Read Aghem 1 Timotì 4 Bible Online

1 Timotì 4 - Aghem bible

1 Timotì 4

¹Zuʼ tə̀ Zɔlɔ tə dzàa zěe nù enyəa a kê bugho an tsuʼ məla Yɛso kè so e bughò èbàm a te, ghî à li a lo tuu màʼ nù alekòom boō an tsʉ̀ è səŋò zəla ghe fə̀ zuw kùu ndùw Yɛso, ghe e kôom boom fughu nduẁ â zʉ̀ wə agha wo àsùghò â tsʉ̂ e zèa m bǐigh mò.

²À ŋgòʼ è tsʉ̀ zən fughù ghì ghə agha ghəla ghe koom ki yo tuw kə̀ dəla ko alekāʼ egha, mo tɔ u ghee wə n lāa to ghe zuʼ an uwə̀n.

³Ghî ghən tsʉ̂a wò àghì enyəa ghue è niī e dzɔ̂ɔ yò, àsùghò enyəa ghî ghə e ka zəa fʉghàzəa ù lī wo, kuuwn zəa ù lī wo. Ufʉghàzəa mò à fùghù wò Kə̀zə̀ enyəa ghî ghə̀ e zəa, mo ghe m fùghù tsùghù dzə zɔ̀ɔŋ kò a te alo egɔ̀ŋlo, ghî ghəla ghe boō fughu â Zə̀ kò mo ghe m bùghò kèle sùghò səŋò zò aŋ ghəa a te gho.

⁴Tɔŋlo enyəa fʉgha wən u dzə̀m Zə̀ kə̀ gbə̂n wo, u dzɔ̂ɔ nù; kə̀ li kə yo a te a lo aletuū maʼà, abugho ghùw nìi nduw dzə mò ù m fughu kɔʼ zɔ̀ɔŋ â Zə̀ kò.

⁵Tɔŋlo enyəa shwaʼ u Kəzə̀ àsùghò gɔ̀ɔŋ zo ghə̌əŋ nù fʉgha u te u mò è zɔn.

⁶Abugho ghù zə̀əŋ zeē waazughù gho aŋghəa ghəla mùghò fə̀ zoʼn ghû a te, ghùw vʉ̀a ghù tsʉa tsughu sùghò ghue wʉ̀a wò làbəlà è Kə̀lestò zən àsùghò an tsʉ̀ e səŋò zəla ghù bwii a te, ghù e ke lo ghùw ù kəfwàʼ ù dzùŋ â Kə̀lestò Yɛso.

⁷Tue màʼa zə̂azə̂a ŋ ghə̀a kwu mò to məla dwə̂n wə aghì zən u kə̂a seē. E zoʼn tsughuu nlò ghue zɛʼɛ zo aŋ dzǐi tə Kəzə̀.

⁸E dzɔ̂ɔ ko nù alenumsō zee gwən e ughùe zò, e kuuwn ŋgè dzɔ̀ tsə̀ghàtàʼà sə alo tədzǐi tə dzə̀m abugho a zoʼn zeē ghue e sɛ̀ zò alekelê ghəa a Kəzə̀. Ghəa a Kəzə̀ a ki to kəla kə ki mughù zə̀n èzəŋ àsùghò zəla e kê lô tən tsəgha.

⁹Shwaʼ wən u lo êsəŋò, vʉa u kûum kpe sugho aleboō fughu a te.

¹⁰Sɛ̀ dəmà nù, faan sùghò alekelê ghəa ghən bòʼ enyəa tùʼ è sɛ̀ chîi a zəŋò Zə̀ kəla kə mughu, tɔ̂ɔŋ Zə̀ kəla kə bəghaasəa ghî ghò a dzə̀m, a ka dɔ̂ɔm taŋ ghe ghəla ghe boo fughu tsughu â Wə̄n.

¹¹E zoʼn ndùw lò ghî ghò aŋ ghəa ghən gho, kòʼò tsùghu sùghò enyəa ghe yia bwîi nduw an dzə̀ tə te to a.

¹²E kwo ko ghù lò bomlo enyəa ghùw ù lì koʼò lʉgha ghû mbuu ghù lò dzə̂ wɛ̂ɛtùghu. Ghùw kì aledòʼò tsughu tǒ tsə̌a è dzùŋ aŋghəa ghî ghela ghe boō fughu â Kə̀lestò lò alekòʼò nîi kɔʼ, an shwaʼ wûa ù kəaa wo, am mwam wʉ̂a ù dzûŋ wò, an ləgha zəghà â ghì ghò, am fə̀ŋ zə̀ghà zəla ghù gaʼ tsughu a zəŋò Kə̀lestò àsùghò am mùghùu zə̀ghà mò e ki yo dzʉ wo a te.

¹³Tò Ŋ̀ kê tsoō bughô a fì êzə̀, e tɔɔŋ teso nduw shwaʼ u Kəzə̀ wò â ghì ghò an ndɛ, zoʼn ndùw àghì a te, zùghò ndùw sùghò shwaʼ u te wo.

¹⁴E kwo ko ghù lò so e tsughòsò maʼn daʼa kəla Zuʼ tə̀ Zɔlɔ tə fə̀ fughu â ghù an nə̀ghà zəla tsoʼ tə dzeŋe kə ghì a Kəzə̀ tə fə̀ gɔ̂ŋlo mo ghe ŋ ghu a gaʼ wò an tuw kə̂a.

¹⁵Tɔ̀ʼ zoʼn kele kɔʼ ghəa ghən gho, ghù gaʼ tsughu fə̀ŋ zə̀ghà a te gho, to ghî ghə̀ è koʼo wo aŋghəa ghù noōm nduw a te.

¹⁶E nîi ghôm zò a m ghùe wʉ̂a àsùghò an tsʉ zəla ghù zoʼn ghî gho a te. E ti ko a te, nu abugho ghù ghəə̄ŋ dzə êzə̀, ghù lo bəghasə ghùe wʉ̀a wò àsùghò ghì ghəla ghe zuūw â ghù.