Read Aghem 1 Timotì 1 Bible Online

1 Timotì 1 - Aghem bible

1 Timotì 1

¹À mwàʼsò kən kə tɔm mugho Pôl. Zə̀ kəla kə bəghaasəa sɛ̀ ghèe Kə̀lestò Yɛso wəla a chiī tùʼ è sɛ̀ a zəŋò wə̄n fə̀ fughu mughu â daʼa ko enyəa mùghò e lo tum è Kə̀lestò Yɛso.

²M̀ mwàʼsò kən tɔɔ wò â ghù Timotì, tɔŋlo enyəa ghù kùum lǒ wɛ waŋa Ǹ nî sə kɔʼ wo am fə̀ŋ zəla sɛ̀ dzeŋe gaʼ tsughu a zəŋò Zə̀ kò. Ŋ̀ gɔ̂ŋlò enyəa to Kə̀zə̀, Tsele ù te ghèe Mughùbè ù sɛ̀, Kə̀lestò Yɛso mò dê ghù â se ghee è kwuso zo àsùghò dzɔ̀ e ghee zo, ghe fughuu sughò ghù â bughuun zo.

³Ghəa mugho fə̀ nughùn nduw a ŋ Mɛ̀sàdonìa, mùghò n dzɛ̀ â ghù enyəa, ghù dòʼòdòʼò tsughu ko an Efɛsùs. Dzǎa ndùw â ghî ghəla ghe zoʼn kaāŋ ghî ghò am fwə̀n tə aghəa mò à yò ghəa ghəla mùghò fə̀ zoʼn ghɛ a te, enyəa ghe bughū naŋa ghəa a ghee a te gho.

⁴Dzâa ndùw â ghee enyəa ghe bughūu naŋa alezuum taŋso kaaŋ wii to kùu ndùw ghê tsele a ghê tsele a ghee. Ghea a te a ghəəŋ nù ghî ghə̀ m pfʉa adzughu aŋ ghùe è ghee kə̀nughùnùghù. Ghəa a te a yôsò ghùw alefwaʼā fəgha kəla Zə̀ kə̀ ləghaa, mò ghùw lò ko alefwàʼ fəgha kəla Zə̀ kə̀ ləghaa abugho ù boō fughu tsughu â Kə̀lestò.

⁵Ghəa è səŋò zəla M̀ fughuu wô ghû â làŋ kən ko lo enyəa to kə mô lò aleghəŋlo ghî a Kə̀lestò ghə̀ e ləghaa ghue ghee zo; ŋgòʼ è ləgha zəla e səā wo am fə̂ŋ è zɔ̀lɔ, à mòʼnlò è dzuŋ zò, Abugho ghe ləghaa ghue e ghee zo enyə, e fi dêe nù enyəa ghe ŋ kùm bǒo fughu â Kə̀lestò.

⁶Ghî à li ghə n zə̀ghà màʼà səŋò zən zo, kuuwn sə̀ tsə̀ghà tsùghù alekəā kaaŋ shwaʼ ù laʼso wo.

⁷Ghe dəmà aledòʼò wàdè tə kəlàŋ, an làŋ kə Musî; dèe êzə̀ mo ghe tɔʼɔ̀ zǔuwkɛlɛ yo fəgha kəla lâŋ kə te kə lo ghè kò, aŋghəa ghe buʼù tsɔ̂ɔ ko fə̂ŋ tò a te.

⁸Aŋghəa e lô êzə̄ŋ, a kwo nû enyəa e dzɔ̂ɔ nù alezoʼnlo àghì alo kəlàŋ, abugho a kuūwn nyɔʼɔ̀ zoʼn dzə̂ ghəa ghəla lâŋ kə te deē ghè kò.

⁹A kwo sugho nû enyəa ghe kâ lâŋ kə̀ naŋa dzə̀ â ghî à dzûŋ ghò; kə kuuwn lò â ghì ghəla ghe bvuʼū lâŋ kò àsùghò ghəla ghe ghəə̄ŋ fɛ̀ɛn tə aghəa tə̀ biigh to, â ghì ghəla ghe moʼò enyəa Zə̀ kə̀ yo, ghəla ghe ghəə̄ŋ dzə̀adzə̀ tə aghì təla tə ki yo fəgha fwàʼ kə̀ li ko, àsùghò â ghì ghəla wiī maʼn tsughuu tsele ŋkāa zə̂, ŋkāa ghe gbôo ghùw.

¹⁰Laŋ kə lo sugho â ghì ghəla ghe səā nûŋlo, àsùghò ghê nùghùbùʼutùe. Chia kə lô sugho â ghì ghəla ghe tsɔŋɔ̄ boʼn ghî ghò, àsùghò ghəla ghe kaʼn gha gho; a ka dɔ̂ɔm taŋ ghəla ghe dzɛ̂ enyəa a yo alekāʼ egha, dèe èzə̀ mo gha à kaʼnlo a lo fʉghàzəa u ghee àsùghò ghəa à loʼ ghəla a lo mo a boom dzəəŋ yo ghèe tsʉ̀ è zɔlɔ zo.

