Read Aghem 1 Timotì 5 Bible Online

1 Timotì 5 - Aghem bible

1 Timotì 5

¹Kà è tɔnlo â dzə̂ a zəŋò noo kə ghû kò, e bughuso kəaa nduw ghəa gho â wə̄n alo ŋkɔʼso tǒ tsughò. E niī nduw waafəghàŋ à nûu ghò tò waazughù.

²E niī sugho noo tə ayìzən to tò ghê zùghù. Nìi sùghò waafəghàŋ à zən gho tò waazughù. Ghəa ghən gho, e fwaʼa nduw am fə̂ŋ è dzùŋ.

³E lɛnlo â yiikpūw ghəla ghe ki yo ghùw alelɛnlo â ghee.

⁴Zə e sô kuuwn lô enyəa abugho wìikpuw ki wɛ gho ŋkāa wɛ awɛ gho, ghəəŋ tsughu enyəa ghe kele tsughu enyəa ghe ki alebùʼù kaʼ tsughu alefwàʼ fwàʼ kə Kəzə̀ a lǒ ghee an ndughu, enyəa ki alelɛnlo â ghè tsele ghèe ghê zə̀, tɔŋlo enyəa ghən lò ghəa ghəla a dzɔɔ̄ an sə kə Kəzə̀.

⁵Wìikpuw wəla ù ki yo ghùw alelɛnlo â wə̄n, mò ù lò ko wə̄n à nəŋ ko, ù n naŋa moʼnlò e wə̄n zo a zəŋò Zə̀ ko, ù lo tən ko alegɔ̀ŋlò, ù nɔɔ̄ yôsò zò â Zə̀ kò alo ntsuʼu n dzə̀m.

⁶Wìikpuw wəla ù kuūwn ləghaa alezəa zee ko ghue u wə̄n wo lo tǒ ghùw ù kpǔuw, abugho ù naām bûʼ lô ko â tuw ko.

⁷E dzaā nduw â ghì ghò enyəa ghe e ghəəŋ ghəa ghən gho, e kwo ko ghî a nughù nùghù à lô saʼā ghɛ.

⁸Abugho ghùw lɛɛ̄n yo â tōm a wə̄n gho àsùghò ghì ghə̀là ghèe ghe mughu a dzə̀m an ndughu, à fi lo enyəa ù kà tɔ̀ʼ bǒo fughu â Yɛso, vʉ̀a ù bûʼ bo tsəgha ghùw ù wəla ù lo mò ù kà bǒo fughu â Yɛso.

⁹Ghe ki aletɔɔ nyəa tsughu ko zən e wîikpuw zo am mwàʼsò kə yiikpuw mò ù ŋ kɔʼ kpe ghə̀m n tə̀nūu mǒ tǔu; àsùghò abugho à lǒ mò ù fə̀ noo ni koʼ ko num u mɔ̀ʼ[1]:

¹⁰Mo ghe ŋge kwo sugho wə̄n am fwàʼ kə wə̄n kə̀ dzûŋ kò, tò alenìi səā kɔʼɔ̄ wô wɛ a wə̄n, àsùghò aledè mwam ù dzûŋ wò â ghì ghəla ghe bwîin nyə wo alô wə̄n. Mò ù fwàʼà sùghò fwàʼ kə̀ dzûŋ kò a zəŋò ghì a Kəzə̀ ghò; fughuu sùghò èyòsò â ghì ghəla ghe lo an utsù.

¹¹E kwo ko ghù lò nîi kɔʼɔ̄ wàafə̀ghàŋ wəla num kpuw naŋa taʼà tsughu mò ù kaam kpe ghə̀əm tə̀nùu mo tǔu, ghù n tɔ̀m nyə tsughu zən e wə̄n am mwàʼsò kə yiikpuw. Tɔŋlo enyəa abugho lʉgha u kôom gɔ̂e tsughu wɛ̂ɛzən ù te alenìi kpeʼe num, ù n nì nùghù tsùghù fə̀ŋ e wə̄n ebàm a zəŋò Kə̀lestò.

¹²Tɔŋlo enyəa ghe lo alebòʼò naŋa wô ùtsù an tuw kə ghee enyəa so ghe kâ bwìi am fəgha kəla ghe fə̀ boō naŋa sûesʉ.

¹³Alekòom nîi tsughu, ghe n zuee màʼn kâan tsə̀ghà tə̀fom ndùghù tə̀ndughu, kə̀aa kǎaŋ tsəghà ghəa ghəla a buw a lo eghəa.

