Read Aghem 2 Timotì 2 Bible Online

2 Timotì 2 - Aghem bible

2 Timotì 2

¹Yia a bughò ghù wɛ waŋā, Timotì, e tughuu dzɔ̂ɔ bòʼ dzɔ̀ zəla Kə̀lestò Yɛso dè wo â ghù.

²E zoʼn nduūŋ nduw zumso tə aghì tò aŋ ghəa ghəla ghù mo zuw mùgho mò kəaa an sə kə ndə̀mà tə aghì, aŋghəa ghe lô alezoʼn nduūŋ nduw ghî à li gho a te.

³E zuuw sugho fɔnlo e te zo tǒ sùghugòʼ è Kə̀lestò Yɛso è dzùŋ.

⁴Sùghugòʼ è lì yo, ù lò alendùw dzə̂n ghu kə wə̄n aŋ ghəa a aghì ghəla ghe yo dzə̂ sùghugòʼ tò. E wə̄n e lo ko alezuuw lâŋ kə komndzūghū ù wə̄n ko.

⁵Ghùw ù lì yo alenyəŋo zə kəfəgha mò ù kà nyəŋ aŋghəa lwâŋ wə enyəŋ u deē.

⁶À lǒ ghùw wəla ù kùu biso fwaʼā an usum ki alemɔ̀ɔ zuw fəghazəa kə sûesʉ ko an sum u te wo.

⁷E tɔʼɔ̄ moʼn ghəa ghə̀là Ŋ̀ kəaa fɛ â ghù, tɔŋlo enyəa Mughu ù te lo ghəəŋ nù ghù zuwkɛlɛ ghəa ghən gho a dzə̀m.

⁸E moʼn tsughu Yɛso Kə̀lestò wəla ghe fə̀ zôm nughù kɔʼ alo evʉ, mò ù sə̀ an tigh kə Dɛvìd, zən lǒ làbəlà è dzùŋ zəla Ǹ zughò naʼn wo.

⁹M̀ fɛ enyə fanlo bòʼ naʼn kaāŋ làbəlà è dzùŋ zən, ghe ndôʼ kûm nàŋa mugho alo tsāʼ tǒ ghùw ù tsɔ̀ŋɔ ù bǐigh ù lì. Ghe kuuwn yò dzə̂ alekwuū kûu naŋâ shwaʼ u Kəzə̀ a lo tətsāʼ.

¹⁰Zən lò eghee Ŋ̀ kɔlɔ tsughu fə̀ŋ alo aghəa a dzə̀m aleghəŋlo enyəa to ghî ghəla Zə̀ kə̀ lo mo kə n shìaa mò zəā sughô kə̀tuw a m bàm e Kə̀lestò Yɛso, ghe e ki sugho kɔʼso məla n dòʼò tən.

¹¹À lò nû shwaʼ u səŋò wo enyəa, “Abugho e lo enyəa sɛ̀ m kpuw sɛ̀ â ghee, à fi lo enyəa sɛ̀ lo mughùun sùghò nu sɛ̀ à ghee.”

¹²Abugho sɛ̀ kɔlɔ tsughu ko fə̂ŋ tò, sɛ̀ à ghee lô ndàŋ è kə̀də̀ŋ è te zəa sùghò a dzə̀m. Abugho sɛ̀ tue maʼa wə̄n, ù lo tuū maʼà sughò sɛ̀.

¹³Abugho a tâʼkè gaʼ fə̀ŋ è sɛ̀ e dzə̀m a zəŋò wə̄n, Ù è naam lo ko ghùw wəlà ù lǒ ghè wò, tɔŋlo enyəa ù yò dzə aletuū maʼà ghue u wə̄n.

¹⁴E zəə̄ŋ zee nduw ghî ghò aŋ ghəa ghən gho, kwɛ̀ɛn ndùw ghee an zən e Kəzə̀ enyəa ghe ka e dzughu ghə e pfʉa an shwaʼ ù laʼso wo. Shwaʼ wən mo u bûʼ kì yo yôsò è li zo, mo u lo ko aleboon ghùw wəla ù zhənlo.

¹⁵E dəmā təla tsughu enyəa ghù è lo ghùw ù kə̀fwàʼ wəla Zə̀ kə̀ tsoʼn ghèe wə̄n, ghùw ù kə̀fwàʼ wəla ù də̀nsò yô tuw ko, wəla ù tèlè kwu kele shwaʼ u Kəzə̀ wə̀ êsəŋò wo aŋ ghu kə̀ dzûŋ kò.