¹¹Tsʉ̂ zən sə kɔʼ an làbəlà è dzùŋ zəla Ǹ zoʼn wô ghî gho a te — làbəlà è dzùŋ zəla Zə̀ kə̀ ghaʼa kəla ghî à kɔʼso fə̀ fughu wo â mùghò.

¹²M̀ fughu kə̀zɔŋlò â Mughùbè ù sɛ̀ wəlà ù mò fughu mugho â nùŋ wò aŋ ghəa ghən, bòʼ ù maā kôʼ tsughu enyəa Ǹ lo nû tsəghatsəgha, ù n nì kɔʼ mugho alefwàʼ fwàʼ kə wə̄n.

¹³Zə̀ kə̀ maā se zo a zəŋò mùghò kwuso aŋghəa e bûʼ lô ko enyəa M̀ mafə̄ wə̄n bûʼ sùuwn tsə̀ghà dzə̀, dzaŋso kaaŋ tsə̀ghà sùgho tsə̀təndə̄ghā tə wə̄n, bùʼ nòmso sùghò à liʼ gho, tɔŋlo enyəa kə mafə kele enyəa mùghò fə̀ ghəa ghən ghəŋlo an tuw kə e làʼsò.

¹⁴Mughu ù te n dè wò fə̀ŋ e wə̄n è dzùŋ â mùghò aleghəə̄ŋ tsughu enyəa Ŋ̀ gaʼ fə̀ŋ a zəŋò wə̄n àsùghò an ləgha zəla sɛ̀ ki ghè zò aŋghəa sɛ̀ à ghê Kə̀lestò Yɛso lò alo kəfəgha kə mɔ̀ʼ.

¹⁵Shwaʼ wən wo enyəa, “Kə̀lestò Yɛso fə̀ fɛ am mbī bugho alebəghaasə ghî à biigh gho.” Shwa u t e u lo êsəŋò ghùw vʉ̀a ù lo aleboō fughu a te. Yìa M̀ fɛ̂ɛn tsəgha ghe a dzə̀m.

¹⁶Zə̀ kə̀ ŋ kuuwn kwuso tsughu ese a zəŋò mùghò wəla mùgho fə̀ bûʼ bo tsəghà ko ghî à biigh gho a dzə̀m, aŋghəa Yɛso Kə̀lestò fə̀ kǔum maʼà tsughu ghue wo alebəghaasə mugho am bòo taŋa tǒ tsə̌a â ghî ghəla ghe naām ki aleboō fughu â wə̄n to ghe lo kelê mùghù èdoʼntəla zo.

¹⁷Gɔ̂ɔŋ zaʼa e lo enyəa, to ghî à mô tə̀mâ ŋkəma, fughu sùghò ŋkɔʼso â Də̀ŋ kəla kə doʼo tən, də̀ŋ kəla kə kê kpuūw koʼò yo, kəla ghùw taʼkè kaām koʼò koʼo tsəghà, mò a mìa ko wə̄n Zə̀ kò to mbī kê bughò mìaa. Zə e lo ko êzə̀.

¹⁸Timotì, ŋ wɛ, zuw lâŋ kə̀là M̀ fughu wô fɛ â ghù, tɔŋlo enyəa kə boom dzəəŋ nù ghèe fəgha kəla ghiīshʉ̀ghà a Kəzə̀ a fə̀ kə̂a naŋa kùu wò ghù. Nǐi kɔʼ tsʉ̂ e te zo tò ghɔŋ zə̀ghà an dzɔ̀ɔdzɔ̀ kə tsam chìa ghù ki aletə̄m.

¹⁹Tɔ̀ʼɔ teme tsughu ko aŋghəa ghù boo fughu a te â Yɛso, ghù kele tsughu sughò fə̀ŋ è zɔ̀lɔ. Ghî à li a lo nû ghe kôom buʼù kɔʼɔ̄ shiāa yo aleghə̂əŋ ghəa zəla e lô tsəghatsəgha, ghəa a te yia a ghəŋlo, ghe yia kôom yo aleboō fughu â Zə̀ kò.

²⁰Hɛmɛnùs ghèe Àlɛ̀zandà lô ŋgòʼ è ghì a te gho. Mùghò ŋ ghee a te gho a bə̀ghà nî fùghù sə̀ ndùw â Satàn enyəa ù ghə̂əŋ ghəa zəla ù lo aleghəŋlo â ghee. Zən lo ghəəŋ nù, ghe zoʼn tsughu enyəa ghe ki dzə yo alesuūwn Zə̀ kò.