Read Aghem 2 Tɛ̀sàlonìan 3 Bible Online

2 Tɛ̀sàlonìan 3 - Aghem bible

2 Tɛ̀sàlonìan 3

¹Aletsughuu tsəlā tsughu shwaʼ waŋā â ghɛ̀ a waazə̂ ghaʼa gho, lo enyəa, ghɛ̀ e gɔŋlo nlò an tuw kaʼā, gɔ̀ɔŋ sùghò enyəa shwaʼ u Mughu ù te u mbaā nyəŋo ŋgəaā ndûw tə̀ luʼū tə dzə̀m to ghî ghə̀ e zuuw, fughu ndùw ŋkɔʼso â Zə̀ kò, tò ghɛ̌ fə̀ zuw, è boo, fughuu sùghò ŋkɔʼso â Zə̀ kò.

²Ghɛ̀ è gɔ̂ɔŋ sugho enyəa ghàʼ nɔ̂ɔsə aŋ ghu kə ghì a biigh à biigh gho, àsùghò ghu ghì ghəla ghe ki fə̂ŋ tə dzəaa to, nu à yò dzə̂ ghe a dzə̀m ghe boō fughu â Kə̀lestò.

³À sò kǔuwn lò ko enyəa Mughu ù te lo nâaŋ dzughu e wə̄n, ù lo fughu nù ghɛ â daʼa ko, ù lo tughuso nù ghɛ, ù kə̀ŋo naŋā sùghò ghɛ̀ aŋ ghùu ghì à biigh gho.

⁴Ghàʼ kwo tən nû am fə̂ŋ taʼa enyəa Mughu ù te fwaʼà nù a zəŋò ghɛ̀, enyəa ghɛ̀ fwaʼà nù ghəa ghəla ghǎʼ mò dzɛ̂ naŋā â ghɛ, àsùghò enyəa ghɛ̀ yia lo ghəəŋ ndûuŋ tsəgha ghəa a te gho

⁵Ghǎʼ yia a gɔ̂ŋlò enyəa to Mughu ù te mô ghəŋlo ghɛ̀ zuwkɛlɛ dzì zəla Zə̀ kə̀ dêe ləgha e wə̄n zo a te, àsùghò enyəa ghɛ̀ è lo alekɔlɔ̄ fə̀ŋ aŋ ŋgoʼ zəla ghɛ̀ zuūw tò Kə̀lestò.

⁶Ghàʼ dzâa wò â ghɛ̀ a waazə̂ ghaʼa gho an zən e Mughu ù te Yɛso Kə̀lestò enyəa ghɛ̀ è ka e tughuu ghɛ à ghê waazə̂ ghɛʼɛ à li ghəla ghe ləghaa alezuum lo kaāŋ tsəgha mo ghe fwaʼa yò fəgha kə̀ li ko, mo ghe mughu sugho yo aŋghəa bughōo kəla ghɛ̌ fə̀ zoʼn ni aŋ ghùu ghàʼ děe ghè kò.

⁷Ghuūghùe zɛʼɛ̄ e kwo nû aŋghəa ghɛ̀ ki alekòʼò nî ghəa ghaʼa a te, tɔŋlo enyəa ghǎʼ mò bɔlɔ yo aŋghəa ghǎʼ mò lo tsəgha fì sɛ̀ a dzə̀m.

⁸Ghàʼ mò niī zəa sugho yo fəghazəa kə ghûw ko mò ghàʼ kâ tsə̄, nu ghǎʼ mò kuū fwaʼā zee nu, fwaʼà bwǐi enyəa e kwo ko ghàʼ lo so e fughuu kəfəm â ghùw wɛʼɛ ù lì.

⁹Aŋ ghəa ghəla ghǎʼ mò ghəŋlo lo enyə, à mò yo dzə bòʼ ghàʼ mò ki yo daʼa ko alebvʉa wô fəgha kə̀là ghǎʼ mò ləghaa, à mò kuuwn lo enyəa ghàʼ mo ləghaa aledèe wô â ghɛ̀ tǒ tsə̌a e dzùŋ zəla ghɛ̀ ki alekòʼò nî.

¹⁰Ghǎʼ maā fughu naŋa ghɛ â lâŋ kən ko an ghəa sɛ̀ mò lo a dzə̀m enyəa, “Abugho ghùw ləghaa yo alefwaʼā, ù kì yo alezə̄.”

¹¹Ghǎʼ yia a naām zuuw ko enyəa bɔ̀lɔ̀bɔ̀n tə aghì tə̀ li tə naam lo ko am bvʉa zɛʼɛ mo ghe ləghaa yo aleghə̂əŋ ghəa è li zo aŋ ghùe e ghee, kuuwn nyəaa kaaŋ tsə̀ghà aŋ ghəa a aghì nughù ghò.

¹²Ghǎʼ yia a tsʉ̂a wo ŋgòʼ è aghì ghən an zən e Mughu ù te Yɛso Kə̀lestò enyəa ghe zumso tsughu ghue e ghee, ghe e kuūm fwaʼā nduw alekə̄ŋ mughù e ghee.

¹³Yia a bugho ghɛ a waazə̂ ghaʼa gho, e kwo ko ghɛ̀ lô so e bughu kòom nù aleghəŋlo èdzɔ̀.

¹⁴Abugho ghuw ù lì kpɛʼɛ̄ tue maʼa alezuw ghəa ghəla ghàʼ tɔm wo â ghɛ̀ am mwàʼsò kən, ghɛ̀ n tsə̀sò nàŋa kɔʼ wə̄n, koòm zə̌afaa yo ghɛ̀ à ghee, to tuw kə də̂n wə̄n.

¹⁵E kwo ko ghɛ̀ lô so e nîi ŋgòʼ e ghùw ù te tǒ ghùw ù kə tuw wɛʼɛ, ghɛ̀ ŋ kuuwn tsʉ̀a ndùw ko wə̄n tǒ wàazə̀ wɛʼɛ.

¹⁶To ghuūghùe u Mughu ù te wəla ù fughuu ghî ghò â bughuun zo, mò fughuu sughò ghɛ â bughuun zo alo tənə̀gha tə dzə̀m àsùghò alo aghəa a dzə̀m. Mughu ù te e lo ghɛ̀ à ghee a dzə̀m

¹⁷À tɔɔŋ zən êzəŋ enyə, à tɔm nyə tsughu mugho Pôl aŋ ghu kaŋā. Zən lo tsə̌a zəla e lò am mwàʼsò waŋa u dzə̀m, aledèe tsughu enyəa à mwàʼsò kə te kə tɔm mugho Pôl.

¹⁸Yìa Ŋ̀ gɔ̂ŋlo enyəa to Mughu u sɛ̀ Yɛso Kə̀lestò mò dê ghɛ̀ a dzə̀m â dzɔ̀ e wə̄n zo.