Read Aghem 1 Timotì 6 Bible Online

1 Timotì 6 - Aghem bible

1 Timotì 6

¹Ghî ghəla ghe lo kɔ̀ɔ mò ki alefughuu kɔʼso mò â ghe mughùbè a ghee gho, tò ghùw ù lì ka e kəaa boon ghəa zo an zən e Kəzə̀, àsùghò tsʉ̀ e sɛ̀ zò.

²Kɔ̀ɔ məla ghè mughùbè a ghee a lo mo ghe m boo fughu â Kə̀lestò, e kwo ghe lô so e koʼò lʉ̀ghaa ghê mughùbè a ghee gho, bòʼ enyəa ghê mughùbè a te a boo fùghù tsùghù dzə̀ â Zə̀ kò. Ghe laam ki alefwaʼā dzɔɔ̄ â ghê ghee, bòʼ enyəa ghe fwaʼà a tsəlà ghì ghəla ghe boo fughu sugho â Zə̀ kò tǒ ghee, ghe yia ki sugho ləgha zo a zəŋò ghee. E tɔʼɔ̄ zoʼn tsughu ghî ghò aŋ ghəa ghən gho.

³Abugho ghùw zoʼn ghî gho an tsʉ̀ è nughù zò tsə̀ghàa sə̌a ko yo zəla M̀ fughu wo â ghù, mo tsʉ̂ e te e boom dzəəŋ yo ghèe tsʉ̀ e Mughubè ù sɛ̀ Yɛso Kə̀lestò àsùghò zəla e zoʼn ghî ghò alemughu aŋghəa Zə̀ kə̀ ləghaa enyəa sɛ̀ è mughu a te.

⁴Ghùw ù te ŋ ki alekele tsughu enyəa ù tsòo ghaŋso kaāŋ tsə̀ghà sùghò ghue u wə̄n mò ù bùʼù zuuwkɛlɛ yo ghəa è li zo. Tsû u ghûw ù te e lo ko alekəŋo ŋgəaa kaaŋ tsəgha shwaʼ wo, ghəəŋ sughò enyəa ghî ghə̀ e pfʉa kaaŋ dzughu gho, zùghùu ŋgə̂aa kaaŋ tsə̀ghà sùghò, mo ghəa a te a bughò â mʉ̌ʉn ko, təfom, kə̀ghòʼ, moʼnlò è biigh zo, àsùghò ndə̀m kò.

⁵Ghî ghən lo tsəgha ko alo kəzùghù, tɔŋlo enyəa ghe moʼn tə̀la ko èbo, ghe sô kôom kwo dzə̂ yo səŋò zò. Ghe sô moʼnlò enyəa fwàʼ kə Kəzə̀ kə lo alekə̄ŋ ekum a te.

⁶Fwàʼ kə Kəzə̀ kə kûu fùghu nù namso kə̀ ne ko, abugho a kuūwn ki fə̂ŋ tə̀ zʉʉ̄n to an nyàaŋ fə̀là sɛ̀ ki ghe fò.

⁷Tɔŋlo enyəa sɛ̀ ka fə fɛ am mbī nyə wò dzə̀ â fəgha kə̀ lì ko, à lo sugho êzə̀, sɛ̀ lo yo alenì nughù sə â fəgha kə̀ li ko fɛ am mbī.

⁸E fi lo êzəŋ enyəa, abugho sɛ̀ ki dzə̂ fʉghàzəa wo àsùghò ndzʉ to, sɛ̌ fi tso lò kədzûŋ.

⁹Ghî ghəla ghe kuūwn ləghaa alekum, à lò nyàaŋ fə eghəa â ghùw ù te alekele kə̀tsòmlo aleghəŋlo èbo, bvʉ̀a sùghò alo fətə̀ma. Ghe ləghaa aleghəəŋ ghəa à kwu gho, ghəa ghəla a dzûuw maʼn mughù e aghì zò àsùghò e ghee zo.

¹⁰Tɔŋlo enyəa sə à səa gho aŋ ghəa kua nîi wò ndə̀mà tə eboo. Ghî ghəla ghe ŋgee ləgha ghə a ukʉa gho ghə n zə̀ghàa màʼà fəgha kəla ghe boō fughu a te, ghe yia faān kaŋlo tǒ ghùw wəla u tsuʼn kaāŋ tsughu ghuw u wə̄n alo fənyə̄.