¹⁴Yia a bugho mugho Pôl, tsʉ̂ zaŋa e lo enyəa, to waafəghàŋ ghəla num a lo mo ghə m kpuwnlo mô kòom nîi kpeʼē ndûw ànum, dzəa ndùw àwɛ; ghe e kwo sugho alekwuū kelê ghì a ghee an ndughu tə ghee, aŋ ŋgòʼ è dzì zəla ghî a kətuw a sɛ̀ yo alekòom kele dzì zəla ghe lo alesāʼ sɛ̀ a te.

¹⁵Ŋ̀ ghəa ghən fɛ dzàa wò bòʼ yiikpuw à li ghə n Zə̀ kə zə̀ghà màʼà, ghe yia a sə lâʼ nughù nduw a bâ Satàn.

¹⁶Wìzən wəla ù lǒ mò ù m boo fughu â Zə̀ kò, vʉ̀a ù ki yiikpuw gho an kèndughu kə wēn, ù kì alelɛnlo â ghee, mò ù nìi nǎaŋ wò dzə̀ yò tsû u te wo a zəŋò dzeŋe kə ghì a Kəzə̀. Dzeŋe kə ghì a Kəzə̀ kə kuuwn dəma nduw a zəŋò yiìkpuw ghəla ghe ki yo ghùw alelɛnlo â ghee.

¹⁷Tsoʼ tə dzeŋe kə ghì a Kəzə̀ təla tə nyɔʼɔ̀ fwaʼā fwàʼ kə ghee ko, ki alekelê namso kə̀ dzûŋ kò àsùghò kɔʼso mò; a ka dɔ̂m taŋ ghəla ghe zughò shwaʼ u Kəzə̀ wò, zoʼn sùghò àghì.

¹⁸Tɔŋlo enyəa Mwàʼsò kə Kəzə̀ kə̀ dzɛ̂ enyəa, “E kwo ghù lò so e dzə̂ən nǎaŋ tsaʼ an dzughu a mbɔ̀ŋ təla tə gwə̂ən sum zo, a bugho tə dzughòo kue gho.” Chia kə dzɛ̂ sugho enyəa, “Ghùw ù kə̀fwàʼ ki nû alekelê namso kə wə̄n.”

¹⁹ Ka è zuuw abugho ghe sɔ̂ʼ ghu ko a zəŋò wìnoo mo ghî à yo a bə̀ghà ŋkāa a təgha ghe lô ale tɔ̀ʼɔ̀ tesô dzɛ̂ ghəa e te zo.

²⁰Abugho ghùw mgbɛɛ̄ ghəə̄ŋ ko bo zo, ghù ŋ ki alekwɛ̀ɛn ndùw wə̄n a sə kə ndə̀m è aghì, to ghî à li ghən kôʼ, ghe tsəŋò kômlò.

²¹M̀ fɛ êzəŋ kûu dzàa wò nù â ghù an sə kə Kəzə̀ ghèe Kə̀lestò Yɛso à tsə̀təndə̄ghā tə Kəzə̀ tò enyəa ghù è bɔm bwiī nduw an tsʉ̀ zəla mùgho mò zoʼn ghû a te, mò ghù tàŋso yo kàʼ mə esʉ mə̀ àghì mò abugho ghù ghəə̄ŋ ghəa zo.

²²Kà è tsoʼn dzə â ghue wo aletsuʼu naŋā kɔʼ ghùw enyəa ù e fwaʼā fwàʼ kə Kəzə̀ kò. Kà è nyəso ghu ko aŋ ghəa à biigh ghəla ghî à li a ghəə̄ŋ kaŋlo. E dəma tsughu ko alezɔlɔ aŋ ghəa ghə̂a à ghəəŋ gho.

²³Kà e mʉa təla ko mùghù mò, e mʉa nduw sugho mbeʼe fə nlʉ̀ fò, bòʼ enyəa nʉghà wʉa àsùghò dzàŋà təla tə fəmso zeē ghû.

²⁴Ghî à li a mgbaŋa ghəəŋ tsughu èbo, a ghî a dzə̀m ghə kòʼkɛ̀lɛ mɛ̀ʼɛ̀ ndùw bo e te zo abugho ghe buʼù saʼā ko ghee. Lò êzə̀ mo bôo tə ghî à li tə lô ghue u ghûu dêe ko nù.

²⁵À lò sugho eghala ghî à li a ghəəŋ dzɔ̂ zò, aghî a dzə̀m ŋ kwo. Dzɔ̂ e ghì à li ghəla ghe buʼu koʼo ko yo èzə̄ŋ, ghəa à dzûŋ a te a kê bùghò sə̌a nù an ndɛ.