Read Aghem 1 Timotì 3 Bible Online

1 Timotì 3 - Aghem bible

1 Timotì 3

¹À lò nu êsəŋò enyəa abugho ghùw kəŋo aledòʼò tsoʼ è tùghù an dzeŋe kə ghì a Kəzə̀, ù fi kəŋò alefwaʼā fwàʼ kə̀ dzûŋ kò.

²Tsoʼ an dzeŋe kə ghì a Kəzə̀ kì alelo ghùw wəla mughù e wə̄n e zɔlɔ̄, mò ù kì ko wi u mɔ̀ʼ, mò ù kì sugho bughuun kə dzə̂, naŋso tsughu sùghò ghuw kə ebwìi ke wə̄n, mò ghəa a ghəə̄ŋ ko an ulwàŋ — ù e ki sugho zǐi alezoʼnlo aghî an shwaʼ u Kəzə̀, kwo sugho alekpeēnî aghì abugho ghe bwîin nduẁ alo wə̄n an ndughu.

³Ù ki dzə yo alemʉa kala kaaŋ lʉ̀ mò ŋkāa ŋgaam kə ghûw, ŋkāa bàa ŋgə̌a kaaŋ tsə̀ghà àghəa. Ù kî alelo zʉ̀ kə ghûw kò mò ghəa a zumso ghəəŋ nù, mò ù sə̌a sùghò yò â sə gho aŋ ghəa a ukua.

⁴A e lo ghùw mò ù kwò alekwuū kele àghì alo wə̄n an ndughu, ghəəŋ tsughu sùghò enyəa wɛ a wə̄n ghə e zuuw â wə̄n.

⁵Abugho ghùw kwo yo alekwuū kele àghì alo wə̄n an ndughu, ù lo ênzə̂n alekwuū kele àghì an dzeŋe kə ghì a Kəzə̀ a?

⁶Ghùw ù te ki alelo sugho mò fə̀ŋ e wə̄n nɛɛ aŋ ghəa a Kəzə̀, mò tɔ̀ʼ gàʼ sùghò fə̀ŋ e wə̄n a zəŋò Zə̀ kò, buw êzə̀ to ù kɔʼso kaŋlo ùghue enyəa ù kì bûʼ kə ne ko, u bùghò bvʉ̂a tsughu alo fətə̀mà tò aŋghəa Satàn fə̀ bvʉ̂ sugho a te.

⁷Fwaʼ kə wə̄n kə ki alezɔlɔ an sə kə ghî a beē gho aŋ ghəa ù buw alebvʉ̀ an tə̀mà fə̀ Satàn, ù kelê tuw kə̀ dəla ko.

⁸An ndzîi è mɔ̀ʼɔ zən, ghî a li ghəla ghe kwu kele sugho dzeŋe kə ghì a Kəzə̀ gho ki alekaa tsughuu zə zo, bəən kə̂a sùghò yò ghəa gho, mʉa kala yo lʉ̀ mò, səa sùghò yò â sə gho aŋ ghəa a ukua.

⁹Ghe ki alekele tsughu fə̂ŋ tə̀ zɔlɔ to aŋghəa ghe boo fughu tsughu an tsʉ̀ zəla Zə̀ kə fə̀ nî dê fughu wo a ghee.

¹⁰Ghɛ̀ ŋ ki alemɔ̀msò koʼò dzə̂ ghee, mo ghəa a ghùw ù te a zɔlɔ nù, ghe n naŋa kɔʼ wə̄n enyəa ù e fwaʼa â ghɛ̀.

¹¹Yi a ghee a ki alelo yîzən a dzûŋ gho, mo ghe maʼn kǎaŋ yo fom to, ghe ki bughunlo u tədzə̀ wò, zumso lo sugho.

¹²Ghùw wəla ù yòsò ghî gho an dzeŋe kə ghì a Kəzə̀ ki aletele ki ko wi u mɔ̀ʼ; ghùw ù te ŋ ki aletɔ̀ʼɔ̀ kwuū kele sughò wɛ a wə̄n aŋ ghu kə̀ dzûŋ kò àsùghò ghì à li yì à dzə̀m ghe mughu alô wə̄n an ndughu.

¹³Ghî ghəla ghe kwu kele dzɔ̂ tsughu dzeŋe kə ghì a Kəzə̀ gho bùghoo ghe ŋ kele zən è dzûŋ zò, ghe mən tsughu a m boo zəla ghe ki ghè zò â Kə̀lestò Yɛso.

¹⁴Ŋ̀ ki nû moʼnlò e te zo alekùʼn bughò tɛ̂ fì a vʉ̀a ghɛ̀. Ǹ tsʉ̂ zən â ghɛ̀ fɛ fughuu wò enyəa,

¹⁵abugho M̀ bûʼ loʼn ko nû mò Ŋ̀ kâ mba bùghò, ghɛ ŋ kwo aŋghəa ghɛ̀ lo alenaŋso ghuw kə ebwìi kɛʼɛ ko a te am bvʉa zɛʼɛ, ghî a Kəzə̀, mò à lò dzeŋe kə ghì a Kəzə̀, Zə̀ kəla kə mughu, nyə̀la kəla kə nyə̂n kele səŋò zò.

¹⁶Ghùw ù li yo aletuū maʼà nàn kə eghəa kəla kə lo aŋ ghəa a Kəzə̀ ghən enyəa, Ù fə̀ a m mbī bugho tǒ ghuw wə̀ nsɔ̌ɔŋnchùw. Zuʼ tə Kəzə̀ tə̀ n dè wò enyəa ù lo tsəghatsəgha, Tsə̀təndə̄ghā tə Kəzə̀ tə̀ ŋ kòʼ wə̄n. Ghî ghə̀ n zoʼn ŋgə̀a wò àghì aŋ ghəa a wə̄n alo tənàʼà tə dzə̀m. Mbī e dzə̀m m boo fùghù ndùw â wə̄n. Ghe n nì nyə̀ kɔ̀ʼ ndùw wə̄n alo kəwala alo n nsəghānyəghā.