¹¹Yia a bughò ghû a Timotì, ghù lǒ ghùw wəlà ghù lo mò ghù m boo fughu â Zə̀ kò. E kwo ko ghù lò boōm naāŋ dzʉ wə̄n wo, e kəŋo ko ghəa e tsəghatsəgha zo, fwàʼà ndùw fwàʼ kə Kəzə̀ kə̀a, naaŋ ndùw fə̀ŋ a zəŋò Zə̀ kò, ki sugho eləgha â ghì ghò; kɔɔn tsughu sugho fə̀ŋ, zumso tsughu sùgho ùghue.

¹²Ghù bǒo fughu â Zə̀ kò, e təma nduw tsàm è dzùŋ zən am bo e te zo alekelê mughù è doʼn təla zəla ghe fə̀ tɔŋɔ̄ ghû a te, an nə̀gha zəla ghù fə̀ boō fughu â Zə̀ kò an sə kə ndə̀m è àghì àsùghò enyəa ghù kè tì zə̀ghà kòʼ yò alefwàʼ â Zə̀ kò.

¹³ M̀ fɛ êzəŋ e dzâa wò nù â ghù an sə kə Kəzə̀ kəla kə fughu mughù zò à fʉgha wə̄n wo ù dzə̀m, àsùghò an sə kə Kə̀lestò Yɛso wəla ù fə̀ ndzə̂əm kə̂aa ghəa gho an sə kə Pontios Paelɛ̀t, to ghùw wəla ù kwo səŋò zò,

¹⁴enyəa ghù e bwiī an lwàŋ wə̄n wo mò ghù nɔ̀ʼɔ yo, ghî ghə̀ e ke yo alesāʼ ghû; nì nùghù ezə̄n ndùw tɛ̀ ndùw an tsû wəla Mughùbè ù sɛ̀, Yɛso Kə̀lestò kè kôom bugho a te.

¹⁵À lo ghəəŋ tsughù Kə̀zə̀ enyəa Yɛso bùghò am nə̀ghà zəla ù ki alebùghò a te, tɔɔŋ Zə̀ kəla kə ghaʼ tsəghà fʉgha wo u dzə̀m, Tsəntəmbî, Də̀ŋ kə dwə̀ŋ, Mughu ù ghê Mughùbè.

¹⁶Zə̀ kəla kə kê kpuūw koʼò yo, mo kə mughu an tsə̂ zəla à nyəghaan tsə̀ghà tàʼà sə ko ghè zò mò fəgha kə̀ li kə yo alendùw tɛ̂ fughu, mò ghùw ù lì kaam bûʼ kòʼ kòʼ ŋkāa ghùw kè bùʼ kòʼ kòʼ yò. À ki wən kɔʼso mò ndzə̀m à daʼa ko. Zə e lo ko êzə̀.

¹⁷Kwɛ̀ɛn tsughu ghî ghəla ghe kuū am fʉgha u mbī wo, enyəa ghe ka e kɔʼso ghue zo a te, tɔŋlo enyəa u lo dòʼn tə̀la yo, ghe ki alechiī tùʼ e ghee e dzə̀m a zəŋò Zə̀ kəla kə fughu sɛ̀ â fʉgha wə̀n ù dzə̀m u ghəŋlo enyəa sɛ̀ è tsoʼnlo.

¹⁸Dzàa tsughu â ghee enyəa ghe e deē dzɔ̂ zò, ŋgee fwàʼà ndùw ghəa à dzûŋ gho â ghì ghò. Ghe e mwaʼā aleyòsò àghì, ki zǐi alefughuu fʉgha wo â ghì ghò.

¹⁹Abugho ghe fwaʼà dzə ezə̀, ghe fi seen naŋa bʉ̀ghànlò u ghee ù dzûŋ wò â sə ko aŋghəa ghe lo alekele mughù èsəŋò zò.

²⁰Timotì, tɔ̀ʼɔ kwo kelē fəgha chìa Zə̀ kə̀ fughu naŋā wo â ghù. Ka è zəən dzə ghəa ghə̀là à buw shwàʼ u Kəzə̀ wò, àsùghò zɔ̀ʼ tə aghəa təla ghî à li a gaām tɔŋlo enyəa à lò utɔ.

²¹Tɔŋlo enyəa ghì ghəla ghe moʼnlò enyəa ghe ki tɔ wən m bvʉ sə am fə̀ŋ zəla ghe mò gaʼ a zəŋò Yɛso Kə̀lestò, làʼ mìaa è nduw. To Zə̀ kə̀ mô dê ghɛ̀ a dzə̀m â dzɔ̀ e wə̄n zo.