¹⁶Kà è boom naaŋ shwaʼ ù laʼso wo, tɔŋlo enyəa shwaʼ ù laʼso u te gbôo sɛ̀ɛ sə̌a wò aghì aŋ ghəa e Kəzə̀, fəghaan sèe məŋso nyəa ndùw àghì aŋ ghê.

¹⁷Shwaʼ ù laʼso u ghee u te u pfʉa ghùw tò tətsughò. Ghî a lo a bə̀ghà ghe kəaa ŋgòʼ è shwà ù biigh wə̄n, à lǒ Hɛ̀mɛnus ghèe Fìletùs.

¹⁸Ghən lò aghî mo ghe n tì zə̀ghà səŋò zò, dzàa wò enyəa ghî a mafə kpuuw kɔʼsə alo evʉ̄. Làʼsò kə shwaʼ kə ghee kə te kə fwəlà màʼn ghî à li ghəla ghe boō fughu sugho â Kə̀lestò.

¹⁹ Bəghàan kəla à kuūwn kuʼ kɔʼ Zə̀ kò, fəgha kə̀ li kə yo alenòʼsò, ghe yia tɔm naŋā a te enyəa, “Zə̀ kə̀ kwo nû ghî ghə̀là ghe lo a wə̄n gho.” Àsùghò enyəa, “Abugho à lò ko ndughoo ù kwo dzə̂ enyəa e lo wɛ ù Mughu ù te, ù ki aletiī zəghàa maʼà ghəa à biigh gho.”

²⁰Â an ndùghù è ghùw ù ne ka yò ko fʉgha wəla ghe fəghanlo alo etsɛ ŋkāa am fəgha kə̀ nyəghaan ko, wəla ghe fəghanlo alo fəkâʼ àsùghò alo etsaʼ lo sugho nû. Ù li u lo a n kùu èghəa; ù li vʉ u tsô lo sugho enyəa ghe e fwaʼa kaŋlo a te an nə̀gha tən tə̀ dzə̀m.

²¹Abugho ghùw nì nùghù sə kɔʼ ghu kə wə̄n ko aŋ ghə̀a biigh gho, ù n dòʼò tsùghù fəgha kə kùu ù èghəa, tɔŋlo enyəa ù zɔ̀lɔ nù, ù n tumso Mughùbè ù wə̄n, ù n lò sugho tsəghatsəgha alefwàʼ fwàʼ kə Kəzə̀ kə̀ dzûŋ kò.

²²Zə̀gha màʼà ghəa à biigh ghəla ghâŋ fə̀ ləghaa aleghəŋlo. E dəma ko enyəa fə̀ŋ zə̀ghà e lo a zəŋò Kə̀lestò, ləgaa àghì, mùghù alo ebughunlo, lò sugho tsəghatsəgha. E fwàʼà ndùw êzə̀ ghɛ̀ à ghê ghî ghəla ghe kûu dîi dzâa nduw ghəa a ghee gho â Mughu ù te am fə̀ŋ è zɔ̀lɔ.

²³Kà boo naŋā shwàʼ ù laʼso wo, kà è təmadzəəŋ sugho ghɛ̀ à ghê ghì ghəla ghe pfʉā kaāŋ dzughu gho an làʼsò tə aghəa, tɔŋlo enyəa ghəa a te a ghəəŋ nù ghî ghən zùghùu zěe.

²⁴Ghùw ù kəfwàʼ u Mughu ù te ki yo aledòʼò ghùw wəla ù kəŋo shwaʼ wo; ù lǎam ki alelo ghùw wəla ki mwam ù dzûŋ wò a zəŋò ghì ghò a dzə̀m, lò sugho wàdè ù dzùŋ wəla ù kaā tsughu zə zo.

²⁵Ù kì alemaʼn tsughuu ghue wo alezoʼn ghì ghəla ghe kee təghasò shwaʼ wə̄n wo, kwo tən am fə̂ŋ e wə̄n enyəa Zə̀ kə̀ lo nû aleghəŋlo ghe tiī maʼà ghəa a ghee à biigh gho, ghe bugho zuūwkɛlɛ kɔʼ êsəŋò.

²⁶An dziī zən, tɔ u ghee u lo nû alekwəla nyəa wô, to ghe tiī nughù səa wô am fàŋa kə Satàn kə̀ biigh kəla ù kɔlɔ naŋa ghee a te enyəa ghe e bwiī wo an dzə̂ è wə̄n.