Read Aghem 2 Timotì 1 Bible Online

2 Timotì 1 - Aghem bible

2 Timotì 1

¹À lò mughu Pôl, tùm è Kə̀lestò, Ǹ tɔm wo mwàʼsò kən ko. À mò tsəm tsughu Kəzə̀, kə n tsɔʼ kɔʼ mugho enyəa Ǹ doʼò tùm è Kə̀lestò Yɛso. Kə n tùm sə̀ wò mùghò alezùghò naʼà wô to kəla kə fə̀ to naŋā â sɛ̀ enyəa sɛ kê kelê mùghù è doʼn təla zo aŋghəa sɛ̀ lô fəgha ko kə mɔ̀ʼ sɛ̀ â ghê Kə̀lestò Yɛso.

²M̀ mwàʼsò kən kə tɔɔ wò â ghǔ a Timotì, ghù wɛ waŋā ù tsùʼu. Ŋ̀ gɔ̂ŋlò enyəa to Kə̀zə̀, tɔɔŋ Tsele ù te ghèe Mughùbè ù sɛ̀, Kə̀lestò Yɛso mò dê ghù â dzɔ̀ e ghee zo àsùghò se è kwuso zo, ghe fughuu sughò ghù â bughun zo.

³M̀ fughuu kə̀zɔ̀ŋlò â Zə̀ kə̀là M̀ fwaʼā a tsəlà wə̄n am fə̂ŋ è zɔ̀lɔ, tò aŋghəa ghê bə̀ghà fə̀ ghəə̄ŋ tsəgha. M̀ fughuu zɔɔŋ kə wə̄n nəgha tən tə̀ dzə̀m abugho M̀ moʼn tsughu ghû aŋ gɔ̀ɔŋ zaŋa.

⁴Abugho Ǹ tɛ̀ moʼn tughu sə̀ mo èdì mə̀ghà mò, Mùghò m mbuŋlò alekòʼò wo ghù alo esə̄, tò fə̀ŋ zaŋa kôom zʉ̂ʉn tsughu.

⁵ Ǹ tâa mòʼn nù fə̀ŋ zəla ghù kùm gaʼ tsughu a zəŋò Kə̀lestò, tò aŋghəa zughù ù nǒo, tɔɔŋ Lōis ghèe zughùu, tɔɔŋ Yunìs fə̀ gaʼ sugho fə̀ŋ a te a zəŋò Kə̀lestò, yìa Ŋ̀ kwo enyəa ghù gàʼ sùghò fə̀ŋ êzə̀ a zəŋò Kə̀lèstò.

⁶Zən lo e ghee Ǹ dzâa wô â ghù enyəa, ghù è numso zee namso kəla Zə̀ kə mò fughu â ghù an tsuʼ fəla mugho mò gaʼ wô ghu ghaŋa gho a zəŋò ghù, gɔ̀ɔŋ tsùghù an tuw kə̂a.

⁷Tɔŋlo enyəa Zə̀ kə̀ ka mo fughu dzə̌ sɛ̀ â fə̀ŋ zəla è ghəŋlo enyəa sɛ̀ è tsəŋo ghəa gho. Kə mò laam fughu sɛ̀ â fə̀ŋ zəla è ghəŋlo enyəa sɛ̀ è ki daʼa ko, sɛ̀ è ləghaa ghue e sɛ̀ zò, àsùghò enyəa sɛ̀ lo alenaŋsô ghuw kə ebwìi kə sɛ̀.

⁸E kwo ko ghù lò so e də̂nsò kə̀tuw aleteso dzâa nduw ghəa a Mughùbè ù sɛ gho â ghì ghò, e kwo ko ghù lò də̂nsò sugho tuw ko aledzaā nduw enyəa ghù kwò nû mugho wəla N̂ lô fɛ an ndùghùtsāʼ aŋ ghəa e Kə̀lestò Yɛso. Laam təmdzəəŋ wò mugho alefala bòʼ làbəlà è dzùŋ zən aŋghəa Zə̀ kə̀ dzəlà wô ghû â sə̀ŋ zò a te.

