Read Aghem 2 Timotì 4 Bible Online

2 Timotì 4 - Aghem bible

2 Timotì 4

¹Ǹ dzàa wò â ghù a n sə kə Kəzə̀ ghèe Kə̀lestò Yɛso wəla ù kè saʼā ghî ghəla ghe kê naām lô â sə à tughu gho, àsùghò ghəla ghe lo mo ghe n kpuwnlo, abugho ù kè bughoo alebùghò saʼ mbī a te tò kədə̀ŋ enyəa:

²E dəma ko alezughò shwaʼ u Kəzə̀ u te wo nəgha tən tə̀ dzə̀m, kà ghî à ləghaa ŋkāa ghe ləghaa yo. E naŋso ndùw ghî ghò, kwɛ̀ɛn ndùw ghee, dzə̀là ndùw sùghò ghee â sə̀ŋ zò. E ndòʼò màʼn tsughuu sugho ghue wo aletsʉ̀ ghee an shwaʼ u Kəzə̀.

³Tɔŋlo enyəa, nəgha e lo kpee nù, ghî ghə̀ e ke tuu maʼn wo tsʉ̂ è səŋò zò. Ghe e ke kuuwn ləghaa ko alenùghù ndûw a n dzìi tə ghee, ghe e tɔɔŋ zuūŋ wo wàdè təla ghe ləghaa enyəa tə e fughu ghee â tsʉ̀ zəla ghe ləghaa alezūw.

⁴Ghe lo e tuu alezənlo êsəŋò, ghe e ləghaa ko alezəə̄n kaaŋ zuum tə n zə̀azə̀a tò.

⁵Yia a bughô ghû a Timotì, tiso kɔʼ tuw ko edzūŋ, boo tsughu fala zo, ghù e də̀mà tə̀la tsughuu alenàʼà làbəlà è dzùŋ zən â ghì ghò; fwàʼà tə̀la tsughu sùghò fwàʼ kə̀a kə dzə̀m tò kɔ̂ɔ fə Kəzə̀.

⁶Yia a bughò mugho, fʉgha waŋa wə n tsə̀ghà; â mùghò alezə̀ghàa mbī zən, nəghaā zə n kpe â ghe alenìi sâa fughu mugho à Zə̀ kò tò kə fughu.

⁷Mùghò ŋ ŋgè ndə̀m am fwàʼ kaŋa, yìa M̀ mîaso, yìa Ǹ nyoʼn kwu kele sə kɔ̀ʼ wô sugho boo zaŋā zo.

⁸Namso kə ləəm mùghò êzə̄ŋ alo kəwālā am fwàʼ kə̀ dzûŋ kə̀là Ǹ lo mò mùghò fwâʼ ghè kò; Namso kən kà yò ko â mùghò, kə lo â ghì ghən à dzə̀m ghe ki ləgha zo alekòʼ tsuʼ fəla Kə̀lestò kè bughōo a te ebàm. À namso kə te kə naŋa Mughu ù te wəla ù saʼā ghî ghò a dzə̀m am fôʼ è tsəghatsəgha.

⁹Də̀mà tsughu alembaā bughò tɛ̌ fɛ a vʉ̀a mùghò.

¹⁰Dɛ̀mâs ŋ kele sə à səa gho a m fʉgha u mbī wo, vʉ̀a ù zə̀ghà maʼà tsughu mugho, nùghù nduw an naʼ e Tɛ̀sàlonikà. Kə̀lesɛ̀ns maā nughù ndùw an Gàlashìa, Taetùs n nùghù ndùw an Dàmatìa

¹¹À fɛ̀ èzə̄ŋ lo ko Lûk ù dòʼòdoʼo tsughu ghàʼ à wə̄n[2]: Abugho ghù so e bughòo nù, nîi kɔʼ Mâk, ghù abugho ghɛ̀ à wə̄n, tɔŋlo enyəa ù lo yòsò nù mugho am fwàʼ kən.

¹²M̀ maā Tàekikùs tum ndùw an naʼ zə Efɛsùs.

¹³Abugho ghù bùghoo, nîi wò ndzʉ taŋā tìa mùghò mò naŋā taʼā an ndughu alô Kapùs an naʼ e Təlôas. Ghù ni wo sugho mwàʼsò waŋa vʉa ghe nyemē kɔʼ, a ka dɔ̂m taŋ vʉa ghe ta tsughu an gûw è nyòm.

¹⁴Àlɛ̀ʼzandà wəla ù tsəā nâm kò mò biso ghəəŋ mugho â bo zo: Mughu ù te lo tsəa nû wə̄n aŋ ghəa a wə̄n ghəla ù lǒ mò ù ŋ ghəŋlo.

¹⁵Nì ghôm zò a ghɛ̀ à wə̄n, nu ù fə̀ ŋgəmso tuu maʼn wo tsʉ̂ è sɛ̀[3].

¹⁶An nə̀gha e sûesʉ zəla ghe fə̀ nî nduw mugho an tia e sāʼ, ghùw ù lì ka fə bughò dzə̀ alebùghò yosò mùghò. Aghî à dzə̀m m fwə̀n tì zə̀ghàa tàʼà tsùghù mugho. Gɔ̂ŋ zaŋa e lo enyəa, to Zə̀ kə̀ mô ghuūw maʼà ghəa a ghee à biigh a te gho.

¹⁷À ŋ kuuwn lò ko enyəa, Mughu ù te fə̀ lo ghàʼ à wə̄n. Ù n dzə̀n tsughu mugho â sə̀ŋ zò enyəa to M̀ mô lò alenaʼn mɛʼn nduw làbəlà è dzùŋ è te, enyəa to tûu təla tə fə̀ lo a fughu; mò à yò dzə̂ Tə̀dzûu è lo alezūw. Zə̀ kə̀ fi baaŋ sə tsughu nû mugho an dzughu e kəbəgha.

¹⁸Mughu ù te lo bəghaasəa nù mugho aŋ ghu kə ghəa à biigh ghəla a ləghaa alenomso mùghò. Ù lo nyoʼn nîi nyəā ndûw mùghò am fɔ̀e u kəwālā u wə̄n. Gɔ̂ŋ zaŋa e lo enyəa, to ghî à mô tə̀ma ŋkəma, fughuu sùghò ŋkɔʼso â Zə̀ kò to mbī kê bughò mîaa. Zə e lo ko êzə̀.

¹⁹Tɔɔŋ zuw tsughu Pə̀lesilìa[4] ghèe Akwilà, àsùghò ghì ghò a dzə̀m an ndughu alô Ònìsìfolùs.

²⁰Elatùs maā doʼòdòʼò an naʼ e Kolèent. Yia a bughò Tə̀lofimùs, mùghò mǒ wə̄n naŋa taʼā an naʼ e Mìletùs, ù màʼa lo mò ù dzaŋà nù.

²¹Də̀ma tən tsughu alebùghò tɛ̂ a vʉ̀a mùghò mo ghuuw e kaām tsughu kwə̄n. Yubulùs ghèe ghê Pudɛ̀ns, Linùs, Kòlodìa àsùghò waazə̂ à sɛ̀ à li ghəla ghàʼ à ghee lô fɛ a dzə̀m dzɛ̀ enyəa Ǹ tɔɔŋ zuūw wô ghɛ̀.

²²Gɔ̂ɔŋ zaŋa e lo enyəa, to Mughu ù te mô lǒ ghɛ̀ à wə̄n. Yìa Ŋ̀ gɔ̂ɔŋ sugho enyəa to Zə̀ kə̀ mô dê ghɛ̀ a dzə̀m â dzɔ̀ e wə̄n zo.