te gho a dzə̀m.

¹⁰Ù lo e niī wo bòobò tə agha tə wən to tsèe ndùw ghî ghò an ndə̀mà tə tədzǐi, ghî ghəla ghe fə̀ fôʼ naŋā enyəa ghe kê sə̌a mìanlò alo kələ̄ŋ, bòʼ ghe tue maʼa aleboo fughu â sə̀ŋò zò to ghe zə kətuw.

¹¹Zən lò ghee Zə̀ kə̀ ndzəŋso naāŋ tsughuū ghee enyəa ghe boom fughuu nduw ko â gha gho.

¹²Ghəa ghən fə̀ lo enyəa ghe lo fɔeso ghee bòʼ ghe mò ləghaa aleghəəŋ ghəa à biigh gho, kuuwn tuu alebôo ghəa zəla e lo èsəŋò.

¹³Ghàʼ ŋgəmso ki nû alefughuu zɔ̀ɔŋ kə Kəzə̀ ko an tuw wɛʼɛ waazə̂ ghaʼa gho alo tənə̀gha tə dzə̀m. Mughu ù te gaʼ fə̀ŋ a zəŋò ghɛ̀, tɔŋlo enyəa â mbī aletsoō zîi tsughu, à fə̀ lo mo Zə̀ kə̀ mafə ghɛ ki shìaa enyəa ghɛ̀ ke bughuo zə tuw ko mò à ghɛ̀ sûuw zɔ̀nso tsughu Zuʼ tə̀ Zɔlɔ to àsùghò aŋghəa ghɛ̀ boō fughu aŋ ghəa zəla e lo êsə̀ŋò.

¹⁴Zə̀ kə fə̀ ghɛ̀ fɛ aŋ ghəa ghən tɔŋɔ wo bòʼ làbəlà è dzùŋ zəla ghàʼ mò bughò naʼà wo â ghɛ̀, aleghəŋlo enyəa ghɛ̀ lo kele sugho səghanyəgha ŋ Yɛso Kə̀lestò mò, tɔɔŋ Mughùbè ù sɛ̀.

¹⁵Waazə̂ ghaʼa gho, à fi lo enyəa ghɛ ki alefəghaan tee tsughu, ghɛ̀ gaʼ tsughu tuw ko an shwaʼ ù Kə̀zə̀ wəla ghǎʼ fə̀ naʼà wo â ghɛ̀ an dzə̂ ŋkāa à fə̀ tɔm wo alo kəmwàʼsò.

¹⁶Ghaʼ gɔ̂ŋlò enyəa to ghuūghùe u Mughùbè ù sɛ̀, Yɛso Kə̀lestò, ghèe Tsele ù te tɔɔŋ Zə̀ kə sɛ̀, ghe ghəla ghe mò ləgha sɛ̀, fughu tən sɛ̀ â tsə̀mso kə fə̂ŋ kəla kə doʼò tən, àsùghò moʼnlò è dzûŋ zò an dzɔ̀ e ghee,

¹⁷Mô dzə̂n fə̀ŋ tɛʼɛ, tə e tughu aŋ ghəa à dzûŋ ghə̀là ghɛ̀ ghəŋlo àsùghò aŋ ghəa ghɛʼɛ à kəa gho.