⁹Zə̀ kə mò bəghasə̄ sɛ̀, tɔŋɔ wò sɛ̀ enyəa sɛ̀ è mughu mùghù è zɔlɔ zo. Zə̀ kə ka fə enyə ghəəŋ dzə̀ bòʼ ghəa e è dzuŋ è li zo sɛ̀ fwaʼ â wə̄n. À fə̀ enyə lo ko aŋghəa Zə kə̀ ki fôʼ naŋa aleghəŋlo bòʼ dzɔ̀ e wən zəla kə ki â sɛ̀ mo kə tsəghà tsùghù a zəŋò Kə̀lestò Yɛso.

¹⁰Yia a kuūwn bugho êzə̄ŋ, Kə̀lestò Yɛso, Bəghambī ù sɛ̀ m bùghò tsʉ̀ dè ghəa ghən gho à dzə̀m. Ù ŋ ghəŋlo, vʉ zəa e kôom ki yô daʼa ko a zəŋò sɛ̀, vʉ̀a ù zoʼn sɛ̀ â làbəlà e dzùŋ, làbəlà è dzùŋ è te zə̀a è dè fughu wo sɛ̀ â fəgha kəla mughù è doʼn təla e lo ghè kò.

¹¹Zə̀ chia kə shîaa kɔʼ mugho tǒ tum è Kə̀lestò àsùghò tǒ wàdè alezoʼn wo ghî ghò, nàʼn ndùw sùghò làbəlà è dzùŋ è te.

¹²Zən lò e ghee M̀ fanlo enyə a fɛ an ndùghùtsāʼ. Ghəa M̀ buʼù faan ko enyə, Ǹ tsoo də̀nsò yò tuw ko, Ǹ sô kwo ghùw wəla M̀ boō fughu â wə̄n; yia Ŋ̀ kûum kwo sughò enyəa ù lo kwuu kele nù fəgha kəla ù mò fughu â mùghò, alendùw tâa ndûw an tsuʼ fəla ù lo bughoo a te ebàm.

¹³Tiso kɔʼ tuw kə̀a kò aŋ ghəa ghən a dzə̀m mùgho mò zoʼn ghû a te, ghù e zoʼn nduūŋ nduw ghî à li gho a te. Abugho ghù ghəŋlo êzə̀, tee tən tsughu ko am fə̀ŋ zəla sɛ̀ gaʼ tsughu a zəŋò Zə̀ kò aŋghəa sɛ̀ lo alo kəfəgha kə mɔ̀ʼ sɛ̀ à ghê Kə̀lestò Yɛso.

¹⁴To Zuʼ tə̀ Zɔlɔ təla tə lo a zəŋò sɛ̀ mò fughu ghû â daʼa ko aletɔ̀ʼɔ̀ kwuū kelê sə̀ŋò zəla ghe mo fughu naŋa wo â ghù.

¹⁵Ghù kwò nû enyəa aghî a dzə̀m am mbùʼ è Ɛsìaa m mùgho ti zə̀ghà tàʼa, ghuūghùe u Fìdzɛlùs ghèe Hɛ̀modzɛnès yia bûʼ ti zə̀ghà taʼà daŋso sughò mugho.

¹⁶Onifɛlùs mò bugho tsəmso zee mugho aŋghəa mùgho mò lo an ndùghùtsāʼ, ù ŋ kè də̂nsò sughò kə̀tuw alebùghò kôʼ mùghò. Gɔ̂ɔŋ zaŋa e lo enyəa to Zə̀ kə̀ mô kele se è kwuso zo a zəŋò wə̄n àsùghò a zəŋò ghì ghò a dzə̀m alo wə̄n an ndughu.

¹⁷A m bùghò ù daŋso bugho an Lumà, ù n ləghaa alekòʼ mùghò, ù ŋ kəŋ kaaŋ tə̀luʼū tə dzə̀m, bùghò kə̀ŋ kòʼ wò mùghò.

¹⁸To Mughu ù te mô kwuso èse a zəŋò wə̄n an tsuʼ fəla Kə̀lestò kè bughoo a te ebàm. Ghù tɔ̀ʼ kwò nû aŋghəa ù mò yosò mugho a te an Efɛsùs.